My Blog

Category: ताज्या बातम्या

महाराष्ट्र, राष्ट्रीय आणि आंतरराष्ट्रीय स्तरावरील सर्व ताज्या बातम्या (Latest News) आणि ब्रेकिंग अपडेट्स वाचण्यासाठी रोज भेट द्या news34.in वर. राजकारण, समाजकारण, क्रीडा, गुन्हेगारी आणि आर्थिक घडामोडींचे त्वरित आणि विश्वसनीय कव्हरेज येथे उपलब्ध आहे. २४ तास सुरू असलेल्या घडामोडींची अचूक माहिती मिळवा, जेणेकरून कोणतीही मोठी बातमी तुमच्यापासून सुटणार नाही.

  • वरोरा पोलिसांची गंभीर गुन्ह्यात दमदार कामगिरी

    News34

    चंद्रपूर/ वरोरा – बेपत्ता मुलीचा शोध घेत असताना वरोरा पोलिसांना अल्पवयीन मुलगी आढळली आणि शहरातील मोठं देहव्यापाराचे नेटवर्क उघडे पडले.

    अल्पवयीन मुलीला देह व्यापारात महिला व पुरुष एजंटने ढकलत तिला विविध ग्राहकांकडे पाठविण्यात आले होते, मात्र हे सर्व नेटवर्क पोलीस उपविभागीय अधिकारी आयुष नोपाणी यांनी उघडकीस आणले.

    या प्रकरणात 13 आरोपीना अटक करण्यात आली होती, बुधवारी न्यायालयाने आरोपीना 14 दिवसांची न्यायालयीन कोठडी सुनावली आहे.

    या प्रकरणात आरोपीच्या आई वडिलांनी पत्रकार परिषद घेत पोलीस विभागावर गंभीर आरोप केले, निव्वळ फोन कॉल व ऑनलाइन पैसे दिल्याने आमची मुलं आरोपी कसे असा प्रश्न पत्रकार परिषदेत करण्यात आला, आम्हाला आमच्या मुलांना पोलीस विभाग भेटू देत नसल्याचे पत्रकार परिषदेत आरोपी युवकांच्या आई वडिलांनी सांगितले.

    चंद्रपूर जिल्ह्यात पत्रकाराची आत्महत्या

    याबाबत पोलिसांनी आमच्याकडे अटक करण्यात आलेल्या आरोपी विरोधात सबळ पुरावे असल्याची माहिती दिली आहे, विशेष म्हणजे काही आरोपींवर गंभीर गुन्हे सुद्धा दाखल असल्याची माहिती आहे.

    अन्य आरोपींनी अल्पवयीन मुलीला चाकूचा धाक दाखवून तिच्यावर अत्याचार केला आणि तिच्यावर वेगवेगळ्या ठिकाणी वारंवार बलात्कार केला.
    पोलिसांकडे विविध ठिकाणी आणि वाहनात केलेल्या जघन्य गुन्ह्याशी संबंधित आरोपींविरुद्ध व्हिडिओ फुटेज आणि भरपूर पुरावे आहेत. पडताळणीनंतर त्यांना ताब्यात घेण्यात आले, असे पोलीस अधिकाऱ्याने सांगितले.

    पीडित मुलीचा व्हिडीओ व्हायरल

    या प्रकरणातील अल्पवयीन पीडित मुलीसोबत एका तथाकथित नेत्याने आक्षेपार्ह संभाषण करीत व्हिडीओ व्हायरल केला आणि त्या मुलीची ओळख जनमानसात प्रसिद्ध केली या प्रकरणी रमेश मेश्राम व इतर दोघांविरुद्ध भद्रावती पोलीस ठाण्यात विविध कलमांव्ये गुन्हा दाखल करण्यात आला आहे.

    देहव्यापारासारख्या गंभीर गुन्ह्यात वरोरा पोलिसांनी कौतुकास्पद कामगिरी बजावीत प्रकरण चांगल्या पद्धतीने हाताळले, गुन्ह्यात सहभागी आरोपीना अटक तत्परता दाखवली.

    या प्रकरणाचा पुढील तपास पोलीस उपविभागीय अधिकारी आयुष नोपाणी, पोलीस निरीक्षक अमोल काचोरे व व्हायरल व्हिडीओ प्रकरणाचा तपास भद्रावती पोलीस निरीक्षक विपीन इंगळे करीत आहे.

  • 15 August : चंद्रपूर जिल्ह्यात 15 ऑगस्ट पर्यंत जमावबंदी

    15 August चंद्रपूर : जिल्ह्यात कायदा व सुव्यवस्था अबाधित राहावी म्हणून जिल्हाधिकारी विनय गौडा यांनी दि. 1 ऑगस्ट ते 15 ऑगस्ट 2023 पर्यंत महाराष्ट्र पोलीस अधिनियम, 1951 चे कलम 37 (1)(3) नुसार जमावबंदी आदेश लागू केले आहे.

