Category: ग्रामीण वार्ता

Illegal minor mineral mining कोरपना – गौण खनिजाची अवैध रित्या उत्खनन करून मालामाल होण्याची जणू स्पर्धा चंद्रपूर जिल्ह्यात सुरू आहे. रॉयल्टी कमीची आणि उत्खनन जास्तीचे असा फंडा वापरून शासनाचा सर्रास महसुल बुडवून व्यवसायीक मालामाल होत आहेत.

शुक्रवारी (8 मार्च) रात्री साडेकराच्या सुमारास जिल्ह्यातील कोरपना तालुक्यातील देवघाटावर नाल्यावर अवैद्य मुरुमाची चोरी होत असताना पोलिस व महसल विभागाने धाड टाकली. या संयुक्त कारवाईत 12 हायवा ट्रक पकडण्यात आले. त्यापैकी गौण खनिजाने भरलेले पाच हायवा ट्रक वरच पोलिस विभागाने कारवाई केली आहे. पोलिस अधिक्षक मुमक्का सुदर्शन यांच्या निर्देशानंतर ही कारवाई करण्यात आली आहे. Illegal minor mineral mining

वर्षभरापासून राजुरा – गोविंदपुर (353 बी) या राष्ट्रीय महामार्गाचे काम सुरू आहे. या बांधकामाचे कंत्राट जीआरआयएल (gril) या कंपनीला मिळाले आहे. रस्ता तयार करण्याकरीता कंपनीला गौण खनिजाची म्हणजे मुरुम माती व रेतीची आवश्यकता आहे.

वाचा – चंद्रपुरात 24 लाख 75 हजारांची रोकड जप्त

गौण खनिजाला कोरपना तालुक्यातील अंमलनाला, देवघाटनाला, पकडीगुड्डम, आदी ठिकाणावरून काढण्याची परवानगी प्रशासनाने दिली आहे. मात्र कंपनीने परवानगी पेक्षा अतिरिक्त गौण खनिजाचे उत्खनन करून बारमाही वाहणारे जिवंत नाले पोखरून काढले आहेत. Illegal minor mineral mining

संबंधीत विभागाच्या दुर्लक्षितपणामुळे हा प्रकार वाढल्याने गौण खनिज तस्करांचे फावत आहे. चोरी प्रकरणात अनेक तक्रारी झाल्या, परंतु प्रशासनाने छोट्या मोठ्या कारवाईचा फार्स दाखविला. दबावापोटी कारवाईला ठेंगा दाखविल्याने गौण खनिजाची तस्करी सर्रास सुरूच आहे.

नव्यानेच रूजू झालेले पोलीस अधिक्षक ममुका सुदर्शन यांना तक्रारी प्राप्त होताच त्यांनी पोलिस व महसूल विभागाला कारवाई करण्याचे निर्देश दिले. पोलिस अधिक्षकाच्या निर्देशानुसार शुक्रवारी पोलिस व महसूल विभागाने कोरपना तालुक्यातील देवघाट नाल्यावर मुरूमाची तस्करी होत असताना धाड टाकली. या कारवाईत 12 हायवा ट्रक घटणास्थळी पकडण्यात आले.

राष्ट्रीय महामार्गाच्या बांधकामाकरीता जीआरआयएल कंपनीला नाल्यावरून मुरुम माती उत्खनना परवानगी मार्च २४ पर्यंत मिळालेली आहे. या कालावधीत कंपनीला ५३ हजार ब्रासचे उत्खनन करायचे होते. परंतु वाजवीपेक्षाही जास्तीचे उत्खनन करून नालाच पोखरून टाकला आहे. 53 हजाराच्या ऐवजी लाखों ब्रास अवैद्यरित्या दिवस रात्र उत्खनन करण्यात आले आहे.

मंजुरी नुसार 30 सप्टेबर पर्यंतच 52 हजार 500 ब्रास उत्खनन झाले आहे. त्यानंतरही मागील चार महिण्यापासून 24 तास गौण खनिजाचे उत्खनन करून शासनाच्या महसुलाला चुना लावण्यात आला आहे. रात्री गौण खनिजाची वाहतूक करता येत नाही परंतू अधिकाऱ्यांच्या आशीर्वादाने हा वाहतुकीचा गोरखधंदा दिवस रात्र सुरूच आहे.

