Category: ब्रेकिंग न्यूज मराठी

News34 chandrapur

चंद्रपूर : शहरात आनंद मेळा उघडण्यासाठी विविध विभागांचे ना हरकत प्रमाणपत्र घेतल्यानंतरच ती सुरू करण्याची परवानगी दिली जाऊ शकते. मात्र या विभागांची परवानगी न घेताच चांदा क्लब ग्राउंड येथे आनंद मेळा सुरू असून यातून दररोज लाखोंची कमाई केली जात आहे. प्रशासकीय यंत्रणेतील भ्रष्ट अधिकारी आणि कर्मचाऱ्यांनी आनंद मेळाच्या मालकाशी हातमिळवणी केल्याने शासनाचा महसूल तर बुडतच आहे मात्र लहान मुले आणि सामान्य लोकांची सुरक्षा वाऱ्यावर सोडण्यात आली आहे.

40 ते 50 लाखांची उलाढाल

चंद्रपूर शहरात वर्षातुन दोन ते तीनदा आनंद मेळा लागतो. जयंत टॉकीज जवळ, चांदा क्लब ग्राउंड आणि विद्या निकेतन शाळेजवळ हा आनंद मेळा लागतो. यामध्ये लहान मुलांच्या मनोरंजनासाठी आकाश पाळणा, झुले, टॉय ट्रेन आणि अनेक साहसी खेळ असतात. इथे पार्किंगचे पैसे वेगळे, तिकीट वेगळी आणि ज्या साहसी खेळाचा आनंद लुटायचा आहे त्याचे वेगळे पैसे. एकूण ह्याचा खर्च बघता सामान्य माणसाच्या खिशाला हे परवडण्यासारखे नाही इतकी याची तिकीट आहे. तरी सामान्य माणूस काटकसर करून एक दिवस तरी आपल्या मुलांना येथे घेऊन जातो. एका आनंद मेळ्याचा एका सत्राचा गल्ला हा 40 ते 50 लाखांचा आहे. इतकी बक्कळ कमाई यातून केली जाते.

परवानगी मिळण्याआधीच मेळा सुरू

चंद्रपूर येथील चांदा क्लब ग्राऊंड येथे 14 नोव्हेंबर ते 15 डिसेंबर या दरम्यान एक महिन्याच्या कालावधीत आनंद मेळा होणार होता. तो सुरू करण्यासाठी महानगरपालिका, अग्निशमन विभाग, सार्वजनिक बांधकाम विभाग, महावितरण आणि जिल्हा सामान्य प्रशासन विभागाकडून याची परवानगी घ्यावी लागते. त्याशिवाय हा मेळा सुरू करता येत नाही. त्यातही जिल्हा सामान्य प्रशासन विभागाची परवानगी अतिमहत्त्वाची आहे. सर्वांची परवानगी घेतल्यानंतरच आणि त्याची पडताळणी केल्यानंतरच जिल्हा सामान्य प्रशासन विभाग याची परवानगी देते. मात्र याची पडताळणी करण्यात आली नाही. असे असताना आनंद मेळा सर्रासपणे सुरू आहे. मेळा संपण्यासाठी केवळ दहा दिवस उरले आहेत तरी परवानगी मिळण्याची प्रकिया पूर्ण झालेली नाही.

मेळ्याच्या मालकाकडून खोटे कागदपत्रे सादर

आनंद मेळा हा सामान्य नागरिकांसाठी सुरक्षित असावा यासाठी अग्निशमन विभागाचे नाहरकत प्रमाणपत्र आवश्यक आहे. ते मिळण्यासाठी लायसन्स एजन्सीचे फॉर्म A प्रमाणपत्र, त्रयस्थ एजन्सीकडून फायर ऑडिट रिपोर्ट, ज्या ठिकाणी हा आनंदमेळा होणार आहे त्याचा संपूर्ण नकाशा जोडावा लागतो. नागपुरातील आकाश अम्यूजमेंट कंपनीकडून चंद्रपूर महोत्सव मेलाचे मुख्य कार्यवाह रामपाल सेवाराम सिंह यांनी 30 ऑक्टोबरला परवानगी मिळण्यासाठी अर्ज केला. मात्र यापैकी आवश्यक कुठल्याही कागदपत्रांची पूर्तता त्यांनी केली नाही. फायर ऑडिट रिपोर्ट त्यांनी जोडली नाही, जो जागेचा नकाशा दिला तो खोटा दिला. नकाशावर जलील बाबा दर्गा दाखवण्यात आला जो चंद्रपूर शहरात नाही. कागदपत्रे पूर्ण नसताना त्याचा अर्ज नामंजूर करण्यात आला नाही. उलट हा मेळा सुरू झाला असताना त्याकडे डोळेझाक करण्यात आली.

