My Blog

Category: ग्रामीण वार्ता

ग्रामीण वार्ता (Gramin Varta) विभागात वाचा news34.in वर चंद्रपूर जिल्ह्यातील ग्रामीण भागातील बातम्या आणि घडामोडी. शेतकरी योजना, ग्रामपंचायत राजकारण, स्थानिक विकास प्रकल्प, कृषी आणि ग्रामीण जीवनाशी संबंधित सर्व महत्त्वाचे अपडेट्स येथे उपलब्ध आहेत. चंद्रपूर ग्रामीण भागातील समस्या, यशोगाथा आणि सकारात्मक बदलांना आम्ही प्राधान्य देतो. ग्रामीण भागातील विश्वासार्ह माहितीसाठी नियमित भेट द्या.

  • तो गुरांना घेऊन जंगलात गेला आणि वाघ समोर आला

    News34 chandrapur

    चिमूर – गुरांना जंगलात चराईसाठी घेऊन जाणाऱ्या गुराख्याला दबा धरून बसलेल्या वाघाने हल्ला करीत ठार केल्याची घटना रविवारी 29 ऑक्टोबर ला घडली.

     

    चिमूर तालुक्यातील विहिरगाव येथे राहणारे 45 वर्षीय मधुकर धाडसे असे मृतकाचे नाव आहे.

    दुपारच्या सुमारास विहिरगाव येथील गुराखी व गुरेढोरे मालक यांनी 8 जणांचा समूह बनवीत गुरे चराईकरिता विहिरगाव वनविभागातील कम्पार्टमेंट क्रमांक 859 मध्ये गेले.

     

    त्याठिकाणी दबा धरून बसलेल्या वाघाने मधुकर वर हल्ला चढवीत त्याला ठार केले, सदरची माहिती वनविभागाला मिळताच ते तात्काळ घटनास्थळी दाखल झाले. वनविभागाच्या चमूने मधुकर चा मृतदेह शवविच्छेदन करिता उपजिल्हा रुग्णालयात आणला, मृतक मधुकर हा विवाहित असून त्याला एक मुलगी आहे.

  • शिक्षण क्षेत्रातील शिक्षित नागरिकांचे अघोरी कृत्य

    News34 chandrapur

    चंद्रपूर – सत्ता प्राप्तीसाठी माणूस कुठल्याही स्तरावर जाऊ शकतो याचा प्रत्यय चंद्रपूर जिल्हात आला आहे.जिल्हातील राजुरा शहरातील शैक्षणिक क्षेत्रात कार्यरत बापूजी पाटील मामुलकर प्रतिष्ठानच्या निवडणूकीपुर्वी अघोरी प्रकार पुढे आला.

    आपल्यालाच सत्ता मिळावी,यासाठी संस्थेतील एका संचालकाने इत्तर संचालकांच्या घरी काळा धागा बांधला, हळद, कुंकू लावले.संशयास्पद वस्तू ठेवल्या.या वस्तू निदर्शनास येताच संचालक हादरले. सीसीटीव्हीमूळे हा प्रकार उघडकिस आला.या अघोरी प्रकाराची तक्रार राजुरा पोलिस ठाण्यात करण्यात आली आहे.संचालक मेघा नलगे आणि त्यांचे तीन नातेवाईक यांच्या विरोधात ही तक्रार आहे. या प्रकारामुळे एकच खळबळ उडाली आहे.

     

    प्राप्त माहितीनुसार,जिल्हातील राजुरा शहरातील बापूजी पाटील मामुलकर प्रतिष्ठान या संस्थेतर्फे काही शाळा संचालित आहेत.या संस्थेमध्ये संचालक म्हणून अविनाश जाधव, एडवोकेट अरुण धोटे, सुमनताई मामुलकर, अरुण धोटे,डॉक्टर एस. एम. वारकड, बी. यु. बोर्डेवार ,सुदर्शन निमकर, मेघा नलगे, दत्तात्रय येगीनवार ,राजेंद्र जाधव हे सदस्य आहेत.संस्थेचा कार्यकाळ पुर्ण झाल्याने सहाय्यक धर्मदाय आयुक्त चंद्रपूर यांच्या आदेशाने निवडणूक घेण्यात आली.

     

    सत्ता आपल्याकडे असावी यासाठी विरोधातील सहा संचालकांच्या घरात काळा धागा, हळद, कुंकू लावले काही संशयास्पद वस्तू ठेवल्यात. अविनाश जाधव, एडवोकेट अरुण धोटे ,डॉक्टर एस. एम. वारकड, बी. यु. बोर्डेवार ,दत्तात्रय येगिनवार यांच्या घरी या वस्तू आढळून आल्यात.हा प्रकार सीसीटीव्ही कैद झाला.हा प्रकार उघळकीस येताच एकच खळबळ उडाली.

     

    सत्ता प्राप्तीसाठी थेट जादुटोण्याचा आधार घेतल्याने या प्रकरणाला वेगळे वळण आले आहे.या प्रकाराणे संचालकांचे कुटुंबिय भयभीत झाले आहेत.हा प्रकार उघडकीस येताच घरी व शेजारच्या सीसीटीव्ही फुटेज बघितल्या गेले.त्यात तिन महिला व एक पुरूष दिसून आला.

    असा घडला प्रकार…

    संचालक घरी नसतांना त्यांचा घरी तीन महिला, एक पुरुष गेलेत. कुटुंबियांना त्यांनी पाणी मागलेत.पाणी आणण्यासाठी ते गेले असता नेमके त्याच वेळी सोफ्याच्या आत काही वस्तू त्यांनी ठेवल्यात.दरम्यान या प्रकाराची तक्रार राजुरा पोलिस ठाण्यात करण्यात आली आहे.