    राजकीय बातमी – शहरात अनियमित पाणी पुरवठा, कांग्रेसने पालिकेवर काढला घागर मोर्चा

    15 august या आदेशान्वये संबंधित अधिकारी यांच्या पूर्व परवानगीशिवाय सभा, मोर्चा, उत्सव व मिरवणुका काढता येणार नाही. पाच किंवा त्यापेक्षा जास्त व्यक्ती सार्वजनिक ठिकाणी, रस्त्यावर किंवा चावडीवर जमा होणार नाहीत किंवा कोणतेही कार्यक्रम आयोजित करणार नाहीत. जिल्ह्याच्या कार्यक्षेत्रात शासकीय कर्तव्य पार पाडणाऱ्या व्यक्ती व्यतिरिक्त अन्य कोणत्याही ठिकाणी अथवा कोणत्याही व्यक्तीस, शस्त्रे, तलवारी, भाले, दंडे, बंदुका, रिव्हॉल्व्हर, सुरे, काट्या किंवा लाठ्या किंवा शारीरिक इजा करता येईल, अशी इतर कोणतीही वस्तू, कोणताही क्षार, द्रव्ये पदार्थ, दाहक पदार्थ किंवा स्फोटक पदार्थ जवळ बाळगता येणार नाही. दगड किंवा इतर क्षेपणास्त्रे किंवा साधने बाळगणे, जमा करणे किंवा तयार करणे, व्यक्तीच्या आकृत्या, प्रतिमा यांचे प्रदर्शन करणे, जाहीरपणे घोषणा करणे, गाणी म्हणणे, वाद्य वाजविणे, तसेच यामुळे सभ्यता आणि नीतिमत्ता यास धोका पोहोचेल अशी किंवा राज्याची सुरक्षितता धोक्यात येईल असे किंवा आवेशपूर्ण भाषणे करणे, हावभाव करणे, चित्रे, चिन्हे, फलक किंवा इतर कोणताही जिन्नस किंवा वस्तू तयार करणे, त्यांचे प्रदर्शन करणे, त्याचा जनतेत प्रसार करणे इत्यादीस प्रतिबंध करण्यात आला आहे.

    सदर आदेश 1 ऑगस्ट ते 15 ऑगस्ट 2023 पर्यंत संपूर्ण चंद्रपूर जिल्ह्याच्या कार्यक्षेत्राकरीता लागू राहील, असे जिल्हाधिकारी तथा जिल्हा दंडाधिकारी विनय गौडा जी. सी. यांनी निर्गमित केलेल्या आदेशात नमूद आहे.

  • चंद्रपुरातील इरई नदीच्या काठी संरक्षण भिंतीचे निर्माण होणार

    News34

    चंद्रपूरात वारंवार उद्भवत असलेल्या पूर परिस्थितीवर कायमचा तोडगा काढण्यासाठी जलसंपदा विभागाच्या वतीने सादर करण्यात आलेल्या इरई नदी काठी पूर सरंक्षण भिंतीच्या बांधकाम प्रस्तावास तात्काळ मंजूरी प्रदान करण्यात यावी अशी मागणी आमदार किशोर जोरगेवार यांनी मुंबई मंत्रालय येथे मदत व पुनर्वसन मंत्री अनिल पाटील यांची भेट घेत केली आहे.

    अल्पशा पावसाने चंद्रपूरात वारंवार पुरपरिस्थिती निर्माण होत आहे. त्यामुळे नागरिकांचे मोठे आर्थिक नुकसान होत आहे. या भागात जिवीतहाणी होण्याची शक्यताही बढावली आहे. त्यामुळे आता याचे योग्य नियोजन करुन भविष्यात उद्भवणा-या पूरपरिस्थितीवर कायमस्वरुपी उपाययोजना करण्याची गरज आहे. सदर विषय आमदार किशोर जोरगेवार यांनी उचलून धरला असून पावसाळी अधिवेशनातही त्यांनी या विषयाकडे सभागृहाचे लक्ष वेधत यावर कायमस्वरुपी उपायोजना करण्याची मागणी केली होती.

    चंद्रपूर शहराच्या पश्चिमेला वाहणाऱ्या इरई नदीकाठा जवळील परिसरात कामगार वर्ग मोठ्या प्रमाणात वास्तव्यास आहे. पावसाळयात अतिवृष्टीमुळे पुराचे पाणी या सखोल नागरी भागात शिरत आहे. सन २००६, २०१३ आणि २०२२ तसेच या वर्षी सुद्धा या भागात पुरपरिस्थीती निर्माण झाली. त्यामुळे मोठ्या प्रमाणात या भागातील घरांचे नुकसान होवून वित्तहानी झाली आहे. दरवर्षी सखोल भागात पूर परिस्थिती उद्भवत आहे. त्यामुळे भविष्यात उद्भवणाऱ्या संभाव्य पुरपरिस्थितीवर कायमस्वरूपी उपाययोजना करणे आवश्यक आहे.
    या विषयाची गंभीरता लक्षात घेत राज्य शासनानेही पुरसंरक्षण भिंत बांधकामाचा प्रस्ताव तयार करण्याबाबतचे निर्देश जलसंपदा विभागाला दिले असून तसा प्रस्तावही तयार करण्यात आला आहे.

