My Blog

Blog

  • नियमबाह्य व्हिडिओ गेम पार्लरवर सक्त कारवाई करणार – जिल्हाधिकारी विनय गौडा

    News34 chandrapur

    चंद्रपूर : News34 च्या बातमी नंतर जिल्ह्यातील व्हिडीओ गेम पार्लर वर प्रशासनाने कारवाईचा धडाका सुरू केला, मात्र त्यानंतर सुद्धा जिल्ह्यात मोठ्या प्रमाणात व्हिडीओ गेम पार्लर सुरू आहे.

     

    जिल्ह्यातील व्हिडिओ गेम पार्लर व कार्ड क्लब पार्लरबाबत अनेक तक्रारी प्राप्त झाल्या आहेत. त्यासोबतच परवानाधारकांकडून परवान्यातील अटी व शर्तीचे भंग होत असल्याचे देखील निदर्शनास आले आहे. याबाबत नियमबाह्य व्हिडिओ गेम पार्लर व कार्ड क्लब पार्लरवर सक्त कारवाई करणार असल्याचे स्पष्ट निर्देश जिल्हाधिकारी विनय गौडा यांनी आज दिले.

     

    जिल्ह्यातील व्हिडिओ गेम पार्लर व कार्ड क्लब परवानाधारकांची बैठक आयोजित करण्यात आली होती याप्रसंगी ते बोलत होते.

     

    यावेळी सहाय्यक जिल्हाधिकारी मुरुगानंथम एम., निवासी उपजिल्हाधिकारी संजय पवार, उपजिल्हाधिकारी (भूसंपादन)दगडू कुंभार, बल्लारपूरच्या उपविभागीय अधिकारी स्नेहल रहाटे, मुलचे उपविभागीय अधिकारी विशालकुमार मेश्राम, पोलीस निरीक्षक महेश कोंडावार, नायब तहसीलदार गीता उत्तरवार, विधी अधिकारी राजेश दुबे तसेच व्हिडिओ गेम पार्लर व कार्ड क्लब परवानाधारक उपस्थित होते.

     

    जिल्हाधिकारी विनय गौडा म्हणाले, व्हिडिओ गेम पार्लरबाबत प्रशासनाला अनेक तक्रारी प्राप्त झाल्या आहेत. त्यासोबतच वरोरा येथे व्हिडिओ गेम खेळून पैसे हरल्याने एका युवकाने आत्महत्या केली, ही जिल्ह्यासाठी चांगली बाब नाही. व्हिडिओ गेम पार्लर परवानाधारकांनी परवान्यातील अटी व शर्तीनुसारच गेम पार्लर चालवावे. सदर पार्लरमध्ये जुगार खेळता कामा नये. तसे आढळून आल्यास नियमानुसार सक्त कारवाई केल्या जाईल, असे स्पष्ट निर्देश जिल्हाधिकारी श्री. गौडा यांनी उपस्थित व्हिडिओ गेम पार्लर व कार्ड क्लब परवानाधारकांना दिले.

     

    तसेच काही व्हिडीओ गेम पार्लरमध्ये जुगार खेळल्या जात असल्याच्या तक्रारी देखील प्राप्त झाल्या असून संयुक्त पथकामार्फत तपासणी केल्या जाणार आहे. तपासणीअंती आढळुन आल्यास दोषींवर कार्रवाई करणार असल्याचे निर्देश बैठकीत दिले.

    जिल्हाधिकारी गौडा यांनी निर्देश दिले असले तरी बैठकीत उपस्थित असलेले पार्लर धारक यांचे परवाने नूतनीकरण झाले का? याबाबत आधी जिल्हाधिकारी यांनी माहिती घ्यावी, नियमांचे उल्लंघन कुणी केलं, ज्यांच्याकडे परवाने बाबत तपासणी मोहीम करण्याचे अधिकार आहे त्यांनी किती वेळा व्हिडीओ गेम पार्लर धारकांकडे जात तपासणी मोहीम राबविली काय?