     

    सीसीटीव्ही फुटेज, ऑडीओ रेकाॅर्डींग व सापडलेल्या वस्तू राजुरा पोलिस ठाण्यात जमा करण्यात आल्या आहेत.या प्रकाराची तक्रार प्राप्त झालेली आहे. तक्रारीच्या अनुषंगाने प्राथमिक चौकशी सुरू असल्याची माहिती पोलीस निरीक्षक योगेश्वर पारधी यांनी दिली. सध्या या प्रकरणात कुणालाही अटक करण्यात आली नाही.

  • चंद्रपुरात वाढते अपघात, प्रशासन “टक्केवारीत” खुश

    News34 chandrapur

    चंद्रपूर – जिल्ह्यात मागील काही दिवसात अपघाताच्या घटना वाढल्या आहे, विशेषतः चंद्रपूर शहरात सातत्याने अपघात होत आहे, यामध्ये निष्पाप जीवांचे बळी जात आहे. मात्र प्रशासन कोणतेही उपाययोजना करताना दिसत नाही, उलट मागील वर्षीच्या तुलनेत यावर्षी अपघाताची टक्केवारी घटल्याचे सांगून आरटीओसह संबधीत प्रशासन स्वतःचीच पाठ थोपटून घेण्यात धन्यता मानत आहे. त्यामुळे अपघात रोखण्यासाठी शहरातील अतिक्रमण काढण्यास अन्य उपाययोजना करणे अत्यावश्यक झाले आहे.

     

    चंद्रपूर जिल्हा हा औद्योगिक जिल्हा म्हणून ओळखला जातो, औद्योगिकीकरण असल्याने जिल्ह्यात वाहनांची संख्या मोठ्या प्रमाणात आहे, वाहनांची संख्या जास्त असल्याने अपघातांचे प्रमाण ही जास्तच आहे, मागील काही दिवसांपासून महामार्गावर नव्हे तर शहरात अपघाताची मालिका सुरू झाली आहे, मागील आठवड्यात आठ वर्षीय बालकासह अपघातात 7 जणांना आपला जीव गमावला लागला, त्यापूर्वी एका शिक्षीकेसह अन्य नागरिकांना बळी गेला आहे. ही चिंताजनक बाब आहे, मात्र यावर आजही प्रशासनाने नियंत्रण आणलेले नाही. विशेष म्हणजे 27 ऑक्टोबर ला शहरातील रहमतनगर येथे सेवानिवृत्त पोलीस अधिकाऱ्यांच्या मुलाचा अपघातात मृत्यू झाला, त्या मुलाचा अपघात पोलिसांच्या वाहनामुळेच झाला.

     

    अपघाताबाबत जिल्हाधिकारी कार्यालयात नुकतीच रस्ता सुरक्षा समितीची बैठक झाली, त्यामध्ये जानेवारी ते ऑगस्ट वर्ष 2023 या कालावधीत 534 अपघातांची नोंद झाली असून 233 जणांनी अपघातात आपला जीव गमावन्याचे शासन दरबार नोंद आहे.

    या अपघातात दुचाकी अपघातांची संख्या 275 असून यामध्ये 129 जणांचा मृत्यू झाला, बैठकीत नियमाबद्दल चर्चा करण्यात आली होती मात्र ते नियम प्रत्यक्षात लागू झालेच नाही.
    महामार्गावर अनेक अपघात होत असतात मात्र आता चंद्रपूर शहरात अपघातात वाढ झाली आहे.

     

    4 सप्टेंबर 2023 ला चंद्रपुरातील बापट नगरमध्ये झालेल्या अपघातात शिक्षिकेला आपला जीव गमवावा लागला. त्याचदिवशी सायंकाळी 2 अपघातात दोघांनी आपला जीव गमावला. त्यांनतर ऑक्टोबर महिन्यात लागोपाठ झालेल्या दुचाकी वाहनांच्या अपघातात 7 जणांनी आपला जीव गमावला, सतत होणाऱ्या अपघातात निष्पाप नागरिकांचे बळी जात आहे. त्याला जबाबदार कोण हा प्रश्न आहे.

     

    अतिक्रमनात झपाट्याने वाढ

    चंद्रपूर-नागपूर महामार्गावर अतिक्रमण वाढले आहे. अनेकांनी रस्त्यावर आपला कब्जा केला आहे, एरवी रस्त्याच्या कडेला सामान्य नागरिकांनि दुचाकी वाहन लावले तर तात्काळ वाहतूक विभाग वाहन उचलून नेतात. मात्र चंद्रपूर-नागपूर महामार्गावरील असलेल्या दुचाकी वाहनांच्या शोरूमसह अन्य व्यावसायिकांनी रस्त्यावर अतिक्रमण केले आहे. एवढेच काय तर अर्धा अधिक रस्त्यावर नवीन दुचाकी, चारचाकी वाहने विक्रिसाठी ठेवल्या आहे. मात्र वाहतूक पोलिसांसह अन्य प्रशासन दुर्लक्ष करीत आहे. यामागे आर्थिक कारण दडले असल्याचे बोलल्या जात आहे.
    अतिक्रमण काढण्यात यावे यासाठी प्रशासनाला अनेकदा निवेदने देण्यात आली मात्र कोणताही उपयोग झाला नाही.

