My Blog

Category: ग्रामीण वार्ता

ग्रामीण वार्ता (Gramin Varta) विभागात वाचा news34.in वर चंद्रपूर जिल्ह्यातील ग्रामीण भागातील बातम्या आणि घडामोडी. शेतकरी योजना, ग्रामपंचायत राजकारण, स्थानिक विकास प्रकल्प, कृषी आणि ग्रामीण जीवनाशी संबंधित सर्व महत्त्वाचे अपडेट्स येथे उपलब्ध आहेत. चंद्रपूर ग्रामीण भागातील समस्या, यशोगाथा आणि सकारात्मक बदलांना आम्ही प्राधान्य देतो. ग्रामीण भागातील विश्वासार्ह माहितीसाठी नियमित भेट द्या.

  • चंद्रपूर जिल्ह्यात भीषण अपघात

    News34 गुरू गुरनुले

    मूल : चंद्रपूर येथून छत्तीसगड राज्यातील बोहरमभेडी गावांत पार्थीव घेवून जाणा-या स्काॅर्पीओचा अपघात झाल्याने एकाचा घटनास्थळीच मृत्यु झाला तर एक जण गंभीर जखमी झाल्याची घटना तालुक्यातील जानाळा लगतच्या नर्सरी जवळ घडली. अपघातग्रस्त स्काॅर्पीओ मध्यें चालकासह एकुण सहा जण प्रवास करीत होते.

    चंद्रपूर लगतच्या पडोली लखमापूर परीसरातील कोल डेपो मध्यें काम करणारे केशवराम यादव (60) यांचे काल रात्री निधन झाले. छत्तीसगड मधील मानकापूर जिल्हयातील बोहरमभेडी येथील मूळ रहिवासी असल्याने मृतक केशवराम यादव याचे पार्थीव अंत्यसंस्कारा करीता त्याचे मूळ गांवी घेवून जाण्यासाठी त्याचे नातेवाईक छगनलाल साहु व इतर दोघेजण स्काॅर्पीओ (एचएच-34-बीएफ 0050) ने सकाळी 9.15 वाजताच्या दरम्यान लखमापूर येथून छत्तीसगड कडे रवाना झाले.

    दरम्यान सकाळी 9.50 वा. चे दरम्यान मूल पासून चंद्रपूर मार्गावरील 7 कि.मी.अंतरावर असलेल्या जानाळा लगतच्या नर्सरी जवळ स्काॅर्पीओ चालक अश्वजीत रूपचंद सहारे (26) रा. दुर्गापूर याचे वाहनावरील नियंत्रण सुटल्याने मार्गावरील पुलाच्या कठडयाला स्काॅर्पीओने धडक दिली.

     

    अपघातग्रस्त वाहन भरधाव वेगात असल्याने वाहनाच्या धडकेने पुलाचा कठडा तुटून मार्गाच्या कडेला असलेल्या झाडाला जबर धडक दिली. यामध्यें गोंदिया जिल्हयातील अर्जूनी मोरगांव तालुक्यातील बुटाई येथील रहीवासी असलेले सचिन मोहन साखरे (32) याचा घटनास्थळीच मृत्यु झाला. मृतक सचिन साखरे हा स्काॅर्पीओ चालक अश्वजीत सहारे याचा नातेवाईक असून पार्थीव पोहोचवून परत येतांना सोबतीला एक जण असावा म्हणून स्काॅर्पीओ चालकाने त्याला सोबत घेतले होते. अपघाता मध्यें छगनलाल साहु (60) यांना गंभीर दुखापत झाल्याने त्याला जिल्हा सामान्य रूग्णालय येथे हलविण्यात आले. इतर दोघांना किरकोळ जखमी झाले असून ते सुखरूप आहेत. घटनेची माहिती होताच मूल पोलीसांनी घटनास्थळी धाव घेतली.

    अपघातातील जखमी आणि मृतकाला हलविण्यात रूग्णवाहीकेला बोलाविण्यात आले परंतू रूग्णवाहीकेला घटनास्थळी पोहोचण्यास उशीर झाल्याने शेवटी पोलीस वाहनामध्यें जखमी आणि मृतकांना मूल येथील उपजिल्हा रूग्णालयात हलविण्यात आले. घटनेचा पुढील तपास ठाणेदार सुमीत परतेकी यांचे मार्गदर्शनात स्थानिक पोलीस कर्मचारी करीत आहेत.

  • चंद्रपुर जिल्ह्यात शासनाच्या गव्हाची खुल्या बाजारात विक्री

    News34

    चंद्रपूर/कोरपना – चंद्रपूर जिल्ह्यातील वरोरा येथून शासनाच्या तांदळाची दुसऱ्या राज्यात विक्री करणार मोठं नेटवर्क पोलिसांनी हाणून पाडल्यानंतर ही रेशन दुकानदार दुकानातील शासनाच्या तांदळाची खुल्या बाजारात विक्री करीत आहे, असाच एक प्रकार कोरपना तालुक्यातील धामणगाव येथे नागरिकांनी उघडकीस आणला.

