My Blog

Category: ग्रामीण वार्ता

ग्रामीण वार्ता (Gramin Varta) विभागात वाचा news34.in वर चंद्रपूर जिल्ह्यातील ग्रामीण भागातील बातम्या आणि घडामोडी. शेतकरी योजना, ग्रामपंचायत राजकारण, स्थानिक विकास प्रकल्प, कृषी आणि ग्रामीण जीवनाशी संबंधित सर्व महत्त्वाचे अपडेट्स येथे उपलब्ध आहेत. चंद्रपूर ग्रामीण भागातील समस्या, यशोगाथा आणि सकारात्मक बदलांना आम्ही प्राधान्य देतो. ग्रामीण भागातील विश्वासार्ह माहितीसाठी नियमित भेट द्या.

  • सत्तेत येताच जुनी पेन्शन योजना लागू करणार – विरोधी पक्षनेते विजय वडेट्टीवार

    News34 chandrapur

    चंद्रपूर – जूनी पेन्शन योजना लागू करावी ही अनेक वर्षांपासूनची मागणी आहे. ह्या मागणीच्या संदर्भाने आम्ही पुर्णतः सकारात्मक असुन यासाठी माझा पाठींबा आहे. काॅंग्रेस पक्षाचे नेते राहुल गांधी यांनी जुनी पेन्शन योजना लागू करावी म्हणून स्पष्ट भुमिका जाहीर केली आहे.

     

    आगामी काळात राज्यात आमची सत्ता येताच प्राधान्याने जुनी पेन्शन योजना लागू करणार असे प्रतिपादन राज्याचे विरोधीपक्षनेता विजय वडेट्टीवार यांनी केले. ते ब्रह्मपुरी येथे जुनी पेन्शन योजना कर्मचारी संघटनेच्या वतीने एल्गार मेळाव्या प्रसंगी आयोजित कार्यक्रमात बोलत होते.

     

    यावेळी मंचावर शिक्षक मतदारसंघाचे आमदार सुधाकर अडबाले, जुनी पेंशन संघटना राज्याध्यक्ष वितेश खांडेकर, राज्य कार्याध्यक्ष आशुतोष चौधरी, राज्य सल्लागार सुनिल दूधे, राज्य महीला उपाध्यक्ष मनिषा मडावी, विभागीय अध्यक्ष अनिल वाकडे, विभागीय उपाध्यक्ष दुशांत निमकर, विपीन धाबेकर, गुरुदेव नवघडे, मनीष वैरागडे, राकेश शेंडे, गुलाब लाडे यांसह अन्य मान्यवर उपस्थित होते.

     

    यावेळी पुढे बोलतांना विरोधीपक्षनेते विजय वडेट्टीवार म्हणाले की, विद्यमान शिंदे-भाजप सरकार बदलणार ही काळ्या दगडावरची रेष आहे. या सरकारने घेतलेले अनेक निर्णय हे चुकीचे होते. कंत्राटी नोकरभरतीचा शासन निर्णय काढून त्याचे कंत्राट ज्या ९ कंपन्यांना देण्यात आले होते. त्या कंपन्या सत्तेतील लोकांच्या होत्या. ह्या कंत्राटी नोकरभरतीला मी तीव्र विरोध केला आणि मुद्दा शेवटपर्यंत लावून धरला आणि तो निर्णय मागे घ्यायला सरकारला भाग पाडला. मात्र आगामी निवडणुकांमध्ये विजय हा आमचाच असून सत्तेत येताच प्राधान्याने जुनी पेन्शन योजना लागू करण्यात येईल. असे वचनही या प्रसंगी त्यांनी दिले.
    कार्यक्रमाचे प्रास्ताविक प्रा. स्निग्धा कांबळे यांनी केले. तर सुत्रसंचलन डांगे यांनी केले.

     

    महिला कर्मचाऱ्यांनी बांधल्या राख्या…

    मेळाव्यात राज्य जुनी पेन्शन योजना कर्मचारी संघटनेच्या महिला पदाधिकारी यांनी राज्याचे विरोधी पक्षनेते विजय वडेट्टीवार यांना राख्या बांधून ओवाळणीत जुनी पेन्शन योजना लागू करण्याची विनंती केली.

    मी तुमच्या संघर्षात पुढे राहील…

    जुनी पेन्शन योजना मिळविण्यासाठी आपण जे काही प्रयत्न कराल त्या संघर्षात मी खंबीर पणे तुमच्या पाठीशी उभा राहिल. असे अभिवचन यावेळी विरोधी पक्षनेते विजय वडेट्टीवार यांनी उपस्थितांना दिले.

  • चंद्रपुरात पालकमंत्री मुनगंटीवार यांनी केले मिशन टिन्स चे उदघाटन

    News34 chandrapur

    चंद्रपूर : चंद्रपूर जिल्हा हा शांतता आणि सामाजिक सलोखा राखणारा जिल्हा आहे. मात्र काही असामाजिक तत्वांकडून जिल्ह्यात गुन्हेगारी वाढविण्याचे प्रकार निदर्शनास येत आहे. याचा शोध घेण्यासाठी पोलिसांनी गुप्त खब-यांचे जाळे वाढवावे. तसेच आधुनिक तंत्रज्ञानाचा उपयोग करून दोषसिद्धीचे प्रमाण वाढवावे, असे निर्देश राज्याचे वने, सांस्कृतिक कार्य, मत्स्यव्यवसाय मंत्री तथा जिल्ह्याचे पालकमंत्री सुधीर मुनगंटीवार यांनी दिले.