पोलिस अधिक्षकांच्या निर्देशानंतर शुक्रवारी रात्री अकराचे सुमारास तहसिलदार व्हटकर व ठाणेदार एकाडे यांनी कोरपणा तालुक्यातील देवघाट नाल्यावर ताफ्यासह धाड टाकली. घटनास्थळावर पोकलेन व हायड्रा मशीन तसेच वाहतूक होत असलेले 12 हायवा आढळून आले. त्यापैकी गौण खनिजाने भरलेले 5 हायवावरच कारवाई करण्यात आली आहे. उर्वरित खाली हायवा व मशीन सोडून देण्यात आल्याची माहिती सूत्रांनी दिली आहे. मात्र खाली हायवा आणि उत्खनन करणारे मशीन का सोडून देण्यात आले असा प्रश्न विचारला जात आहे.

राज्याच्या शेवटच्या टोकावर असलेले कोरपना, या तालुक्यात अवैध धंद्यांचा मोठा जोर आहे, विशेष म्हणजे कोरपना पोलीस ठाण्याचे पोलीस निरीक्षक एकाडे यांच्यावर अनेकांनी गंभीर आरोप केले, विशेष म्हणजे त्यांच्या विरोधात पोलीस महासंचालक यांच्याकडे तक्रार सुद्धा करण्यात आली आहे, इतके दिवस ग्रील कंपनीने अवैध गौण खनिजाचे उत्खनन केले ते कुणाच्या आशीर्वादाने? स्थानिक प्रशासनाचा सहभाग असल्याशिवाय बाहेरच्या कंपनीची हिंमत वाढली कशी?  प्रशासनाला चुना लावणारे प्रशासनातील अधिकारीच आहे.

पोलीस प्रशासनाला 5 हायवा ट्रक वर कारवाई केली तर उर्वरित हायवा ट्रक का सोडले ? अशी विचारणा केल्यावर त्याबाबत उत्तर महसूल प्रशासन देणार असे सांगण्यात आले हे विशेष.. एकंदरीत अनेक दिवसांनी जागे झालेल्या प्रशासनाने कारवाई केल्यावर प्रशासनाचेच धाबे दणाणले हे वाक्य प्रयोग केल्यास फारकत नाही.

Botanical Garden Opening Chandrapur चंद्रपूर-बल्लारपूर मार्गावरील विसापूर येथे 11 मार्च सोमवारी बॉटनिकल गार्डन चे मुख्यमंत्री एकनाथ शिंदे यांच्या हस्ते उदघाटन होणार आहे, त्याकरिता प्रशासनाने सदर मार्गावरून अवजड वाहनाचा मार्ग बदलला आहे.

चंद्रपुरात अनेक वर्षांपासून निर्माण होणाऱ्या आधुनिक बॉटनिकल गार्डनचे काम पूर्णत्वास आल्याने 11 मार्च रोजी राज्याचे मुख्यमंत्री एकनाथ शिंदे यांच्या हस्ते उदघाटन होणार आहे, त्यासाठी प्रशासनाने जय्यत तयारी सुरू केली आहे. Botanical Garden Opening Chandrapur

चंद्रपूर ते बल्लारपूर या मार्गावरून होणारी अवजड वाहतूक 11 मार्च रोजी पूर्णतः बंद राहतील, असे आदेश जिल्हाधिकारी विनय गौडा यांनी काढले आहे.

अवश्य वाचा – चंद्रपुरात येणार उष्णतेची लाट

मात्र त्यासाठी जिल्हाधिकारी गौडा यांनी वाहन चालकाना पर्यायी मार्गाचा अवलंब करावा असेही यावेळी सूचित केले आहे.

11 मार्च ला मुख्यमंत्री शिंदे सह इतर मंत्र्यांची उदघाटन कार्यक्रमाला उपस्थित राहतील, त्यांच्या सुरक्षिततेसाठी चंद्रपूर-बल्लारपूर मार्गावरील अवजड वाहतूक बंद राहतील, सदर आदेशाची अंमलबजावणी ही 11 मार्च ला दुपारी 2 ते रात्री 9 वाजेपर्यंत राहतील.

जिल्हाधिकारी विनय गौडा यांनी आपल्या अधिकारातील मुंबई पोलीस अधिनियम 1951 चे कलम 33(1) व मोटर वाहन अधिनियम 1988 मधील कलम 115 चा वापर करीत सार्वजनिक ठिकाणी रहदारी सुरळीत रहावी यासाठी वापर केला आहे.