    प्रशासनाने स्वतः थोपटली आपली पाठ

    मागच्या वर्षीच्या तुलनेत अपघातांची संख्या कमी असून मृतकाचा आकडा सुद्धा कमी आहे, उलट 30 टक्के नागरिक यंदा वाचले, मृतकाच्या आकड्यात 30 टक्क्यांची कमी आली असे अधिकारी ताठ मानेने सांगत आहे, ही टक्केवारी कमी असली तरी निष्पाप नागरिकांचा बळी तर जात आहे ना?  मृतकाची संख्या 30 टक्क्यांनी कमी असली तर तो आकडा शून्यावर आणण्याची जबाबदारी कुणाची आहे? याचं भान अधिकाऱ्यांनी ठेवायला हवं. प्रशासन सध्या मागील वर्षीच्या तुलनेत “टक्केवारी” कमी झाल्याचे सांगून खुश असल्याचे दिसत आहे.

     

    अधिकाऱ्यांचा संवेदनशीलपणा संपला

    यंदा मृतक कमी आहे असे सांगणाऱ्या अधिकाऱ्यांनी त्या कुटुंबांच्या घरी एकदा डोकावून बघावं.ज्यांच्या घरचा कमावता पुरुष दुचाकी अपघातात ठार झाला, एक आठ वर्षाचा मुलगा अपघातात गेला, 3 दिवसांनी त्याच्या वडिलांनी सुद्धा जगाचा निरोप घेतला, यांच्या मृत्यूला जबाबदार कोण? याचं उत्तर अधिकाऱ्यांनी द्यायलाच हवं.

    कारवाई कुणावर?

    शहरात अक्षरशः स्टंट करणारे दुचाकीस्वार यांच्यावर कारवाई अत्यंत कमी प्रमाणात होत आहे. शहरात झालेल्या अपघाताला जबाबदार हे स्टंट करणारे दुचाकीस्वारचं आहे, मात्र हे वाहतूक पोलिसांच्या हाती कधी लागत नाही, आजही शहरात ट्रिपल सिट ने अल्पवयीन बालक प्रवास करतात, त्यांच्यावर कारवाई नाही, इतकेच नव्हे तर शहरात लागलेले सीसीटीव्ही कॅमेरे कशासाठी आहे? ट्रिपल सिट व स्टंट करणारे दुचाकी स्वार त्या कॅमेऱ्यात कैद होत नाही काय? हा प्रश्न आहे.

     

    वाहतूक विभागात इतिहास

    चंद्रपूरच्या इतिहासात चंद्रपूर वाहतूक नियंत्रण शाखेत पहिल्यांदाच 2 पोलीस निरीक्षकांची वर्णी लागली असली तरी चंद्रपुरात वाहतुकीचे तीनतेरा वाजलेले आहे.

     

    विशेष म्हणजे वाहतूक विभागाच्या बाजूलाचं अवैध ट्रॅव्हल्स स्टॅण्ड लागले आहे, तत्कालिन पोलीस अधीक्षक संदीप दिवाण यांनी वाहतूक विभागाच्या बाजूला असलेले ट्रॅव्हल्स स्टॅण्ड बंद केले होते, त्यानंतर तत्कालीन पोलीस अधीक्षक नियती ठाकेर यांनी सुद्धा त्या आदेशाचा मान राखत स्टॅण्ड बंद केले, मात्र पुन्हा तीच परिस्थिती निर्माण झाली आहे.

     

    सध्याचे पोलिस अधीक्षक रवींद्रसिंग परदेशी यांची पोलिस प्रशासनावर पकड ढिली होत असल्याचे नागरिकांचे म्हणने आहे. त्यामुळेच शहरात वाहतूक अनियंत्रित होत असल्याचेही बोलल्या जात आहे. लहान सहान कार्यक्रमाला हजेरी लावणाऱ्या पोलीस अधीक्षकांना शहरातील अपघात कसे काय दिसत नाही, हा प्रश्नच आहे.

    शहरातील सिग्नल ची अवस्था काय?

    शहरातील अति वर्दळीचा प्रियदर्शिनी इंदिरा गांधी चौकातील सिग्नल व कर्तव्यावर असलेले वाहतूक पोलीस शोभेची वास्तू ठरत आहे, नागरिक 12 सेकंद पूर्वी सिग्नल तोडून जातात, यामध्ये कर्मचाऱ्याचा दोष नसला तरी चौकात लागलेले कॅमेरे त्या नियमभंग करणाऱ्या नागरिकांना टिपत नसतील का?

    चंद्रपूर नागपूर मार्गावर बापट नगर येथे सुरू करण्यात आलेला सिग्नल आधी सतत सुरू होता त्यांनतर काही दिवसांनी तो बंद झाला, विद्या निकेतन शाळेसमोर अपघात घडला, त्या अपघातात दोघांनी आपला जीव गमावल्यावर तो सिग्नल पुन्हा सुरू झाला.

     

    सामान्यांचा अंत बघू नका

    शहरात अपघाताच्या घटनांमध्ये वाढ झाली आहे. निष्पाप बळी जात आहे आणि प्रशासन मात्र उपाययोजना करण्याकडे दुर्लक्ष करीत आहे. परिणामी आता सामान्य नागरिक रस्त्यावर उतरण्याची शक्यता नाकारता येत नाही.

  • चंद्रपूर मेडिकल कॉलेज मध्ये गरोदर महिलेचा मृत्यू

    News34 chandrapur

    चंद्रपूर:- सौ. अर्शिला रूपेश मेश्राम, वय-२३ वर्षे, राह. नवेगाव (वाघाडे) ता. गोंडपिपरी जि. चंद्रपूर येथील गरोदर महिलेला श्वास घेण्यास त्रास होत असल्याने  दि.२३/१०/२०२३ रोजी रात्री १२.०० वाजता च्या दर्म्यान गोंडपिपरी येथील शासकिय रूग्णालय येथे तिच्या पतीने भर्ती करण्यासाठी नेले होते. रूग्णालयातील कर्तव्यावर असलेल्या डॉक्टरांनी सदर महिलेची प्रकृती बिघडत असल्याचे पाहून तीला एका तासात शासकीय जिल्हा वैद्यकीय महाविद्यालय, चंद्रपूर येथे रेफर केले.

