Movement of project victims : वेकोलि वणी नॉर्थ क्षेत्रातील कोलेरा व पिंपरी या गावाची पुनर्वसन प्रकीया मागील ३० वर्षांपासून सुरू न झाल्याने प्रकल्पग्रस्त ग्रामस्थांनी दि. २५ जानेवारी २०२५ रोजीपासून खाणीमध्ये कामबंद आंदोलन सुरू केले होते.
या आंदोलनाची गंभीर दखल घेवून पूर्व केंद्रीय गृह राज्यमंत्री तथा राष्ट्रीय मागासवर्ग आयोगाचे अध्यक्ष हंसराज अहीर (hansraj ahir) यांनी वेकोलिचे सीएमडी यांचेसोबत पुनर्वसन विषयक प्रलंबित प्रश्नांबाबत दुरध्वनीवरून विस्तृत चर्चा केली व आंदोलनस्थळी भेट देवून आंदोलकांच्या मागणीस पाठिंबा देत मुख्य महाप्रबंधक वणी नॉर्थ क्षेत्र यांचे उपस्थितीत पुनर्वसन व अन्य न्याय मागण्यांच्या पुर्ततेकरिता पुढाकार घेवून महिनाभरात विषय मार्गी लावण्याचे आश्वासन क्षेत्रीय महाप्रबंधक वणी नॉर्थ यांचेकडून देण्यात आले.
मुख्य महाप्रबंधक यांनी प्रकल्पग्रस्तांना दिलेल्या आश्वासनानुसार महिनाभरामध्ये दोन्ही गावांच्या पुनर्वसनाबाबत प्रकल्पग्रस्त यादीचा विषय मार्गी लावून सन २०१९ पर्यंतची प्रकल्पग्रस्तांची नवीन यादी व २०११ ची जुनी यादी नुसार दोन्ही प्रस्ताव मुख्यालयाला सादर करून नवीन यादी धारकांकडून आवश्यक कागदोपत्री पुरावे मागवून कुंटूबाच्या अंतर्गत झालेले मालकीहक्क फेरफार ग्राह्य धरून पुनर्वसन लाभधारक यादीला अंतिम मान्यता द्यावी असे अहीर यांनी सांगितले. अहीर यांच्या मध्यस्थीने सुचविण्यात आलेल्या तोडग्याच्या आधारे प्रकल्पग्रस्त गावकऱ्यांनी आपले खाणबंद आंदोलन मागे घेतले.
high explosive factory : हाय एक्सप्लोसिव्ह फॅक्टरी खडकी (HE फॅक्टरी खडकी – पुणे) यांनी ग्रॅज्युएट प्रोजेक्ट इंजिनिअर (मेकॅनिकल, इलेक्ट्रिकल, केमिकल, सिव्हिल) या पदांसाठी कंत्राटी तत्त्वावर रिक्त जागा भरण्यासाठी नवीन भरती जाहीर केली आहे. पात्र उमेदवारांनी अर्ज https://munitionsindia.co.in/ या वेबसाइटद्वारे ऑनलाइन सादर करावेत. हाय एक्सप्लोसिव्ह फॅक्टरी खडकी (HE फॅक्टरी खडकी – पुणे) भरती मंडळाने जानेवारी 2025 च्या जाहिरातीनुसार एकूण 15 रिक्त पदांची घोषणा केली आहे. अर्ज करण्यापूर्वी उमेदवारांनी सविस्तर जाहिरात (जाहिरात PDF) काळजीपूर्वक वाचावी. अर्ज सादर करण्याची अंतिम तारीख 14 फेब्रुवारी 2025 आहे.
Number of Posts (एकूण पदे) १५ Vacancies Official Website (अधिकृत वेबसाईट) – https://munitionsindia.in/ Application Mode (अर्जाची पद्धत) Offline Job Location (नोकरी ठिकाण) khadki pune Last Date (अर्ज करण्याची शेवटची तारीख) 14th February 2025
B.E/B.Tech in Mechanical, Electrical, Chemical and Civil.
शिकाऊ कायदा 1961 नुसार, माजी पदवीधर प्रशिक्षणार्थी ज्यांनी एमआयएल अंतर्गत ऑर्डनन्स फैक्टरी किंवा लम्करी दारूगोळा आणि स्फोटके निर्माण करणाऱ्या आयुध कारखान्यांच्या मेकॅनिकल, इलेक्ट्रिकल, केमिकल आणि सिव्हिल, ट्रेडमध्ये प्रशिक्षण घेतलेले माजी पदवीधर. किंवा लष्करी दारूगोळा आणि स्फोटके निर्माण करणाऱ्या कारखान्यामध्ये प्रशिक्षण एक वर्षांचा अनुभव असलेल्या व्यक्ती.
अर्ज पाठविण्याचा पत्ता The General Manager, High Explosives Factory, Khadki, Pune-411003.