अवजड वाहन चालकांचा हा असेल पर्यायी मार्ग

वरोरा भद्रावती व चंद्रपूर कडून राजुरा किंवा गडचांदूर कडे जाण्यासाठी पडोली-धानोरा फाटा भोयगाव मार्गाचा अवलंब करावा. गडचांदूर व राजुरा कडून वरोरा, भद्रावती व चंद्रपूर कडे येण्यासाठी भोयगाव-धानोरा फाटा -पडोली या मार्गाचा वापर करावा. गोंडपीपरी व कोठारी कडून चंद्रपूर किंवा मूल जाण्यासाठी येनबोडी-पोम्भूर्णा या मार्गाचा वापर करावा, चंद्रपूर व मुल कडून बल्लारपूर, गोंडपीपरी व राजुरा जाण्याकरिता पोम्भूर्णा मार्गाचा अवलंब करावा असे आदेश जिल्हाधिकारी विनय गौडा यांनी काढले आहे.

त्यानुसार बामणी फाटा बल्लारपूर ते बंगाली कॅम्प चौक चंद्रपूर पर्यंत अवजड वाहतूक बंद ठेवण्याचे आदेश गौडा यांनी दिले आहे.

CISF jawan dies in fire
भद्रावती – नागपूर – चंद्रपूर या रस्त्यावरून प्रवास करीत असताना भरधाव वेगात कार पुलाचे कठडे तोडून नाल्यात कोसळली, कार ने पेट घेतल्याने आगीत होरपळून कार चालकाचा मृत्यू झाला. 8 मार्च ला सकाळी 6 वाजताच्या सुमारास ही घटना घडली.

35 वर्षीय दीपक चरण बघेल असे मृतकाचे नाव आहे, मृतक हा CISF जामनगर गुजरात येथे कार्यरत होता, काही दिवसांपूर्वी तो रजेवर आला होता, दीपक भद्रावती तालुक्यातील मल्हारी बाबा सोसायटी, सुमठाणा येथे राहत होता. CISF jawan dies in fire

वाचा – चंद्रपूर लोकसभेचा हा आहे कांग्रेस उमेदवार

दीपक हा काही दिवसांपूर्वी रजा घेऊन भद्रावती येथे आला होता, मात्र काही कामासाठी तो नागपूरला गेला होता, 8 मार्च ला मध्यरात्री तो परत भद्रावती येथे होता.

पहाटे ची वेळ असल्याने त्याचे चारचाकी वाहन क्रमांक 23BH-6855C हे अतिवेगात होते, भद्रावती जवळ पोहचताच त्याचे वाहनवरील नियंत्रण सुटले, सकाळी 6 वाजता दरम्यान कोंढा नाल्याजवळील पुलाच्या कठड्याला धडक देत वाहन खाली कोसळले. CISF jawan dies in fire

दीपक ने वाहनातून बाहेर येण्याचा प्रयत्न केला मात्र तो बाहेर पडू शकला नाही, तितक्यात शॉर्ट सर्किट झाल्याने कार ने पेट घेतला, यामध्ये दीपक चा आगीत होरपळून मृत्यू झाला.

सकाळी 8 वाजता गावातील नागरिकांना वाहन व अर्धवट जळाळेला मृतदेह आढळल्याने त्यांनी सदर माहिती भद्रावती पोलिसांना दिली, माहिती मिळाल्यावर पोलीस घटनास्थळी दाखल झाले.

घटनेचा पंचनामा करीत मृतदेह उत्तरीय तपासणीसाठी रुग्णालयात पाठविण्यात आला, घटनेचा पुढील तपास भद्रावती पोलीस करीत आहे.

गुरू गुरनुले

Dam incomplete for irrigation मुल तालुका हा धान उत्पादन करणारा तालुका आहे. परंतु शेतीच्या विकासासाठी पुरेशा प्रमाणात सिंचनाची सोय झालेली नाही. चिखली – मोरवाही भागात गोसेखुर्द धरणाच्या कालव्याचे काम पूर्ण झाले नसल्याने या साझातील राजोली, डोंगरगाव, मुरमांडी,गोलाभुज, गांगलवाडी, बेलगाटा, चीतेगाव इत्यादी गावे सिंचन सोई पासून वंचित आहेत.