    पडोली पूल ते चौराळा पुलाचे अंतर ७ किमी असून नदीच्या समांतर डाव्या बाजूस चंद्रपूर शहराची लोक वस्ती आहे. या संपूर्ण लांबी मध्ये पूर संरक्षक भिंतीची आवश्यकता आहे,
    सदर पूर संरक्षण भिंत बांधकाम बाबत जिल्हाधिकारी यांच्या अध्यक्षतेखाली जिल्हा आपत्ती व्यवस्थापन प्राधिकरण समिती चंद्रपूर यांच्या सभेत शासनातर्फे निर्देश दिल्यानुसार प्राधिकरणाची मान्यता घेऊन दिनांक 23.12.2022 रोजीच्या 24 कोटी 94 लक्ष 13 हजार 237 रुपये या रक्कमेत आवश्यकतेनुसार बदल करत सुधारित रक्कम 49, कोटी 34 लक्ष 19 हजार, 908 रुपयांच्या प्रस्तावाला मान्यता देऊन तो शासनास सादर करण्यात आला आहे.

    आता मदत व पूनर्वसन विभागानेही या प्रस्तावास मंजुरी प्रदान करावी यावी अशी मागणी यावेळी आमदार किशोर जोरगेवार त्यांनी मदत व पूनर्वसन मंत्री अनिल पाटील यांना केली आहे. यावेळी आमदार किशोर जोरगेवार यांची ना. अनिल पाटील यांच्याशी सकारात्मक चर्चा झाली आहे.

  • वरोरा पोलीस स्टेशन पुन्हा चर्चेत

    News34

    चंद्रपूर /वरोरा – 7 ऑगस्ट ला अत्याचारग्रस्त महिलेने वरोरा पोलीस स्टेशनच्या आवारात विष प्राशन करीत खळबळ माजवून टाकली होती, त्या घटनेनंतर 8 ऑगस्ट ला पुन्हा एका महिलेने पोलीस स्टेशनच्या आवारात विष प्राशन केल्याची घटना घडली मात्र त्या महिलेने बनाव केल्याचे उघडकीस आले.

    वरोरा तालुक्यातील 48 वर्षीय अर्चना दिवाकर दिवटे ही महिला सायंकाळच्या सुमारास वरोरा पोलीस स्टेशनमध्ये पोहचली, आमच्या शेतात चाफले नामक व्यक्तीने खांब लावले त्यांच्यावर कारवाई करावी याबाबत 4 दिवस आधी तक्रार दिली होती, मात्र त्याच्यावर कारवाई करण्यात आली नसल्याने ती महिला आज विष सोबत घेत वरोरा पोलीस स्टेशनमध्ये दाखल झाली, शौचाच्या बहाण्याने त्या महिलेने पिशवीतून बॉटल काढत तिने विष प्राशन केले.
    अचानक झालेली ही घटना बघून पोलीस विभाग सतर्क झाले.

    तात्काळ त्या महिलेला वरोरा उपजिल्हा रुग्णालयात नेण्यात आले, मात्र त्या महिलेने तपासणी करण्यासाठी आलेल्या डॉक्टरला रोखले, पोलिसांना संशय आला असता त्यांनी त्या महिलेच्या कुटुंबातील सदस्यांना विचारणा केली असता आम्ही कालच्या घटनेला प्रेरित होऊन हे पाऊल उचलले असल्याचे सांगितले.

    सदर माहिती मिळाल्यावर पोलिसही अवाक झाले, याबाबत पोलीस उपविभागीय अधिकारी आयुष नोपाणी यांनी माहिती दिली की सदर महिलेच्या प्रकरणात पोलिसांची कसलीही भूमिका नव्हती, रुग्णालयात गेल्यावर जेव्हा त्या महिलेने डॉक्टरला तपासणी करू दिली नाही तेव्हा आम्हाला संशय आला होता, विशेष म्हणजे पोलीस स्टेशनच्या आवारात असलेल्या सीसीटीव्ही मध्ये संपूर्ण घटनाक्रम कैद झाला आहे.

    पिशवीत जी बॉटल त्या महिलेने आणली होती त्यामध्ये काही नव्हते, सध्या त्या महिलेला चंद्रपूर जिल्हा रुग्णालयात नेण्यात आले आहे.
    त्या महिलेने हा बनाव का केला याबाबत तपास करीत रीतसर कायदेशीर प्रक्रियेने कारवाई करण्यात येणार असल्याची माहिती नोपाणी यांनी दिली

    वरोरा पोलीस उपविभागात भापोसे sdpo म्हणून आयुष नोपाणी हे रुजू झाल्यावर त्यांनी अनेकांवर कारवाईचा धडाका लावला होता, सध्या वरोरा येथील सर्व अवैध धंद्यावर नोपाणी यांनी चाप बसविला आहे.