     

    पहाटे २.३० ते ३.०० वाजताच्या दरम्यान ते वैद्यकिय महाविद्यालय, चंद्रपूर येथे पोहोचले. तसेच तीला प्रस्तुती वार्डात भर्ती करून घेण्यात आले. तेव्हा तिच्यावर उपचार सुरू असतांना दि. २४/१०/२०२३ ला सायं. ७.३० वाजता च्या दरम्यान सदर महिलेचा मृत्यु झाला. प्रसूतीच्या काळात रुग्णालयात संबंधित डॉक्टरांच्या दुर्लक्षीतपणामुळे सदर मातेचा बाळासह मृत्यु झाला असल्याचे परिवारातील सदस्यांचे म्हणने आहे.

     

    तेव्हा सदर घटनेचे गाभीर्य लक्षात घेता भाजपा जिल्हाध्यक्ष राहुल पावडे यांना सदर घटनेची दूरध्वनी वरून माहिती मिळताच  तत्काळ पदाधिकाऱ्यांना रुग्णालयात पाठवून घटनेची माहिती घेण्यास सांगितले आणि पावडे यांनी जिल्हा महामंत्री ब्रिजभूषन पाझारे,अनु. जमाती मोर्चा जिल्हाध्यक्ष धनराज कोवे,बंडू गौरकार,साजिद भाई, प्रवीण उराडे,आकाश मस्के,अमित निरंजन यांच्या सोबत जिल्हाधिकारी यांची भेट घेतली व निवेदन दिले.

     

    या घटनेची सखोल चौकशी व्हावी व दोषी असलेल्या संबंधीत डॉक्टर व कर्मचारी यांच्यावर तात्काळ कार्यवाही करण्यात यावी तसेच वैद्यकीय महाविद्यालयातील अनेक सोई सुविधा आणि रुग्णांच्या मदती साठी गठित केलेली समिती द्वारे वेळोवेळी केलेल्या सूचनाने अनेक सुविधा होत आहेत. मात्र ह्या घटनेची चौकशी करण्याचे     जिल्हाधिकारी यांना निवेदन दिले. आणि अश्या घटनेची पुनरावृत्ती होऊ नये या साठी ठोस उपाय करण्यात यावे अशी विनंती केली आहे. दिलेल्या निवेदनाला जिल्हाधिकारी यांनी सकारात्मक प्रतिसाद दिला आहे.

  • चंद्रपुरात एका आठवड्यात काढले 60 हजार 494 नागरिकांचे आयुष्यमान भारत कार्ड

    News34 chandrapur

    चंद्रपूर : आयुष्मान भारत प्रधानमंत्री जन आरोग्य योजनेंतर्गत लाभार्थी व्यक्तीस प्रती कुटुंब प्रती वर्ष 5 लक्ष रुपयांचा आरोग्य विमा हा 1209 उपचार/शस्त्रक्रिया करता देण्यात येतो. या योजनेंतर्गत देशातील शासकीय आणि अंगीकृत खाजगी रुग्णालयांच्या माध्यमातून मोफत लाभ पुरविण्यात येत आहे. जिल्ह्यात आयुष्मान कार्ड काढण्याची मोहीम प्रभावीपणे राबविण्यात येत असून मागील सात दिवसांत तब्बल 60494 नागरिकांचे आयुष्मान कार्ड तर आतापर्यंत एकूण 4 लक्ष 6 हजार 239 जणांचे आयुष्मान कार्ड काढण्यात आले आहे.

     

    आपले सरकार सेवा केंद्राचे केंद्रचालक यांच्या विशेष सहभागाने आयुष्मान कार्ड काढण्याची मोहीम युध्दपातळीवर सुरू आहे. आरोग्य विभागामार्फतसुध्दा विशेष मोहिमेचे आयोजन करण्यात आले असून यात तालुका आरोग्य अधिकारी, वैद्यकीय अधिकारी, समुदाय आरोग्य अधिकारी, आरोग्य सेवक, आरोग्य सहाय्यक, तालुका समुह संघटक, डाटा एंट्री ऑपरेटर आणि इतर कर्मचा-यांचा तसेच उमेद अंतर्गत बचत गटाचे सहकार्य आयुष्मान कार्ड काढण्याकरीता घेण्यात येत आहे. पात्र लाभार्थी हे मोबाईल ॲपच्या सहाय्याने स्वत:चे आयुष्मान कार्ड काढू शकतात. त्यामुळे त्यांनी सुध्दा या मोहिमेत आपला सहभाग नोंदविण्याचे आवाहन मुख्य कार्यकारी अधिकारी विवेक जॉन्सन यांनी केले आहे.

     

    आयुष्मान कार्ड स्वतः काढण्याची पद्धत :
    Weblink- https://beneficiary.nha.gov.in आणि मोबाईल मध्ये ‘Ayushman App’च्या सहाय्यतेने पात्र लाभार्थी स्वत:चे किंवा इतर पात्र लाभार्थी व्यक्तीचे ‘आयुष्मान कार्ड’ काढू शकतो. या करीता, लाभार्थी जवळ Android 9.0 version किंवा त्यापेक्षा अधिक version मोबाईल असणे आवशक आहे. सुरवातीला मोबाईल मध्ये Google Play Store मधून ‘Ayushman App’ download व Install करणे गरजेचे आहे. त्यानंतर Adhar Face Rd App Install करावे. ‘Ayushman App’ मध्ये “Beneficiary” लॉगीन पर्यायाची निवड करावी. Mobile OTP च्या सहाय्याने लॉगीन करावे. तदनंतर, Search पर्यायामध्ये नाव, आधार कार्ड क्रमांक आणि राशन कार्ड online ID(RCID) द्वारे पात्र लाभार्थी शोधता येते. यानंतर पात्र लाभार्थी यांची ई-केवायसी आधार कार्डशी संलग्न मोबाईल क्रमांकवर OTP किंवा फेस ऑथ (लाभार्थी यांचा मोबाईल द्वारे फोटो) च्या माध्यमातून पूर्ण करता येते. याबाबत अधिक माहिती करीता आपल्या नजीकच्या शासकीय रुग्णालय, आरोग्य केंद्र, ग्राम पंचायत, अंगीकृत खाजगी रुग्णालयातील आरोग्य मित्र यांचाशी संपर्क साधावा.

