sudden electric shock while drying clothes : राजुरा – मृत्यू हा कधी आणि केव्हाही येऊ शकतो, त्यासाठी एक निमित्त पुरे आहे, अधिक हृदयद्रावक घटना राजुरा तालुक्यातील चिंचोली (खुर्द) गावात घडली. घरातील कामे आटोपते करीत असताना महिलेला विजेचा जोरदार धक्का बसला, या धक्क्यात महिलेचा जागीच मृत्यू झाला.
४० वर्षीय सुवर्णा राजेश वांढरे असे त्या मृत महिलेचे नाव असून घरासमोरील अंगणात कपडे वाळू लावायला बाहेर आलेल्या सुवर्णा यांनी कपडे वाळविण्यासाठी अंगणातील लोखंडी तारांवर कपडे ठेवत असताना त्यांना विजेचा जोरदार धक्का बसला. हि घटना २० जुलै रोजी रविवारी सकाळच्या सुमारास घडली.
सर्व्हिस केबलमुळे विजेचा प्रवाह
विशेष बाब म्हणजे त्या तारेला कटलेली विजेची सर्व्हिस केबल लागली होती त्यामुळे त्या तारांमध्ये विजेचा प्रवाह सुरु होता, याची कल्पना सुर्वणा यांना नव्हती नेहमीप्रमाणे त्या आपलं काम करीत होत्या मात्र आजचा दिवस त्यांच्या आयुष्यातील शेवटचा दिवस असेल असे कुणालाही वाटलं नसेल.
या घटनेमुळे गावात हळहळ व्यक्त करण्यात येत असून वांढरे कुटुंबावर दुःखाचा डोंगर कोसळला आहे.
brahmpuri illegal firearm seizure : ब्रह्मपुरी – चंद्रपूर जिल्ह्यात अवैध बंदूक कुठून येतात हा सर्वात मोठा अनुत्तरित प्रश्न आहे, बंदूक आणणारा पोलिसांना मिळतो मात्र बंदूक विक्रेता पोलिसांच्या हाती लागत नाही. १९ जुलै रोजी स्थानिक गुन्हे शाखेच्या पथकाने २६ वर्षीय युवकांकडून देशी कट्टा व दोन जिवंत काडतुसे जप्त करण्यात आले.
ब्रह्मपुरी तालुक्यात अवैध व्यवसाय विरुद्ध कारवाई करीता पेट्रोलिंग करणाऱ्या स्थानिक गुन्हे शाखेच्या पथकाला अवैध शस्त्राबाबत गोपनीय माहिती मिळाली, माहितीच्या आधारे स्थानिक गुन्हे शाखेचे पथक मौजा किन्ही गावात दाखल होत संशयिताच्या घरी छापा टाकला, २६ वर्षीय गणेश उर्फ गोलू बक्षी सोनवणे याच्या ताब्यातील देशी कट्टा सह दोन जिवंत काडतुसे पोलिसांच्या कारवाई दरम्यान आढळले.
दोन आरोपीना अटक
सदर गावठी कट्टा ब्रह्मपुरी तालुक्यातील मालडोंगरी गावात राहणाऱ्या २९ वर्षीय अक्षय भजनदास शेंडे याने गणेश सोनवणे ला दिला असल्याची माहिती गणेश ने पोलिसांना दिली, पोलिसांनी दोन्ही आरोपीना अटक करीत भारतीय शस्त्र अधिनियम कलम ३, २५ अनव्ये गुन्हा दाखल करीत ब्रह्मपुरी पोलीस स्टेशनच्या ताब्यात देण्यात आले.
सदरची कारवाई पोलीस निरीक्षक अमोल काचोरे यांच्या नेतृत्वात सपोनि बलराम झाडोकर, पोउपनि संतोष निंभोरकर, पोलीस कर्मचारी सचिन गुरनुले, गणेश भोयर, अजित शेंडे, नितेश महात्मे व मिलिंद जांभुळे यांनी केली.