     

    नियोजन सभागृह येथे पोलिस विभाग, राज्य उत्पादन शुल्क विभाग तसेच उप-प्रादेशिक परिवहन विभागाचा आढावा घेतांना ते बोलत होते. यावेळी जिल्हाधिकारी विनय गौडा, मुख्य कार्यकारी अधिकारी विवेक जॉन्सन, जिल्हा पोलिस अधिक्षक रविंद्रकुमार परदेशी, सहाय्यक जिल्हाधिकारी मुरुगानंथम एम., अतिरिक्त पोलिस अधिक्षक रिना जनबंधु, सहाय्यक पोलिस अधिक्षक आयुष नोपानी, मनपा आयुक्त विपीन पालीवाल, उप-प्रादेशिक परिवहन अधिकारी किरण मोरे, राज्य उत्पादन शुल्क अधिकारी संजय पाटील यांच्यासह सर्व उपविभागीय पोलिस अधिकारी, पोलिस निरीक्षक आदी उपस्थित होते.

     

    पुढे पालकमंत्री श्री. मुनगंटीवार म्हणाले, पोलिस विभागाने नवीन तंत्रज्ञानाचा उपयोग करून गस्तीवर असणारे वाहन, पोलिस, कर्तव्यावर असलेला वाहतूक पोलिस नक्की कुठे आहे, यावरसुध्दा लक्ष ठेवावे. खब-यांचे जाळे वाढविण्यासाठी पोलिस मित्र/मैत्रीण नियुक्त करता येतात,  याबाबत विचार करावा.
    जिल्ह्यातील जातीय सलोखा कायम ठेवण्यासाठी सोशल मिडीयावरील घटनांचे विश्लेषण करण्यासाठी तंत्रज्ञानाचा उपयोग करावा. शहरातील वाहतुक कोंडी सोडविण्यासाठी बायपास मार्ग काढणे तसेच रस्ते कसे विकसीत करता येईल, याबाबत नियोजन करावे, अशा सुचना पालकमंत्री श्री. मुनगंटीवार यांनी दिल्या.

     

    सादरीकरणात जिल्हा पोलिस अधिक्षक रविंद्रसिंह परदेशी म्हणाले, जिल्ह्यात ड्रंक ॲन्ड ड्राईव्ह प्रतिबंध, सिटबेल्ट व हेल्मेट बाबत राबविण्यात आलेल्या त्रिसुत्रीच्या प्रभावी अंमलबजावणीमुळे अपघातांची संख्या तसेच अपघातातील मृत्युंची संख्या कमी करण्यात यश आले आहे. सन 2022 मध्ये ड्रंक ॲन्ड ड्राईव्हचे 767 प्रकरणांची नोंद होती. यावर्षी सप्टेंबरअखेर पर्यंत 7721 प्रकरणे नोंदविण्यात आली आहे. यात 900 टक्के वाढ आहे. सन 2022 मध्ये सिटबेल्टची 7149 प्रकरणे तर 2023 मध्ये 18281 प्रकरणे (156 टक्के वाढ), 2022 मध्ये सिटबेल्टची 12079 प्रकरणे तर 2023 मध्ये 27303 प्रकरणे (126 टक्के वाढ) नोंदविण्यात आली आहेत. या तीनही बाबींमध्ये गत वर्षीच्या एकूण 19995 प्रकरणांच्या तुलनेत 2023 मध्ये एकूण 53305 प्रकरणांची नोंद आहे.

     

    तसेच अवैध दारुला आळा घालणे, या प्रकणांत 45 टक्क्यांनी वाढ असून 2632 जणांवर कारवाई करण्यात आली आहे. सन 2022 मध्ये जनावरांची अवैध वाहतुकीची 39 प्रकरणे होती. यावर्षी 69 प्रकरणे नोंदविण्यात आली असून 2200 जनावरे पकडण्यात आली आहेत. सन 2017 ते 2023 या कालावधीत जिल्ह्यातील अल्पवयीन 300 मुले आणि अल्पवयीन 1271 मुली असे एकूण 1571 जण बेपत्ता असल्याची नोंद झाली. यापैकी 292 मुले तर 1236 मुलींना परत आणण्यात यश प्राप्त झाल्याचे पोलिस अधिक्षक रविंद्रसिंह परदेशी यांनी सांगितले.

     

    रस्ते अपघातांची संख्या कमी करा

     

    जिल्ह्यातील रस्ते अपघातांची संख्या कमी करण्यासाठी ब्लॅक स्पॉट निश्चित करून त्याच्या उपाययोजनेसाठी निधीबाबतचा प्रस्ताव रस्ता सुरक्षा समितीमध्ये तात्काळ पाठवावा. तसेच राष्ट्रीय महामार्ग प्राधिकरण व सार्वजनिक बांधकाम विभागाने रस्त्यांवरील खड्डे त्वरीत बुजवावे. अपघातांचे विश्लेषण करण्यासाठी सॉफ्टवेअर विकसीत करा. वाहनांच्या मागे रिफ्लेक्टर प्रभावीपणे दिसण्यासाठी वाहनांच्या तपासणीची मोहीम राबवावी. तसेच टोल नाक्यावर वाहनांच्या रिफ्लेक्टरची तपासणी करावी.