जिल्हा सामान्य प्रशासन विभागातही तेच

हीच कागदपत्रे जिल्हा सामान्य प्रशासन विभागाकडे सादर करण्यात आली. त्याची पडताळणी देखील संबंधित अधिकारी कर्मचाऱ्यांकडून करण्यात आली नाही. विशेष म्हणजे सार्वजनिक बांधकाम विभागाही यांत्रिकी विभागाची परवानगी मिळाली नसताना देखील हा मेळा सुरू करण्यात आला.

प्रशासनाचे झोपेचे सोंग

आनंद मेळा सुरू करण्यासाठी ऑक्टोबर महिन्यात अर्ज सादर करण्यात आला होता. 14 नोव्हेंबर ते 15 डिसेंबर यादरम्यान हा मेळा सुरू असण्याचे स्पष्ट असताना आणि त्यापूर्वी परवानगी घेण्याची पूर्तता झाली नसताना हा आनंद मेळा सुरू कसा झाला याची शहानिशा करण्याची तसदी प्रशासनातील एकही अधिकारी कर्मचाऱ्याने घेतली नाही.

भ्रष्ट यंत्रणा आणि दलालांची टोळी

केवळ या आनंद मेळ्याची ही गोष्ट नाही तर यापूर्वी झालेल्या अनेक आनंद मेळ्यात ही भ्रष्ट शासकीय यंत्रणा या मागे होती. त्यासाठी चंद्रपूर शहरात काही दलाल लोक सक्रिय असून ते जिल्हा प्रशासनाकडून सर्व परवान्यांचे आपण बघून घेतो याची हमी देतात. प्रशासनाचे अधिकारी, कर्मचारी देखील यासाठी चांगलीच मागणी करतात. याची पूर्तता झाली की परवानगी नसताना देखील मेळा सुरू करण्याची मुकसंमती देतात. मात्र हे धोकादायक असून भविष्यात कुठलीही मोठी दुर्घटना झाल्यास याला जबाबदार संपूर्णता प्रशासनाची भ्रष्ट यंत्रणा असणार आहे.

News34 chandrapur

चंद्रपूर – लहान मुले व नागरिकांच्या मनोरंजनासाठी चंद्रपूर शहरातील चांदा क्लब मैदानावर नुकतंच आनंद मेळा सुरू झाला आहे, मात्र या मेळा धारकाने सार्वजनिक मार्गावर अतिक्रमण केल्याने नागरिकांनी चांगलाच संताप व्यक्त केला आहे.

नोव्हेंबर महिन्यापासून चंद्रपूर शहरातील चांदा क्लब मैदानावर आनंद मेळा सुरू झाला, मात्र या मेळा धारकांनी आपली मुजोरी सुरू करीत चंद्रपूर-नागपूर मार्गावर अतिक्रमण केले आहे, विशेष बाब म्हणजे वाहतूक व चंद्रपूर पोलिसांचे बॅरिकेट्स चा वापर अतिक्रमणसाठी केला.

चांदा क्लब मैदानाच्या आत सुरू असलेल्या या मेळ्यात येणारे नागरिक आत वाहन पार्क करतात मात्र मैदानाच्या बाहेर नागरिकांनी आपली वाहने पार्क करू नये यासाठी वाहतूक पोलिसांचे बॅरिकेट्स चा वापर करून चंद्रपूर-नागपूर मार्गावरील तब्बल 100 मीटर वर दोरीच्या साहाय्याने मेळा धारकाने अतिक्रमण केले आहे.