Starting Date For Offline Application 25th January 2025 Last Date For Offline Application 14th February 2025
आ.मुनगंटीवार यांच्या पुढाकारामुळे पार्कची निर्मिती
Nana Nani park : चंद्रपूर येथील नाना- नानी पार्क पर्यावरणाच्या संवर्धनात महत्वाची भूमिका निभावेल. यासोबतच लहान-थोरांच्या चेहऱ्यावर आनंद निर्माण करणारे केंद्र ठरेल, असा विश्वास महाराष्ट्र राज्याचे माजी वने, सांस्कृतिक कार्य व मत्स्य व्यवसाय मंत्री आमदार श्री. सुधीर मुनगंटीवार यांनी व्यक्त केला.
वन विभागाद्वारे आयोजित चंद्रपूर येथील नाना-नानी पार्कच्या लोकार्पण सोहळ्यात ते बोलत होते. कार्यक्रमाला प्रमुख अतिथी म्हणून पालकमंत्री प्रा.डॉ. अशोक उईके, आमदार किशोर जोरगेवार, जिल्हाधिकारी विनय गौडा, जिल्हा परिषदेचे मुख्य कार्यपालन अधिकारी विवेक जॉन्सन, उपवनसंरक्षक पीयूषा जगताप, उपवनसंरक्षक प्रशांत खाडे, लॉयड्स मेटल्सचे मधुर गुप्ता, तुलसी गुप्ता, डॉ. मंगेश गुलवाडे, प्रकाश देवतळे, मनोज पाल, प्रदीप किरमिरे यांच्यासह वन विभागाचे सर्व अधिकारी, कर्मचारी, परिसरातील नागरिक उपस्थित होते.
वन मंत्री असताना आमदार श्री. सुधीर मुनगंटीवार यांनी नाना-नानी पार्क करिता दोन कोटी रुपये मंजूर करण्यासाठी पुढाकार घेतला होता. या पार्कचे लोकार्पण सोहळ्यासाठी उपस्थित राहताना आ. मुनगंटीवार यांनी समाधान व्यक्त केले.
पुढे बोलताना आमदार श्री. मुनगंटीवार म्हणाले, क्लायमेट चेंज ग्लोबल वार्मिंग मध्ये वृक्ष लागवड करून त्यांचे संवर्धन करण्याची आपली जबाबदारी आहे. यासाठी सर्व एकत्र येऊन चंद्रपूर जिल्ह्यात काम करीत आहोत. यातूनच बॉटनिकल गार्डन, श्रद्धेय अटल बिहारी वाजपेयी स्टेडियम, एपीजे अब्दुल कलाम उद्यान निर्माण झाले. याच कार्यात आता नाना-नानी पार्कची भर पडत असल्याचा आनंद आहे.
चंद्रपूर शहरात 15 उद्यान तयार झाले आहेत. हे सर्व पार्क शहरातील श्वास घेण्याजोग्या जागा ठरत आहेत. शहर वेगाने पुढे जाताना शहराचा पर्यावरणीयदृष्ट्या विकास व्हावा यासाठी सर्वांनी पुढे येण्याची गरज आहे. ‘सी फॉर चंद्रपूर’ आणि ‘सी फॉर क्लायमेट चेंज’ चे मोठे केंद्र व्हावे या हेतूने चंद्रपूरमध्ये आंतरराष्ट्रीय परिषद घेण्यात आली. चंद्रपूरचे नाव जागतिक स्तरावर घेऊन जाण्यासाठी हा महत्वाचा पुढाकार आहे, असेही ते म्हणाले.
ग्लोबल वॉर्मिंग आणि हवामान बदलाच्या पार्श्वभूमीवर वृक्ष लागवड व संवर्धन ही आपली सामूहिक जबाबदारी आहे. हे पार्क कुटुंबांसाठी आनंद केंद्र निश्चित बनेल, असा विश्वास आ . सुधीर मुनगंटीवार यांनी यावेळी व्यक्त केला. तसेच पर्यावरण संवर्धनासाठी सर्वांनी झाडे लावावे असे आवाहन देखील केले.
आदिवासी संघर्ष कृती समीती आणि भारतीय जनता पार्टीचे आयोजन
Ashok Uike : चंद्रपूरचे नवे पालकमंत्री डॉ. प्रा. अशोक उईके यांच्या प्रथम आगमनाच्या निमित्ताने आदिवासी संघर्ष कृती समीती आणि भारतीय जनता पार्टी, चंद्रपूर विधानसभेच्या वतीने प्रियर्दशीनी सांस्कृतिक सभागृह येथे भव्य सत्कार सोहळ्याचे आयोजन करण्यात आले होते. या प्रसंगी विविध सामाजिक संघटना, भारतीय जनता पार्टी आणि आदिवासी संघर्ष कृती समीतीच्या वतीने पालकमंत्री डॉ. प्रा. अशोक उईके यांचा जंगी सत्कार करण्यात आला.