    त्यांच्या प्रामाणिक भूमिकेला काहीजण विरोध करीत पोलीस विभागाला बदनाम तर करीत नाही ना अशी चर्चा सध्या जनमानसांत सुरू आहे.

     

  • देशातील 7 विधानसभा जागेवर पोटनिवडणुकीची घोषणा

    News34

    नवी दिल्ली – केंद्रीय निवडणूक आयोगाने देशातील 7 विधानसभा जागेवर पोटनिवडणूकी ची घोषणा केली आहे.

    यामध्ये झारखंड, त्रिपुरा, केरळ, पश्चिम बंगाल, उत्तर प्रदेश व उत्तराखंड या जागेचा समावेश आहे.

    मात्र चंद्रपूर व पुणे लोकसभा मतदार संघाच्या पोटनिवडणूक बाबत निवडणूक आयोगाने काही एक घोषणा केली नाही, ज्यामुळे राज्यातील 2 लोकसभा जागेची निवडणूक होणार नाही याबाबत सध्यातरी संभ्रम आहे.

    देशातील 7 जागेवर 5 सप्टेंबर ला विधानसभा पोटनिवडणूक होणार आहे, सध्या वर्षांपेक्षा कमी कालावधी लोकसभा निवडणुकीला बाकी आहे.

    भाजपचे ज्येष्ठ नेते खासदार गिरीश बापट यांचं 29 मार्च 2023 ला निधन झाले होते, ते पुणे लोकसभा क्षेत्राचे खासदार होते, चंद्रपूर लोकसभा व राज्यातील कांग्रेसचे एकमेव खासदार बाळू धानोरकर यांचं 30 मे 2023 ला निधन झाले होते.

    पोटनिवडणूक होणार की नाही यावर संभ्रम होता मात्र आज निवडणूक आयोगाने 7 विधानसभा पोटनिवडणूकीची घोषणा केल्यावर चंद्रपूर व पुणे लोकसभा पोटनिवडणूक त्यामधून वगळली आहे.

  • राष्ट्रीय ओबीसी महासंघाच्या तिरुपती अधिवेशनामध्ये ४२ मागण्यांचे ठराव पारीत

    News34

     

    चंद्रपूर : राष्ट्रीय ओबीसी महासंघाचे ८ वे राष्ट्रीय अधिवेशन आंध्रप्रदेश येथील तिरुपती येथे ७ ऑगस्ट रोजी संपन्न झाले. दिवसभर चाललेल्या या महाअधिवेशनात ओबीसी समाजाशी संबंधित ४२ मागण्यांचे ठराव पारीत करण्यात आले.

    तिरुपती येथील या महाअधिवेशनाचे उद्घाटन राष्ट्रीय मागास वर्गीय आयोगाचे अध्यक्ष माजी केंद्रीय मंत्री हंसराज अहिर यांच्या हस्ते करण्यात आले.

    या अधिवेशनाला राष्ट्रीय मागासवर्गीय आयोगाचे अध्यक्ष माजी खासदार हंसराज अहिर, एआयएमआयएम चे अध्यक्ष खासदार असुद्दिन औवेसी, जस्टिस व्ही. ईश्वरय्या, राष्ट्रीय समाज पक्षाचे महादेव जानकार, आमदार परिनय फूके, आमदार अभिजित वंजारी, आमदार सुधाकर अडबाले, माजी आमदार डॉ. अविनाश वारजुकर, आदी अनेक मान्यवर उपस्थित होते.

    राष्ट्रीय ओबीसी महासंघाचे राष्ट्रीय अध्यक्ष डॉ. बबनराव तायवाडे, महासचिव सचिन राजूरकर, राष्ट्रीय समन्वयक डॉ. अशोक जीवतोडे यांची आयोजनात महत्त्वाची भूमिका होती.

    ‘जो ओबीसी की बात करेगा, वही ‘देश पे राज करेगा’, ‘जय ओबीसी’, ‘जातनिहाय जनगणना झालीच पाहिजे’, आदी घोषणांनी महाअधिवेशन गाजले.

    ओबीसी नेते डॉ. अशोक जीवतोडे अध्यक्षस्थानावरून म्हणाले की, दर वर्षी देशाच्या विविध भागात आम्ही ओबीसी महाअधिवेशन आयोजित करतो. अधिवेशन हे केवळ निमित्त मात्र आहे, या माध्यमातून देशातील कानाकोपऱ्यातील ओबीसी बांधावांपर्यंत पोहोचण्याचा हा प्रयत्न असतो. ओबीसी समाजात ऊर्जा व जागरूकता निर्माण करण्याचा हेतू असतो. शेवटच्या श्वासापर्यंत ओबीसी समाजासाठी लढत राहू.