Devabhau Jankalyan Seva Saptah : चंद्रपूर – राज्याचे मुख्यमंत्री देवेंद्र फडणवीस (cm devendra fadnavis) यांच्या वाढदिवसानिमित्त आमदार किशोर जोरगेवार यांच्या पुढाकारातून राबविण्यात येत असलेल्या देवाभाऊ जनकल्याण सेवा सप्ताहाला ९ रक्तदान शिबिरे, योग प्रात्यक्षिके, महाआरती आणि वृक्षारोपण कार्यक्रमाने उत्साहात सुरुवात झाली आहे. पुढील नऊ दिवस हा सेवा सप्ताह चालणार असून, यामध्ये विविध धार्मिक, आरोग्यवर्धक, शैक्षणिक आणि सामाजिक कार्यक्रमांचे आयोजन करण्यात आल्याचे आमदार किशोर जोरगेवार (mla kishor jorgewar) यांनी म्हटले आहे.
आमदार किशोर जोरगेवार यांच्या पुढाकारातून देवाभाऊ जनकल्याण सेवा सप्ताहाचे आयोजन करण्यात आले आहे. २० जुलै ते २९ जुलै पर्यंत सदर सेवा सप्ताह चालणार आहे. दरम्यान, आज पंजाबी सेवा समिती, कृष्ण नगर समाज मंदिर, बंगाली कॅम्प, पंचशील चौक, घुग्घूस येथील माता मंदिर, श्यामनगर, नूतन व्यायामशाळा, महिला पतंजली योग समिती, भवानजीबाई हायस्कूल येथे रक्तदान शिबिरे पार पडली. यामध्ये जवळपास ३०० हून अधिक रक्तदात्यांनी रक्तदान केले.
तर तुकूम येथील लॉ कॉलेज येथे योग-नृत्य शिबिराचे आयोजन करण्यात आले होते. मोरवा येथे वृक्षारोपण कार्यक्रमाचे आयोजन करण्यात आले होते. तर बायपास मार्गावरील अष्टभुजा मंदिर आणि महाकाली वॉर्डातील सुपर मार्केट येथील दुर्गा मंदिर येथे महाआरती करण्यात आली.
विविध कार्यक्रमांच्या माध्यमातून समाजसेवेचा वसा
यातील अनेक कार्यक्रमांचे आमदार किशोर जोरगेवार यांच्या हस्ते उद्घाटन करण्यात आले. त्या प्रसंगी बोलताना आ. जोरगेवार म्हणाले की, आज या पवित्र कार्याची, देवाभाऊ जनकल्याण सेवा सप्ताहाची (Devabhau Jankalyan Seva Saptah) सुरुवात करताना आनंद होत आहे. राज्याचे लाडके मुख्यमंत्री देवेंद्र फडणवीस यांच्या वाढदिवसानिमित्त हा सप्ताह त्यांच्या कार्याची प्रेरणा घेऊन समाजासाठी समर्पित भावनेतून आयोजित करण्यात आला आहे. समाजात सकारात्मक परिवर्तन घडवण्यासाठी फक्त योजना पुरेशा नसतात, तर त्या योजनांना समर्पित मन, सामाजिक बांधिलकी आणि सेवाभाव लागतो. आपल्या चंद्रपूर मतदारसंघात हा सेवा सप्ताह सुरू करत आहोत, जिथे रक्तदान शिबिरे, योग प्रात्यक्षिके, महाआरती, वृक्षारोपण आणि शैक्षणिक-सामाजिक उपक्रम अशा विविध कार्यक्रमांच्या माध्यमातून समाजसेवेचा वसा सुरू झाला आहे.
रक्ताच्या एका थेंबातून कोणाचे तरी जीवन वाचवण्याचे भाग्य आपल्याला मिळत आहे. तसेच, आजच्या योग शिबिरातून आपण आरोग्यविषयी सजगता वाढवत आहोत. वृक्षारोपणाने पर्यावरण रक्षणाचा संदेश देत आहोत आणि महाआरतीद्वारे आपल्या परंपरांचा गौरव करत असल्याचे ते यावेळी बोलताना म्हणाले.