     

    आयुष्मान कार्ड कोण काढू शकते : आपले सरकार सेवा केंद्र, आशा स्वयंसेविका, योजनेच्या अंगिकृत रुग्णालयातील आरोग्य मित्र आणि स्वत: लाभार्थी.

     

    आयुष्मान कार्डचे लाभ : प्रति वर्ष प्रति कुटुंब 5 लक्ष रुपयांपर्यंत आरोग्य सुविधा मोफत, 1209 उपचार / शस्त्रक्रियांचा समावेश, देशातील अंगिकृत शासकीय आणि खाजगी रुग्णालयांचा समावेश

     

    चंद्रपूर जिल्ह्यातील अंगिकृत रुग्णालये :

     

    चंद्रपूर येथील शासकीय वैद्यकीय महाविद्यालय व रुग्णालय, मूल, चिमूर, वरोरा आणि बल्लारपूर येथील उपजिल्हा रुग्णालय / ग्रामीण रुग्णालय, गाडेगोणे रुग्णालय, मूल रोड चंद्रपूर आणि मुसळे रुग्णालय, बसस्थानक मागे चंद्रपूर.

  • चंद्रपुरात महिला बचत गटाच्या रायबा रिसॉर्ट चे उदघाटन

    News34 chandrapur

    चंद्रपूर : भारताचे पंतप्रधान नरेंद्र मोदी यांनी देशवासियांना आत्मनिर्भरतेचा मूलमंत्र दिला आहे. ग्रामीण भागाचा विकास झाला तर आत्मनिर्भर भारताचा संकल्प सिद्धीला जाईल, याची जाणीव ठेवूनच केंद्र व राज्य सरकारने ग्राम विकासाला प्राधान्य दिले आहे. हाच धागा धरून ग्रामीण भागात आरोग्य, शिक्षण, शेती, सिंचन आणि रोजगाराच्या विकासाची पंचसूत्री राबविण्यात येईल, अशी ग्वाही जिल्ह्याचे पालकमंत्री ना. श्री. सुधीर मुनगंटीवार यांनी दिली.

     

    चंद्रपूर तालुक्यातील पिंपळखुट येथे नवीन ग्रामपंचायत भवनाच्या बांधकामाचे भूमिपूजन करतांना ते बोलत होते. यावेळी मंचावर जिल्हाधिकारी विनय गौडा, मुख्य कार्यकारी अधिकारी विवेक जॉन्सन, तहसीलदार विजय पवार, गटविकास अधिकारी आशुतोष सपकाळ, रामपालसिंग, नामदेव डाहुले, चंद्रकांत डोंगरे, गौतम निमगडे, विलास टेंभुर्णे, अशोक आलाम, कविता जाधव यांच्यासह परिसरातील गावांचे सरपंच उपस्थित होते.

     

    ग्रामीण भागात ‘मिशन जयकिसान’ अंतर्गत शेतीचा सर्वांगिण विकास आणि पाणंद रस्त्यांबाबत नियोजन करण्यात आले आहे, असे सांगून पालकमंत्री सुधीर मुनगंटीवार म्हणाले, या परिसरात अंगणवाडी, जि.प.शाळा, सिमेंट रस्ते व इतर विकास कामांसाठी मोठ्या प्रमाणात निधी उपलब्ध करून दिला आहे. भविष्यात आरोग्याच्या उत्तम सुविधा, गुणवत्तापूर्वक शिक्षण, सिंचनाच्या सोयी, रोजगाराची उपलब्धता या विषयाला प्राधान्य देण्यात आले आहे. जिल्हा परिषद शाळेची संरक्षण भिंत, प्राथमिक आरोग्य केंद्र, अंगणवाड्यांचे बांधकाम उत्तम असावे, हेच आपले मिशन आहे. विकासाच्या बाबतीत गाव आदर्श होण्यासाठी सर्वांनी एकजुटीने काम करावे. अधिका-यांनीही जनतेला सन्मानाची वागणूक द्यावी, असे पालकमंत्री सुधीर मुनगंटीवार म्हणाले.

     

    यावेळी प्रास्ताविकात मुख्य कार्यकारी अधिकारी विवेक जॉन्सन म्हणाले, गाव आदर्श होण्यासाठी ग्रामपंचायत स्तरावर अनेक योजना आहेत. महिला शिक्षित तर गाव व समाज शिक्षित होतो. जिल्ह्यातील महिला बचत गट आर्थिकदृष्ट्या सक्षम झाले असून त्यामुळे महिलांचे सक्षमीकरण होत आहे. तसेच गावांमध्ये पाणंद रस्ता खडीकरणाचे नियोजन करण्यात आल्याचे त्यांनी सांगितले. कार्यक्रमाचे संचालन एकता बंडावार यांनी केले.

     

    जंगलालगतच्या गावांसाठी विशेष निर्णय :

    जंगलालगत असलेल्या गावातील शेतमालाचे वन्यप्राण्यांकडून मोठ्या प्रमाणात नुकसान होते. यासाठी 30 दिवसांत मदत देण्याचा निर्णय घेण्यात आला आहे. तसेच बफर झोनमधील गावांना पुर्वीप्रमाणेच वर्षाला सहा सिलिंडर मोफत देण्याचे नियोजन करण्यात येत आहे.