    राज्याच्या सर्व शाखांमध्ये अनुसूचित जाती, जमाती आणि ओबीसींना लोकसंख्येच्या योग्य प्रमाणात आरक्षण व प्रतिनिधीत्व देण्यासाठी जातनिहाय जनगणना करावी, ४ मार्च २०२१च्या सर्वोच्च न्यायालयाच्या आदेशानुसार रद्द करण्यात आलेले ओबीसींचे राजकीय आरक्षण पूर्ववत करण्यासाठी घटनेच्या कलमात सुधारणा करावी किंवा २७ टक्के लागू करावे, ओबीसींसाठी लोकसंख्येच्या प्रमाणात अर्थसंकल्पात तरतूद करावी आणि स्वतंत्र मंत्रालयाची स्थापना करावी, सर्व शासकीय व निमशासकीय संस्थांना जुनी पेन्शन योजना लागू करावी, सर्वोच्च न्यायालयाने घातलेली ५०% आरक्षणाची मर्यादा दूर करण्यासाठी घटनादुरुस्ती करावी, क्रिमिलेअरची मर्यादा १३ सप्टेंबर २०१७ पासून वाढलेली नाही, याबाबतची अट मागे घेईपर्यंत मर्यादा २० लाख रुपये करावी, महात्मा फुले दांपत्यांना भारतरत्न द्यावे, ओबीसी विद्यार्थ्यांसाठी वसतिगृह आदी अशा ४२ मागण्यांचे बाबतीत महाअधिवेशनात सर्वसंमतीने ठराव घेतले. आता ते केंद्र तथा राज्य सरकारला पाठवून ओबीसी संघटनांद्वारे पाठपुरावा करण्यात येणार आहे.

    प्रस्तावना राष्ट्रीय ओबीसी महासंघाचे महासचिव सचिन राजूरकर यांनी केले. उपस्थित मान्यवरांनी समोचीत मार्गदर्शन केले.

    राष्ट्रीय मागासवर्गीय आयोगाचे अध्यक्ष माजी खासदार हंसराज अहिर म्हणाले की, आता पर्यंत मोदी सरकारने ओबीसी समाजाकरीता सकारात्मक योगदान दिले आहे. मी त्यांची स्तुती करत नाही आहे तर मी एका संवैधानिक पदावर आहों, व जवाबदारी ने बोलत आहों, मात्र त्यांनी केलेले कार्य उल्लेखनीय आहे. आम्ही त्यांचे कडून ओबीसी समाजाकरीता अधिक महत्त्वपूर्ण निर्णय घेतील, अशी अपेक्षा व्यक्त करतो. आता पर्यंत ओबीसी समाजाला जे मिळाले आहे त्याचाही विचार आपण करुया.

    यावेळी बोलताना एआयएमआयएम चे अध्यक्ष खासदार असुद्दिन औवेसी म्हणाले की देशात ओबीसी समाज ५२% पेक्षा अधिक आहे. मात्र आज केवळ ५% सवर्ण समाज बहुसंख्यांक समाजावर अन्याय करीत आहे.

    न्यायमूर्ती व्ही. ईश्वरय्या म्हणाले की एक दिवस देशाचा पंतप्रधान हा ओबीसी समाजाचा होईल व ओबीसींचे वर्चस्व देशाच्या राजकारणावर असेल.

    या देशव्यापी ओबीसी अधिवेशनात देशभरातून हजारो ओबीसी समाज बांधव उपस्थित होते.

    शरद वानखेडे, शकील पटेल, प्रा. शेषराव येलेकर, प्रा. सुधाकर जाधवर, जाजुला श्रीनिवास गौड, केसना शंकरराव, मुकेश नंदन, गुनेश्वर आरीकर, सुषमा भड, एड. रेखा बारहाते, सुभाष घाटे, प्रकाश भागरथ, दिनेश चोखारे, चेतन शिंदे, कल्पना मानकर, आदींनी यशस्वीतेकरीता प्रयत्न केले.

  • चंद्रपुर जिल्ह्यातील नागरिकांनी तब्बल 333 कोटी रुपयांचा केला भरणा

    News34

     

    चंद्रपूर : महावितरणच्या चंद्रपूर परिमंडलामध्ये ‘ऑनलाइन’ वीजबिल भरण्यासाठी चांगला प्रतिसाद मिळत असून गेल्या वर्षभरामध्ये १६ लाख ७६ हजार ९३८ वीजग्राहकांनी तब्बल ४२४ कोटी ६६ लाख ४० हजार रुपयांचा रांगेत उभे न राहता व सुरक्षितपणे ‘ऑनलाइन’ भरणा केला आहे. यामध्ये चंद्रपूर जिल्ह्यातील १२ लाख ३१ हजार ग्राहकांनी ३३३ कोटी रुपयांचा तर गडचिरोली जिल्ह्यातील ४ लाख ४५ हजार ८७० ग्राहकांनी ६६ कोटी १८ लाख रुपयांचा घरबसल्या ‘ऑनलाइन’ वीजबिल भरणा केला आहे.