अनेकदा मागणी करूनही शासनाने लक्ष दिले नाही म्हणून केवळ मामा तलावाच्या भरोषावर या भागातील शेतकरी विसंबून आहेत. यासाठी चिखली – मोरवाही परिसरातील शेतकरी बांधवांनी गावाला लागूनच वाहणाऱ्या उमा नदीवर बंधारा बांधण्यात यावा अशी मागणी करण्यात आली होती. शेतकऱ्यांची महत्वाची मागणी लक्षात घेऊन शासनाकडे मागणी ही मागणी मंजूर करुन चिखली घाटावर एक बंधारा व मोरवाही घाटावर एक बंधारा मंजूर करण्यात आला. Dam incomplete for irrigation

हे काम मृद व जलसंधारण विभागाच्या वतीने कोटी रुपये खर्चाची निविदाही काढण्यात आली होती. या कामाचे कार्यारंभ आदेशही मे २०२३ लाच कंत्राटदार सहदेव कंत्रक्षण कंपनी नागपूर यांना देण्यात आले होते. कार्यारंभ आदेश प्राप्त होताच सहदेव कंत्राटदाराने कामाला सुरुवात केली असती तर चिखली व मोरवाही बंधाऱ्याच्या पाण्याने हजारो हेक्टर जमिनीला याचा फायदा झाला असता व शेतकऱ्यांना धानाचे उत्पन्न उत्तम झाले असते.

वाचा – चंद्रपूर लोकसभेचा उमेदवार ठरला

बंधाऱ्याचे काम कंत्राटदाराने केले नसल्यामुळे शेतकऱ्यांची मोठी नुकसान झाली आहे. पाण्याअभावी खरीप पिके गेलीच आणि यासोबत शेतकऱ्यांना रब्बीपिकेही गहू, चना,लाख, तूर, भाजीपाला,  मका अशी पिके घेता आली नाही. त्यामुळे चिखली मोरवाही गावातील व परिसरातील अनेक गावातील शेतकऱ्यांना याचा फायदा झाला असता. मृद् व जलसंधारण विभागाने मजुरी दिलेल्या चिखली व मोरवाही बंधारा बांधकामाचे निविदा प्रक्रिया पूर्ण करून दोन्ही कामाचे कार्यारंभ आदेश देऊनही जर कंत्राटदाराने बंधाऱ्याच्या कामाला सुरुवात केली नाही. त्यामुळे शेकडो शेतकऱ्यांच्या पिकाचे नुकसान झाले.

याला जबाबदार सहदेव बांधकाम कंपणी नागपूर असून अशा कंपनीचे परवाने तात्काळ रद्द करावे अशी मागणी चिखली मोरवाही येथील शेतकरी व सरपंच नंदू नैताम,माजी सरपंच तथा कृषी उत्पन्न बाजार समिती संचालक लहू कडस्कर व उपसरपंच दुर्वास कडस्कर यांनी केली असून शासनाने व मृद्द व जलसंधारण विभागाने संबंधित कंत्राटदाराला त्वरित काम सुरु करण्याची तंबी द्यावी अन्यथा चिखली व मोरवाही येथील शेतकरी न्यायालयात धाव घेण्याचा इशारा दिला आहे.

Election Victory Machine (EVM) देशात लोकशाही वाचवायची असेल तर सरकारने निवडणुका बॅलेट पेपरने घ्यावा, कारण ईव्हीएम ही निवडणूक जिंकण्याची मशीन बनली आहे, अशी प्रतिक्रिया भूमिपुत्र ब्रिगेडच्या डॉ.अभिलाषा गावतुरे यांनी दिली. 7 मार्च ला बल्लारपूर येथे ईव्हीएम विरोधात भव्य मोर्चा काढण्यात आला यावेळी त्या बोलत होत्या.

चंद्रपूर जिल्ह्यातील बल्लारपूर येथे भूमिपुत्र ब्रिगेडच्या वतीने डॉक्टर अभिलाषा ताई गावतुरे यांच्या नेतृत्वात आज (गुरुवार) ईव्हीएम हटाव अशी मागणी करत मोर्चा काढला. सोबतच शेतकऱ्यांना त्यांचा हमीभाव मिळावा ओबीसींची जातीनिहाय जनगणना व्हावी व केजी टू पीजी शिक्षण फ्री व्हावे आणि नोकऱ्यांचे कंत्राटीकरण बंद व्हावे या मागण्या सुद्धा करण्यात आल्या.या माेर्चात हजारो नागरिक सहभागी झाले हाेते. हा माेर्चा काटा गेट पासून तहसील कार्यालयापर्यंत काढण्यात आला. Election Victory Machine (EVM)