    बाबुपेठ येथे पोलिस चौकी कार्यान्वित करणार :

    बाबुपेठ येथे असलेली पोलिस चौकी एक महिन्याच्या आत पुन्हा कार्यान्वित करण्यासाठी पोलिस विभागाने आवश्यक मनुष्यबळाची पुर्तता करावी. या चौकीच्या बांधकामासाठी निधी लागत असल्यास तो उपलब्ध करून देण्यात येईल, असे पालकमंत्री सुधीर मुनगंटीवार यांनी सांगितले.

     

    हेल्मेट वापरण्याबाबत जनजागृती आवश्यक :

    सन 2023 मध्ये दुचाकी अपघातात 161 जणांचा मृत्यु झाला आहे. यात 154 जणांचा मृत्यु हा हेल्मेट न वापरल्यामुळे झाल्याचे निदर्शनास आले आहे. त्यामुळे हेल्मेट वापराबाबत जनजागृती करणे आवश्यक आहे. तसेच हेल्मेटचा वापर केल्याने किती जणांचे जीव वाचले आणि न वापरल्याने किती जणांचा मृत्यु झाला, याचा सर्व्हे करावा. हेल्मेट शिवाय (विशिष्ट क्रमांकासह) नवीन वाहनांची नोंदणीच करू नये, याबाबत नियोजन करता येते का, ते तपासावे.

     

    दारू दुकानांची संख्या वाढवू नका

    दारुमुळे अनेक कुटुंब उध्वस्त होतात. दारु दुकानांबद्दल नागरिकांच्या तक्रारी असल्यास त्याकडे गांभियाने लक्ष द्यावे. यापुढे जिल्ह्यात दारुच्या दुकानांची संख्या वाढवू नये, असे निर्देश पालकमंत्री सुधीर मुनगंटीवार यांनी राज्य उत्पादन शुल्क विभागाला दिले.

     

    गोवंश ठेवण्यासाठी जागेची उपलब्धता :

     

    अवैध वाहतुकीदरम्यान पकडण्यात आलेली जनावरे ठेवण्यासाठी किती जागेची मागणी आहे, त्याबाबतचा प्रस्ताव तयार करावा. जागेची उपलब्धता करून देऊन त्याच्या बाजुला वनविभागातर्फे कुरण विकसीत करण्याचे नियोजन करता येईल, असेही पालकमंत्र्यांनी सांगितले.

     

    मिशन ‘टीन्स’ चे उद्घाटन :

     

    पोलिस अधिक्षक कार्यालय व जिल्हा परिषद यांच्या संयुक्त विद्यमाने अल्पवयीन मुले / मुली यांना सायबर क्राईम, लैंगिक शोषण, बॅड टच – गुड टच, पोक्सो कायदा आदींबाबत जनजागृती निर्माण व्हावी, यासाठी ‘टीन्स’ उपक्रम (ट्रेनिंग, एज्युकेटिंग, इंपॉवरिंग, नर्चरींग स्टुडंट) राबविण्यात येत आहे. याअंतर्गत जिल्ह्यातील शिक्षकांना प्रशिक्षण देण्यात येत आहे. जेणेकरून याबाबत शालेय विद्यार्थ्यांना अवगत करता येईल. तसेच याबाबत जे पिडीत आहेत, त्यांचे मनोर्धर्य उंचाविण्यासाठी मानसोपचार तज्ज्ञांकडूनसुध्दा मार्गदर्शन करण्यात येईल. या उपक्रमाचे पालकमंत्री सुधीर मुनगंटीवार यांच्या हस्ते उद्घाटन करण्यात आले.

  • रविंद्र शिंदेचे कार्य समजले आणि आशेचा किरण गवसला

    News34 chandrapur

    भद्रावती : तालुक्यातील खापरी येथील वैष्णवी सुनील पाचभाई ह्या नर्सिंग अभ्यासक्रमाच्या विद्यार्थींनीला तिचे प्रथम वर्षाचे प्रवेश शुल्क भरण्याची व्यवस्था शिवसेना ( उध्दव बाळासाहेब ठाकरे ) वरोरा -भद्रावती विधानसभा प्रमुख रविंद्र शिंदे यांनी सामाजिक बांधिलकीतून केली. रविंद्र शिंदे यांनी प्रसंगावधान ठेवीत केलेल्या सहकार्यामुळे वैष्णवीच्या चेहऱ्यावर अप्रतीम हास्य फूलले.

     

    दि. २२ ऑक्टोंबर रोजी वैष्णवीच्या आईवडीलांनी रविंद्र शिंदे यांची प्रत्यक्ष भेट घेवून त्यांच्या प्रति कृतज्ञता व्यक्त केली. याप्रसंगी भद्रावती विविध कार्यकारी सहकारी सोसायटीचे उपाध्यक्ष विश्वास कोंगरे व युवा सामाजिक कार्यकर्ते उमेश काकडे प्रामुख्याने उपस्थित होते.
    लेकीचे शिक्षण पूर्ण करण्यासाठी रविंद्र शिंदे यांच्या रूपाने आमच्या मदतीला देवदुतच धावून आले. कदाचित त्यांनी वैष्णवीचे प्रवेश शुल्क भरण्याची व्यवस्था केली नसती ,तर आमच्या वैष्णवीचा प्रवेश या वर्षी झाला नसता. तिचे एक वर्ष वाया गेले असते. रविंद्र शिंदे यांनी दिलेले सहकार्य आम्ही विसरू शकत नाही. तसेच त्यांनी केलेल्या उपकाराची परतफेड सुध्दा आम्ही कदापिही करू शकणार नाही.