    सामान्य जनतेच्या हिताला प्राधान्य :

    केंद्र व राज्य सरकार मिळून पी.एम. किसान सन्मान निधी अंतर्गत शेतक-यांना आता वर्षाला 12 हजार रुपये देण्यात येत आहे. आयुष्मान भारत योजनेंतर्गत पाच लाखांपर्यंतचे मोफत उपचार, शेतक-यांना एक रूपयांत प्रधानमंत्री पीक विमा योजनेचा लाभ, महिलांना राज्य परिवहन महामंडळाच्या तिकिट दरात 50 टक्के सवलत आदी महत्वाचे निर्णय सरकारने घेतले आहे.

     

    नंदगुर येथे अन्नधान्य साठवणूक गोदामाचे लोकार्पण :

    गटग्रामपंचायत पिंपळखुट अंतर्गत येत असलेल्या नंदगुर येथे मनरेगामधून बांधण्यात आलेल्या अन्नधान्य साठवणूक गोदामाचे लोकार्पण पालकमंत्री सुधीर मुनगंटीवार यांच्या हस्ते करण्यात आले. या गोदामाची साठवणूक क्षमता 250 मेट्रीक टन इतकी आहे. या गोदाममुळे मौजा पिंपळखुट चेक, पिंपळखुट, हळदी, नंदगुर येथील जवळपास 230 शेतक-यांना आपले धान्य साठवूण ठेवण्याकरीता फायदा होईल.

     

    झरी येथे महिला बचत गटाच्या रिसॉर्टचे लोकार्पण :

    कोळसा ग्रामपंचायत अंतर्गत येणा-या झरी येथे महिला बचत गटाच्या रायबा रिसॉर्टचे पालकमंत्री सुधीर मुनगंटीवार यांच्या हस्ते लोर्कापण करण्यात आले. यावेळी बोलतांना पालकमंत्री श्री. मुनगंटीवार म्हणाले, वैभवलक्ष्मी महिला बचत गट या नावाप्रमाणेच येथे येणा-या पर्यटकांचे वैभव वाढेल, अशी उत्तम सेवा देऊन गावाच्या विकासाला हातभार लावावा. तसेच बचतगटाच्या माध्यमातून महिलांनी आत्मनिर्भर व्हावे, असे आवाहनही त्यांनी केले.

  • कवडीमोल भाव देऊन चंद्रपुरातील शेतकऱ्यांचा अपमान

    News34 chandrapur

    चंद्रपूर – लॉयड्स मेंटल स्पेन आर्यन अँड पॉवर कंपनीचे विस्तारीकरण करण्यात आले. परंतु परंतु नवीन किती कामगार कंपनीने घेतले यासंदर्भात खुलासा झालेला नाही आणि विस्तारीकरण दरम्यान ज्या जमिनी कंपनीने अधिग्रहित केल्या. त्या संबंधित शेतकऱ्यांना कवडीमोल भाव देऊन त्यांचा अपमान करण्यात आल्याचा आरोप दिनेश चोखारे यांनी केला आहे.

    दिनेश चोखारे यांच्या मागणीची दखल घेत जिल्हाधिकारी कार्यालयाने चंद्रपूर जिल्हा प्रशासनाने लॉयड्स मेंटल स्पेन आर्यन अँड पॉवर कंपनीच्या CSR कार्याची चौकशी करण्याचे आदेश दिले होते. दिनेश दादाजी चोखारे यांनी 18 ऑगस्ट 2023 रोजी जिल्हाधिकारी कार्यालयात एक तक्रार दाखल केली होती. त्यात त्यांनी कंपनीने CSR फंडातून केलेल्या खर्चाबद्दल चौकशीची मागणी केली होती.

     

    या तक्रारीची दखल घेत, जिल्हाधिकारी कार्यालयाने कंपनीला चौकशी करण्याचे आदेश दिले आहेत. कंपनीने 2013 पासून आजपर्यंत CSR फंडातून केलेल्या खर्चाची माहिती आणि त्या खर्चातून केलेल्या कार्याची माहिती जिल्हाधिकारी कार्यालयाला सादर करावी, असे आदेशात काढले.

     

    चोखारे यांनी कंपनीला लिहिलेल्या पत्रात म्हटले आहे की, कंपनीने आपल्या विस्तारीकरणासाठी अनेक शेतकऱ्यांच्या जमिनी अधिग्रहित केल्या आहेत. या जमिनींचे मोबदला शेतकऱ्यांना कवडीमोल भाव देऊन देण्यात आला आहे. यामुळे शेतकऱ्यांच्या भावना दुखावल्या आहेत.

     

    चोखारे यांनी कंपनीला नवीन कामगारांची संख्या आणि शेतकऱ्यांना देण्यात आलेल्या मोबदल्याची माहिती देण्याची मागणी केली.

  • चंद्रपुर जिल्ह्यातील शेतकरी मरतोय, प्रशासन कुठंय?

    News34 chandrapur

    चंद्रपूर –  आर सी सी पी एल सिमेंट कंपनीच्या मनमानी कारभाराविरुद्ध व विविध मागण्यासाठी कोरपना तालुक्यातील परसोडा येथील प्रकल्पग्रस्त नेमीचंद काटकर यांनी दिनांक १६ ऑक्टोबर पासून अन्नत्याग बेमुदत उपोषण सुरू केले आहे.

