News34 chandrapur

चंद्रपूर – सध्या संपूर्ण महाराष्ट्रात आरोग्य सेवा पूर्णपणे कोलमडली आहे. वैद्यकीय व्यवस्थेबाबत शिंदे सरकारची कोंडी झाली आहे. एकीकडे नांदेड आणि नागपूरच्या शासकीय रुग्णालयांमध्ये शेकडो मृत्यू आणि महाराष्ट्रभरातील शासकीय रुग्णालयांमध्ये औषधांचा तुटवडा यामुळे सरकार तोंडघशी पडली आहे, तर दुसरीकडे शासकीय वैद्यकीय महाविद्यालयाचे सुमारे शंभर प्रशिक्षणार्थी डॉक्टर डॉ. चंद्रपुरात गेल्या ४ महिन्यांपासून मानधन नसल्यामुळे ते संपावर गेले आहेत.

चंद्रपूर वैद्यकीय महाविद्यालयाचे डीन व इतर अधिकारी गेल्या अनेक महिन्यांपासून या प्रशिक्षणार्थी डॉक्टरांना केवळ आश्वासने देत होते आणि त्यांच्या देयकाचा निधी इतरत्र वापरत होते. त्यामुळे या डॉक्टरांना संपावर जावे लागले मात्र गेल्या 10 दिवसांपासून तेच आश्वासन दिले जात होते. अखेर या प्रकरणाचे गांभीर्य पाहून शिक्षक सेनेने या प्रकरणात हस्तक्षेप करत अवघ्या एका दिवसात प्रकरण पूर्णपणे मिटवले.

उद्धव बाळासाहेब ठाकरे शिवसेना प्रणित शिक्षक सेनचे चंद्रपूर जिल्हाध्यक्ष व गडचिरोली संपर्क प्रमुख राजेश नायडू हे 6 ऑक्टोम्बर ला सकाळी साडेदहा वाजता डॉक्टरांची भेट घेण्यासाठी दाखल झाले. त्यांनी या डॉक्टरांकडून त्यांच्या समस्या जाणून घेतल्या व रुग्णालयाची पाहणी करण्यासाठी आलेले जिल्हादंडाधिकारी विनय गौडा यांची भेट घेऊन प्रशिक्षणार्थी डॉक्टर व आरोग्य विभाग यांच्यात मध्यस्थी करून ही समस्या तात्काळ जागेवरच सोडवण्यात आली.

राजेश नायडू यांच्या विनंतीवरून जिल्हाधिकाऱ्यांनी संपावर असलेल्या डॉक्टरांच्या गटाशी तात्काळ चर्चा करून कोषागाराशी बोलून उद्यापर्यंत पगार देण्यास सांगितले आणि डॉक्टरांना तातडीने कामाला येण्याचा सल्ला दिला.

संपावर असलेल्या डॉक्टरांनी आपसात चर्चा करून व राजेश नायडू यांच्याशी चर्चा करून जिल्हाधिकाऱ्यांच्या शब्दाला मान देत संप तातडीने संपवून कामावर रुजू होण्याचा निर्णय घेतला. मात्र उद्यापर्यंत आमची देणी न दिल्यास किंवा संपाबाबत आमच्यावर कोणतीही कारवाई न झाल्यास आम्हाला आमच्या हक्कासाठी पुन्हा संघर्ष करावा लागेल, असेही ते म्हणाले.

यानंतर शिक्षक सेनेचे जिल्हाध्यक्ष राजेश नायडू यांनीही जिल्हाधिकारी विनय गौडा यांचे आभार मानले मात्र दिलेले आश्वासन पाळले नाही तर आता या डॉक्टरांसह शिक्षक सेनेच्या वतीने पूर्ण ताकदीने आंदोलन करण्याचा इशारा दिला. हा प्रश्न सोडवल्याबद्दल डॉक्टरांनी शिक्षक सेनेचेही आभार व्यक्त केले.

News34 chandrapur

चंद्रपूर – शहरात सार्वजनिक कार्यक्रम,रॅली अथवा उत्सवात पेपर ब्लोवर मशीनद्वारे कागद अथवा प्लास्टीक पेपरचे तुकडे उडविण्यावर चंद्रपूर महानगरपालिकेतर्फे बंदी जाहीर करण्यात आली असुन यापुढे कुठल्याही सार्वजनिक कार्यक्रमात सदर मशीनचा उपयोग झाल्यास संबंधितांवर दंड तसेच फौजदारी कारवाई केली जाणार आहे.

शहरात विविध उत्सव मोठ्या प्रमाणात उत्साहाने साजरे केले जातात. अश्या प्रसंगी पेपर ब्लोवर मशीनचाही वापर केला जातो ज्याला सीओटू पेपर ब्लोवर मशीन म्हणतात. ज्याद्वारे मोठ्या प्रमाणात कागदांचे अथवा प्लास्टीक कागदांचे तुकडे एका वेळेस हवेत उधळल्या जातात. हे दृश्य पाहण्यास मोहक वाटत असले तरी त्या एका ब्लास्टने मोठ्या प्रमाणात कचरा रस्त्यावर जमा होतो, मग रॅली अथवा कार्यक्रमात उपस्थीत लोकांच्या चालण्याने ते कागद रस्त्यावर असे घट्ट चिपकतात कि, ते काढतांना स्वच्छता कर्मचाऱ्यांना फार त्रास होतो.