     

    गेल्या जुलै २०२२ ते जुलै २०२३ च्या आकडेवारीनुसार सद्यस्थितीत चंद्रपूर परिमंडलामध्ये वीजबिलांपोटी दरमहा १ लाख ३९ हजार वीजग्राहक ३५ कोटी ५५ लाख रुपयांचा ‘ऑनलाइन’ भरणा करीत आहे. चंद्रपूर परिमंडलामध्ये ‘ऑनलाइन’ वीजबिल भरण्यात ग्राहकांची पसंती वाढत आहे. ‘ऑनलाइन’ भरणा केलेली पावती मोबाईल किंवा संगणकात जतन करून ठेवता येते व कधीही प्रिंट काढता येते. त्यामुळे जास्तीत जास्त वीजग्राहकांनी ‘गो-ग्रीन’ योजनेला व ‘ऑनलाइन’ वीजबिल भरण्यास प्रतिसाद द्यावा असे आवाहन मुख्य अभियंता श्री. सुनील देशपांडे यांनी केले आहे.

     

    महावितरणकडून बिल भरणा केंद्राच्या रांगेत उभे राहण्याऐवजी किंवा कार्यालयीन वेळेतच वीजबिल भरण्याऐवजी ‘ऑनलाइन’द्वारे घरबसल्या व २४ तास वीजबिल भरण्याची सोय उपलब्ध झाली आहे. यासाठी घरगुती, वाणिज्यिक व औद्योगिक व इतर लघुदाब ग्राहकांना www.mahadiscom.in ही वेबसाईट व मोबाईल अॅप उपलब्ध आहे. त्यामुळे एकाच नोंदणीकृत खात्यातून स्वतःच्या एकापेक्षा अधिक कुठल्याही वीजजोडण्यांचे बिल ‘ऑनलाइन’ भरणे तसेच सर्व वीजजोडण्यांच्या वर्षभरातील मासिक बिलांचा तपशील व रक्कम भरल्याची पावती संगणकात किंवा मोबाईलमध्ये जतन करण्याची सोय उपलब्ध आहे. ‘ऑनलाइन’ वीजबिल भरणा केल्यानंतर संबंधीत ग्राहकांना लगेचच नोंदणीकृत मोबाईल क्रमांकावर ‘एसएमएस’द्वारे पोच देण्यात येत आहे.

     

    लघुदाब घरगुती, वाणिज्यिक, औद्योगिक व इतर वीजग्राहकांनी क्रेडिट/डेबीट कार्ड, यूपीआय, भीम, इंटरनेट बँकींग, मोबाईल वॉलेटदवारे ‘ऑनलाइन’ वीजबिल भरल्यास दरमहा ५०० रुपयांच्या मर्यादेत प्रत्येक महिन्याच्या वीजबिलामध्ये ०.२५ टक्के सूट देण्यात येत आहे. तसेच वीजबिलांचे प्रॉम्ट पेमेन्ट केल्यास एक टक्का असे एकूण १.२५ टक्के सूट वीजग्राहकांना देण्यात येत आहे. सोबतच लघुदाब ग्राहकांचे वीजबिल ५ हजार रुपयांपेक्षा अधिक असल्यास ते आरटीजीएस किंवा एनईएफटीद्वारे भरण्याची सोय आहे. तसेच मा. विद्युत नियामक आयोगाच्या आदेशानुसार दि. १ ऑगस्टपासून महावितरणचे वीजबिल रोखीन भरण्यासाठी ५ हजार रुपयांची कमाल मर्यादा लागू करण्यात आली आहे. त्यामुळे यापेक्षा अधिक रकमेचे वीजबिल सुरक्षित व घरबसल्या भरण्यासाठी महावितरणची ‘ऑनलाइन’ सुविधा उपलब्ध आहे.

    महावितरणचे महापॉवर वालेट
    आता किराणा दुकान, मेडिकल मध्येही वीजबिल भरता येईल

    याव्यतिरिक्त वीजबिलाचा भरणा अधिक सुलभ व्हावा, यासाठी महावितरणने स्वतःचे पेमेंट वॉलेट सुरू केले असून आवश्यक अटींची पूर्तता करणाऱ्या पतसंस्था तसेच किराणा, मेडीकल व जनरल स्टोअर्स चालकांना वॉलेटधारक होता येईल. यातून वीज ग्राहकांना विशेषतः ग्रामीण भागात वीजबिलाचा भरणा करणे सुलभ होण्यासह प्रतीबिल पावतीमागे ५ रुपये उत्पन्न मिळविण्याची संधी वॉलेटधारकास मिळणार आहे.