या सर्व कार्यक्रमांना भारतीय जनता पक्षाच्या पदाधिकाऱ्यांची आणि कार्यकर्त्यांची मोठ्या संख्येने उपस्थिती होती. कार्यक्रमाच्या यशस्वितेसाठी भारतीय जनता पक्षाचे कार्यकर्ते आणि सामाजिक संघटनेच्या पदाधिकार्यांनी परिश्रम घेतले.
आमदार सुधाकर अडबाले यांच्या तारांकित प्रश्नावर जलसंपदा मंत्री यांचे निर्देश
Dhariwal infrastructure re-investigation : चंद्रपूर : जिल्ह्यातील ताडाळी एमआयडीसी येथील धारिवाल इन्फ्रास्ट्रक्चर कंपनीने वर्धा नदी ते विद्युत निर्मिती प्रकल्पासाठी पाईपलाईन मंजूर मार्ग न वापरता खाजगी जमिनीतून पाईपलाईन टाकल्याचे उघड झाले आहे. या पाईपलाईनच्‍या गळतीमुळे शेतकऱ्यांच्या पिकांचे मोठ्या प्रमाणात नुकसान होत असल्याने कंपनीची फेर चौकशी करण्याचे निर्देश जलसंपदा मंत्री गिरीष महाजन यांनी आमदार सुधाकर अडबाले यांच्या प्रश्नावर उत्तर देताना दिले.
आमदार सुधाकर अडबाले यांनी २०२५ च्या पावसाळी अधिवेशनात यासंदर्भात तारांकित प्रश्न उपस्थित केला होता. पाईपलाईन टाकण्यासाठी चुकीचा मार्ग वापरणाऱ्या धारिवाल कंपनीवर अजूनपर्यंत दंडात्मक कारवाई का करण्यात आलेली नाही? तसेच झालेल्या नुकसानाची भरपाई शेतकऱ्यांना दिली जावी, अशी मागणी आमदार अडबाले यांनी लावून धरली. pipeline leakage affecting farmers
भरपाई दिल्याचा संशयास्पद अहवाल
या प्रश्नावर उत्तर देताना जलसंपदा मंत्री गिरीश महाजन म्हणाले की, धारिवाल कंपनीने शासकीय मंजुरीनुसार सहा फूट खोलीत पाईपलाईन टाकणे आवश्यक होते. मात्र, त्यांनी ही पाइपलाईन खाजगी जमिनीतून आणि कमी खोलीत टाकल्याने गळती होत असून त्यातून शेतकऱ्यांचे नुकसान झाले आहे. या प्रकरणाची चौकशी करण्यासाठी जिल्हाधिकाऱ्यांनी १८ मार्च २०२५ रोजी आदेश पारित करून उपअधीक्षक, तहसीलदार, तालुका कृषी अधिकारी व अन्‍य अधिकारी अशा अधिकाऱ्यांची समिती नेमली होती. मात्र, या समितीने केवळ सहा शेतकऱ्यांना मिळून १५,००० रुपयांची भरपाई दिल्याचा संशयास्पद अहवाल दिला आहे. मंत्री महाजन यांनी या अहवालावर नाराजी व्यक्त करत चौकशी प्रक्रियेवर प्रश्नचिन्ह उपस्थित केले.
पुन्हा चौकशीचे निर्देश
“पंधरा हजार रुपयांची मदत म्हणजे केवळ प्रवास खर्चापेक्षा कमी आहे. वास्तविक नुकसान किती झाले याचा वस्तुनिष्ठ अभ्यासच झालेला नाही. त्यामुळे जिल्हाधिकाऱ्यांना नव्याने चौकशी करण्याचे निर्देश देण्यात येत आहेत. कंपनीने मंजूर मार्गानेच पाईपलाईन टाकावी व तोपर्यंत गळती होणार नाही याची काळजी कंपनीने घ्यावी,” असे स्पष्ट निर्देश जलसंपदा मंत्री गिरीश महाजन यांनी सभागृहात दिले.