    स्वस्त धान्य विक्रेता नामे राजेश दतात्रय ढग्गे यांनी मागील जानेवारी महिन्यापासून गावातील नागरिकांची दिशाभूल करीत लोकांना 9 महिन्यापासून गहू दिले नव्हते. गावातील नागरिक दर महिन्याला गहुची मागणी करीत असता राजेश दतात्रय ढग्गे कडून शासनाकडून गहू आले नाही असे उत्तर मिळत होते. व नागरिक त्यांचा भूलथापांना बळी पडले व याचा फायदा घेऊन राजेश दतात्रय ढग्गेनीं दर महिन्याला येणारे सरकारी गहू विकण्यास सुरू केले.

    असाच प्रकार खूप महिन्यापासून सुरू होता पण 27 ऑगस्ट रविवार ला दुपारी 1.00 वाजता गहू विकण्याचा प्रकार सुरू होता, स्वस्त धान्य दुकान बेकायदेशीर विक्री करीत गहुचे कट्टे वाहन क्रमांक MH 34 AB 3064 या चारचाकी वाहनमध्ये गहू भरतांना गावातील नागरिकांच्या लक्षात आले.

    ही बाब लक्षात येताच गावातील नागरिकांनीं पोलिसांकडे तक्रार केली. स्वस्त धान्य दुकानदार मागील 9 महिन्यापासून नागरिकांचे हक्काचे गहू विकत आहे. गहू मिळत नसल्याने अनेक जण खाजगी दुकानातून गहू जास्त किमतीत विकत घेऊन आपल्या कुटुंबाचा उदरनिर्वाह करीत आहे. गावामध्ये अनेक नागरिक हे मजूर वर्ग आहेत.

    दिवसभर मजुरी करून पैसे कमावतात त्यात शासनाकडून मिळणाऱ्या योजना हे असले चोरटे स्वस्त धान्य दुकानदार शासनाला व नागरिकांना भूलथापा देऊन स्वतःचे खिसे भरत असतात. अश्या दुकानदारांना कठोर शिक्षा व स्वस्त धान्य दुकान परवाना निलंबित करण्यात यावा अशी मागणी गावकरी करीत आहेत.

  • रस्त्यासाठी करणार भीक मांगो आंदोलन – अभिजित कुडे

    News34

    वरोरा / भद्रावती – तालुक्यातील संपूर्ण रस्त्याची अत्यंत दयनीय अवस्था झाली आहे अनेक आंदोलन करून देखील प्रशासकीय अधिकारी झोपेत आहे, अनेक निवेदन दिले.  त्या नंतर काही रस्ते मंजूर झाले तरी देखील अजून कामाला सुरुवात झाली नाही.  बांधकाम विभागाला निधी उपलब्ध नसेल तर आम्ही भीक मांगो आंदोलन करून ते पैसे मुख्यमंत्री महाराष्ट्र राज्य यांना पाठवू असे निवेदन तहसीलदार साहेब वरोरा मार्फत पाठविण्यात आले.

     

    खराब रस्त्यामुळे अनेक गावातील बससेवा बंद झाली आहे.  विद्यार्थ्यांंना त्रास सहन करावा लागतो आहे.   खासगी वाहनांची जीव धोक्यात घालून प्रवास करावा लागतो आहे यामुळे विद्यार्थ्यांंना आर्थिक भुर्दंड सहन करावा लागत आहे.

     

    रस्त्यात खड्डे की खड्डय़ात रस्ते हा प्रश्न पडला आहे.  लोकाना जीव मुठीत धरून प्रवास करावा लागतो आहे.  लाजिरवाणी बाब आहे की रस्त्याच्या खराब अवस्थेमुळे बस बंद होतात.  या गेंड्याच्या कातडीच्या प्रशासकांना जाग आली नाही.  यासाठी विधानसभा प्रमुख रविन्द्र शिंदे तसेच उपजिल्हा प्रमुख भास्कर ताजणे व तालुका प्रमुख दत्ता भाऊ बोरेकर यांच्या मार्गदर्शनाखाली शिवसेना (उद्धव बाळासाहेब ठाकरे) युवासेनाच्या शिष्टमंडळाने निवेदन सादर केले.

