My Blog

Blog

  • महोत्सव आला….भक्तीगीतांच्या सिडीचे फडणवीस यांच्या हस्ते विमोचन

    News34 chandrapur

    चंद्रपूर – श्री माता महाकाली महोत्सवा निमित्त तयार करण्यात आलेल्या आला आला हो .. महोत्सव आला या भक्तीगीत सिडीचे राज्याचे उपमुख्यमंत्री देवेंद्र फडणवीस यांच्या हस्ते नागपूर येथे विमोचन करण्यात आले. यावेळी श्री महाकाली माता महोत्सव समितीचे अध्यक्ष आमदार किशोर जोरगेवार, समितीचे सचिव अजय जयस्वाल, माजी नगर सेवक बलराम डोडाणी, अशोक मत्ते, मोहित मोदी आदींची उपस्थिती होती.

     

    श्री महाकाली माता महोत्सव समितीच्या वतीने 19 ऑक्टोंबर पासून चंद्रपूरात होऊ घातलेल्या श्री माता महाकाली महोत्सवाची जय्यत तयारी सुरु आहे. यासाठी महाकाली मंदिर पटांगणात भव्य मंडप उभारण्यात आले आहे. सदर महोत्सवाच्या टिझरचे नुकतेच राज्याचे मुख्यमंत्री एकनाथ शिंदे यांच्या हस्ते उद्घाटन करण्यात आले आहे. सदर महोत्सवात सुप्रसिध्द कलाकार भक्तीमय गीतांची मेजवानी सादर करणार आहे.

     

    सदर महोत्सवात 9 हजार 999 कन्यांचे पुजन व भोजन कार्यक्रमाचे आयोजन करण्यात आले आहे. तर नवरात्री दरम्यान जन्मास आलेल्या कन्यांना श्री महाकाली माता महोत्सव समितीच्या वतीने चांदीचा सिक्का देण्यात येणार आहे. चंद्रपूरची आराध्य दैवत माता महाकालीची महती राज्यभरात पोहोचावी यातुन येथील पर्यटनाला चालना मिळावी हा या महोत्सवा मागचा मुळ उद्देश असल्याचे समितीचे अध्यक्ष आमदार किशोर जोरगेवार यांनी म्हटले आहे.

     

    सदर महोत्सवासाठी श्री महाकाली माता महोत्सव समितीच्या वतीने माता महाकालीच्या भक्तीमय गीतांची सीडी तयार करण्यात आली आहे. यात बोलो नमोस्तुते महाकाली, आला आला हो महोत्सव आला, दृष्ट पापीओं दूर हटो, मुझे भा गया महाकाली का देश, चंद्रपूरची महाकाली गोंधळाला आली, चला करुया जागर अशी भक्ती गीते सदर सिडीमध्ये असणार आहे. दरम्यान राज्याचे उपमुख्यमंत्री देवेंद्र फडणवीस यांच्या हस्ते नागपूर येथे या भक्तीगीतांच्या गाण्याच्या सिडीचे विमोचन करण्यात आले आहे. सदर गाणी महाकाली भक्तांच्या मुखात बसेल या गाण्यांच्या माध्यमातून माता महाकालीचा जागर राज्यभर होईल असा विश्वास यावेळी श्री महाकाली माता महोत्सव समीतीच्या वतीने व्यक्त करण्यत आला आहे.

  • शुक्रवारी चंद्रपुरात जनआक्रोश मोर्चा

    News34 chandrapur

    चंद्रपूर : राज्‍य सरकारने बाह्ययंत्रणेमार्फत सुरू केलेली कंत्राटी पदभरती रद्द करावी, ‘दत्तक शाळा योजना’ रद्द करावी, राज्‍य कर्मचाऱ्यांना जुनी पेंशन योजना लागू करावी, MPSC व इतर विभागाकडून घेण्यात येणाऱ्या स्‍पर्धा परिक्षेचे शुल्‍क कमी करून १०० रुपये ठेवावे यासह इतर मागण्यांना घेऊन शिक्षण – नोकरी बचाव समिती, जिल्‍हा चंद्रपूरच्या वतीने शुक्रवार, दिनांक २० ऑक्‍टोंबर २०२३ रोजी दुपारी १२ वाजता दीक्षाभूमी (डॉ. आंबेडकर कॉलेज) येथून चंद्रपूर जिल्‍हाधिकारी कार्यालयावर जनआक्रोश माेर्चा काढण्यात येणार आहे.