  • विदर्भात आम आदमी पक्षाची झाडू यात्रा

    News34 chandrapur

    चंद्रपूर – आम आदमी पक्षाच्या वतीने विदर्भातील सर्व जिल्ह्यात दिनांक २ ऑक्टोबर २०२३ गांधी जयंती पासून ११ ऑक्टोबर २०२३पर्यत झाडू यात्रा” आयोजित करण्यात आली आहे. या यात्रेचे उद्दिष्ट विदर्भातील सर्वसामान्य जनतेला पार्टीच्या धोरणांशी जोडणे आणि आगामी निवडणुकीसाठी तयारी करणे आहे. या यात्रेचे प्रारंभिक ठिकाण वर्धा जिल्ह्यातील गांधी आश्रम आहे. येथून रॅलीला सुरू होईल आणि 1830 किलोमिटर प्रवास करून चंद्रपूर जिल्ह्यातील राजुरा येथे यात्रेचा समारोप होईल. या यात्रेमध्ये प्रत्येक जिल्ह्यात मोठी सभा आयोजित केली जाईल.

     

    या सभांमध्ये आम आदमी पक्षाचे महाराष्ट्र प्रभारी गोपाल ईटालीया, महाराष्ट्र संघठन सचिव भूषण ढाकुलकर तसेच दिल्लीचे नेते आणि विदर्भ तसेच जिल्ह्यातील आपचे शेकडो कार्यकर्ते उपस्थित राहतील, अशी माहिती आम आदमी पक्षाचे नेते सुनिल देवराव मुसळे, जिल्हाध्यक्ष मयूर राईकवार व महानगर अध्यक्ष योगेश गोखरे यांनी प्रेस च्या माध्यमातून दिली.

     

    त्यांनी सांगितले की,चंद्रपूर जिल्ह्यामध्ये आम आदमी पक्ष तळागाळात पोहोचविने करीता ही यात्रा वरोरा,भद्रावती सुरज शहा घुघुस अमीत बोरकर चंद्रपूर योगेश गोखरे बल्लारपूर रवि पप्पुलवार कोरपना, गडचा्ंदुर,राजुरा सुरज ठाकरे यांचे नेतृत्वात होईल व त्यानुसार आम आदमी पार्टी ने तयारी सुरू केली आहे.

     

    आपचे कार्यकर्ते यात्रा यशस्वी करन्याकरीता प्रयत्न करीत आहे.
    शहरात रेली व सभा घेण्यात येईल . त्यामुळे सर्वसामान्य जनतेत एक आत्मविश्वास निर्माण होईल. आम आदमी पक्षाच्या या यात्रेमुळे चंद्रपूर जिल्ह्यातील राजकारणात नवीन चळवळ निर्माण होण्याची शक्यता आहे.

     

    या माध्यमांतून सर्वसामान्यांचे संविधानिक हक्कांसाठी लढा, मुलाच्या शिक्षणासाठी त्याच्या उज्वल भविष्यासाठी नियोजन, नागरिकांना दिल्लीसारख्या आधुनिक वैद्यकीय व शैक्षणिक सुविधा देणे, शेत मालाला भाव, तरुणांना रोजगार, शेतकऱ्यांना २४ तास वीपुरवठा, शेतकरी सुरक्षा जंगली जनावरे बंदोबस्त, प्रत्येक शेताला पांधन रस्ते, वीज, पाणी आदी मुद्दे यातून मांडण्यात येतील.

     

    आम आदमी पक्षाच्या नेत्यांनी सांगितले की, ही यात्रा विदर्भातील जनतेला एकत्र आणण्याचा आणि त्यांना एक नवीन दिशा देण्याचा एक प्रयत्न आहे.

    या यात्रेमध्ये सर्वसामान्य जनतेने आपला सहभाग नोंदवावा व जनतेच्या हितासाठी काम करना-या
    पार्टी ला सहकार्य करावे असे आवाहन आम आदमी पार्टी तर्फे प्रेस च्या माध्यमातून करन्यात आले.

  • चंद्रपुरात Dj चा आवाज किती? जिल्हाधिकारी गौडा यांच्या आदेशात काय?