     

    नागरी, माढेळी, उखर्डा,  वाघनख, महाडोळी, शेगाव, चीकणी, बामर्डा,  आजनगाव, बोपापुर, वडगाव, केळी, हीवरा, उमरी, बोरगाव, बोर्डा, चारगाव,  पवणी व सर्व रस्त्याची अत्यंत दयनीय अवस्था आहे.  या रस्त्याची तात्काळ दुरुस्ती करावी अन्यथा भीक मांगो आंदोलन करून ते पैसे मुख्यमंत्री महाराष्ट्र राज्य यांना पाठवू असा इशारा अभिजित कुडे यांनी दिला. यावेळी प्रतिभा मांडवकर सरपंच तथा युवती जिल्हा अधिकारी, निखिल मांडवकर, रोशन भोयर, आदित्य जूनघरे आदी उपस्थित होते.

  • वरोरा येथील श्रद्धेय अटलबिहारी वाजपेयी ई- अभ्यासिकेचे लोकार्पण

    News34

     

    चंद्रपूर : शिक्षण हे केवळ पुस्तकी नव्हे तर संस्कारी असावे. आपण समाजाचे कोणीतरी लागतो, या भावनेतून संस्कारी शिक्षण घेऊन ऋण फेडणारा विद्यार्थी या अभ्यासिकेतून घडावा, अशी अपेक्षा राज्याचे वने, सांस्कृतिक कार्य व मत्स्य व्यवसाय मंत्री तथा जिल्ह्याचे पालकमंत्री सुधीर मुनगंटीवार यांनी व्यक्त केली.

    वरोरा येथील श्रद्धेय अटल बिहारी वाजपेयी अभ्यासिकेचे लोकार्पण करताना ते बोलत होते. यावेळी मंचावर माजी भाजपा जिल्हाध्यक्ष देवराव भोंगळे,भाजपा तालुका अध्यक्ष डॉ भगवान गायकवाड,माजी नगराध्यक्ष एहतेशाम अली,श्रीमती जोगी,वरोरा विधानसभा प्रभारी रमेश राजुरकर,नगरपालिकेचे मुख्याधिकारी गजानन भोयर,अभिजित मोटघरे,सूरज पूनवटकर, बाबासाहेब भागडे,आकाश वानखेडे,अमित गुंडावार,ओम मांडवकर, अमित चवले,सुरेश महाजन,सागर वझे,आकाश भागडे आदी उपस्थित होते.

    श्रद्धेय अटल बिहारी वाजपेयी ई- अभ्यासिकेचे लोकार्पण झाले असे सुरुवातीला घोषित करून पालकमंत्री श्री मुनगंटीवार म्हणाले, नगरपालिकेने अतिशय चांगले नियोजन करून ही अभ्यासिका उभी केली आहे. रस्ता, पूल या भौतिक सुविधेच्या गोष्टी थोड्या उशिरा तयार झाल्या तरी जास्त फरक पडत नाही, मात्र देशाचे भविष्य घडविणारे विद्यार्थी जेथे तयार होतात, अशा शैक्षणिक सुविधा त्वरित उभ्या करणे आवश्यक आहे. इतर देशात आर्थिक संपन्नता, भौतिक संसाधने आदी गोष्टी मुबलक प्रमाणात असल्या, तरी तेथील जीवन हे सुखी- संपन्नच राहील, याची शाश्वती नाही. मात्र आपला देश, आपला समाज हा कुटुंबवत्सल आहे. हेच संस्कार आपल्याला सुरुवातीपासून मिळाले आहेत. त्यामुळे आजच्या विद्यार्थ्यांना अशा संस्कारी शिक्षणाची गरज आहे. शेवटी देशाच्या गुणसंपन्नतेवरच आनंदाचा इंडेक्स ठरत असतो.

    पुढे पालकमंत्री म्हणाले, चंद्रपूर हा वाघांचा जिल्हा आहे. त्यामुळे येथील विद्यार्थ्यांनी शिक्षणात वाघासारखाच पराक्रम करावा. राज्याचा मंत्री व या जिल्ह्याचा पालकमंत्री म्हणून चंद्रपूर, बल्लारशा, पोंभुर्णा येथे डॉ. श्यामाप्रसाद मुखर्जी वाचनालय सुरू करण्यात आले आहे. आपण निर्माण केलेल्या वास्तूमधून प्रशासकीय अधिकारी घडतात, याचा आपल्याला मनापासून आनंद आहे. विद्यार्थ्यांनो, खूप मोठे होऊन या शहराचे तसेच या जिल्ह्याचे नाव रोशन करा, असा सल्लाही त्यांनी विद्यार्थ्यांना दिला.

    शैक्षणिक सोयी सुविधांना प्राधान्य : आपल्या मंत्रिपदाच्या कार्यकाळात जिल्ह्यात एकूण 205 विकास कामे करण्यात आली आहे. जिल्ह्यात शैक्षणिक सोयीसुविधांना विशेष प्राधान्य असून बाबा आमटे अत्याधुनिक अभ्यासिका तयार करण्यात आली आहे.