धारीवाल कंपनीकडून शेतकऱ्यांना नुकसान भरपाई मिळेपर्यंत सभागृहात पाठपुरावा करणार असल्याचे यावेळी आमदार अडबाले यांनी सांगितले.
illegal oyo hotels in chandrapur : चंद्रपूर – जोडप्यांचा स्वर्ग म्हणून ओळखल्या जाणाऱ्या OYO हॉटेल चा लोगो वापरणाऱ्या हॉटेल व लॉजेस मालकांवर चंद्रपुरात गुन्हे दाखल करण्यात आले आहे. काही महिन्यापूर्वी आमदार जोरगेवार यांनी oyo हॉटेल्स ची चौकशी करण्याची मागणी केली होती, पावसाळी अधिवेशनात माजी मंत्री आमदार सुधीर मुनगंटीवार यांनी ओयो प्रकरण चांगलेच गाजवले. जगभरात ओयो हॉटेलचे लाखो रूम्स आहे मात्र चंद्रपूर जिल्ह्यात अवैध पद्धतीने कंपनीच्या संमती शिवाय ओयो सुरु आहे. oyo trademark misuse cases
अहमदाबाद मधील OYOचे नोडल अधिकारी यांनी १८ जुलै रोजी चंद्रपूर शहर पोलीस स्टेशनमध्ये तक्रार दिली कि ओयो रूम्स हि कंपनी अधिनियम २०१३ अंतर्गत नोंदणीकृत कंपनी असून ओयो रूम्स हे कंपनीचे ट्रेडमार्क आहे, इतर हॉटेलपेक्षा कमी बजेट मध्ये ओयो रूम्स उपलब्ध होतात मात्र चंद्रपुरात ओयो कंपनीचा ब्रँड लोगो बनावट पध्द्तीने बनवीत त्याचा हॉटेल व लॉज मालक व्यवसाय करीत असल्याच्या तक्रारी कंपनीकडे प्राप्त झाल्या होत्या. fake oyo hotel logo case chandrapur
याबाबत शहानिशा करण्यासाठी कंपनीचे नोडल अधिकारी मनोज पाटील यांनी गोपनीयरित्या याबाबत माहिती घेतली असता चंद्रपूर शहरातील एकूण १५ हॉटेल व लॉजेस कंपनीच्या संमतीशिवाय बनावट ओयो लोगो वापरीत त्याचा व्यवसायात गैरवापर करीत असल्याचे आढळले. याबाबत नोडल अधिकारी यांनी संबंधित हॉटेल व लॉज मालकांविरुद्ध पोलिसात तक्रार दिली.
हे हॉटेल व लॉज करीत होते ओयो चा व्यवसायात वापर
Hotel Royal Inn, ballarpur road, chandrapur
Hotel Dream Stay, ashtabhuja
Hotel Friends Stay, Ballarpur road
Leo Star Hotel, ashtabhuja ward
Hotel RR Inn, babupeth
Hotel Sky Line, Ashtabhuja ward
Hotel Ashoka Lodging and Boarding, babupeth
Hotel IK Residency, vikas nagar
hotel 3 star Babupeth
Hotel Celebrity, babupeth
Hotel Green Park, babupeth
Hotel 7 Day, Mahakali Mandir Road
Hotel Sunrise, Jatpura Gate
Rayan Hotel & Celebration, Vichoda
Hotel Flagship Inn, near janta college
चंद्रपूर शहर पोलिसांना तक्रार प्राप्त होताच संबंधित हॉटेल व लॉज मालकांवर भारतीय न्यायसंहिता २०२३ सहकलम १०३, १०४ ट्रेडमार्क अधिनियम १९९९ प्रमाणे गुन्हा दाखल करण्यात आला.