     

    वॉलेटधारक होण्यास इच्छुक असणाऱ्या पतसंस्थांनी आधार कार्ड, पॅन कार्ड, जीएसटी क्रमांक, गुमास्ता प्रमाणपत्र (शॉप ॲक्ट), पत्त्याचा पुरावा, पासपोर्ट फोटो व रद्द केलेला धनादेश आदी आवश्यक कागदपत्रांच्या प्रती महावितरणच्या विभागीय कार्यालयात सादर करणे आवश्यक आहे. वॉलेटधारक महावितरणच्या ॲपमध्ये नोंदणी करून महावितरणच्या ग्राहकांकडून वीजबिलाचा भरणा करून घेऊ शकतील. वॉलेटमध्ये बिलाचा भरणा झाल्यानंतर संबंधित ग्राहकाच्या नोंदणीकृत मोबाईलवर बिल भरणा झाल्याचा एसएमएस पाठविण्यात येईल. एकाच वॉलेटचा बॅलन्स वापरून विविध लॉग-ईनद्वारे वेगवेगळ्या व्यक्तींकडून वीजबिलाचा भरणा करून घेण्याची सुविधा आहे. त्याचा लेखाजोखा व कमिशन महिनाअखेर मुख्य वॉलेटमध्ये जमा केले जाईल.

  • बच्चू कडू यांचा तालुकाध्यक्ष कांग्रेस पक्षात सामील

    News34

     

    चंद्रपूर ः आमदार प्रतिभाताई धानोरकर यांच्या कार्यप्रणालीवर विश्वास ठेवून प्रहार संघटनेचे तालुकाध्यक्ष किशोर डुकरे यांच्यासह टेमुर्डा सर्कल येथील शेकडो युवकांनी काँग्रेस पक्षात प्रवेश केला. काँग्रेस पक्षाशी ध्येयधोरणे, पक्षसंघटन मजबूत करण्याचे आश्वासन या युवकांनी दिले. पक्षात प्रवेश करणाऱ्या या युवकांचा आमदार प्रतिभाताई धानोरकर यांनी काँग्रेसचा दुप्पटा देऊन स्वागत केले.

    वरोरा-भद्रावती मतदारसंघाच्या आमदार प्रतिभाताई धानोरकर यांनी मतदारसंघात विकासकामांचा धडका सुरू केला आहे. गावागावात जाऊन तेथील गावकऱ्यांच्या अडीअडचणी जाऊन घेत आहे. तातडीने समस्यांचा निपटारा करीत आहे. त्यांच्या या कार्याने प्रभावीत होऊन प्रहार संघटनेचे तालुकाध्यक्ष किशोर डुकरे यांनी काँग्रेस पक्षात प्रवेश घेण्याचा निर्णय घेतला.

    नुकताच पार पडलेल्या एका छोट्याखानी कार्यक्रमात किशोर डुकरे यांच्यासह टेमुर्डा सर्कलमधील शेकडो युवकांनी काँग्रेस पक्षात प्रवेश घेतला. पक्षात प्रवेश केलेल्यांमध्ये कोसरसारचे उपसरपंच गणेश मडावी, बोरगावचे ग्रामपंचायत सदस्य श्रीकृष्ण देवतळे, गुंजाळ्याचे सरपंच भाऊराव चौधरी, बोरगाव तंटामुक्त गाव समितीचे अध्यक्ष आकाश धवने, संदीप वासेकर, निखिल तिखट, अनिकेत झिले, संदीप वासेकर, ओमकार कांबळे, पवन बावणे, मुनेश्वर राऊत, विशाल कापरे, विनोद दडमल, आकाश डाखरे, आकाश डावणे, यशश्री आस्वले, प्रसाद मिलमिले, राहुल देठे, सतीश कनोजवार, अमोल डांबोली, प्रणय तिवारे, अमने, हर्षल चोपणे, देवाजी घोसरे, अजय ताजने, रितेश देवतळे, गिरीश वनकुटे यांच्यासह अन्य युवकांचा समावेश होता. या युवकांनी काँग्रेसचे पक्षसंघटन वाढविण्याचे आश्वासन दिले.

  • चंद्रपुरात जळाला अवैध सुगंधित तंबाखू

    News34

    चंद्रपूर – शहरातील प्रशासकीय भवनात असलेले अन्न व औषध प्रशासन कार्यालयाला सकाळी आग लागली, या आगीत कागदपत्रे व जप्त केलेले अवैध सुगंधित तंबाखू जळाले असल्याची माहिती आहे.

    सकाळी प्रशासकीय भवन परिसरातून फेरफटका मारताना काही नागरिकांना वरच्या मजल्यावरून धूर निघताना दिसला याबाबत अग्निशमन विभागाला माहिती देण्यात आली.