     

    आम्ही त्यांचे खुप खुप आभारी आहोत. अशी कृतज्ञता वैष्णवीची आई भारती आणि वडील सुनिल पाचभाई यांनी याप्रसंगी व्यक्त केली.
    खापरी येथील सुनिल पाचभाई हे हात ठेल्यावरुन भाजीपाला विकतात. त्यांच्या कुटुंबात स्वतः कुटुंब प्रमुख सुनिल पाचभाई , पत्नी भारती , मुलगी वैष्णवी आणि मुलगा वैभव असे एकूण चार सदस्य आहे. सुनिल यांच्या डाव्या हाताला यापूर्वी इजा पोहचली आहे. तरी सुध्दा आपली मुलगी व मुलगा शिकला पाहीजे. त्यांचे जिवन घडविण्यासाठी पाचभाई दाम्पत्य अहोरात्र कष्ट करीत आहे. परंतु वाढत्या महांगाईच्या काळात मुलांच्या शिक्षणाचा खर्च करणे त्यांना अत्यंत अवघड जात आहे.
    मुलगी वैष्णवी हिला बी.एस्सी. प्रथम वर्ष नर्सिंग अभ्यासक्रमासाठी नागपूर हिंगणा येथील आकार बहुउद्देशीय संस्थेत प्रवेश मिळाला.

     

    प्रवेश मिळाल्याने पाचभाई कुटूंबात आनंदी लहरी बहरू लागल्या. परंतु प्रवेश घेण्यासाठी लागणारे प्रवेश शुल्क भरण्यासाठीची रक्कम कशी जमवायची ? या काळजीने पाचभाई कुटूंबाचा आनंद मावळण्यास सुरुवात झाली. शिवसेना ( उध्दव बाळासाहेब ठाकरे ) वरोरा -भद्रावती विधानसभा प्रमुख रविंद्र शिंदे यांच्या सामाजिक कार्याची माहिती कुणीतरी सुनिल पाचभाई यांच्या कानावर टाकली. आणि… अखेर आशेचा किरण पाचभाई कुटुंबाला गवसला.

     

    लेकीच्या शैक्षणिक प्रवेशाची चिंता वाढल्याने, सुनिल पाचभाई आणि त्यांच्या पत्नी भारती यांनी मुलगी वैष्णवीसह भल्या सकाळीच रविंद्र शिंदे यांचे निवासस्थान गाठले. रविंद्र शिंदे यांना पाचभाई दाम्पत्यांनी आपली आपबीती कथन केली. लेकीचे प्रवेश शुल्क भरण्यासाठी कृपया काहीतरी व्यवस्था करा, अन्यथा वैष्णवीचा प्रवेश होणार नाही, तिचे एक वर्ष वाया जाईल अशी विनंती पाचभाई दाम्पत्यांनी या प्रसंगी केली.

     

    रविंद्र शिंदे यांनी क्षणाचाही विलंब न लावला. पाचभाई कुटुंबाला धिर दिला. तसेच वैष्णवीच्या प्रथम वर्षाचे प्रवेश शुल्क भरण्याची व्यवस्था करण्याची तयारी दर्शविली. तसेच यापुढे सुध्दा सहकार्य करण्याचे आश्वासन दिले. याप्रसंगी पाचभाई दाम्पत्यांसह वैष्णवीच्या चेहऱ्यावर हास्य फुलले.शिवसेना ( उध्दव बाळासाहेब ठाकरे ) वरोरा-भद्रावती विधानसभा प्रमुख रविंद्र शिंदे यांनी वैष्णवीचे बी.एस्सी. प्रथम वर्ष नर्सिंग अभ्यासक्रमासाठीचे प्रवेश शुल्क भरण्याची व्यवस्था केली. आता वैष्णवीचा प्रवेश सुध्दा निश्चित झाला. वैष्णवीचे वर्ग सुध्दा सुरू झाले. वैष्णवीचा मोठा भाऊ वैभव हा चंद्रपूरच्या शासकीय इंजीनीअरींग कॉलेजचा संगणक शाखेतील तीसऱ्या वर्षाचा विद्यार्थी आहे.

     

    यापूढे क्रांतीज्योती सावित्रीबाई फूले यांच्या लेकींना विकासाची संधी मिळालीच पाहीजे : रविंद्र शिंदे

     

    कुठल्याही कुटूंबातील क्रांतीज्योती सावित्रीबाई फूले यांच्या लेकी विकासापासून दूर राहता कामा नये. त्यांचा सर्वंकष विकास झालाच पाहीजे.त्यांनी घेतलेल्या शिक्षणाचा तसेच त्यांच्या कर्तृत्वाचा लाभ समाजाला निश्चितच होईल. वैष्णवी सारख्या असंख्य क्रांतीज्योती सावित्रीबाई फूले यांच्या लेकींना विविध समस्यांना सामोरे जावे लागते. यामुळे त्यांना विकासाची संधी मिळत नाही. काही समस्या व अडचणी असल्यास नि : संकोचपणे संपर्क साधावा. यापुढे क्रांतीज्योती सावित्रीबाई फूले यांच्या लेकींना विकासाची संधी मिळालीच पाहीजे . असे प्रतिपादन शिवसेना ( उध्दव बाळासाहेब ठाकरे ) वरोरा -भद्रावती विधानसभा प्रमुख रविंद्र शिंदे यांनी केले.