पोलीस निरीक्षक निशिकांत रामटेके यांच्या नेतृत्वात चंद्रपूर शहर हद्दीतील ८ लॉजेस वर धाडी टाकत आवश्यक कारवाई करण्यात आली असून सदर प्रकरणाचा पुढील व सखोल तपास सुरु करण्यात आला आहे.
female ganja peddlers : चंद्रपूर – चंद्रपूर सारख्या मागासवर्गीय जिल्ह्यात अंमली पदार्थाची तस्करी मोठ्या प्रमाणात वाढलेली आहे. एमडी, गांजा, सुगंधित तंबाखू हे पदार्थ सहजपणे उपलब्ध होऊ लागलेले आहे, मात्र पोलीस यंत्रणा यावर गांभीर्याने लक्ष देत नसल्याचे दिसून येत आहे. विशेष म्हणजे आता अंमली पदार्थाच्या विक्री मध्ये महिलांची एंट्री झाली आहे. चंद्रपूर शहर पोलिसांनी गांजा विक्री करणाऱ्या २ महिलांविरुद्ध गुन्हा दाखल केला आहे.
१ किलो गांजा जप्त
१९ जुलै रोजी शहर पोलिसांना माहिती मिळाली कि दोन महिला राहत्या घरून गांजा विक्री करीत आहे, माहितीच्या आधारे पोलीस पथक भिवापूर वॉर्ड येथे एका घरी धाड मारली असता पोलिसांना १ किलो १५७.५ ग्राम गांजा किंमत १२ हजार रुपये आढळून आला. याप्रकरणी पोलिसांनी कुख्यात सराईत गुन्हेगार ३३ वर्षीय मुस्कान उर्फ स्नेहा उर्फ भारती सुरेश खैरे व ५५ वर्षीय पुष्पा पांडुरंग बानलवार यांच्यावर गुन्हा दाखल करीत अटक केली. drug arrest cases in Chandrapur
नेटवर्क तयार
चंद्रपूर जिल्ह्यात गांजा विक्री मध्ये महिलांचं नेटवर्क वाढत असल्याची माहिती असून महाविद्यालय व इतर ठिकाणी महिला व मुली या अंमली पदार्थ विक्री नेटवर्कचा भाग झाले आहे, सहसा मुली व महिलांवर संशय जात नसल्याने हा धंदा चंद्रपुरात जोमात सुरु आहे.
peacock poaching in chandrapur : चंद्रपूर – जगप्रसिद्ध ताडोबा अभयारण्यातील वन्यजीव आता शहराकडे येऊ लागल्याने त्यांच्यावर आता शिकाऱ्यांच्या नजरा लागून आहे, मागील वर्षी देशातील सर्वात मोठो टोळी बहेलिया चे सदस्य राजुरा तालुक्यात आढळून आले, वनविभागाने शिकाऱ्याना अटक केली मात्र वनविभागाच्या नजरा चुकवून त्यांनी वाघांची शिकार मात्र केली. आता शहराच्या कडेला लागून असलेल्या माना टेकडी परिसरात राष्ट्रीय पक्षी मोराची शिकार केल्या जात असलेली धक्कादायक बाब उघडकीस आली आहे. illegal hunting of national bird
मोरांना पकडण्यासाठी १ किलोमीटर जाळं
माना टेकडी हा वन सदृश्य परिसर असल्याने या निसर्गरम्य भागात सकाळच्या सुमारास मॉर्निंग वॉक साठी असंख्य नागरिक येतात. नागरिकांनी याठिकाणी अनेकदा विविध वन्यप्राणी बघितले आहे, विशेषकरून या भागात मोरांचे वास्तव्य मोठ्या प्रमाणात आहे. याचाच फायदा शिकारी घेत आहे. सदर बाब जागरूक नागरिक माना निसर्ग भ्रमंती मंडळ चंद्रपूरचे अध्यक्ष अनुप चिवंडे यांनी उघडकी आणली असून झरपट व इरई नदीच्या पात्राजवळ शिकाऱ्यानी तब्बल १ किलोमीटर पर्यंत जाळं लावलं होत. ते संपूर्ण जाळ चिवंडे यांनी सहकाऱ्यांसोबत मिळून बाहेर काढले.