वाहन पार्क न करू दिल्याने अनेक नागरिकांसोबत मेळा धारकाचे अनेकदा भांडण सुद्धा झाले आहे, मात्र आमचं कुणी काही बिघडवू शकत नाही अशी मुजोर भूमिका मेळा धारकाने घेतली आहे.

चंद्रपूर-नागपूर मार्गावर आधीच अतिक्रमणामुळे अनेक अपघात घडले असताना वाहतूक पोलिसांच्या नाकावर टिच्चून मेळा धारक आपली मुजोरी करत असल्याने हा रस्ता माझ्या बापाचा आहे असे दर्शवित आहे.

शहरात पुन्हा अपघाताला आमंत्रण देणाऱ्या मुजोर आनंद मेळा धारकावर पोलीस व वाहतूक पोलीस प्रशासन कारवाई करणार काय? की मेळा धारकाच्या मुजोरीला प्रशासन आशीर्वाद देणार? वाहतूक पोलिसांनी मेळा धारकाला चंद्रपूर-नागपूर मार्गावर अतिक्रमण करण्याची रीतसर परवानगी दिली आहे काय? प्रशासन त्या अतिक्रमण धारकाला पाठीशी घालत आहे काय? असे अनेक प्रहन यावेळी उपस्थित झाले आहे.

News34 chandrapur

चंद्रपूर – शहरातील अति वर्दळीचा भाग व अपघात प्रवण स्थळ वरोरा नाका चौकात आज मोठी दुर्घटना घडली, या घटनेत ट्रक ने तब्बल 4 वाहनांना चक्काचुर केल्याची माहिती आहे.

ट्रायस्टार हॉटेल ते वरोरा नाका चौकात अतिक्रमण झपाट्याने वाढत आहे, या मार्गावर होणाऱ्या अपघाताला हे अतिक्रमण सुद्धा कारणीभूत ठरले आहे.

25 नोव्हेम्बरला शहरातील वरोरा नाका चौकातून ट्रक क्रमांक Mh04 DK 6344 हा मूल रोडच्या दिशेने निघाला मात्र बाळासाहेब ठाकरे उड्डाणपूलावरून जाताना अचानक ट्रक चा रिव्हर्स गियर लागल्याने ट्रक अतिवेगात मागच्या बाजूने यायला लागला, मागे असलेल्या चारचाकी वाहन व दुचाकीला धडक देत तब्बल 100 मीटर अंतर ट्रक मागच्या दिशेने गेला, यामध्ये 3 चारचाकी वाहन व 1 दुचाकी वाहनांचे मोठे नुकसान झाले आहे. वाहनात कुणी नसल्याने मोठी दुर्घटना टळली.

ट्रक चालकाने समयसूचकता दाखवीत ट्रक मागच्या बाजूने सरळ नेला अन्यथा मोठी दुर्घटना घडली असती.

मागील अनेक दिवसांपासून चंद्रपूर शहरात अपघातांची संख्या वाढत आहे, याला जबाबदार काही वाहतुकीचे नियम मोडणारे बेजबाबदार नागरिक तर मोठ्या प्रमाणात वाढत असलेले अतिक्रमण आहे.

News34 chandrapur

विसापूर ( चंद्रपूर ): बल्लारपूर तालुक्यातील नांदगाव ( पोडे ) येथील चंद्रपूर कृषी उत्पन्न बाजार समितीचे उपसभापती गोविंदा पोडे यांचे मोठे वडील घनश्याम झित्राजि पोडे यांचे ११ नोव्हेंबर रोजी निधन झाले होते. त्यांचे अस्थिविसर्जन आज रविवार ( दि.१९ ) दुपारी २ वाजता दरम्यान वर्धा – इराई संगमावर गेले. दरम्यान मुलगा व भाचा नदीच्या प्रवाहात बुडत होते.त्यांना वाचविण्यासाठी उपसभाती गोविंदा पांडुरंग पोडे यांनी नदी पात्रात उडी घेतली.दोघांना वाचविण्याच्या प्रयत्नात तिघानाही वर्धा नदीपात्रात जलसमाधी मिळाली. ही मनाला चटका लावणारी व ह्रदयदायक घटना बल्लारपूर तालुक्यातील नांदगाव ( पोडे ) जवळ वर्धा – इराई नदीच्या संगमावर घडली.