  • 23 ऑक्टोम्बरला कांग्रेसचा भव्य आक्रोश मोर्चा

    News34 chandrapur गुरू गुरनुले

    चंद्रपूर/मूल – वाघाच्या दहशतीने शेतकरी त्रस्त झाला असून रानटी डुकराच्या व वन्य प्राण्यांच्या हैदोसाने शेती नष्ट होत आहे. वर्तमान स्थितीत शेती कोणी करणार नाही. व धान उत्पादक असूनही तांदूळ विकत घेण्याची पाळी शेतकऱ्यांवर आल्याशिवाय राहणार नाही. अशा अनेक मागण्यांसाठी महाराष्ट्र राज्याचे विरोधी पक्षनेते विजय वडेट्टीवार यांच्या नेतृत्वात्व चंद्रपूर जिल्हा काँग्रेसचे अध्यक्ष आमदार सुभाष धोटे तथा सीडीसीसी बँकेचे अध्यक्ष संतोष रावत यांच्या मार्गदर्शनात २३/१०/२०२३ रोज सोंमवारला भव्य शेतकरी मोर्चाचे आयोजन केलेले आहे.

     

    तरी तालुक्यातील सर्व जंगल लगत शेतकरी- शेतमजूर, अनुसूचित जाती जमाती व इतर पारंपरिक वननिवाशी शेतकरी,नजुल जमीन पट्टेधारक, बेरोजगार युवक युवती तसेच राज्य सरकार व केंद्र शासनाच्या चुकीच्या धोरणामुळे होणार्या अन्यायाविरुद्ध समस्त मुल तालुक्यातील नागरिकांनी सदर मोर्चात सहभागी व्हावे. असे आव्हान तालुका कांग्रेस कमिटीच्या वतीने केले आहे.

    प्रमुख मागण्या

    🔸वाघाने व इतर हिंस्र प्राण्यांनी ठार केल्यास ५० लाख रुपये देण्यात यावे.
    🔸शेतीची नुकसान करणार्या रानटी डुकरांचा बंदोबस्त करावा तसेच मारण्यासाठी परवानगी देण्यात यावी.
    🔸 प्राण्यांपासून शेतीची नुकसान झाल्यास तात्काळ नुकसान भरपाई देण्यात यावी.
    🔸 अनुसूचित जमाती व इतर पारंपरिक वननिवाशी जबरान जोत शेतकरी यांना पट्टे देण्यात यावे.
    🔸नजुलच्या जागेवर घरे बांधलेल्या कुटुंबाला स्थायी पट्टे देण्यात यावे.
    🔸जंगलालगत असलेल्या शेतीभोवताल तारेचे कुंपण करण्यात यावे.
    🔸वाढती बेरोजगारी कमी करण्यासाठी सुशिक्षित बेरोजगारांसाठी स्थायी नौकरी देण्यात यावी.
    या सर्व मुलभूत मागण्यांना घेऊन दिनांक २३/१०/२०२३ रोज सोमवारला सकाळी ११.०० वाजता कॄषि उत्पन्न बाजार समिती मुल या आवारापासून ते उपविभागीय अधिकारी व तहसिल कार्यालय मुल यांचे कार्यालयापर्यंत भव्य मोर्चाचे आयोजन केलेले आहे तरी जास्तीतजास्त संख्येने उपस्थित राहण्याचे करावे असे कांग्रेस कमिटीच्या वतीने करण्यात आले आहे.

  • प्रशासन नरमले तरीही आदिवासी समाजाचे ठिय्या आंदोलन सुरुचं

    News34 chandrapur

    चंद्रपूर/पोम्भूर्णा – पोंभूर्णा येथील भारतरत्न अटलबिहारी वाजपेयी इको पार्क येथील आदिवासी संस्कृतीचे दर्शन घडविणारे पुतळे व झेंडा हटविल्यावरून मागील पाच दिवसांपासून सुरू असलेल्या आंदोलनाचे रुपांतर कार्यालयाचे तोडफोड होण्यापर्यंत गेल्याने तणावाची परिस्थिती निर्माण झाली आहे. आंदोलनकर्त्यांनी पोलिस अधिकाऱ्याला धक्काबुक्की केल्याने सध्या हे प्रकरण तापले आहे.

     

    सध्या आंदोलनस्थळाला पोलीस छावणीचे रूप आले असून जिल्ह्यातील विविध पोलीस स्टेशनमधून अधिकारी व कर्मचारी पोम्भूर्णा येथे दाखल झाले आहे.

     

    सध्या वनविभाग, महसूल व पोलीस विभागाने आंदोलकांची भेट घेऊन समजविण्याचा प्रयत्न केला मात्र आंदोलकांनी प्रशासनाला वेठीस धरून ठेवले आहे.