    तात्काळ अग्निशमन विभागाची गाडी घटनास्थळी दाखल झाली व लवकर त्यांनी आगीवर नियंत्रण मिळविले.

    सदर आग कशामुळे लागली याबाबत कारण अद्याप अस्पष्ट आहे, मात्र जप्त असलेला सुगंधित तंबाखूचा काही साठा जळाला अशी माहिती पुढे आली आहे.

    शहरातील हवेत काही वेळ तंबाखू मिश्रित धूर मिसळण्याचे काम काही वेळ सुरू होते.

  • 6 ऑगस्टला नितेश कराळे वरोरा शहरात

    News34

     

    वरोरा – महाराष्ट्र राज्य ग्रामीण पत्रकार संघ वरोरा तसेच स्व. श्रीनिवास शिंदे मेमोरियल रवींद्र शिंदे चॅरिटेबल ट्रस्ट चंद्रपूर यांच्या संयुक्त विद्यमाने दि.६ ऑगस्ट २०२३ स.११ वाजता राधा मिलन सभागृह बोर्डा वरोरा येथे विविध कार्यक्रमाचे आयोजन करण्यात आले आहे.

    चंद्रपूर जिल्हा परिषदेत 519 पदांची भरती

    कार्यक्रमात प्रामुख्याने वऱ्हाडी भाषेतील महाराष्ट्रातील प्रसिद्ध वक्ते खद खद आपले मास्तर प्रा.नितेश कराळे सर वर्धा यांचे विद्यार्थ्यांना स्पर्धा परीक्षा मार्गदर्शन सह इयत्ता १० व १२वीच्या गुणवंत विद्यार्थ्यांचा सत्कार, ctv वरोरा लोकल चॅनेलचे भव्य उदघाटन आणि उन्माद विषमतेचा या कवितासंग्रहाचा प्रकाशन सोहळा पार पडणार आहे.

    सदर कार्यक्रमाचे उदघाटन आयुष नोपानी (भापोसे) सहाय्यक पोलीस अधीक्षक तथा उपविभागीय पोलीस अधिकारी वरोरा यांच्या हस्ते होणार असून कार्यक्रमाच्या अध्यक्षस्थानी राजेशजी सोलापण जिल्हाध्यक्ष, महाराष्ट्र राज्य ग्रामीण पत्रकार संघ चंद्रपूर हे राहणार आहेत.

    कार्यक्रमात विशेष अतिथी म्हणून डॉ. अभिलाषा गावतुरे, परिवर्तनवादी सामाजिक कार्यकर्त्या चंद्रपूर, ॲड पुरुषोत्तम सातपुते ज्येष्ठ अधिवक्ता चंद्रपूर, प्रकाश बाबू मुथा ज्येष्ठ सामाजिक कार्यकर्ते माढेळी, धनराज पाटील आस्वले कार्यकारी अध्यक्ष, स्व. श्रीनिवास शिंदे मेमोरियल रवींद्र शिंदे चॅरिटेबल ट्रस्ट चंद्रपूर, सुषमाताई श्री शिंदे, विश्वस्त स्व. श्रीनिवास शिंदे मेमोरियल रवींद्र शिंदे चॅरिटेबल टेबल ट्रस्ट चंद्रपूर, शोभाताई वेले ज्येष्ठ कवयित्री नागपूर, सुधाकर कडू गुरुजी विश्वस्त ,महारोगी सेवा समिती आनंदवन, वरोरा यांची उपस्थिती राहणार आहे.

    आयोजित कार्यक्रमाला जास्तीत जास्त संख्येने उपस्थित राहावे असे आवाहन अशफाक शेख अध्यक्ष ,महाराष्ट्र राज्य ग्रामीण पत्रकार संघ वरोरा सुनिल शिरसाट सचिव, महाराष्ट्र राज्य ग्रामीण पत्रकार संघ वरोरा संजय तोगट्टीवार सचिव स्व. श्रीनिवास शिंदे मेमोरियल रवींद्र शिंदे चॅरिटेबल ट्रस्ट चंद्रपूर, हितेश राजनहिरे ,संघटक , महाराष्ट्र राज्य ग्रामीण मतदार संघ वरोरा अमर गोंडाने, सदस्य, महाराष्ट्र राज्य ग्रामीण पत्रकार संघ वरोरा मुजाहिद कुरेशी ,फैज पटेल, विश्वदीप गोंडाने ,अजीम शेख, अहेफाज शेख यांनी केले आहे.

Powered by
►
Necessary cookies enable essential site features like secure log-ins and consent preference adjustments. They do not store personal data.
None
►
Functional cookies support features like content sharing on social media, collecting feedback, and enabling third-party tools.
None
►
Analytical cookies track visitor interactions, providing insights on metrics like visitor count, bounce rate, and traffic sources.
None
►
Advertisement cookies deliver personalized ads based on your previous visits and analyze the effectiveness of ad campaigns.
None
Powered by