    News34 chandrapur

    चंद्रपूर : केंद्र शासनाच्या ध्वनी प्रदुषण (नियमन व नियंत्रण) सुधारित नियम 2017 अन्वये तसेच ध्वनी प्रदूषण(नियमन व नियंत्रण) नियम, 2000 च्या नियम 5(3)नुसार, ध्वनिक्षेपक व ध्वनीवर्धक यांचा श्रोतगृहे, सभागृहे, सामूहिक सभागृहे आणि मेजवानी कक्ष यासारख्या बंद जागाखेरीज इतर ठिकाणी, ध्वनीची विहित मर्यादा राखून सकाळी 6 वाजेपासून ते रात्री 12 वाजेपर्यंत वापर करण्यासाठी, संपूर्ण चंद्रपूर जिल्ह्याकरीता सन-2023 मधील 10 सवलतीचे दिवस निश्चित करण्यात आले आहे.

     

    त्यापैकी 5 दिवस राखीव ठेवण्यात आले आहे. निश्चित करण्यात आलेल्या 10 दिवसांपैकी 3 दिवस गणेश उत्सवाकरीता (अनंत चतुर्दशी हा दिवस धरून) निश्चित करण्यात आले आहे.

     

    गणेश उत्सवा करीता ध्वनिक्षेपक व ध्वनिवर्धक वापरासाठी यापूर्वी निश्चित अनंत चतुर्दशी दि. 28 सप्टेंबर हा सवलतीचा दिवस व उर्वरित दि. 27 व 29 सप्टेंबर 2023 हे दोन दिवस निश्चित करण्यात आले आहे.

     

    निश्चित करण्यात आलेल्या सवलतीच्या दिवशी सक्षम प्राधिका-याकडून परवानगी घेऊनच त्यांनी ठरवून दिलेल्या अटी व शर्ती प्रमाणेच ध्वनिक्षेपक व ध्वनीवर्धकाचा वापर करता येईल, असे जिल्हा दंडाधिकारी विनय गौडा यांनी निर्गमित केलेल्या आदेशात नमूद आहे.

  • व्हिडीओ गेम पार्लर बाबत धक्कादायक माहिती

    News34 chandrapur

    चंद्रपूर – चंद्रपूर जिल्ह्यात सुरू असलेल्या नियमबाह्य व्हिडीओ गेम पार्लर बाबत News34 वर बातमी प्रकाशित होताच पोलीस व जिल्हा प्रशासन खळबळून जागे होताच कारवाईचा धडाका सुरू झाला.

     

    आता या व्हिडीओ गेम पार्लर ची जिल्हा प्रशासनाने परवाना तपासणी मोहीम सुरू केली आहे.
    मात्र आधीच परवाने नूतनीकरण करण्यात आले नसल्याने प्रशासनाच्या मोहिमेचा अर्थ काय? असा प्रश्न यावेळी उपस्थित झाला आहे.

     

     

    या पार्लर बाबत News34 ला धक्कादायक माहिती मिळाली आहे, शहरातील काही व्हिडीओ गेम पार्लर मध्ये पोकर च्या मशीन लावण्यात आल्या होत्या, विशेष म्हणजे पोकर च्या मशीन फक्त केसिनो मध्ये लावण्यात येतात.

    पोकर मशीन म्हणजे काय?

    मोठ्या केसिनो मध्ये लावण्यात येणाऱ्या जुगाराच्या मशीनला पोकर म्हणतात याचा दुसरा अर्थ हा डाकू होतो, म्हणजेच खेळणाऱ्यांच्या खिश्यावर दरोडा टाकण्याचे काम या मशीन द्वारे केल्या जाते.

    वर्ष 2022 डिसेंम्बर पासून जिल्ह्यातील व्हिडीओ गेम पार्लर संचालकांच्या परवान्यांचे अद्यापही नूतनीकरण करण्यात आले नाही, मात्र पार्लर संचालक प्रशासनाला आमचं काम हे नियमाप्रमाणे असल्याचे ओरबाडून सांगत आहे.