आंदाेलकांनी आगामी काळातील निवडणुका या बॅलेट पेपरच्या माध्यमातून घ्याव्यात अशी मागणी निवेदनाच्या माध्यमातून प्रशासनास केली.देशात नरेंद्र मोदी यांचे सरकार मतदान यंत्राच्या (evm) साहाय्याने आले असल्याचे अनेक पुरावे निवडणूक आयोगाला देण्यात आले. मात्र त्यावर पांघरून घातले जात आहे. मतदान यंत्राच्या बळावर सत्ताधारी भाजप आज चारशे पारचा नारा देत आहे. यावेळी अध्यक्ष स्थानावरून बोलताना डॉक्टर अभिलाषा ताई गावतुरे म्हणाल्या की देशात विद्यमान सरकारबद्दल प्रचंड आक्रोश असताना आम्ही दिलेली मते कुणाला जातात हे कळण्याचा मार्ग नाही
शिक्षण, रोजगार, आरोग्य अशा मूलभूत सुविधाही मिळणे कठीण झाले आहे.

आज देशातील शेतकरी विद्यार्थी महिला शिक्षक कर्मचारी अंगणवाडी सेविका आशा वर्कर सगळे आंदोलन करून राहिले आहेत पण या देशातल्या सरकारला कोणाचीही सूध घेण्याची काळजी नाहीये किंबहुना यांच्या शोषण करण्याचे ,शेकडो शेतकऱ्यांचे प्राण त्यांनी घेतले ,शिक्षकांवर लाठी हल्ला करतात विद्यार्थ्यांवर लाठी हल्ला करतात कारण त्यांना आता त्यांच्या मताची गरज राहिली नाही कारण त्यांच्या विरोधात जरी मतदान झाले तरी ते सत्ताधारी ईव्हीएम च्या माध्यमातून स्वतःकडे वळते करतात आणि म्हणून देशातील सर्व सामान्य नागरिकांच्या बद्दल सरकारला कुठलीही आस्था नाही त्यांना फक्त त्यांच्या भांडवलदार मित्रांच्या घशामध्ये या देशातील अरबोची संपत्ती टाकायची आहे आणि त्यासाठी ईव्हीएम हे त्यांचे सर्वात मोठे शस्त्र ठरलेले आहे म्हणून ते हटले पाहिजे आणि बॅलेट पेपरवर निवडणुका झाल्या पाहिजे.

लोकशाही आणि संविधान टिकवायचे असेल तर लोकांना त्यांचा मतदानाचा खरा अधिकार प्राप्त झाला पाहिजे आणि हा अधिकार केवळ बॅलेट पेपरच्या माध्यमातूनच मिळू शकतो.
यामुळे ईव्हीएम बंद करण्याची गरज आहे असे प्रतिपादन त्यांनी केले.

मोर्चाला ज्येष्ठ समाजसेविका रजनीताई हजारे ,चंद्रपूरचे ज्येष्ठ नेते हिराचंदजी बोरकुटे, बल्लारशाचे भास्कर भगत, प्रा. विजय लोणबले, रितेश बोरकर यांनी सुद्धा संबोधित केले, या मोर्चात महिला आणि युवक मोठ्या संख्येने सहभागी झाले. हातात मागण्यांचे फलक उंचावत, घोषणा देत हा मोर्चा तहसील कार्यालयावर धडकला. त्यावेळी मागण्यांचे निवेदन उपविभागीय अधिकाऱ्यांना देण्यात आले.

सोबतच जवळपास 28 हजार नागरिकांनी स्वतंत्ररीत्या स्वाक्षरी केलेले 28 हजारो निवेदने यावेळी उपविभागीय अधिकाऱ्यांना देण्यात आले मोर्चाच्या यशस्वीतेसाठी भूमि पुत्र ब्रिगेडचे तालुकाध्यक्ष विवेक खुठेमाटे, विजय मुसळे, विश्वास निमसरकर, ताहीर हुसेन, अनिस खान, रितेश बोरकर, राहुल मोहरले, नितेश म्याकलवार, राहुल दहिवले, अमोल काकडे, सतीश नेवारे, श्रीकांत शेंडे, शंकर काळे, श्रीनिवास मासे, शितलताई हस्ते, संगीताताई देठे, रेखाताई कोरे, रक्षा मेश्राम यांनी अथक परिश्रम घेतले.

Woman Talathi arrested while accepting bribe

चंद्रपूर – Woman Talathi arrested while accepting bribe महिला दिनाच्या पूर्व संध्येला चंद्रपुरात महिला तलाठी ला 4 हजार रुपयांची लाच घेताना रंगेहात अटक करण्यात आली आहे.