     

    याबाबत वनविभागाच्या उपवनसंरक्षक श्वेता बोड्डू यांच्याशी संपर्क साधला असता त्यांनी सांगितले की आम्ही 2 दिवसांपूर्वी आंदोलकांशी चर्चा केली, त्यांच्या सर्व मागण्या सुद्धा मान्य केल्या परंतु आंदोलकांच्या मागण्या शासन नियमानुसार पूर्ण कराव्या लागणार याबाबत सर्वाना याची माहिती दिली मात्र आंदोलक मागे हटायला तयार नाही.

     

    20 ऑक्टोबर ला आदिवासी समाजाच्या आंदोलनाला हिंसक वळण लागले, उपविभागीय पोलीस अधिकारी मल्लिकार्जुन इंगळे यांच्यासोबत धक्काबुक्की करण्यात आली, एसडीओ व होमगार्ड ला सुद्धा यामध्ये किरकोळ दुखापत झाली असल्याची माहिती आहे, सध्या उपविभागीय पोलीस अधिकारी इंगळे यांना नागपुरातील अर्नेजा हॉस्पिटलमध्ये दाखल करण्यात आले आहे.

     

    आदिवासी आंदोलनाच्या हिंसक वळणानंतर सुद्धा पोलीस प्रशासन कमालीचे संयम दाखवीत आहे, आंदोलनस्थळी पोलीस प्रशासनाने मोठा बंदोबस्त लावला असून सध्या प्रशासनाने आदिवासी बांधवांना आंदोलन मागे घेण्याची विनंती केली आहे.

     

  • चंद्रपुर जिल्ह्यात पहिल्यांदाचं आढळला भला मोठा अजगर

    News34 chandrapur

    चंद्रपूर : मूल तालुक्यातील चांदापूर येथील शेतशिवारात १४ फुट लांबीचा अजगर साप आढळून आला.अजगर १४ फुट लांब व २६ किलो वजनाचा होता. आतापर्यंत सापडलेला हा सर्वात मोठा अजगर आहे.

     

    चांदापूर येथील नागरिकांनी संजीवन पर्यावरण संस्थेच्या सदस्यांना संपर्क करून माहीती दिली. संजीवन पर्यावरण संस्थेचे सदस्य दिनेश खेवले आणि सर्पमित्र तन्मयसिंह झिरे यांनी चांदापूर येथे जाऊन शेतशिवारातील झाडावरून १४ फुट लांब व २६ किलो वजनाच्या अजगर सापाला अलगद पकडले. आतापर्यंत सापडलेला हा सर्वात मोठा अजगर आहे. याआधी तेरा फुट लांबीचा अजगर याच परिसरात झिरे यांनी पकडला आहे. अजगराची वनविभागा मध्ये नोंद करण्यात आली. त्यानंतर बफर क्षेत्रातील डोनी च्या जंगलात सुरक्षित ठिकाणी त्याला सोडण्यात आले.

     

    अजगर सापाला सोडतांना वनरक्षक सूधीर ठाकुर, वनरक्षक पवन कुळमेथे, वनरक्षक खोब्रागडे, संजीवन पर्यावरण संस्थेचे सदस्य तन्मयसिंह झिरे, दिनेश खेवले, अंकुश वाणी, प्रतीक लेनगुरे व शक्कीर जेंगठे उपस्थित होते.

  • चंद्रपूर शहरातील वाहतूक व्यवस्थेत बदल, जाणून घ्या पर्यायी मार्ग

    News34 chandrapur

    चंद्रपूर : चंद्रपुर शहरात 23 ऑक्टोबर 2023 रोजी दुपारी 12 ते रात्री 12 वाजेपर्यंत माता महाकाली मंदिरापासुन नवरात्रोत्सवानिमित्त रॅली निघणार आहे. सदर रॅली माता महाकाली मंदिर-गिरणार चौक-गांधी चौक जटपुरा गेट-परत मौलाना चौक-गिरणार चौक ते माता महाकाली पर्यंत काढण्यात येणार आहे. या रॅलीमध्ये वाहतुकीला अडथळा होऊ नये म्हणून या मार्गावरील सर्व वाहतुक बंद ठेवणे आवश्यक आहे.

     

    त्याअनुषंगाने महाराष्ट्र पोलीस अधिनियम-1951 च्या कलम-33(1)(ब) नुसार सार्वजनिक ठिकाणी सुरळीत रहदारी व सुव्यवस्था राखण्यासाठी करावयाच्या उपाययोजना व नियमणासाठी सदर रॅलीकरीता असलेल्या मार्गावर रहदारी सुरळीत चालावी, रहदारीस कुठल्याही प्रकारचा अडथळा निर्माण होऊ नये व जनतेला त्रास व गैरसोय होऊ नये म्हणून वाहतूक व्यवस्थेमध्ये बदल करणेबाबतची अधिसुचना पोलीस अधिक्षक रविंद्रसिंह परदेशी यांनी निर्गमीत केली आहे.

     

    दि. 23 ऑक्टोबर रोजी दुपारी 12 ते रात्री 12 वाजेपर्यंत माता महाकाली मंदिर-गिरणार चौक-गांधी चौक-जटपुरा गेट-परत मौलाना चौक-गिरणार चौक ते माता महाकाली मंदिर पर्यंतचा मार्ग सर्व प्रकारच्या वाहनांकरीता बंद राहील. तसेच हा मार्ग “नो पार्कंग झोन आणि नो हॉकर्स झोन” म्हणून घोषित करण्यात येत आहे.