    या उपोषणाला दहा दिवस उलटून ही प्रकल्पग्रस्तांच्या रास्त मागण्या अद्याप ही पूर्ण झाल्या नाही.त्यामुळे प्रकल्पग्रस्तात असंतोषाचे वातावरण असून उपोषणकर्त्याची प्रकृती दिवसेंदिवस ढासळत चालली आहे.

    RCCPL सिमेंट कंपनीकडून लिजं क्षेत्रातील संपूर्ण ७५६.१४ हेक्टर जमीन सरसकट भूसंपादित करावी, प्रकल्पग्रस्तांना प्रती एकर पन्नास लाख रुपये व एक सातबारा एक नोकरी द्यावी , परसोडा गावाच्या मुख्य रस्त्यावरून होणारी अवजड वाहतूक बंद करण्यात यावी, दलाला मार्फत करण्यात येणारी खरेदी त्वरित थांबवण्यात यावी,

     

    परसोडा व कोठोडा बु या दोन्ही ग्रामपंचायतीच्या नव्याने एनओसी घेण्यात याव्या, कंपनी परिसरातील स्थानिकांना रोजगार देण्यात यावा, परसोडा गावाकडे जाणाऱ्या रस्त्याची कंपनी वाहतुकीमुळे झालेली दुरवस्था लक्षात घेता रस्त्याची दुरुस्ती करण्यात यावी, पेसा क्षेत्रातील पायमल्ली करणारे कंपनी अधिकारी व जबाबदार प्रशासन यावर कायदेशीर कारवाई करण्यात यावी, ग्रामपंचायतच्या सूचित करण्यात आलेल्या विषयाच कंपनीने काटेकोरपणे पालन करावे या मागण्या कंपनी व प्रशासनाकडे प्रकल्पग्रस्तांनी केल्या आहे. या उपोषणाला आतापर्यंत विविध सामाजिक संघटनांनी पाठिंबा दर्शवला आहे.

  • चंद्रपुरात रावण दहनाला विरोध

    News34 chandrapur

    चंद्रपूर – विजयादशमीच्या दिवशी मंगळवारी चंद्रपूर तालुक्यातील घुग्घुस येथे सकाळी साडेनऊच्या सुमारास आदिवासी समाजबांधवांनी केलेल्या विरोधानंतरही रात्री सव्वानऊच्या सुमारास बहादे प्लॉट येथे रावणदहन पार पडले. तब्बल दहा ते अकरा तास पोलिस ठाण्यात ठेवलेल्या आदिवासी बांधव महिला पुरूषांना पोलिसांनी रात्री सोडले. पोलिस स्टेशन पासून तर डॉ. बाबासाहेब आंबेडकर यांचे पुतळ्यापर्यंत पैदल मार्च काढून या घटनेचा निषेध करण्यात आला.
    मंगळवारी चंद्रपूर तालुक्यातील घुग्घूस शहरात बहादे प्लॉटमध्ये विजयादशमीचा उत्सव आयोजित करण्यात आला होता. याकरीता रावणाची प्रतिकात्मक प्रतिमा सकाळी तयार करण्यात येत होती.

    घुग्घूस शहरातील आदिवासी बांधवांनी त्या ठिकाणी येऊन रावण दहनास प्रचंड विरोध केला. रावण हे आदिवासी समाजाचे दैवत आहेत. त्यांचे दहन करण्यता येत असल्याने आदिवासी समाज बांधवांच्या धार्मिक भावना दुखावल्या जातात. त्यामुळे रावणदहन करू नये अशी आदिवासी समाजाने भूमिका घेतली. तसेच शासन, प्रशासन, नगर परिषद, पोलिस स्टेशन व मंत्री महोदयांना निवेदन देऊन रावणदहनला परवानगी देण्यात येवू नये अशी मगाणी करण्यात आली होती. सकाळी आदिवासी बांधवांनी रावणदहनाला विरोध करीत घुग्गुस शहरात निषेध मोर्चा काढला. दिवसभरतणावपूर्ण स्थिती निर्माण होऊ नये याकरीता घुग्घूस पोलिसांनी घटनास्थळी येऊन शंभरावर आदिवासी बांधव, मुलामुलींना ताब्यात घेऊन पोलिस ठाण्यात ठेवण्यात आले. त्यांची भोजनाची व्यवस्था पोलिस ठाण्यात करण्यातच आली होती. शहरात तणावपूर्ण स्थिती निर्माण होऊ नये दंगा नियंत्रण पथकाला पाचारण करून चोख पोलिस बंदोस्त ठेवला होता.

     

    आदिवासी बांधवांच्या विरोधानंतर घुग्घूस येथील रावणदहन होणार की नाही याकडे सर्वांचे लक्ष लागले होते. दिवसभर आदिवासी बांधव पोलिस ठाण्यात स्थानबध्द असल्याने रावणदहन विरोधाचे वातावरण शांत झाले होते. त्यामुळे सायंकाळी रावणदहनाची बहादे प्लॉटवर तयारी करण्यात आली. बहादे प्लॉटवर रावणाची प्रतिमा उभी करण्यात आली. सायंकाळ पासून त्या ठिकाणी नागरिकांची गर्दी झाली. पोलिस बंदोबस्तात रात्री सव्वानऊच्या सुमारास बहादे प्लॉटवर उभारण्यात आलेल्या प्रतिकात्मक रावणाचे दहन करण्यात आले. दिवसभर पोलिस ठाण्यात ठेवलेलया शंभरावर आदिवासी महिला पुरूषांना रात्री सोडण्यात आले.