आज आपल्या शहरात कुठलीही रॅली निघाली तरी ती रॅली संपताच रस्ते स्वच्छ आढळुन येतात कारण मनपा स्वच्छता कर्मचारी स्वच्छतेप्रती जागरूक असतात. नागरीक म्हणुन स्वच्छता कर्मचाऱ्यांच्या प्रयत्नांना साथ देण्याचे आपलेही कर्तव्य आहे तेव्हा मनपातर्फे आवाहन करण्यात येत आहे कि,सार्वजनिक कार्यक्रम अथवा रॅलीमध्ये पेपर ब्लोवर मशीनचा वापर करून कागद अथवा प्लास्टीक तुकडे हवेत उडवु नये अन्यथा सदर मशीन,सदर वाहन जप्त करण्यात येऊन संबंधितांवर घनकचरा अधिनियमानुसार दंड व फौजदारी कारवाई करण्यात येईल.

News34 chandrapur

चंद्रपूर – शासकीय वैद्यकीय महाविद्यालय नांदेड येथील अधिष्ठाता यांना खासदार हेमंत पाटील यांनी टॉयलेट स्वच्छ करायला लावल्याने राज्यात पाटील यांचा डॉक्टरांनी काळी फित लावत निषेध नोंदवीला.

नांदेड शासकीय वैद्यकीय रुग्णालयात मृत्यूच्या तांडवानंतर खासदार हेमंत पाटील यांनी डिन एस.आर. वाकोडे यांना टॉयलेट्स ची स्वच्छता करायला लावली, यावेळी पाटील यांच्या कार्यकर्त्यांनी व्हिडीओ बनवीत व्हायरल सुद्धा केला.

या घटनेमुळे डॉक्टर संघटनांनी खासदार पाटील विरोधात एल्गार पुकारत त्यांचा निषेध केला.
चंद्रपूर शासकीय वैद्यकीय महाविद्यालयातील निवासी डॉक्टरांच्या मार्ड संघटनेच्या वतीने काळी फित लावत पाटील यांचा निषेध नोंदवला.

निवासी, शिकाऊ डॉक्टर्स व विविध संघटनेच्या डॉक्टरांनी खासदार पाटील यांनी जाहीर माफी मागावी अशी मागणी यावेळी केली आहे, खासदार असलेल्या लोकप्रतिनिधींचे हे कृत्य संघटना खपवून घेणार नाही अशी माहिती डॉक्टर संघटनेच्या वतीने देण्यात आली आहे.
यावेळी संघटनेच्या अध्यक्ष डॉ. तेजस्विनी चौधरी, रोहित होरे, प्रशांत मगदूम, ऋतुजा गांगुर्डे आदींची उपस्थिती होती.

News34 chandrapur

चंद्रपूर –  मनपा आरोग्य विभागात झालेल्या कंत्राटी भरतीदरम्यान अनुभवाचे खोटे प्रमाणपत्र सादर करून दिशाभूल व फसवणुक केल्याबद्दल दोन उमेदवारांविरुद्ध महानगरपालिकेद्वारे सिटी पोलीस स्टेशन गांधी चौक येथे तक्रार दाखल करण्यात आली आहे.

जुन महिन्यात मनपा आरोग्य विभागातर्फे एएनएम या पदासाठी कंत्राटी तत्वावर १८ पदे भरण्यासंबंधी जाहिरात प्रकाशित करण्यात आली होती. यात अनेक उमेदवारांनी अर्ज दाखल केले होते.पात्र होण्यास इतर कागदपत्रांसोबतच अनुभव प्रमाणपत्र सुद्धा मागविण्यात आले होते. यात शितल सिद्धार्थ मेश्राम यांनी सीएचएल मल्टीस्पेशालिटी हॉस्पिटल चंद्रपूर यांचे तर प्रगती शंकर ढोले यांनी सिम्स हॉस्पिटल,बजाज नगर नागपुर येथे काम केले असल्याबाबत अनुभव प्रमाणपत्र सादर केले.

मात्र मनपाद्वारे सदर कागदपत्रांची वैधता तपासण्यास या हॉस्पिटल्सला संपर्क केले असता सदर नावाच्या उमेदवाराने येथे काम केले नसल्याचा अहवाल प्राप्त झाला. नौकरी मिळविण्यास अनुभवाचे खोटे प्रमाणपत्र सादर करून चंद्रपूर महानगरपालिकेची दिशाभूल व फसवणुक केल्याने आरोग्य विभागामार्फत सिटी पोलीस स्टेशन येथे तक्रार दाखल करण्यात आली आहे.

रिक्त पदांची अथवा कंत्राटी पदांची भरती दरम्यान कुठल्याही प्रकारचे खोटे कागदपत्रे सादर करून उमेदवारांनी आपल्या भविष्याचे नुकसान न करून घेण्याचे आवाहन चंद्रपूर महानगरपालिकेतर्फे करण्यात येत आहे.