या सत्कार कार्यक्रमाला राष्ट्रीय मागासवर्गीय आयोगाचे अध्यक्ष हंसराज अहिर, चंद्रपूर मतदारसंघाचे आमदार किशोर जोरगेवार, आमदार किर्तीकुमार भांगडीया, आमदार करण देवतळे, माजी मंत्री शोभा फडणवीस, माजी आमदार सुदर्शन निमकर, माजी आमदार अतुल देशकर, ओबीसी नेते अशोक जिवतोडे, भाजप नेते प्रकाश देवतळे, भारतीय जनता पक्षाचे माजी नगरसेवक सुभाष कासनगोट्टूवार, दशरथ सिंग ठाकूर, तुषार सोम, अजय जयस्वाल, मनोज पाल, संजय कंचार्लावर, जितेश कुळमेथे, प्रमोद बोरिकर, कृष्णा मसराम, प्रा. हितेश मडावी, अॅड. संतोष कुडमेथे, सुधाकर कन्नाके, शांताराम उईके, ड्रेफुल आत्राम, विजय कुमरे, भय्याजी उईके आदींची उपस्थिती होती.
रात्रो ८.३० वाजता या कार्यक्रमाला सुरवात झाली. यावेळी विविध संघटनांनी पालकमंत्री डॉ. प्रा. उईके यांचा स्वागत व सत्कार केला. सत्काराला उत्तर देताना पालकमंत्री यांनी चंद्रपूरच्या विकासाची ग्राव्ही दिली. आज माझ्या सत्कारासाठी कार्यकर्त्यांमध्ये उत्साह दिसून आला. आदिवासी समाजाची आदर्श संस्कृती लाभलेल्या जिल्हाचे पालकमंत्री पद मिळाले याचा आनंद असल्याचे” ते यावेळी म्हणाले. चंद्रपूर जिल्ह्याचे वैभव वाडवून जिल्हाचे नाव लौकीक करण्यासाठी योग्य पावले उचलले जाणार असल्याचे ते यावेळी म्हणाले. जिल्ह्याच्या विकासासाठी नियोजित प्रभावी अमलबजावणी आपण करणार असल्याचेही त्यांनी यावेळी स्पष्ट केले.
यावेळी बोलतांना आमदार किशोर जोरगेवार यांनी चंद्रपूर जिल्हाच्या विकासासाठी सहकार्य मिळावे अशी आशा व्यक्त केली. हे शहर दुरदृष्टी असणाऱ्या गोंड राजाचे आहे. भारतरत्न डॉ. बाबासाहेब आंबेडकर यांनी दीक्षा दिलेल्या पवित्र दिक्षाभूमीचे आहे. औद्योगिक असे हे शहर असून राज्याला रेव्हेन्यू देणाऱ्या या शहराचा सर्वसमावेशक विकास व्हावा अशी मागणी यावेळी आमदार किशोर जोरगेवार यांनी पालकमंत्री डॉ. प्रा. उईके यांच्याकडे केली. आपल्या नेतृत्वात अनेक महत्त्वाकांक्षी प्रकल्पांना गती मिळेल असा विश्वास यावेळी आमदार किशोर जोरगेवार यांनी बोलून दाखविला.
यावेळी बोलतांना राष्ट्रीय ओबीसी आयोगाचे अध्यक्ष हंसराज अहिर यांनी पालकमंत्री डॉ. प्रा. अशोक उईके यांचे अभिनंदन करत त्यांच्या नेतृत्वात चंद्रपूरचा विकास होणार असा विश्वास व्यक्त केला. जितेश कुळमेथे यांनी या कार्यक्रमाचे प्रास्ताविक केले तर संचालन प्रा. श्याम हेडाउ यांनी केले. कार्यक्रमाला आदिवासी टायगर सेना, बिरसा क्रांती दल, अखिल भारतीय आदिवासी विकास परिषद, क्रांतिवीर बाबुराव फुलेश्वर शेडमाके स्मारक समिती, एप्फ्रोड, गोंडियन आदिवासी कल्याण सहाय्यता संस्था, भारतीय जनता पार्टी यांच्या सदस्य व कार्यकर्त्यांची मोठ्या संख्येने उपस्थिती होती.
cotton ginning : कोरपना तालुक्यातील सोनुर्ली गावाजवळ असलेल्या एमएस कापूस जिनिंगला आज 26 जानेवारीला आग लागली. या आगीत कापसाच्या 150 ते 200 कापूस गाठी जळून खाक झाल्याची माहिती आहे, ही आग शॉर्टसर्किटमुळे लागल्याची प्राथमिक माहिती समोर येत आहे. या आगीमुळे लाखोंचे नुकसान झाल्याची माहिती आहे.