याबाबत चिवंडे यांनी आमदार सुधीर मुनगंटीवार, किशोर जोरगेवार व मुख्य वनसंरक्षक जितेंद्र रामगावकर यांना निवेदन दिले होते मात्र त्या निवेदनाची दखल कुणी घेतली नाही. काही दिवसांपूर्वी चिवंडे यांनी मोराची शिकार करण्याच्या तयारीत असलेल्या काही इसमांना हटकले मात्र ते इसम चिवंडे यांच्या अंगावर धावून आले होते.
१९ जुलै रोजी चिवंडे हे आपल्या सहकाऱ्यांसोबत फिरायला गेले असता त्यांना नदीजवळील पात्रात मोरांना पकडण्याकरिता जाळं लावल्याचे दिसले त्यांनी तात्काळ सदर जाळ बाहेर काढले याबाबत वनविभागाच्या वनपरिक्षेत्र अधिकाऱ्यांना माहिती देण्यासाठी संपर्क केला मात्र त्यांनी प्रतिसाद दिला नाही. peacock hunting cases
माना टेकडीच्या या परिसरात झाडे-झुडपे असल्याने वन्यप्राणी या भागात येतात, मोर, अस्वल या प्राण्यांचा याठिकाणी वावर असतो मात्र काही दिवसांपासून वन्यप्राणी दिसेनासे झाल्याने चिवंडे यांनी याबाबत माहिती काढणे सुरु केले आणि हा धक्कादायक प्रकार उघडकीस आला. मोरांच्या शिकाऱ्यावर कारवाई व्हावी यासाठी पोलीस व वनविभागाला पुन्हा निवेदन देणार असल्याची माहिती चिवंडे यांनी दिली.
mhada office property seizure by court : चंद्रपूर : चंद्रपूर येथील दिवाणी वरिष्ठ न्यायालयाने दिलेल्या आदेशानुसार, दाताळा येथील म्हाडा कार्यालयातील जंगम मालमत्ता जप्त करण्यात आली. ही कारवाई बुधवारी शेतमालकांना दिल्या जाणाऱ्या वाढीव नुकसानभरपाईची रक्कम रू. २ कोटी ४३ लाख २९५ रुपये न भरल्यामुळे करण्यात आली.
कोसारा येथील भू.नं. १४४/१ या जमिनीचे संपादन म्हाडाने केल्यानंतर शेतमालक हरीदास लक्ष्मण पाऊनकर, सुभाष लक्ष्मण पाऊनकर व इतरांनी न्यायालयात दाद मागितली. न्यायालयाने त्यांना वाढीव नुकसानभरपाई मंजूर केली. म्हाडाने या निर्णयाविरोधात उच्च न्यायालयात अपील केले मात्र ते फेटाळण्यात आले. परिणामी, शेतमालकांच्या बाजूने निर्णय कायम राहिला.
तरीही म्हाडाने रक्कम न भरल्याने न्यायालयाने जप्तीचे आदेश दिले. त्यानुसार न्यायालयाचे बेलीफ दाताळा येथील म्हाडा कार्यालयात जाऊन टेबल, खुर्च्या, व कंप्युटर जप्त केले. ही मालमत्ता शेतमालकाच्या सुपुर्दनाम्यावर ठेवण्यात आली आहे. जर म्हाडाने लवकरात लवकर रक्कम भरली नाही, तर या मालमत्तेचा लिलाव होण्याची शक्यता आहे. या प्रकरणात शेतमालकांच्या वतीने अॅड. पुरुषोत्तम सातपूते यांनी प्रभावीपणे बाजू मांडत महत्त्वपूर्ण विजय मिळवून दिला. court ordered auction of seized govt office property
हे प्रकरण संपादित संस्थांच्या भूमिकेवर प्रश्नचिन्ह निर्माण करणारे ठरत आहे. न्यायालयाच्या आदेशाकडे दुर्लक्ष करणाऱ्या संस्थांवर कायद्याने कारवाई होणे ही लोकशाहीत एक सकारात्मक बाब आहे.