    जिल्हाधिकारी कार्यालय मार्फत सुरू करण्यात आलेल्या तपासणी मोहिमेबाबत अद्यापही जिल्हाधिकारी यांचं ते पत्र पोलीस निरीक्षकांना प्राप्त झाले नाही.

    शासनाने सुरू केलेल्या मोहिमेआधी खिसा खाली करणाऱ्या या मशीन पार्लर चालक तर्फे मशीन काढण्यात येण्याची शक्यता वर्तविण्यात येत आहे.

    गेम पार्लर बाबत बातमी नंतर अनेकांनी आपण या पार्लर मध्ये जाऊन पैश्याचा जुगार खेळत पैसे हरल्याची खंत व्यक्त केली आहे.

     

    विशेष म्हणजे अनेक युवकांनी गेम च्या नावावर पोकर म्हणजे पैश्याचा जुगार खेळला, पार्लर चालकांनी मशीन सेट करीत अनेकांची फसवणूक केली अशी माहिती सुद्धा News34 च्या हाती लागली आहे.

    विशेष म्हणजे चंद्रपूर जिल्हाधिकारी कार्यालयात वर्ष 2002 पासून व्हिडीओ गेम पार्लर बाबत जी अधिसूचना काढण्यात आली होती, त्यानंतर आजपर्यंत त्या अधिसूचनेत काही सुधारणा झाली नाही.

     

    जिल्हाधिकारी गौडा यांनी आधी व्हिडीओ गेम पार्लर ला सील मारून तपासणीचे आदेश द्यायला हवे होते मात्र तसे काही झाले नाही, जर असे झाले असते तर व्हिडीओ गेम पार्लर संचालक सेटिंग केलेली मशीन काढू शकले नसते.

    राज्याच्या अधिवेशनात उपमुख्यमंत्री फडणवीस यांनी जुगार बाबत कायदे कठोर करणार असल्याची घोषणा असली तरी चंद्रपूर जिल्ह्यातील बल्लारपूर येथे मोठ्या प्रमाणावर नियमबाह्य व्हिडीओ गेम पार्लर सुरू आहे, बल्लारपूर पोलीस व्हिडीओ पार्लर च्या नावाखाली सुरू असलेल्या या जुगार अड्ड्यावर धाड मारण्याचे धाडस करणार काय?

    नुकत्याच वर्ष 2023 मध्ये जून महिन्यात खापरखेडा पोलिसांनी व्हिडीओ गेम पार्लर मध्ये सुरू असलेल्या जुगार अड्ड्यावर धाडी मारल्या होत्या, या धाडीत तब्बल 88 मशीन सहित तब्बल 26 जणांना अटक करीत 17 लाखांचा मुद्देमाल जप्त केला होता, मात्र चंद्रपुरात अशी कारवाई कुठे होताना दिसत नाही.

    पोलीस व जिल्हा प्रशासन नियमबाह्य व्हिडीओ गेम पार्लर वर कारवाई करीत नसल्याने पार्लर चालकांच्या हिंमती वाढल्या आहे.

  • युरिया खताची चढ्या दराने विक्री, कांग्रेसने केली कारवाईची मागणी

    News34 chandrapur गुरू गुरनुले

    मुल:- तालुक्यातील शेतकऱ्यांना कृत्रिमरित्या युरिया खताचा तुटवडा करून चढ्या दराने खते विकणाऱ्या कृषी केंद्रावर कारवाई करण्याची मागणी काँग्रेसकडून करण्यात आली.युरिया खताचा प्रचंड तुटवडा पडलेला असून शेतकऱ्यांना ज्यादा दरात युरिया खत घ्यावे लागत आहे.

     

    कृषी केंद्राचे व्यापारी जास्त नफा कमवण्याच्या उद्देशाने युरिया खताचा स्टॉक करून जास्त नफा मिळणाऱ्या ईतर कंपनीच्या खताचा ज्यादा भावाने शेतकऱ्यांना विकत आहेत. तालुक्यातील शेतकऱ्यांची सर्रास लूट होत असून युरिया खतासाठी शेतकऱ्यांना इकडे तिकडे भटकावे लागत आहे. ऐनवेळी हंगामातच खताची नितांत आवश्यकता असतानाच शेतकऱ्यांना हेतू परस्पर लुटल्या जाते.