बल्लारपूर तालुक्यातील नांदगाव ( पोडे ) येथील राहणारे व चंद्रपूर कृषी उत्पन्न बाजार समितीचे उपसभापती गोविंदा पांडुरंग पोडे ( ४७), त्यांचा एकुलता मुलगा चेतन गोविंदा पोडे ( १६ ) व त्यांचा भाचा गणेश रवींद्र उपरे ( १७) असे वर्धा नदी पात्रात जलसमाधी मिळालेयाची नावे आहेत.

गोविदा पोडे हे बल्लारपूर पंचायत समितीचे देखील माजी सभापती होते. एकाच कंटुंबातील तिघांचा मृत्यू झाल्यामुळे पंचक्रोशित शोककळा पसरली आहे. वर्धा नदी पात्रात कुटुंबातील सदस्यां समोर तिघे वाहून गेल्याने गावात हळहळ व्यक्त केली जात आहे.दरम्यान शोध मोहिमेत सायंकाळी ५.४५ वाजता गोविंदा पोडे यांचा मुलगा चेतन पोडे याचे प्रेत नावाड्यानी बाहेर काढले.अन्य दोघांच्या प्रेताचा शोध मोहीम सुरु आहे.
नांदगाव ( पोडे ) येथील गोविंदा पोडे यांचे मोठे वडील घनश्याम पोडे यांचे ११ नोव्हेंबर रोजी वृदापकाळाने निधन झाले होते.

आज रविवारी त्यांच्या अस्थिविसर्जन करण्यासाठी कुटुंबीय वर्धा – इराई नदीच्या संगमावर दुपारी १ वाजता गेले होते. पूजा अर्चना करून अस्थी विसर्जन करण्यात आले. त्यावेळी चेतन पोडे व गणेश उपरे हे नदी पात्राच्या पाण्यात पोहत होते.त्यावेळी गोविंदा पोडे यांनी दोघांनाही पाण्याच्या बाहेर या,म्हणून आवाज दिला.त्यावेळी ते बाहेर निघत असताना वाहत्या पाण्याच्या प्रवाहात वाहू लागले.

मुलगा व भाचा यांना वाचविण्यासाठी गोविंदा पोडे यांनी नदी पात्रात उडी घेऊन त्यास वाचविण्याचा भरपूर प्रयत्न केला.मात्र ते देखील कुटुंबातील अन्य सदस्यासमोर वाहत्या पाण्याचा प्रवाहात वाहून गेले.
या घटनेची माहिती होताच चंद्रपूरचे एस.पी.रवींद्रसिहं परदेशीं, बल्लारपूर पोलीस निरीक्षक निरिक्षक उमेश पाटील, चंद्रपूर शहर पोलीस ठाण्याचे निरीक्षक सतीशसिहं राजपूत, बल्लारपूरच्या तहसीलदार डा.कांचन जगताप आणि परिसरातील नागरिकांनी धाव घेतली.

दोघांचे प्रेत बाहेर काढले

चंद्रपूर कृषी उत्पन्न बाजार समितीचे उपसभापती गोविंदा पोडे,त्यांचा मुलगा चेतन पोडे व भाचा गणेश उपरे यांना वर्धा नदी पात्रात जलसमाधी मिळाली. या दुर्दैवी घटनेतील मृतक गोविंदा पोडे यांच्या मुलाचे प्रेत शोध मोहिमे दरम्यान सायंकाळी ५. ४५ वाजता चेतन याचा तर सायंकाळी ६.४५ वाजता भाचा गणेश उपरे यांचे प्रेत बाहेर काढण्यात आले. यावेळी नातेवाईकांनी एकच हंबरडा फोडला.