मोबदला न दिल्याने जप्तीची कारवाई
शेतकऱ्यांना जमिनीचा मोबदला अतिशय कमी दिला होता. या प्रकरणी न्यायालयात दाद मागण्यात आली. न्यायालयाने अतिरिक्त भरपाई देण्याचे आदेश देहूनही मोबदला न दिल्यामुळे ही कारवाही करण्यात आली. -अड पुरुषोत्तम सातपुते चंद्रपूर
gondwana university chandrapur sub center : मुंबई : राज्याचे माजी वने, सांस्कृतिक कार्य व मत्स्यव्यवसाय मंत्री आमदार श्री. सुधीर मुनगंटीवार यांनी चंद्रपूर जिल्ह्याच्या सर्वांगीण विकासाच्या दृष्टीचा ध्यास घेतला आहे. त्यादृष्टीने त्यांनी सर्वच क्षेत्रांच्या विकासासाठी सातत्याने प्रयत्न केले आणि त्यात त्यांना यशही आले आहे. शिक्षण क्षेत्राच्या विकासालाही त्यांच्या प्रयत्नांमुळेच गती मिळणार आहे. यासंदर्भातील एक मोठा निर्णय अलीकडेच झाला. आमदार श्री. सुधीर मुनगंटीवार यांच्या सातत्यपूर्ण पाठपुराव्यामुळे गोंडवाना विद्यापीठ गडचिरोलीचे चंद्रपूर जिल्ह्यातील उपकेंद्र चंद्रपूर शहरात सुरू करण्यासह मुल शहरात नवीन शासकीय तंत्रनिकेतन महाविद्यालय स्थापन करण्याच्या प्रस्तावाला देखील मंजुरी मिळाली आहे. chandrapur university sub centre gadchiroli expansion
विदर्भातील युवकांचे भविष्य उज्वल करण्यासाठी व शिक्षण क्षेत्रात भरीव प्रगती साधण्यासाठी चंद्रपूर जिल्ह्यातील या दोन महत्त्वपूर्ण मागण्यांवर सकारात्मक पाऊल पडले आहे. या संदर्भातील बैठक अलीकडेच उच्च व तंत्रशिक्षण मंत्री श्री. चंद्रकांतदादा पाटील यांच्या अध्यक्षतेत मुंबईतील सुवर्णगड या शासकीय निवासस्थानी पार पडली. या बैठकीस आ.सुधीर मुनगंटीवार यांची प्रमूख उपस्थिती होती. यासोबत उच्च शिक्षण विभागाचे वरिष्ठ अधिकारी, गोंडवाना विद्यापीठाचे पदाधिकारी तसेच विविध यंत्रणांचे प्रतिनिधी उपस्थित होते.
या बैठकीत दोन्ही विषयांवर सकारात्मक चर्चा झाली असून, उच्च व तंत्रशिक्षण मंत्री श्री. चंद्रकांतदादा पाटील यांनी दोन्ही प्रस्तावांना त्वरित कार्यवाहीसाठी स्पष्ट निर्देश दिले आहेत. विशेष म्हणजे, गोंडवाना विद्यापीठाच्या उपकेंद्रासाठी तब्बल ४१४ कोटींच्या प्रस्तावाला प्रशासकीय मान्यता देण्याचा ऐतिहासिक निर्णय या बैठकीत घेण्यात आला आहे. हा प्रस्ताव पुढील प्रक्रियेसाठी उच्चस्तरीय समितीकडे पाठविण्याचे आदेश देण्यात आले आहेत.