    बल्लारपूर तयार करण्यात आलेल्या सैनिक शाळेतून भविष्यात देशासाठी लष्करी अधिकारी तयार होतील. बल्लारशा येथे सुषमा स्वराज कौशल्य विकास केंद्र, चंद्रपूर – बल्लारपूर मार्गावर 50 एकर मध्ये 560 कोटी रुपये खर्च करून एस. एन. डी. टी. विद्यापीठाचे उपकेंद्र, चंद्रपुरात गोंडवाना विद्यापीठाचे उपकेंद्र, कृषी महाविद्यालय, चंद्रपूर येथे नवीन शासकीय वैद्यकीय महाविद्यालय अशा नवनवीन गोष्टी पूर्णत्वास येत आहे. एवढेच नाही तर जिल्हा परिषदेच्या सर्व शाळांमध्ये गुणवत्ता वाढीसाठी विशेष लक्ष देण्याच्या सूचना करण्यात आल्या आहेत. आज येथे घेतलेलं प्रण शपथ हा केवळ कार्यक्रम नाही, तर आपल्या हातून उत्तोमत्तम कार्य घडावे, त्यासाठी हा संकल्प करण्यात आला आहे, असे पालकमंत्री सुधीर मुनगंटीवार यांनी सांगितले.

    यावेळी वरोरा येथील शहीद योगेश डाहूले यांची वीरमाता पार्वताबाई आणि वीरपिता वसंतराव डाहूले यांचा ना.सुधीर मुनगंटीवार यांच्या हस्ते शाल व श्रीफळ देऊन सन्मान करण्यात आला. तत्पूर्वी अभ्यासिकेच्या परिसरात ना.मुनगंटीवार यांनी वृक्षारोपण करून श्रद्धेय अटलबिहारी वाजपेयी यांच्या प्रतिमेला अभिवादन केले.

    प्रास्ताविकात मुख्याधिकारी गजानन भोयर म्हणाले, या ई – अभ्यासिकेसाठी पालकमंत्री यांनी खनिज विकास निधी अंतर्गत 3 कोटी 66 लक्ष रुपये मंजूर केले. या अभ्यासिकेमध्ये 30 संगणक, पेंटिंग कक्ष, प्रतिक्षालय, ग्रंथालय स्टोअर रूम आदी उपलब्ध करून देण्यात आले आहे. कार्यक्रमाचे संचालन प्रा. नरेश खुळे यांनी केले. यावेळी नगरपालिकेचे माजी नगराध्यक्ष माजी नगरसेवक विविध संघटनांचे पदाधिकारी नागरिक आणि विद्यार्थी उपस्थित होते.

  • 7 वर्षीय आकांक्षाला मिळाला भद्रावती भूषण पुरस्कार

    News34

    भद्रावती –  स्वातंत्र्य दिन १५ ऑगस्ट समारंभ व भद्रावती नगर परिषदेच्या रौप्य महोत्सवी वर्षानिमित्त “भद्रावती भूषण पुरस्कार” व “भव्य सांस्कृतिक कार्यक्रम” असे संयुक्त आयोजन भद्रावती येथील मुरलीधर पाटील गुंडावार सभागृहात करण्यात आले होते.

    या कार्यक्रमाला भद्रावती-वरोरा विधानसभा मतदारसंघाच्या आमदार श्रीमती प्रतिभाताई धानोरकर ,नगराध्यक्ष अनिल धानोरकर,न.प. उपाध्यक्ष संतोष आमणे ,मुख्याधिकारी विशाखा शेळके, उपमुख्य अधिकारी गायकवाड नगरपरिषदेचे सर्व समित्यांचे सभापती यांचेसह बहुसंख्य नगरसेवकांची मंचावर उपस्थिती होती.

    योग क्षेत्रातील विषेश पुरस्कार डॉक्टर ज्योती देवराव देऊरकर यांना व योग क्षेत्रातीलच दुसरा विशेष पुरस्कार कुमारी आकांक्षा आकाश कटलावार या सात वर्षीय मुलीला देवून तिला गौरविण्यात आले. शाल,श्रीफळ व स्मृतिचिन्ह व पुष्पगुच्छ असे या पुरस्काराचे स्वरूप होते. डॉ.ज्योती देऊरकर या कु.आकांक्षाच्या योग कलेच्या गुरु आहेत. या डॉ.ज्योती व की.आकांक्षा या दोन्ही गुरु शिष्यांनी आंतरराष्ट्रीय स्पर्धेत सुवर्णपदक प्राप्त केलेले आहे.

    आकांक्षाचे वडील दिल्ली येथे सैनिक दलात असुन देश सेवेसाठी कार्यरत आहेत. आकांक्षा वयाच्या अवघ्या तिसऱ्या वर्षापासूनच योग शिक्षिका डॉ. देऊरकर यांच्याकडून योगा संबंधीचे धडे घेत आहे. तिच्या घेतलेल्या परिश्रमामुळेच वयाच्या सातव्या वर्षी आकांक्षा ला “भद्रावती भुषन पुरस्कार” देवुन तिला गौरविण्यात आले आहे.