     

    उद्योग, ऊर्जा, कामगार आणि खनिकर्म विभागाने शासन निर्णय ६ सप्‍टेंबर २०२३ रोजी निर्गमित केला. त्यानुसार शिक्षण व विविध विभागात मनुष्यबळ बाह्ययंत्रणेमार्फत पुरविण्यात येणार आहे. शासकीय नोकरी हा महाराष्ट्रातील सुशिक्षित तरुणाचा हक्क आहे. बाह्ययंत्रणेमार्फत पदभरती करून सुशिक्षित बेरोजगारांचे शोषण करण्याचे परवाने वाटप केल्या जात आहे.

     

    महाराष्ट्र राज्य सरकार या शासन निर्णयाच्या माध्यमातून नवी वेठबिगारी निर्माण करू पाहत आहे काय? हा शासन आदेश तात्काळ रद्द करून सर्व विभागातील रिक्त जागेवर कायमस्‍वरूपी पदभरती करावी, ‘दत्तक शाळा योजना’ राबविण्याबाबतचा शासन निर्णय रद्द करावा, NPS रद्द करून शिक्षक-राज्‍य कर्मचाऱ्यांना जुनी पेंशन योजना लागू करावी, MPSC व इतर विभागाकडून घेण्यात येणाऱ्या स्‍पर्धा परिक्षेचे शुल्‍क कमी करून १०० रुपये ठेवावे, IBPS/ TCS किंवा इतर खासगी संस्‍थामार्फत विविध पदाच्या स्‍पर्धा परिक्षा न घेता सर्व परिक्षा MPSC आयाेगाद्वारे घेण्यात याव्‍या, विविध शासकीय पदभरतीसाठी होणाऱ्या स्‍पर्धा परिक्षेतील पेपर फुटीवर नियंत्रण आणण्यासाठी कडक कायदा करण्यात यावा, विद्यार्थी हितासाठी २० पटाखालील शाळा बंद होऊ नयेत, यासाठी समूह शाळा संकल्‍पना रद्द करणे, राज्‍य शासनातील शासकीय कार्यालयातील रिक्‍त पदे व अनुदानित संस्‍थेमधील शिक्षक – प्राध्यापकांची रिक्‍त पदे तात्काळ भरावी आदी मागण्यांचा जनआक्रोश मोर्चात समावेश आहे.

     

    वरील सर्व मागण्यांचा गांभीर्याने विचार करून राज्‍यातील विद्यार्थी, सुशिक्षीत बेराेजगार, शिक्षक, राज्‍य कर्मचारी यांना न्‍याय द्यावा अन्‍यथा शिक्षण – नोकरी बचाव समिती, जिल्‍हा चंद्रपूरच्या वतीने सुरू असलेले आंदोलन अधिक तीव्र करून राज्‍यव्‍यापी आंदोलन छेडण्यात येईल, असा इशारा राज्‍याचे मुख्यमंत्री, उपमुख्यमंत्री, शालेय शिक्षण मंत्री यांना पत्राद्वारे देण्यात आला आहे. आमदार सुधाकर अडबाले यांच्या अध्यक्षतेखाली नुकतीच मातोश्री सभागृह तुकूम येथे नियोजन सभा पार पडली. यावेळी सर्व शैक्षणिक, सामाजिक, राजकीय संघटनांचे पदाधिकारी मोठ्या संख्येने उपस्‍थित होते.

     

    या जनआक्रोश मोर्चात विद्यार्थी, युवक, पालक, कर्मचारी, सर्वसामान्‍य नागरिक यांनी रस्‍त्‍यावर उतरून सरकारने सुरू केलेले खासगीकरण व कंत्राटीकरण धोरण रद्द करण्यासंदर्भात विराेध दर्शवावा, असे आवाहन शिक्षण – नोकरी बचाव समिती, जिल्‍हा चंद्रपूरच्‍या वतीने करण्यात आले आहे.