आ. सुधीर मुनगंटीवार यांनी चंद्रपूर जिल्ह्यातील युवकांना दर्जेदार उच्च शिक्षणाची सुविधा उपलब्ध व्हावी यासाठी गेल्या अनेक वर्षांपासून पाठपुरावा केला. त्यांच्या दूरदृष्टीमुळेच जिल्ह्यातील युवकांना आता शिक्षणाच्या नव्या संधी उपलब्ध होणार आहेत. यामुळे रोजगारक्षम शिक्षणाचे दालन खुले होईल आणि जिल्ह्यातील विद्यार्थ्यांचा शिक्षणाचा स्तर भक्कमपणे उंचावणार आहे, असा विश्वास व्यक्त केला जात आहे.
चंद्रपूरच्या शिक्षण विकासाच्या दिशेने टाकलेले हे पाऊल युवकांच्या प्रगतीचा नवा अध्याय लिहणारे ठरणार आहे, असा विश्वास नागरीकांमध्ये व्यक्त करण्यात येत आहे.
minority scholarship 2025-26 for abroad study : चंद्रपूर, दि. 19 : अल्पसंख्यांक विकास विभागाच्या वतीने, अल्पसंख्यांक समुदायातील विद्यार्थ्यांना परदेशात उच्च शिक्षण घेता यावे, यासाठी सन 2025-26 करिता शिष्यवृत्ती योजना राबविण्यात येत आहे. योजनेत सहभागी होण्यासाठी पात्र विद्यार्थ्यांकडून अर्ज मागविण्यात येत आहेत.
सदर अर्ज https://fs.maharashtra.gov.in या अधिकृत संकेतस्थळावर ऑनलाईन पद्धतीने 1 ऑगस्ट 2025 च्या सायंकाळी 6.15 वाजेपर्यंत सादर करणे आवश्यक आहे. अर्जाची छायाप्रत आवश्यक त्या कागदपत्रांसह प्रत्यक्ष किंवा टपालाने समाज कल्याण आयुक्तालय, 3 चर्च रोड, पुणे – 411001 येथे पाठवावी. overseas education scholarship
अर्जदार महाराष्ट्राचा रहिवासी असावा व अल्पसंख्यांक समुदायात येणारा असावा, पदव्युत्तर अभ्यासक्रमासाठी 35 वर्षे, तर पीएचडीसाठी 40 वर्षे ही वयोमर्यादा राहील. कुटुंबाचे एकत्रित वार्षिक उत्पन्न 8 लाख रुपयांपेक्षा अधिक नसावे, शैक्षणिक पात्रतेत किमान 55 टक्के गुण आवश्यक आहेत. शिष्यवृत्ती QS World University Ranking मध्ये 200 च्या आतील विद्यापीठांमध्ये प्रवेश असलेल्या अभ्यासक्रमांसाठीच देण्यात येईल. (UNSW, ऑस्ट्रेलिया वगळलेले आहे.) विद्यार्थ्यांस शिक्षण शुल्क, प्रवास खर्च, निवास भत्ता, आरोग्य विमा, आकस्मिक खर्च इत्यादी प्रतिपूर्ती स्वरूपात देण्यात येईल.
USD 15,400 (USA व इतर देशांसाठी) व GBP 9,900 (UK साठी) या मर्यादेत निर्वाह भत्ता देण्यात येईल. आकस्मिक खर्चासाठी अनुक्रमे USD 1,500 (USA) व GBP 1,100 (UK) इतकी रक्कम मंजूर असेल. प्रत्येक सत्रात नियमित प्रगती, गुणपत्रिका आणि शैक्षणिक अहवाल सादर करणे बंधनकारक राहील.
या शिष्यवृत्ती योजनेचा जास्तीत जास्त अल्पसंख्यांक विद्यार्थ्यांनी लाभ घ्यावा तसेच अधिक माहितीसाठी www.maharashtra.gov.in या संकेतस्थळावरील ‘ताज्या घडामोडी’ या लिंकला भेट द्यावी, असे आवाहन सहाय्यक आयुक्त, समाज कल्याण विनोद मोहतुरे यांनी केले आहे.