    पुरस्कार स्वीकारताना आकांक्षा सोबत तिच्या गुरु, आजी,आजोबा,आई सौ.किशोरी कटलावार,मोठी आई व इतर नातेवाईक आप्तेष्टांची उपस्थिती होती.यावेळी कार्यक्रमांत उपस्थित भद्रावती नगर वासियांनी आकांक्षाला प्रत्यक्ष भेटून अभिनंदनाचा वर्षाव केला.

  • बल्लारपूर विधानसभा क्षेत्रातील राष्ट्रवादी पदाधिकारी पर्यटनाला रवाना

    News34

    चंद्रपूर – चंद्रपूर जिल्ह्यात मूल तालुक्यात आगामी काळात होणाऱ्या स्थानिक स्वराज्य संस्थांच्या निवडणूका नजरेसमोर ठेवून व सदर निवडणुकांची रणधुमाळी सुरु होण्यापूर्वी देव -देवतांचे आशीर्वाद घेण्याकरिता माहूर देवी, शेगाव चे गजानन महाराज, शिर्डीचे साईबाबा , शनी शिंगणापूर इत्यादी पवित्र स्थानाचे दर्शन घेण्याकरीता मूल येथून मूल तालुक्यातून राष्ट्रवादी काँग्रेसचे प्रमुख पदाधिकारी तिर्थटनाला निघाले.

    Online shopping चा आनंद घ्या Amazon वर

    येणाऱ्या निवडणुकीत घव -घवीत यश संपादन करीता देव-देवतांचे आशीर्वाद मिळवून येणाऱ्या निवडणुकीत अतिशय स्फूर्तीने विरोधकांना लढा देण्याकरिता राष्ट्रवादी काँग्रेस च्या पदाधिकाऱ्यात जोश व ऊर्जा निर्माण व्हावी ह्या उद्देशाने आज दिनांक २५-०८-०२३ रोजी शुक्रवारला रात्री 9 .00 वाजता मूल तालुक्यातील बहुसंख्य पदाधिकारी महाराष्ट्र महादर्शन यात्रे करिता रवाना झाले.

    महाराष्ट्र दर्शन यात्रे चा लाभ मिळण्याकरिता राष्ट्रवादी काँग्रेस चे बल्लारपूर विधानसभा अध्यक्ष सुमीत समर्थ ह्यांनी स्वतः या सर्व पर्यटकांची संपूर्ण स्वखर्चाची जवाबदारी घेऊन प्रमुख पदाधिकाऱ्यांना देवदर्शन व पश्चिम महाराष्ट्रतील कृषीउद्योग, राहुरी विद्यापीठ व विविध पर्यटन स्थळे बघण्याचा व आनंदाचा लाभ मिळवून देण्याचा विशेष प्रयत्न केलेला आहे.
    ह्या पर्यटकांमध्ये ग्रामीण भागातून गाव प्रमुख ,शहरातून वार्ड प्रमुख अश्या प्रमुख पदाधिकाऱ्यांचा यामध्ये समावेश आहे.

  • प्राथमिक स्वास्थ केंद्रात डॉक्टर व कर्मचाऱ्यांच्या कमतरतेमुळे रुग्णांचे हाल

    News34

    गुरू गुरनुले

     

    मुल – मुल तालुक्यातील सर्वात मोठे गाव व मोठी आणि राजकीय दृष्ट्या संवेदनशील असलेल्या बेंबाळ येथे आयुष्मान भारत अंतर्गत आरोग्य वर्धीनी प्राथमिक आरोग्य केंद्राची नवीन प्रशस्त ईमारत बांधण्यात आली.

    याचा लाभ बेंबाळ या ग्रामीण परिसरात असलेल्या अनेक खेडी गावातील रुग्णांना होईल हाच हेतू ठेऊन ईमारत बांधकाम करण्यात आले. परंतु अत्यावश्यक डॉक्टर,नर्स,कर्मचारी नसल्याने आरोग्य केंद्रात आलेल्या रुग्णांवर वेळीच उपचार होत नसल्याने नाईलाजाने रुग्णांना उपचाराअभावी मुल येथे रेफर केले जात आहे. करीता एवढी मोठी इमारत असूनही डॉक्टर व कर्मचारी अभावी नवीन ईमारत आज शोभेची वास्तू ठरत असल्याचे बेंबाळ ग्राम पंचायत सरपंच चांगदेव केमेकर यांनी आमच्या प्रतिनिधींजवळ बोलून दाखविले आहे.