सदर प्रकरणी तक्रारदार हे शेतकरी असून त्यांनी मौजा सिदूर पिपरी येथील शेती पत्नी व मुलांच्या नावे बक्षिस पत्र करून दिले होते, बक्षीस पत्राच्या आधारे शेतीचे फेरफार करण्याच्या कामाकरिता मौजा नागाळा येथील तलाठी कार्यालयात जात तलाठी श्रीमती प्रणाली अनिलकुमार तुडूंरवार यांच्याकडे अर्ज केला, काही दिवस झाल्यावर अर्जाचे काय झाले याबाबत फिर्यादी हे तलाठी कार्यालयात गेले, त्यांनी तलाठी यांना विचारणा केली असता त्यांनी फेरफार व सातबारा तयार करण्यासाठी 5 हजार रुपयांची लाच मागितली.

फिर्यादी यांना पैसे देण्याची इच्छा नसल्याने त्यांनी चंद्रपूर लाचलुचपत प्रतिबंधक विभागात तक्रार दिली, 7 मार्च रोजी तक्रारीची पडताळणी केल्यावर पोलीस निरीक्षक प्रशांत पाटील सापळा रचला, त्यावेळी तलाठी प्रणाली तुडूंरवार यांनी तडजोडीअंती 4 हजाराची लाच मागितली. Woman Talathi arrested while accepting bribe

तलाठी कार्यालय नागाळा येथे प्रणाली तुडूंरवार यांना 4 हजाराची लाच घेताना रंगेहात अटक करण्यात आली.
तलाठी तुडूंरवार यांना शासनाची सेवा करताना अंदाजे 40 हजार रुपये पगार मिळतो तरी त्यांनी शेतकऱ्याला 4 हजाराची लाच मागितली हे विशेष.

सदर सापळा कारवाई पोलीस उपअधीक्षक मंजुषा भोसले यांच्या नेतृत्वाखाली पोलीस निरीक्षक प्रशांत पाटील, हिवराज नेवारे, रोशन चांदेकर, वैभव गाडगे, अमोल सिडाम, प्रदीप ताडाम, पुष्पा काचोळे यांनी केली.

Shocking incident in Chandrapur district चंद्रपूर जिल्ह्यातील सावली तालुक्यातील खेडी शिवारात अंगावर शहारे आणणारी घटना घडली आहे, आईने 14 वर्षीय मुलीला विहिरीत ढकलत स्वतः आत्महत्या केली.

6 मार्च रोजी घडलेली ही घटना नागरिकांच्या मनाला चटका लावून गेली आहे, 35 वर्षीय दर्शना दीपक पेटकर, 14 वर्षीय समिक्षा दीपक पेटकर असे मृत आई-मुलीचे नाव आहे. Shocking incident in Chandrapur district

मूल तालुक्यातील दीपक पेटकर यांचं शेत खेडी शिवारात आहे, दुपारी 4.30 वाजताच्या सुमारास आई दर्शना, मुलगी समीक्षा व मुलगा सोहन हे शेतात गेले होते.

पेटकर यांच्या शेताला लागून असलेल्या दुसऱ्याच्या शेतातील विहिरीत दर्शनाने 14 वर्षीय मुलीला ढकलले, त्यानंतर दर्शनाने मुलगा सोहन ला सुद्धा ढकलण्याचा प्रयत्न केला मात्र सोहन ने हात झटकत तिथून पळ काढला.

मुलगा गावात गेल्याने दर्शनाने विहिरीत उडी घेत आत्महत्या केली, गावातील नागरिकांना सोहन ने ही बाब सांगितल्यावर ते तात्काळ शेताकडे आले, मात्र तोपर्यंत दर्शना व समिक्षाचा मृत्यू झाला होता.

गावकऱ्यांनी पोलिसांना याबाबत माहिती दिली, पोलीस घटनास्थळी दाखल झाले त्यांनी दोघांचे मृतदेह बाहेर काढले. व शवविच्छेदन साठी सावली ग्रामीण रुग्णालयात पाठविण्यात आले.

मृतक दर्शना ही किडनीच्या आजाराने ग्रस्त होती, काही महिन्यांपूर्वी दर्शना वर शस्त्रक्रिया झाली होती. सध्या यामागील कारण अद्याप कळले नाही, घटनेचा पुढील तपास सावली पोलीस करीत आहे.