या जिनिंग मध्ये सीसीआय व प्रायव्हेट कापूस खरेदी सुरू होती कापूस खरेदी केल्यानंतर कापसाच्या गाठी तयार करून पाठविलेल्या जातात सकाळी काम सुरू असताना अचानक कापसाच्या गाठित आग लागली त्यानंतर कामगारांनी धाव घेत आग विझविण्याचा प्रयत्न केला.
त्याच वेळी गडचांदूर नगरपरिषद, अल्ट्राटेक सिमेंट, दालमिया सिमेंटच्या 3 अग्निशामक वाहनाच्या मदतीने आग विझविण्यात आली असून यात सुदैवाने कुठलीही जीवित हानी झाली नाही.
Aap Party On Cdcc bank : मध्यवर्ती बँकेच्या बोगस भरती प्रकरणाने संपूर्ण महाराष्ट्र ढवळून निघाला आहे. आरक्षण बचाव संघर्ष कृती समितीच्या बेमुदत उपोषणाला आज आम आदमी पक्षाचे पदाधिकारी आणि कार्यकर्त्यांनी भेट देऊन आपला ठाम पाठिंबा दर्शवला.
या आंदोलनात मनोज पोतराजे आणि रमेश काळबांधे हे मागील 11 दिवसांपासून उपोषणाला बसले आहेत. बेरोजगार तरुणांच्या हक्कांसाठी ते झुंजत असून, बँकेच्या भरती प्रक्रियेत झालेल्या भ्रष्टाचारामुळे हजारो बेरोजगार तरुणांचे भविष्य धोक्यात आले आहे.
भाजपाची आणि काँग्रेसची बँकेशी हातमिळवणी: या प्रकरणात विशेष म्हणजे मध्यवर्ती बँकेत काँग्रेसची सत्ता आहे. जर काँग्रेस चुकीचे काम करत असेल, तर भाजपाने बोगस भरती प्रक्रियेवर स्थगिती आणून बेरोजगार तरुणांना न्याय दिला असता. मात्र, भाजपाने काँग्रेससोबत हातमिळवणी करत आपल्या उमेदवारांना पात्र ठरवण्यासाठी बँकेतील व्यवस्थापनावर दबाव आणल्याचे उघड झाले आहे.
भाजपाच्या नेत्यांनी बँकेत लाच घेऊन अपात्र उमेदवारांना नियुक्ती मिळवून देत स्वतःचा आर्थिक फायदा करून घेतला आहे. काँग्रेसच्या सत्तेत भ्रष्टाचाराला चालना देण्यासाठी भाजपानेही परस्पर फायद्याचे धोरण स्वीकारल्याचा गंभीर आरोप आम आदमी पक्षाने केला आहे.
भाजपाच्या नेत्यांची दुटप्पी भूमिका: भाजपाच्या नेत्यांनी केवळ राजकीय स्वार्थासाठी आंदोलनाला भेट दिली आहे, मात्र कोणतीही ठोस कारवाई केली नाही.
4 जानेवारी 2025: आमदार किशोर जोरगेवार यांनी आंदोलनाला भेट दिली व समर्थन दर्शवले. 6 जानेवारी 2025: सुधीर मुनगंटीवार यांनी आंदोलनस्थळी येऊन मुख्यमंत्र्यांशी फोनवर चर्चा केली. 20 जानेवारी 2025: भाजपाचे जिल्हाध्यक्ष राहुल पावडे यांनी आंदोलनाला भेट देत पाठिंबा व्यक्त केला. 19 जानेवारी 2025: आमदार देवराव भोंगळे यांनी आंदोलनाला भेट देत आपली भूमिका मांडली. 22 जानेवारी 2025: भाजपाचे ओबीसी प्रदेशाध्यक्ष रवींद्र गीते आणि ओबीसी प्रदेश उपाध्यक्ष डॉ. अशोक जिवतोडे यांनी आंदोलनाला भेट दिली आणि सहकार मंत्र्यांशी चर्चा करत मंत्रालयात बैठक लावली.
आम आदमी पक्षाच्या प्रमुख मागण्या:
एसआयटीची स्थापना: बोगस भरती प्रकरणाची तातडीने एसआयटीमार्फत सखोल चौकशी करावी. नियुक्ती थांबवावी: चौकशी पूर्ण होईपर्यंत कोणत्याही बोगस उमेदवारांना नियुक्ती देऊ नये. कायदेशीर कारवाई: चौकशीत दोषी आढळलेल्या व्यक्तींवर कठोर कारवाई करण्यात यावी. पात्र उमेदवारांना न्याय: चौकशीद्वारे पात्र ठरलेल्या उमेदवारांनाच नियुक्तीपत्र दिले जावे.