    बेंबाळ परिसरातील ग्रामीण भागातील अनेक गावात डोळ्याची साथ, सर्दी,तापाची साथ चांगलीच पसरली आहे. अशा वेळेला गावात निर्माण झालेल्या आरोग्य वर्धीनी प्राथमिक आरोग्य केंद्रात वेगवेगळ्या आजाराचे रुग्ण उपचारासाठी येत आहेत. परंतु आरोग्य केंद्रात फक्त एकच डाक्टर व एकच नर्स आहे. तेही निवासी राहत नाही.

    त्यामुळे रात्रीच्या वेळेला आलेल्या रुग्णांना परत जावे लागत आहे. किंवा गावाजवळ आरोग्य केंद्र असतांनाही नाईलाजाने गाडी करुन रुग्णाला मुल येथे आणावे लागत आहे. याचा आर्थिक भुर्दंड गरीब नागरिकांना सहन करावा लागत आहे. जे कर्मचारी आहेत तेही आपल्या वेळेनुसार उपस्थित राहत नसल्याचा आरोपही सरपंच चांगदेव केमेकर यांनी केला आहे. त्यामुळे रोज येणाऱ्या रुग्णांची संख्या वाढत आहे. रोजच् गर्दी होत आहे.

    परंतु डाक्टर,नर्स,कर्मचारी अभावी रुग्णांवर उपचार होत नसल्याने रुग्णांचे बेहाल होत आहेत. करीता शासनाच्या आरोग्य विभागाने त्वरित लक्ष देऊन रात्रीला नियमित निवासी डाक्टर,नर्स,कर्मचारी यांची नेमणूक करावी व रुग्णांना सेवा द्यावी अशी मागणी सरपंच चांगदेव केमेकर यांनी केली असून सध्यातरी मागील एक महिन्यापूर्वी उभारण्यात आलेली बेंबाळ येथील आरोग्य वर्धीनी इमारत शोभेची वास्तू ठरत आहे.

  • त्या अपघाताची मनसे महिला सेने ने घेतली गंभीर दखल

    News34

    बल्लारपूर – बल्लारपूर शहरात मोकाट जनावरांचा वावर मोठ्या प्रमाणात आहे, दिवसेंदिवस मोकाट जनावरांच्या संख्येत वाढ होत आहे, हि जनावरे अचानक मूख्य मार्गावर येत असतात यामूळे वाहण चालकांनाच नाही तर पायदळ चालतांना सूद्धा मोठी कसरत करावी लागत आहे.

    हि जनावरे अचानक वाहनासमोर आल्याने अपघातात वाढ होत आहे, रविवार दिनांक 20 ऑगस्टला मध्यरात्री रस्त्याच्या मधोमध बसलेल्या गायींच्या कळपामूळे सरदार पटेल वार्डात दुचाकीचा अपघात झाला. यामध्ये एकाला आपला जीव गमवावा लागला तर दोघे गंभीर जखमी झाले आहेत, अश्या घटणा वारंवार घडून कुणालाही आपला जीव गमवाव लागू नये यासाठी आपण जातीने आणि गार्भीयाने लक्ष देउन सदर मोकाट जनावरांचा बंदोबस्त आठ दिवसाचे आत करावा अन्यथा मनसे स्टाईल आक्रमक आंदोलन केले जाईल.

    या निवेदनावर मुख्याधिकारी वाघ यांनी सांगितले की आम्ही जनावर मालकांना नोटीस दिली आहे आणि कारवाई सुद्धा करू आमची पूर्ण टीम त्या कामात दिवस आणि रात्र एक करीत जनावर जमा करून प्यार फोंडेशन यांना सोपविले आहे.

    मागील काही दिवसात पन्नास ते साठ जनावरे आम्ही जमा केले आणि आपल्या निवेदनाची दखल घेत आम्ही यात आणखी गांभीर्याने लक्ष देऊ आणि काही मोठ प्रकरण नाही घडणार असा प्रयत्न करू आणि जर घडणार तर याला सर्वस्वी संबंधीत प्रशासण जबाबदार असेल असे आश्वासन प्रशासनाकडून देण्यात आले.

    यावेळेस मनसे पदाधिकारी कल्पना पोतर्लावार तालुका अध्यक्ष महीला सेना, किशोर मडगुलवार, जिल्हा सचिव बल्लारपुर विधानसभा, कुलदिप चंदनखेडे जिल्हा उपाध्यक्ष मनविसे, मंगला घडले शहर अध्यक्ष महीला सेना, प्रंशात कलवल, अजय निराल्ला व मनसैनीक प्रामुख्याने उपस्थित होते.