  • चंद्रपुरातील ते देशी दारूचे दुकान तात्काळ हटवा – चंद्रपूर शिवसेना आक्रमक

    News34 chandrapur

    चंद्रपुर :- जिल्ह्यातील चंद्रपुर शहर महानगरपालिका हद्दीतील अष्टभुजा वार्डातील बायपास रोड जवळील पुरातन अष्टभुजा देवीच्या मंदिरालगत शासनाच्या नियमाची पायमल्ली करुन नियमबाह्य पद्धतीने परवाना देण्यात आलेले मालक-हरीश भोजा शेट्टी यांचे सरकारी देशी दारूचे दुकान तात्काळ हटविण्यासंदर्भात चंद्रपुर शिवसेना तालुका प्रमुख तथा ग्राहक संरक्षण समिती जिल्हाध्यक्ष संतोष पारखी यांनी जिल्हाधिकारी यांना निवेदनाद्वारे इशारा दिला.

     

    आंतरराष्ट्रीय हिंदू परिषद राष्ट्रीय बजरंग दल, चंद्रपुरच्या वतीने जिल्हा महामंत्री दिपक रेड्डी यांनी दि.06/09/2023 ला निवेदन देवून सदर विषयाची दखल न घेतल्यामुळे संदर्भीय पत्राच्या अनुसंगाने चंद्रपुर शहर मनपा येथील अष्टभुजा वार्डातील बायपास रोड जवळील पुरातण अष्टभुजा देवीचे मंदिर असून येथे देशभरातून येणाऱ्या भक्त भाविक मोठ्या संख्यने पूजा अर्चना करण्यासाठी येत असुन मंदिरालगत नुकतेच नव्याने देशी दारूचे दुकान (मालक-हरीश भोजा शेड्डी ला. नं. 133/2023-24) देण्यात आले आहे.

     

    यामध्ये शासनाच्या नियमाची पायमल्ली करुन नियमबाह्य पद्धतीने दारूचा परवाना देण्यात आलेल्या सरकारी देशी दारूच्या दुकानात सर्रासपणे विदेशी दारू व बियरची विक्री केली जात असल्यामुळे दारू पिवून दारूच्या नशेत देवीच्या मंदिरात भक्त भाविक पूजा अर्चना करण्यासाठी ये-जा करीत असतांना अश्लील भाषेत शिविगाळ करुन अपशब्दात बोलत असतात.
    त्यामुळे मंदिर येणाऱ्या महिला, पुरुष, मुले, मूली व लहान बालकांना सदर प्रकरणापासून फार मोठ्याप्रमाणात त्रास सहन करावा लागत असून भाविकांच्या भावना दुखावल्या जात आहे.

     

    त्याकरिता पुरातण अष्टभुजा देवीच्या मंदिरालगत शासनाच्या नियमाची पायमल्ली करुन नियमबाह्य पद्धतीने सरकारी देशी दारूचे दुकान तात्काळ हटविण्याचे आदेश देवून देशभरातून येणाऱ्या भक्त भाविकांना पूजा अर्चना करणे सोइस्कर होईल याची दक्षता घेण्यात यावी.

     

    अन्यथा आम्हाला शिवसेनेच्या पद्धतीने सदर प्रकरण हाताळावे लागेल व याची सर्वस्वी जबाबदारी प्रशासनाची राहील असे चंद्रपुर शिवसेना तालुका प्रमुख तथा ग्राहक संरक्षण समिती जिल्हाध्यक्ष संतोष पारखी यांनी जिल्हाधिकारी यांना निवेदनाद्वारे इशारा दिला. यावेळी चंद्रपुर तालुका संघटक संजयकुमार शिंदे,आंतरराष्ट्रीय हिंदू परिषद राष्ट्रीय बजरंग दल जिल्हा महामंत्री दिपक रेड्डी, राजू रायपुरे, सुरेंदर अंचल, गोविन्द प्रसाद व पप्पू कोठारिया उपस्थित होते.