     

    युरिया या खताचा तुटवडा दाखवून शेतकऱ्यांना नेहमी त्रास दिल्या जातो याबाबत प्रशासकीय स्तरावरून याची गंभीर दखल घेऊन युरिया खताचा पुरवठा शेतकऱ्यांना तात्काळ करण्यात यावा व जे कृषी केंद्र चढ्या दराने शेतकऱ्यांची लूट करत असतील त्यांच्यावर कठोर कारवाई करावी या मागणीला घेऊन काँग्रेसच्या वतीने निवेदन देण्यात आले.

     

    निवेदन देताना काँग्रेसचे तालुकाध्यक्ष गुरु गुरनूले, युवक काँग्रेस तालुका अध्यक्ष पवन निलमवार, काँग्रेसचे युवा नेते प्रशांत उराडे, माजी सरपंच जालिंदर बांगरे, धनराज रामटेके आकाश दहिवले, दामोदर लेनगुरे, संदीप मस्के तथा काँग्रेसच्या अन्य कार्यकर्ते उपस्थित होते.

  • रस्त्याच्या बाजूने जात असताना अज्ञात वाहनाने उडविले

    News34 chandrapur प्रशांत गेडाम

    (प्रशांत गेडाम)
    सिंदेवाही : दोघांना एका भरधाव अज्ञात वाहनाने चिरडले. या भीषण अपघातात दोघांचाही मृत्यू झाला. ही घटना सिंदेवाही- मूल मार्गावर सिंदेवाहीपासून सुमारे १० कि.मी. अंतरावरील नवीन विरव्हा येथे सोमवारी रात्री ७:३० वाजताच्या सुमारास घडली.

     

    दादाजी शिवराम सावसाकडे (वय ६५) व उदालक केशव हजारे (५०) दोघेही रा. सरडपार चक (नवीन विरव्हा) ता. सिंदेवाही अशी मृतकांची नावे आहेत.

    सरडपार (नवीन विरव्हा) येथील दादाजी आणि उदालक हे दोघेही आपल्या वैयक्तिक कामानिमित्त सिंदेवाही- मूल मार्गावरील विरव्हा गावातील बसथांब्या जवळ आले.

     

    रस्त्याच्या बाजूने चालत असताना अचानक भरधाव आलेल्या वाहनाने दोघांनाही जोरदार धडक दिली. यामध्ये मोठ्या प्रमाणात रक्तस्राव होऊन गंभीर जखमी झाले. दोघेही रस्त्यावर पडून असताना सिंदेवाही पोलिस घटनास्थळी पोहोचले. त्यांनी वाहनातून दोघांनाही सिंदेवाही ग्रामीण रुग्णालयात पोहोचविले. मात्र, डॉक्टरांनी दोघांनाही मृत घोषित केले. पोलिस अज्ञात वाहनाचा शोध घेत आहे. सिंदेवाही प्रभारी पोलिस निरीक्षक चव्हाण यांच्या मार्गदर्शनात तपास सुरू आहे.

  • हिंगणघाट जळीत कांडाची 3 वर्षांनी पुन्हा चर्चा

    News34 chandrapur

    वर्धा – हिंगणघाट येथील तरूणीच जळीत हत्याकांड प्रकरण तीन वर्षांनी पुन्हा चर्चेत आले आहे, महाविकास आघाडीच्या काळात घडलेलं जळीत कांडातील पीडित कुटुंबाला मदतीच्या नावावर निव्वळ आश्वासन देण्यात आले होते, मात्र महायुतीचे सरकार आल्यावर त्यांनी पीडित कुटुंबाला आर्थिक मदत व पीडितेच्या भावाला शासकीय नोकरीत सामावून घेण्याची प्रक्रिया सुरू केली आहे, याबाबत भाजप प्रदेश महिला आघाडीच्या अध्यक्षा चित्रा वाघ यांनी माहिती दिली आहे.