  • वरोरा येथे अद्यावत ई-अभ्यासिकेचे होणार लोकार्पन

    News34

    वरोरा – वरोरा चे माजी नगराध्यक्ष अहेतेशाम अली हे नगर पालिकेचे नगराध्यक्ष असतांना वरोरा शहरातील विद्यार्थ्यांची शैक्षनीक जिज्ञासा व वाचण्याची आवड लक्षात घेऊन त्यांना अद्यावत अशी अभ्यासिकेची गरज असल्याने व शालेय,महाविद्यालयीन विद्यार्थ्यांना व वाचकांना वरोरा शहरात एकही परिपूर्ण लायब्ररी उपलब्ध नसल्याने तत्कालीन नगराध्यक्ष अहेतेशाम अली यांनी २०१९ ला सदर वाचनालयाचा मंजुरीचा प्रस्ताव तत्कालीन अर्थमंत्री व जिल्ह्याचे पालकमंत्री सुधीरभाऊ मुनगंटीवार यांचा समोर सादर केला असता त्यांनी त्वरीत या प्रस्तावाला मंजुरी दिली व प्रधानमंत्री खनिज क्षेत्र योजनेचा निधीतून ३६६.२७ लक्ष रू.या अभ्यासिकेच्या बांधकामाकरीता दिला.

    अहेतेशाम अली यांनी या अभ्यासिकेला माजी प्रधानमंत्री स्व. श्री. अटलबिहारी वाजपेयी यांचे नाव देण्याचा ठराव नगरपालिकेत आपल्या नगरसेवकांसोबत मिळून मंजूर केला सदर इमारतीचे बांधकाम आता पूर्णत्वास झाले असून ही ई- अभ्यासिका आता दि.२५ ऑगस्ट पासून वाचकांकरीता उपलब्ध होणार आहे.

    या अभ्यासिकेचे लोकार्पन सुधीर मुनगंटीवार, मंत्री वने, सांस्कृतिक व मस्त्य व्यवसाय,यांचे हस्ते होणार असून आयोजित कार्यक्रमात कार्यक्रमाचे अध्यक्ष – आमदार श्रीमती प्रतिभाताई धानोरकर राहणार आहे.

    प्रमुख अतिथी म्हणून विधान परीषद सदस्य – रामदास आंबटकर,विधान परिषद सदस्य – अभिजित वंजारी, विधानपरिषद सदस्य – सुधाकर अडबाले राहणार आहे.प्रमुख उपस्थिती म्हणून विनय गौडा – जिल्हाधिकारी चंद्रपूर हे राहणार आहे.

  • स्वातंत्र्य दिनाला महिलांनी पकडली दारू पण…

    News34

    चंद्रपूर : शासकीय सेवेत असलेला कर्मचारी गेल्या अनेक वर्षांपासून गावात सर्रास दारुविक्री करीत आहे. यामुळे गावातील युवा वर्ग व्यसनाच्या अधीन जात असल्याचे चित्र बघून गावातील संतप्त महिलांनी स्वतः या व्यक्तीच्या घरी जाऊन पोलिसांना दारू पकडून दिली. मात्र पोलिसांनी उलट याच महिलांविरोधात अनेक गंभीर गुन्हे दाखल केले आहेत. त्यामुळे पोलिसांच्या भूमिकेबाबत गंभीर प्रश्न निर्माण झाला आहे.

    गोंडपीपरी तालुक्यात गोजोली हे गाव आहे. येथील पोस्टमन म्हणून कार्यरत रघुनाथ कोटनाके हा शासकीय कर्मचारी गेल्या अनेक वर्षांपासून सर्रासपणे दारुविक्री करीत आहे. यामुळे गावातील युवा वर्ग व्यसनाकडे वळत असून यामुळे सामाजिक वातावरण गढूळ झाले आहे. यामुळे 15 ऑगस्ट स्वातंत्र्यदिनी संतप्त झालेल्या महिलांनी ढाबा पोलीस स्टेशन गाठत ठाणेदार गोरक्षनाथ नागलोट यांना आरोपी कोटनाके याच्यावर कारवाई करण्याची मागणी केली, मात्र पोलिसांनी आपण दारू पकडा आम्ही कारवाई करतो असे सांगितले.

    त्यामुळे महिलांनी कोटनाके याच्या घराकडे मोर्चा वळवला. यावेळी कोटनाके याने रोजंदारी करणारा व्यक्ती संतोष तुमराम याला राहण्यासाठी जे खोली आहे तिथे दारूच्या पेट्या आढळल्या. याची माहिती पोलिसांना दिली. दारूच्या 100 बाटल्या तिथे सापडल्या मात्र पोलीस पंचनामा न करता आरोपी संतोष तुमराम आणि रघुनाथ कोटनाके यांना घेऊन जात होते, यावेळी महिलांनी आक्षेप घेतल्यावर अखेर पंचनामा करण्यात आला. यानंतर महाराष्ट्र दारूबंदी कायदा कलम 65 (ई) आणि 83 अंतर्गत गुन्हा दाखल करण्यात आला.