आरक्षण बचाव संघर्ष कृती समितीच्या मागे ठामपणे उभा आम आदमी पक्ष: आम आदमी पक्षाने स्पष्ट केले आहे की, आरक्षण बचाव संघर्ष कृती समितीच्या मागण्या पूर्ण होईपर्यंत पक्ष त्यांच्या मागे खंबीरपणे उभा राहील. काँग्रेसच्या सत्तेत बँकेतील भ्रष्टाचार रोखण्यासाठी भाजपाचा निष्क्रियपणा आणि हातमिळवणी याचा तीव्र निषेध व्यक्त करत, आम आदमी पक्षाने आपल्या लढ्याला गती दिली आहे.
भाजपाच्या नेत्यांनी राजीनामा द्यावा: भाजपाच्या सत्ताकाळात झालेल्या या घोटाळ्याची नैतिक जबाबदारी घेत, संबंधित नेत्यांनी तातडीने राजीनामा द्यावा, अशी मागणी आम आदमी पक्षाने केली आहे. “काँग्रेसच्या चुकीच्या कामांना पाठिंबा देऊन भाजपाने आपला खरा चेहरा दाखवला आहे,” असे जिल्हाध्यक्ष मयूर राईकवार यांनी म्हटले आहे. बँकेच्या संचालकामार्फत उपोषण करत्यांना अमिष देण्याचा प्रकार सुरू आहे हे सुद्धा मीडियाच्या माध्यमातून समोर येत आहे.
सदर आंदोलनाला आम आदमी पक्षाचा ठाम पाठिंबा: आंदोलनाला भेट देताना आम आदमी पक्षाचे जिल्हाध्यक्ष मयूर राईकवार, जिल्हा महासचिव संतोष दोरखंडे, शहराध्यक्ष योगेश गोखरे, महानगर संघटनमंत्री संतोष बोपचे, अशोक माहुरकर, शहर उपाध्यक्ष सिकंदर सागोरे, जिल्हा पदाधिकारी जितेंद्र कुमार भाटिया, शहर उपाध्यक्ष सुनील सदैभेया, सहकार आघाडी अध्यक्ष मधुकर साखरकर, पवन कुमार प्रसाद, महिला शहर अध्यक्ष अॅड. तबस्सुम शेख, शहर सचिव सुधीर पाटील, कोषाध्यक्ष स्वप्नील घाघरगुंडे यांच्यासह अनेक कार्यकर्ते व पदाधिकारी उपस्थित होते.
आम आदमी पक्षाने भाजपाच्या दुटप्पी भूमिकेचा आणि काँग्रेसच्या भ्रष्टाचाराचा तीव्र निषेध करत, या प्रकरणात दोषींवर कारवाई होईपर्यंत आंदोलन सुरू ठेवण्याचा निर्धार व्यक्त केला आहे. “चंद्रपूर जिल्ह्यातील बेरोजगार तरुणांच्या हक्कासाठी आम आदमी पक्ष शेवटपर्यंत लढा देईल,” असा ठाम विश्वास पक्षाने व्यक्त केला आहे.
प्रजासत्ताक दिनानिमित्त मुख्य शासकीय ध्वजारोहण कार्यक्रम
Republic day chandrapur : शेतकरी, शेतमजूर, आदिवासी, दलित, वंचित, महिला, युवक-युवती यांच्यासह दुर्बल घटकाला विकासाचा केंद्रबिंदू मानून राज्य सरकार विकासाच्या मार्गावर वाटचाल करीत आाहे. यात चंद्रपूर जिल्हा प्रत्येक क्षेत्रामध्ये अग्रेसर राहावा, यासाठी तन-मन-धनाने या जिल्ह्याचा पालकमंत्री आणि राज्याचा आदिवासी विकास मंत्री म्हणून सर्वांगीण विकास करण्यासाठी आपण कटिबध्द आहोत, अशी ग्वाही राज्याचे आदिवासी विकास मंत्री तथा जिल्ह्याचे पालकमंत्री डॉ. अशोक उईके यांनी दिली.
प्रजासत्ताक दिनानिमित्त मुख्य शासकीय ध्वजारोहण कार्यक्रमात ते बोलत होते. यावेळी खासदार प्रतिभा धानोरकर, आमदार सर्वश्री सुधाकर अडबाले, सुधीर मुनगंटीवार, किशोर जोरगेवार, जिल्हाधिकारी विनय गौडा जी.सी., मुख्य कार्यकारी अधिकारी विवेक जॉन्सन, जिल्हा पोलिस अधिक्षक मुम्मका सुदर्शन, मनपा आयुक्त विपील पालीवाल यांच्यासह विविध विभागाचे अधिकारी, स्वातंत्र्यसंग्राम सैनिक, जेष्ठ नागरिक आदी उपस्थित होते.
शासन आणि प्रशासनाच्या माध्यमातून चंद्रपूर जिल्ह्याचा सर्वांगीण विकास करण्यासाठी मी सदैव कटिबध्द आहे, असे सांगून पालकमंत्री डॉ. अशोक उईके म्हणाले, जिल्हा प्रशासनाने अनेक उपक्रमातून येथील सर्वसामान्य नागरिकांना दिलासा दिला आहे.