     

    या कालावधीत सर्व वाहतुकदारांनी या पर्यायी मार्गाचा अवलंब करावा :

    बल्लारपूरकडून येणाऱ्या तसेच बाबुपेठ, बागला नगर, महाकाली वार्ड, भिवापूर वार्ड या यात्रा परिसरात राहणाऱ्या नागरिकांनी शहरात जाण्यासाठी व परत येण्यासाठी भिवापूर-हनुमान खिडकी-दादमहल वार्ड या मार्गाचा वापर करावा. सदरचा मार्ग हा मोटार सायकल व ऑटो यासाठीच राहील. बागला नगर, महाकाली वार्ड, भिवापूर वार्ड या यात्रा परिसरात राहणाऱ्या नागरिकांना चारचाकी वाहनांने बाहेर जाण्यासाठी किंवा परत येण्यासाठी लालपेठ कॉलरी-पठाणपुरा गेट-बिनबागेट या मार्गाचा वापर करावा. तसेच शहराबाहेर ईतरत्र जाण्यासाठी कामगार चौक मार्गे बायपास रोडचा वापर करावा. नागपूर व मुलकडून शहरामधील पंचशिल चौक, श्री टॉकीज चौक, पठाणपुरा परिसर वार्ड मध्ये जाणाऱ्या सर्व नागरीकांनी (जड वाहने वगळून) वरोरा नाका-संत केवलराम चौक-विदर्भ हाउसिंग चौक -रहेमतनगर – बिनबा गेट मार्गाचा वापर करावा. तसेच नागपूर व मुलकडून शहरामधील रामाळा तलाव, बगड खिडकी, गंजवार्ड, भनापेठवार्ड मध्ये जाणाऱ्या सर्व नागरीकांनी (जड वाहने वगळुन) सावरकर चौक-बस स्टॅन्ड चौक-आर.टी.ओ. ऑफिस- रयतवारी कॉलरी या मार्गाचा वापर करावा.

     

    यात्रेकरीता बाहेरून येणाऱ्या वाहनांकरिता पार्किंग व्यवस्था : (नियोजीत वाहनतळ)

    डी.एड. कॉलेज बाबुपेठ, राजीव गांधी इंजीनियरिंग कॉलेज, श्री. बागला यांची खाजगी जागा (बागला चौकीजवळ), बैल बाजार (माता महाकाली मंदिरासमोर), श्री. चहारे यांची जागा (चहारे पेट्रोलपंपच्या मागे), श्री. कोठारी यांची खाजगी जागा (महाकाली मंदिरासमोर), श्री. पटेल यांची खाजगी जागा (महाकाली मंदिरासमोर) आणि कोहीनुर तलाव ग्राउंड (अंचलेश्वर गेटजवळ) ही नियोजित वाहन स्थळे असून या ठिकाणी पार्किंगची व्यवस्था करण्यात आली आहे. नागरीकांनी निर्देशाचे पालन करुन प्रशासनाला सहकार्य करावे, असे आवाहन पोलीस अधिक्षक रविंद्रसिंह परदेशी यांनी केले आहे.

  • वनमंत्री सुधीर मुनगंटीवार यांच्या विधानसभा क्षेत्रात आदिवासी समाजाचा एल्गार

    News34 chandrapur

    चंद्रपूर/पोम्भूर्णा – पोंभूर्णा येथील भारतरत्न अटलबिहारी वाजपेयी इको पार्क येथील आदिवासी संस्कृतीचे दर्शन घडविणारे पुतळे व झेंडा हटविल्यावरून चार दिवसांपासून सुरू असलेल्या आंदोलन 20 ऑक्टोबर ला चांगलेच चिघळले.

     

    प्रशासनाकडून आदिवासी संस्कृती व समाजाची थट्टा केल्याने आज वनविभागाच्या कार्यालयाची तोडफोड करण्यात आली, परिस्थिती हाताळण्यासाठी गेलेले उपविभागीय पोलीस अधिकारी मल्लिकार्जुन इंगळे याना सुद्धा धक्काबुक्की करण्यात आली, त्यांनतर तणावाची स्थिती निर्माण झाली, मात्र पोलीस विभागाने यावर नमती भूमिका घेतल्याने अनुचित प्रकार घडला नाही.

     

    जोपर्यंत आमच्या मागण्या पूर्ण होणार नाही तोपर्यंत आम्ही मागे हटणार नाही अशी भूमिका आदिवासी समाजाने घेतली होती, यासाठी कायदा हातात घ्यावा लागला तरी चालेल असा इशारा सुद्धा देण्यात आला होता.

     

    वनमंत्री सुधीर मुनगंटीवार यांच्या विधानसभा क्षेत्रातील अटल बिहारी वाजपेयी इको पार्क मध्ये आदिवासी संस्कृती घडविणारे पुतळे व झेंडे लावण्यात आले होते, मात्र प्रशासनाकडून पुतळे व झेंडे हटविल्याने हा वाद सुरू झाला. आदिवासी बांधव वनविभागाच्या कार्यालयापुढे ठिय्या आंदोलनाला बसले, मागण्या पूर्ण करा अश्या भूमिकेत आदिवासी समाज त्याठिकाणी ठाण मांडून बसला आज आंदोलन चिघळल्याने काही काळ तणावाची स्थिती निर्माण झाली होती.