    महिलांनी जबाबदार नागरिकाची भूमिका बजावली असताना आरोपीने खोटे आरोप करीत तक्रार दाखल केली आणि पोलिसांनी याच सामान्य महिलांविरोधात भादवी कलम 143, 147, 149, 323, 504, 506, 427 अशा गंभीर गुन्ह्यांची नोंद केली.

    यामध्ये माया आत्राम, रेखा चौधरी, सुदर्शन मोहूर्ले, मंगला कोकोडे, अर्चना मोहूर्ले, नलिनी कोटरंगे, शारदा ठाकरे, वंदूशा सोनूले, रेखा वाढई, प्रेमीला शेडमाके, कांताबाई निकोडे, लक्ष्मी चौधरी, वर्षा मोहूर्ले, सारिका शेडमाके, शालू वसाके, कांता निवलकर, सारुबाई निकोडे, सपना चौधरी यांच्यासह गावातील होतकरू तरुणांचा समावेश आहे. जागरूक नागरिकांना असा त्रास दिला जात असेल तर सामान्य नागरिकांनी काय करायचे? पोलीस अधीक्षक साहेबांनी याकडे त्वरित लक्ष घालून याची चौकशी करण्याची मागणी केली आहे.

    पोलिसांनी केलं नाही अखेर महिलांनी केलं

    गावातील कुठलीही गोष्ट लपत नाही. गोजोली गावात रघुनाथ कोटनाके अनेक वर्षांपासून सर्रासपणे अवैध दारुविक्री करत आहे, त्याच्या अवैध व्यवसायापायी
    गावातील पुरुष मंडळी तर दारूच्या आहारी गेलेलीच आहे, मात्र बारा ते पंधरा वर्ष वयोगटातील मुले सुद्धा आता दारूच्या आहारी जाऊन आपले शैक्षणिक आणि संपूर्ण आयुष्य उध्वस्त करण्याच्या मार्गावर लागले आहेत
    यामध्ये गावातील महिलांची फार मोठी कौटुंबिक हानी आर्थिक हानी आणि सारे कुटुंब देशोधडीला लागण्याच्या मार्गावर लागले आहेत.
    मात्र पोलिसांनी अद्याप त्याच्यावर कुठलीही कारवाई केली नाही. शेवटी गावातील महिलांना पुढाकार घ्यावा लागला.

    जातीय रंग देण्याचा डाव
    गावातील महिला ह्या मागासवर्गीय आहेत. यामध्ये अनुसूचित जाती, अनुसूचित जमाती आणि इतर मागासवर्गीय महिलांचा समावेश आहे असे असताना आरोपीकडून याला जातीय रंग देण्याचा प्रयत्न केला जात आहे.

    निवेदन देताना डॉक्टर अभिलाषा गावतुरे यांच्या मार्गदर्शनात निवेदन देण्यात आले व दोषींवर कडक कारवाई करण्याची मागणी करण्यात आली तसेच महिलांची व ग्रामस्थांची दिशाभूल करणाऱ्या पोलीस अधिकाऱ्यावर कारवाई करण्याची मागणी करण्यात आली, यावेळी गावातील माया आत्राम ग्रामपंचायत
    सदस्य सरस्वती आत्राम, माजी सरपंच उज्वला दुर्गे,
    मंगला कोकोडे, नलिनी कोटरंगे, सारिका कोटनाके,
    शालीनी डोंगरे, वांदुशा सोनुले, कांता निवळकर, सुरेंद्र मांदाडे, रामदास ठाकरे, रामदास चौधरी, संजय चौधरी,
    राकेश प्रधाने, राजेश डोंगरे इ. ग्रामस्थ उपस्थित होते.

    याबाबत धाबा पोलीस स्टेशनचे ठाणेदार गोरक्षनाथ नागलोत यांची प्रतिक्रिया घेतली असता त्यांनी सांगितले की महिलांनी दारू पकडली यात काही दुमत नाही त्यांनी चांगलं काम केलं, मात्र त्यांनी दारू पकडते वेळी कायदा हातात घ्यायला नको होता, ज्यावेळी महिलांनी दारू पकडली तेव्हा आम्हाला माहिती मिळाली, आम्ही तात्काळ गोजोली मध्ये जाऊन परिस्थिती हाताळली व दारूविक्री करणाऱ्याला अटक केली.

    कायद्यानुसार आम्ही आरोपीवर गुन्हा दाखल केला असून तपास सुरू केला आहे.

Powered by
►
Necessary cookies enable essential site features like secure log-ins and consent preference adjustments. They do not store personal data.
None
►
Functional cookies support features like content sharing on social media, collecting feedback, and enabling third-party tools.
None
►
Analytical cookies track visitor interactions, providing insights on metrics like visitor count, bounce rate, and traffic sources.
None
►
Advertisement cookies deliver personalized ads based on your previous visits and analyze the effectiveness of ad campaigns.
None
Powered by