स्वातंत्र्याच्या इतिहासापासून स्वत:ची ओळख असलेल्या चंद्रपूर जिल्ह्याला ऐतिहासिक गोंडकालीन वंशाचा वारसा लाभला आहे. या वारसामुळेच येथील संस्कृती बहरली आहे. त्याचे आपण साक्षिदार आहोत. अशा ऐतिहासिक आणि विविधतेने नटलेल्या, वनभूमी, खनिज संपत्तीने परिपूर्ण असलेल्या, तसेच जल, जंगल, जमीन आणि आदिवासी संस्कृतीचा वारसा जपणा-या चंद्रपूर जिल्ह्याचा पालकमंत्री आणि राज्याचा आदिवासी विकास मंत्री म्हणून आज ध्वजारोहण करताना आज मनस्वी आनंद होत आहे.
आपल्या देशाच्या स्वातंत्र्यासाठी येथील क्रांतीकारकांनी 1857 मध्ये इंग्रजांविरुध्द क्रांतीची मशाल हाती घेतली. 15 ऑगस्ट 1947 च्या मध्यरात्री भारत स्वतंत्र राष्ट्र म्हणून उदयास आले. देश स्वतंत्र झाला तरी देशाचा कारभार भारतीयांच्या हातात नव्हता. आपल्या देशाचा कारभार आपल्याच पध्दतीने चालावा, यासाठी भारताची स्वतंत्र राज्यघटना तयार करण्याचे काम सुरू झाले.
भारतरत्न डॉ. बाबासाहेब आंबेडकर यांच्या नेतृत्वात स्वातंत्र्य, समता, न्याय, बंधुता यावर आधारीत तसेच बहुभाषिक, बहुसांस्कृतिक आणि अनेक धर्माचा समावेश असलेल्या या देशाची राज्यघटना 26 नोव्हेंबर 1949 रोजी तयार झाली. तो दिवस आपण ‘संविधान दिन’ म्हणून दरवर्षी साजरा करीत असतो. तसेच भारतीय संविधानाचे हे अमृत महोत्सवी वर्ष सुध्दा आहे.
पुढे पालकमंत्री डॉ. उईके म्हणाले, चंद्रपूर या नावाने प्रसिध्द असलेला हा जिल्हा प्राचीन काळी ‘लोकापूर’ या नावाने ओळखला जात होता. ब्रिटीशांच्या कारकिर्दीत म्हणजे 1874 पासून हा जिल्हा चांदा या स्वतंत्र नावाने गणला जाऊ लागला. कालांतराने त्याचे नामांतर इंद्रपूर आणि त्यानंतर जानेवारी 1964 चंद्रपूर असे झाले. क्रांतीकारक आणि हुतात्म्यांच्या बलिदानातून आपल्याला हे स्वातंत्र्य मिळाले आहे. त्यांच्या बलिदानाने मिळालेल्या स्वातंत्र्याचं सुराज्यात रुपांतर करण्याची जबाबदारी शासन, प्रशासन यांच्यासह प्रत्येक भारतीयाचीसुध्दा आहे. यासाठी आपण सदैव प्रयत्नशील राहू, असा विश्वास त्यांनी व्यक्त केला.
तत्पुर्वी पालकमंत्री डॉ. अशोक उईके यांच्या हस्ते ध्वजारोहण झाल्यानंतर त्यांनी परेड संचलनाची पाहणी केली. यावेळी त्यांनी स्वातंत्र संग्राम सैनिक, उपस्थित मान्यवरांची आस्थेने विचारपूस केली.
शहिदांच्या कुटंबियांना स्मृतीचिन्ह : पालकमंत्री डॉ. अशोक उईके यांच्या हस्ते शहिदांच्या कुटुंबातील वीर नारी, वीर पिता, वीर माता, शौर्य चक्र प्राप्त जवानांना स्मृतिचिन्ह देऊन सन्मानित करण्यात आले. यात वीरपत्नी वैक्कमा गोपाल भिमनपल्लीवार, वीरपत्नी अरुणा सुनील रामटेके, वीर माता पार्वती वसंत डाहुले, वीर पिता वसंतराव डाहुले, वीरमाता छाया नवले, वीरपिता बाळकृष्ण नवले, शौर्य चक्र प्राप्त सुबेदार शंकर मेंगरे यांचा समावेश होता.
उत्कृष्ट काम करणा-या ग्रामपंचायतींचा सत्कार : लोकपयोगी योजनांमध्ये उत्कृष्ट कार्य करणा-या ग्रामपंचायतींचा यावेळी पालकमंत्र्यांच्या हस्ते सत्कार करण्यात आला. यात आकापूर (ता. नागभीड), चिचबोडी (ता. सावली), माजरी (ता. भद्रावती).