     

    महिलांना आठच्या तर नऊच्या सुमारास पुरूषांना सोडण्यात आले. त्यांची दिवसभरात भोजनाची व्यवस्था पोलिस ठाण्यात करण्यात आली होती. आदिवासी बांधवांना दहा ते अकरातासांनी रात्री सोडल्यानंतर पोलिस स्टेशनपासून तर डॉ.बाबासाहेब आंबेडकर यांचे पुतळ्यापर्यंत त्यांनी पैदल मार्च काढला. या ठिकाणी एका छोटेखानी सभेची आयोजन करून शासन प्रशासन यांच्या विषयी संताप व्यक्त करीत रावणदहनाच्या घटनेचा निषेध केला.

    यावेळी आदिवासी बांधवांनी, रावणदहन होऊ नये तसेच ही प्रथा बंद व्हावी याकरीता आदिवासी बांधवांनी शासन प्रशासन नगर पालिका, पोलिस स्टेशन तसेच घुग्घूस दशहरा उत्सव समितीला लेखी निवेदन देऊन रावणदहन करू नये तसेच प्रशसान परवागनी देऊ नये अशी मागणी केली होती.

     

    रावण हे आदिवासी समाजाचे दैवत असल्याने आमच्या धार्मिक भावना दुखावल्या जातात. गावात तंटे भांडण होण्याची शक्यता असते. त्यामुळे रावणदहनाला परवानगी देऊ नये ही आमची मागणी आहे. परंतु या मागणीकडे दुर्लक्ष होत असल्याचा आरोप त्यांनी यावेळी केला. शांतता व सुव्यवस्था ठेवण्याकरीता आम्हाला दिवभर पोलिस ठाण्यात ठेवण्यात आले. त्यामध्ये लहानमुलेही होती. आमच्या विरोधानंतरही झालेल्या रावणदहन घटनेचा निषेध व्यक्त करीत रावणदहन प्रथा बंद करावी अशी मागणी आदिवासी बांधवांनी यावेळी केली.

  • शेतकऱ्यांना उध्वस्त करण्याचे काम तिघाडी सरकार करीत आहे – विजय वडेट्टीवार

    News34 chandrapur गुरू गुरनुले

    मुल – वाघाच्या दहशतीने शेतकरी त्रस्त झाला असून रानटी डुकराच्या व वन्य प्राण्यांच्या हैदोशाणे शेती नष्ट झाली आहे. तरी नुकसान भरपाईचा पत्ता नाही. वर्तमान स्थितीत शेती कोणी करणार नाही. व धान उत्पादक शेतकऱ्यांचे दिवाळे निघाले आहे.

     

    नियमित कर्ज भरनाऱ्यांना प्रोत्साहन अनुदान दिले नाही. परंतु उद्योगपतींचे 7 हजार कोटींचे कर्ज माफ केले परंतु शेतकऱ्यांचे कर्ज माफ करायला पैसे नाही. म्हणून आता संतोष रावत यांचे पाठीमागे राहून कांग्रेसला निवडून दिले पाहिजे असे मार्गदर्शन महाराष्ट्र राज्याचे विरोधी पक्षनेते विजय वडेट्टीवार यांनी हजारो शेतकऱ्यांसमोर केले. याप्रसंगी सीडीसीसी बँकेचे अध्यक्ष संतोषभाऊ‌ रावत यांनाही शेतकऱ्यांच्या समस्या, नजुल व वनहक्क धारकांना जमिनीचे पट्टे दिल्या गेले नाही.

     

    हे मार्गी लावण्याचे विजुभाऊ मार्गी लावतील परंतु हिवाळी अधिवेशनामध्ये नागपूरला जाण्याची तयारी आपण ठेवावे असे मार्गदर्शन केले. उपस्थित युवा नेत्या शिवानी ताई वडेट्टीवार यांनी पालक मंत्र्याच्या क्षेत्रात शेतकऱ्यांची अवदशा होणे ही शोकांतिका असल्याचे मत व्यक्त केले. मोर्चात तालुक्यातील २५०० च्या वर दुष्काळ ग्रस्त शेतकरी व महिला उपस्थित होते. यांच्या उपस्थितीत मुख्यमंत्री, उपमुख्यमंत्री, पालकमंत्री यांना निवेदन उपविभागीय अधिकारी मेश्राम,तहसीलदार डॉ.रवींद्र होळी यांना विजय वडेट्टीवार व संतोशसिंह रावत यांचे हस्ते निवेदन देण्यात आले. यावेळी विभागीय वन अधिकारी ,वन परिक्षेत्र अधिकारी उपस्थित होते.

     

    कार्यक्रमाचे संचालन तालुका अध्यक्ष गुरु गुरनुले यांनी केले. मंचावर सभापती राकेश रत्नावार, उपसभापती राजेंद्र कन्नमवार,माजी सभापती व संचालक घनश्याम येनुरकर, शिवा राव, माजी जिल्हा महिला अध्यक्ष चित्रा डांगे, माजी कांग्रेस जिल्हाध्यक्ष प्रकाश देवतळे,ओबीसी सचिव गुरुदास चौधरी,दीपक वाढई यांचेसह महिला अध्यक्षा,युवक अध्यक्ष,व तालुका शहर पदाधिकारी उपस्थित होते. मोर्चाच्या आयोजनासाठी बजार समितीचे सर्व संचालक, तालुक्यातील सर्व सरपंच, कांग्रेस पदाधिकारी यांनी परिश्रम घेतले. आभार शहर अध्यक्ष सुनील शेरकी यांनी मानले.

     

Powered by
►
Necessary cookies enable essential site features like secure log-ins and consent preference adjustments. They do not store personal data.
None
►
Functional cookies support features like content sharing on social media, collecting feedback, and enabling third-party tools.
None
►
Analytical cookies track visitor interactions, providing insights on metrics like visitor count, bounce rate, and traffic sources.
None
►
Advertisement cookies deliver personalized ads based on your previous visits and analyze the effectiveness of ad campaigns.
None
Powered by