    ३ फेब्रुवारी, २०२० रोजी वर्धा येथे एका नराधमाने महाराष्ट्राच्या लेकीला पेट्रोल टाकून जिवंत जाळले होते. ८ दिवस मृत्यूशी दिलेली झुंज अपयशी ठरल्याने 10 फेब्रुवारीला निर्भयाचा मृत्यू झाला होता.

    ही घटना वर्धा निर्भया प्रकरण व हिंगणघाट जळीत प्रकरण म्हणून ओळखले गेले. याच घटनेमुळे शक्तीकायदयाचे सुतोवाच झाले होते. संपूर्ण महाराष्ट्रात या प्रकरणामुळे आक्रोश निर्माण झाला होता.

    संपूर्ण गाव आरोपीला शिक्षा होत नाही तोवर अंत्यसंस्कार करायला तयार नव्हते. सरकारने जिल्हाधिकाऱ्यांच्या माध्यमातून पिडित अंकिता पिसुड्डेच्या परिवाराला आर्थिक मदत व तिच्या लहान भावाला सरकारी नोकरीत सामावून घ्यायचे लेखी आश्वासन दिले होते.

    मात्र उध्दव ठाकरे आणि मविआ त्यांच्या सोयी आणि सवयीप्रमाणे दिलेला एकही शब्द पाळला नाही, २.५ वर्ष कसलीही काहीही मदत केली नाही अशी टीका चित्रा वाघ यांनी यावेळी केली.

     

    महाविकास आघाडीच्या काळात झालेल्या जळीतकांडाचा महाविकास आघाडीलाच विसर पडला होता, अखेर महायुतीच्या सरकारकडून
    पिडीत कुटुंबियांच दुख सावरण्याचा प्रयत्न करण्यात आला आहे.

     

    अडीच वर्ष सत्तेत असनार ठाकरे सरकारने फक्त घोषणाबाजीच केली होती प्रत्यक्ष मदत मात्र शुन्य, अखेर पिडीत कुटूंबियांच्या मदतीला उपमुख्यमंत्री देवेंद्र फडणवीस यांच्याकडून सकारात्मक पाऊल पुढे करीत पिडीत कुटूंबियाला जाहिर मदतीचा धनादेश सुपूर्द केला.

    तत्कालीन मुख्यमंत्री उध्दव ठाकरे आणि गृहमंत्री अनिल देशमूख यांच्याकडून नुसतीच घोषणाबाजी करण्यात आली होती मात्र प्रत्यक्षात मदत ही महायुती सरकारने केली.

     

    मात्र दिनांक २५ सप्टेबर, २०२३ रोजी देवेंद्र फडणवीस यांनी मात्र सदर निर्भयाच्या पिडित कुटुंबाला देवगिरी येथे बोलवून घेऊन आर्थिक मदतीचा धनादेश दिला. निर्भयाच्या भावाला सरकारी सेवेत सामावून घेण्यासाठी सकारात्मकता दाखवली

    निर्भया ही महाराष्ट्राची लेक होती ह्याची जाणीव संवेदनशील नेतृत्व देवेंद्र फडणवीस यांना आहे म्हणून शब्द उध्दव ठाकरे आणि मविआ सरकारने दिलेला असला तरी तो पूर्ण देवेंद्र फडणवीस यांनी केला.

    म्हणून आमचे नेते देवेंद्र फडणवीस आणि आमच्या पक्षाचा आम्हाला अभिमान आहे असे चित्राताई वाघ म्हणाल्या.

    निर्भया सारख्या घटनांची पुनरावृत्ती महाराष्ट्रात होऊ नये म्हणून सरकार आणि पोलीस प्रशासन कार्यरत आहे हा देखील विश्वास त्यांनी महाराष्ट्राला दिला.

  • रामाला तलावात युवकाने मारली उडी

    News34 chandrapur

    चंद्रपूर – शहरातील ऐतिहासिक रामाला तलाव येथे आज मंगळवार 26 सप्टेंबरला 35 वर्षीय युवकाने तलावात उडी घेत आत्महत्या केली.