Republic day 2025 : एस. एन. डी. टी. महिला विद्यापीठ मुंबईचे, महर्षी कर्वे महिला सक्षमीकरण ज्ञानसंकुल, बल्लारपूर येथे ७६ वा प्रजासत्ताक दिन अत्यंत उत्साहात साजरा करण्यात आला. याप्रसंगी बल्लारपुर आवाराचे संचालक डॉ. राजेश इंगोले यांच्या हस्ते ध्वजारोहण करण्यात आले.
या कार्यक्रमाचे प्रमुख पाहुणे म्हणुन डॉ. कविता खोलगडे, क्रीडा व शारीरिक शिक्षण संचालक, एस. एन. डी. टी. महिला विद्यापीठ, मुंबई या उपस्थित होत्या.
ध्वजारोहनानंतर झालेल्या कार्यक्रमात प्रमुख पाहुण्यांचे स्वागत कार्यक्रमाचे अध्यक्ष डॉ. राजेश इंगोले यांनी पुष्पगुच्छ देऊन केले. यावेळी मंचावर सहाय्यक कुलसचिव डॉ. बाळू राठोड, बल्लारपूर आवाराचे समन्वयक डॉ. वेदानंद अलमस्त आणि प्रा. खुशबू जोसेफ उपस्थित होते. (Sndt woman university)
डॉ. कविता खोलगडे यांनी आपल्या मार्गदर्शनपर भाषणात प्रजासत्ताक दिनी प्रत्येकांनी आपले कर्तव्य ओळखून त्यानुसार कार्य करायला पाहिजे, सोबतच विद्यार्थ्यांना निरोगी जीवनशैलीचे महत्त्व पटवून दिले आणि शारीरिक शिक्षणाचे महत्त्व विषद केले.
सोबतच आधुनिक युगात फिटनेस ही जीवनाची गरज बनली आहे आणि प्रत्येकाने आपली क्षमता ओळखून स्वतःचा विकास साधायला हवा असे प्रतिपादन केले.
डॉ. राजेश इंगोले यांनी अध्यक्षीय भाषणात विद्यार्थ्यांना भविष्याच्या संधींविषयी माहिती देत संविधानाच्या मूल्यांवर उभे राहून आपण राष्ट्र उभारणीसाठी योगदान दिले पाहिजे व प्रत्येक विद्यार्थ्याने राष्ट्राच्या प्रगतीचा भाग बनावे या करिता प्रयत्न केले पाहिजे असे मत व्यक्त केले.
प्रजासत्ताक दिनाच्या कार्यक्रमात विद्यापीठाच्या एन.एस.एस व सांस्कृतिक विभागातर्फे वेगवेगळ्या उपक्रमांमध्ये सहभागासाठी विद्यार्थिनींना प्रमाणपत्र देऊन सन्मानित करण्यात आले.
नुकतेच पार पडलेल्या वातावरण बदल आंतरराष्ट्रीय परिषदेच्या आयोजनात स्वयंसेवक म्हणून काम केलेल्या सर्व विद्यार्थिनींचे यावेळी कौतुक करण्यात आले.
एन.एस.एस. विभागाच्या कार्यक्रम अधिकारी प्रा. खुशबू जोसेफ, सहाय्यक कार्यक्रम अधिकारी प्रा. श्रुतिका राऊत यांनी कार्यक्रमाच्या नियोजनासाठी अथक प्रयत्न केले. या कार्यक्रमाचे संचालन प्रा. अपेक्षा पिंपळे यांनी केले आणि आभार प्रा. खुशबू जोसेफ यांनी मानले. या प्रसंगी एस. एन. डी. टी. महिला विद्यापीठ बल्लारपुर आवाराचे शिक्षक, शिक्षकेत्तर अधिकारी-कर्मचारी आणि विद्यार्थिनी मोठ्या संख्येने उपस्थित होते.
President’s Medal : चंद्रपूर: नागपूर येथील एसीबी पोलीस उप अधीक्षक पदावर कार्यरत असलेले रोशन यादव यांच्या प्रदीर्घ उत्कृष्ट आणि गुणवत्तापूर्ण सेवेच्या नोंदी पाहून सन-2025 मध्ये गुणवत्तापूर्ण सेवेसाठी राष्ट्रपती पदक जाहीर करण्यात आले आहे. विशेष म्हणजे त्यांनी चंद्रपूर येथे विविध पदावर जबाबदारी पार पाडली आहे.
सरळ सेवेत 1995 पीएसआय म्हणून त्यांची नेमणूक झाली. त्यांनी अत्यंत संवेदनशील नक्षलग्रस्त गोंदिया आणि गडचिरोली येथे सेवा दिली आहे. त्यांनी मांगेझरी जंगलात नक्षलवाद्यांशी झालेल्या चकमकीत महत्त्वाचे नक्षल साहित्य आणि उपकरणे जप्त केले. तसेच नक्षल शोध मोहिमेत सीमेवरील घनदाट जंगलात नक्षलवाद्यांचा मृतदेह जप्त केला.