     

    कायदा व सुव्यवस्था बिघडू नये यासाठी पोलिस अधीक्षक रविंद्रसिंह परदेशी, अप्पर पोलीस अधीक्षक रिना जनबंधू आंदोलन स्थळी दाखल झाले व आंदोलनाचे नेतृत्व करणारे जगन येलके यांच्याशी चर्चा केली मात्र कोणताही तोडगा निघाला नाही.
    बिगडत चाललेली परिस्थिती पाहता ३०० हून अधिक पोलिसांना तैनात करण्यात आले आहे.

  • चंद्रपूर जिल्ह्यात वाघाच्या हल्लात गुराखी ठार

    News34 chandrapur

    मूल (गुरू गुरनुले): गुरे चराईसाठी नेलेल्या एका गुराख्यावर दबा धरून बसलेल्या वाघाने झडप घेवुन ठार केल्याची घटना वनविकास महामंडळाच्या कांतापेठ बिटातील कक्ष क्रं. 523 घडली. बंडु विट्ठल भेंडारे वय 60 रा. कांतापेठ असे वाघाच्या हल्लात ठार झालेल्या इसमाचे नांव आहे.

    मूल तालुक्यातील मौजा कांतापेठ येथील बंडु विट्ठल भेंडारे हे आज 20 ऑक्टोबर ला गुरांना चराईसाठी जंगलाकडे घेऊन गेले होते, दरम्यान दुपारच्या सुमारास वनविकास महामंडळाच्या जंगलाकडुन गुरे धावत येत असल्याने कांतापेठ येथील नागरीकांना संशय आल्याने त्यांनी जंगलाच्या दिशेने गेले.

     

    यावेळी बडु विट्टल भेंडारे यांना वाघाने हल्ला करून ठार केल्याची घटना उघडकीस आली. घटनास्थळावर वनविभागाचे अधिकारी, कर्मचारी पोहचुन पंचनामा करीत आहे.

  • अज्ञात वाहनाच्या धडकेत बिबट्या ठार

    News34 chandrapur गुरू गुरनुले

    मुल – सावली रेंज मधील उप क्षेत्र राजोली अंतर्गत मूल सिंदेवाही मार्गावर अज्ञात वाहनाच्या धड़केत १ महिन्यापूर्वी बिबटयाचा अज्ञात वाहनाच्या धडकेत मृत्यु झाला ही घटना ताजी असताना १९ आक्टो. रोजी रात्रि सावली – मूल मार्गावर पुन्हा एकदा ३ वर्षीय बिबटयाला आपला जीव गमवावा लागला.

     

    ही चिंताजनक बाब असून जंगल सोडून वन्य जीव लोकवस्ती कडे अन्नाच्या शोधात येत असतील तर वन्य जीवांच्या संगोपन आणि संरक्षण याकडे व्यवस्थापनाचे दुर्लक्ष होत असल्याचे दिसुन येत आहे, त्यामुळे वन्य हिंस्र जीवांची अन्नचि मात्रा वनात संपली की क़ाय असा प्रश्न उपस्थित केला जात आहे.

     

    सावली वनपरिक्षेत्र जंगल व्याप्त असून मोठ्या प्रमामात जंगल आहे त्यामुळे या रेंज अंतर्गत असलेल्या पाचही उप क्षेत्रात मोठ्या प्रमाणात वन हिंस्र पशुचे वावर आहे त्यामुळे या रेंज मधे अनेक घटना नेहमी घडत असतात आता तर वन्य जीव लोकवस्ती कडे येण्याचा सपाटा सुरु झाल्याने तालुक्यात भीतिचे वातावरण निर्माण झाले आहे.

     

    भयावह परिस्थितीत या भागातील शेतक ऱ्याना शेती सांभाळन्याची वेळ निर्माण झाली आहे गावात राहणे , शेतात जाने कठिन होऊन बसले आहे ऐवढ़ी दहशत वन हिंस्र पशुचि निर्माण झाली असताना वनातील अन्नाच्या कमतरतेमुळे अन्नाच्या शोधात भटकत असलेला बिबट सावली उप क्षेत्रा अंतर्गत नियत क्षेत्र टेकाडी भागात फिरत असताना सावली – मूल मार्गावर स्टार ढाबा जवळ अज्ञात वाहनाच्या धड़केत ठार झाला.

     

    घटनेची माहिती होताच सावली रेंज चे वनकर्मचारी घटनास्थळी गेले, मृत बिबटयाला ताब्यात घेऊन उत्तरीय तपासणी टि. टी. सी. सेंटर चंद्रपुर येथे नेण्यात आले. यावेळी सावली वनपरीक्षेत्राचे वनपरिक्षेत्र अधिकारी पि. जी. विरुटकर सावली उप क्षेत्राचे उपक्षेत्र सहा. आर . जी. कोडापे वनरक्षक बोनलवार , वनरक्षक चौ धरी व इतर वनकर्मचारी उपस्थित होते.

     

Powered by
►
Necessary cookies enable essential site features like secure log-ins and consent preference adjustments. They do not store personal data.
None
►
Functional cookies support features like content sharing on social media, collecting feedback, and enabling third-party tools.
None
►
Analytical cookies track visitor interactions, providing insights on metrics like visitor count, bounce rate, and traffic sources.
None
►
Advertisement cookies deliver personalized ads based on your previous visits and analyze the effectiveness of ad campaigns.
None
Powered by