     

    धीरज श्रीकांत देवांग असे मृत युवकाचे नाव आहे, युवक दुर्गापुरातील सेंट मायकल शाळेच्या मागे राहत असल्याची माहिती आहे, सकाळच्या सुमारास युवकाने रामाला तलावात उडी घेतली, यामध्ये त्या युवकाचा मृत्यू झाला.

     

    पोलिसांना याबाबत माहिती मिळताच धीरज चा मृतदेह बाहेर काढण्यात आला आहे, त्याने आत्महत्या का केली यामागील कारण अद्याप अस्पष्ट आहे.

  • बल्लारपूर पेपर मिल समोर कामगाराचा मृतदेह ठेवत आंदोलन

    News34 chandrapur रमेश निषाद

    बल्लारपूर – 14 सप्टेंबर बल्लारपूर पेपर मिल मध्ये कार्यरत कामगार 43 वर्षीय दिगंबर महाजन केमिकल च्या टाकीत पडल्याने होरपळले. तब्बल 10 दिवसांनी उपचारादरम्यान महाजन यांचा नागपुरात मृत्यू झाला.

     

    महाजन यांच्या कुटुंबातील एकाला नोकरी व 40 लाख रुपयांची अथक मदत करण्याची मागणी कामगार व नागरिकांनी केली आहे, या मागणीसाठी आज 25 सप्टेंबर पासून सायंकाळपासून नागरिकांनी महाजन यांचा मृतदेह गेट पुढे ठेवत आंदोलन सुरू केले आहे.

    सध्या आंदोलन सुरू असून पोलिसांचा तगडा बंदोबस्त त्याठिकाणी लावण्यात आला आहे.

  • चंद्रपूर नागपूर मार्गावर वाढतंय अतिक्रमनाचे जाळं

    News34 chandrapur

    चंद्रपूर – दिवसेंदिवस चंद्रपूर शहराचा विस्तार वाढत असून नागरिकांच्या मूलभूत सोयी काही प्रमाणात अपुऱ्या पडत आहे. सोबतच शहरात अतिक्रमण सुद्धा झपाट्याने वाढत आहे.

     

    चंद्रपूर शहरातील गोल बाजार ते जटपुरा गेट परिसर असो की वरोरा नाका चौक ते बापट नगर याठिकाणी आज मोठ्या प्रमाणात अतिक्रमण वाढले आहे.

     

    काही दिवसांपूर्वी चंद्रपूर ते नागपूर महामार्गावर शिक्षिकेचा रस्ते अपघातात बळी गेला होता, कारण रस्त्यावर चारचाकी वाहनांची नेहमीच वर्दळ व काही दुकान चालकांनी रस्त्यावर केलेलं अतिक्रमण त्या अपघाताला कारणीभूत होते.

     

    त्या अपघातानंतर सुद्धा चंद्रपूर मनपा प्रशासनाने रस्त्यावर असलेल्या अतिक्रमनावर काही ठोस कारवाई केली नाही, विशेषतः चंद्रपूर नागपूर मार्ग हा अनेक दुकान चालकांनी आपल्या दुकानाच्या हद्दीत घेतला आहे.

    या मार्गावरील अतिक्रमण मनपा प्रशासनाने तात्काळ हटवून चंद्रपूर नागपूर महामार्ग मोकळा करून भविष्यात होणाऱ्या अपघाताला टाळण्याचे काम करावे अशी मागणी नागरिकांनी केली आहे.

Powered by
►
Necessary cookies enable essential site features like secure log-ins and consent preference adjustments. They do not store personal data.
None
►
Functional cookies support features like content sharing on social media, collecting feedback, and enabling third-party tools.
None
►
Analytical cookies track visitor interactions, providing insights on metrics like visitor count, bounce rate, and traffic sources.
None
►
Advertisement cookies deliver personalized ads based on your previous visits and analyze the effectiveness of ad campaigns.
None
Powered by