एसीबी चंद्रपूर आणि गडचिरोली जिल्ह्यात सामील झाल्यानंतर त्यांनी भ्रष्टाचाराला आळा घालण्यासाठी विशेषतः अतिसंवेदनशील नक्षलग्रस्त भागात अनेक उल्लेखनीय कामगिरी. नागपूर, गोंदिया आणि चंद्रपूर येथे त्याच्या पोस्टिंगदरम्यान एटीएम चोरी ,डकैती करणारे आंतरराज्यीय टोळ्यांचा शोध घेवून तसेच इतर गंभीर गुन्हे उघडकीस आणून त्यांना आरोपींना अटक करण्याचे महत्वपूर्ण काम केले आहे.
कायदा आणि सुव्यवस्थेची परिस्थिती त्यांनी चांगल्या प्रकारे हाताळली आहे. त्यांनी हैदराबादमध्ये ग्रे हाउंड कमांडोचे सर्वात कठीण प्रशिक्षण यशस्वीपणे पूर्ण केले आहे.
ते एक चांगले फुटबॉलपटू असून त्यांनी जिल्हा आणि रेंज स्पोर्ट्समध्ये भाग घेतला आहे.
Tiger Attack News : पळसगाव (पि )चिमूर तालुक्यातील पळसगाव वनपरिक्षेत्र अंतर्गत येणाऱ्या विहीरगाव नियत क्षेत्र २ मधील कक्ष क्र, ८५८ मधील जंगलात विहीरगाव येथील गुराख्याला वाघाने ठार मारल्याची घटना आज दिनांक २५ जानेवारीला दुपारी १२ वाजताच्या सुमारास घडली. जानेवारी महिन्यातील मानव वन्यजीव संघर्षातील हा दुसरा बळी आहे.
विहीरगाव येथील पाच ते सहा लोकांची गावातील जनावरे चारण्याची एका हप्त्याची पाळी होती.आज त्यांच्या पाळीचा दुसरा दिवस जनावरे नेण्याचा होता. भाऊराव नागोसे,अनिल जांभळे,जानिक धाडसे, यांच्या सोबत गुरे घेऊन सकाळी दहा वाजता सहकारी गुराखी सोबत गेले असता दबा धरून असलेल्या वाघाने जंगलातच गुरख्याला ठार मारले.
सदर गुराखी दयाराम लक्ष्मण गोंडाणे (७०) रा. विहीरगाव (ता.चिमूर ) असे मृत गुराख्याचे नाव आहे. सोबत असलेल्या सहकारी गुराखी सोबत काही अंतरावर जनावरे चारीत असताना अचानक वाघाने हल्ला करून गुराखी दयाराम गोंडाने याला तोंडात उचलून दाट जंगलात घेऊन गेला सोबत असलेल्या सहकारी यांनी आरडा ओरड केली मात्र वाघाने त्याला सोडले नाहीं.
सहकारी गुराखी यांनी गावात मोबाईल द्वारे सदर घटनेची माहिती दिली नंतर गावातील नागरिक आणि वनविभागाचे कर्मचारी घटनास्थळी दाखल होत हल्ल्यात मृतक गुराख्याचा शोध कार्य राबविले असता पुढे काही अंतरावर शोध घेतला असता गोंडाणे यांचा मृतदेहच मिळाला त्यांच्या मानेवर वाघाच्या हल्ल्याचे घाव आढळून आले.
सदर परिसरात मागील काही महिन्यांपासून वाघाचा मुक्त वावर सुरू आहे. अनेक जनावरांचा फडशा त्याने पाडला. काही लोकांना या वाघाचे दर्शनही झाल्याचे सांगितल्या जाते. त्यामुळे शेतकरी आणि शेतमजुरांमध्ये प्रचंड दहशत निर्माण झाली आहे.त्याचे प्रेत उचलून शवविच्छेदन साठी उपजिल्हा रुग्णालय चिमूर येथे नेण्यात आले.
या वेळी, वनपरीक्षेत्र अधिकारी योगिता आत्रम,अमोल कवासे वनपाल,वनपाल विनोद किलनाके,निखूरे,वनरक्षक नागलोत, मेश्राम,खारडे,जिवतोडे, जरारे, गेडाम,दुधे, ठाकरे, पोलीस निरीक्षक सतोष बाकल सह पोलीस कर्मचारी वनविभागाचे कर्मचारी हजर होते.मृत्यकाच्या कुटुंबास वनविभागाच्या पन्नास हजाराची आर्थिक मदत करण्यात आली.त्याच्या मागे पत्नी,दोन मुले, एक मुलगी व मोठा आप्त परिवार आहे.