  • 15 वर्षीय मुलाने उचलले धक्कादायक पाऊल

    News34 chandrapur

    चिमूर – 17 ऑक्टोबर ला चंद्रपूर जिल्ह्यातील चिमूर तालुक्यात घडलेल्या एका घटनेमुळे संपूर्ण गाव हादरुन गेला, तालुक्यातील बेलारा येथील 9 व्या वर्गात शिकणाऱ्या 15 वर्षीय मुलाने राहत्या घरी गळफास घेत आत्महत्या केली.

    बेलारा येथील करण मारोती गुरणुले वय १५ वर्ष असे मृतक मुलाचे नाव आहे तो मदनापूर येथील जय लहरी जय मानव विद्यालय येथे ९व्या वर्गात शिकत होता, आज १७ ऑक्टोबर ला दूपारी ३.३० वाजताच्या दरम्यान सदर घटना उघडकीस आली.

    तब्बेत बरी नसल्याने काही दिवस करन शाळेत गेला नव्हता. आज शाळेत जातो म्हणुन गणवेश व बॅग घेऊन तयारी केली. मात्र घरी कुणीही नसल्याचे पाहुन त्याने दोराने गळफास लावुन आत्महत्या केली. दुपारी मोठा भाऊ घरी आल्या नंतर हि घटना उघडकीस आली. घटनेची माहीती चिमूर पोलिसांना देण्यात आली.

     

    पोलिस निरीक्षक मनोज गभने,पोलिस उप निरीक्षक भिष्मराज सोरते,पोलिस कर्मचारी भारत घोळवे, राहुल चांदेकर यांचेसह घटनास्थळावर पोहचुन घटनेचा पंचनामा केला. प्रेत उत्तरीय तपासणीसाठी उप जिल्हा रुग्णालयात पाठविण्यात आले.आत्महत्येचे कारण अजुन स्पष्ट झाले नसुन पुढील तपास सुरु आहे .

  • येल्लो मोझॅक ने आणले बळीराजाच्या डोळ्यात पाणी

    News34 chandrapur

    चंद्रपूर – जिल्हात आलेल्या पुराने, संततधार पावसाने बळीराजावर दुबार पेरणीचे संकट ओढवलं होतं. या संकटाशी दोन हात करीत बळीराजाने शेती उभी केली. मात्र सोयाबीनचा पेरा केलेल्या बळीराजावर मोठं आर्थिक संकट कोसळलं आहे.येल्लो मोझाक रोगाने सोयाबीनचे पीक उध्वस्त झाल. अनेक शेतकऱ्यांनी सोयाबीन पिकात जनावरे सोडलीत तर काही शेतकऱ्यांनी सोयाबीनचे शेत नागरून काढलं.

     

    सरकार मदत करेल ही आशा बळीराजाला होती.मात्र अद्याप साधे पंचनामे झालेले नाहीत. शेतकऱ्यांच्या प्रश्नाकडे दुर्लक्ष करणाऱ्या सरकारचा भारत राष्ट्र समितीने निषेध नोंदवीला आहे. शेतकऱ्यांना तात्काळ नुकसान भरपाईची मदत देण्यात यावी अशी मागणी भारत राष्ट्र समितीचे नेते भुषण फुसे यांनी केली आहे.

    चंद्रपूर जिल्ह्यात 67 हजार हेक्टरवर सोयाबीनची लागवड केल्या गेली .त्यापैकी जवळजवळ 53 हजार हेक्टरवरील सोयाबीनवर येल्लो मोझाक रोगाचा प्रादुर्भाव झाला आहे. नगदी पिकाचे नुकसान झाल्यामुळे जिल्ह्यातील शेतकरी आर्थिक संकटात सापडला आहे.येल्लो मोझाकचा प्रादुर्भाव जिल्हात ऑगस्टमध्ये आढळला होता. त्यानंतर यावर उपाययोजना करायला हवं होतं. मात्र महाराष्ट्र शासन व कृषी विभागाच्या निष्क्रियतेमुळे वेळेत उपाय झाले नाहीत.त्यामुळे बळीराजाचे मोठे नुकसान झाले.

     

    सरकार मदत करेल ही आशा बळीराजाला आहे. मात्र अद्याप सोयाबीन शेतीचे साधे पंचनामे सुद्धा झालेले नाहीत.शेतकऱ्यांचे प्रश्न सोडविण्यासाठी महाराष्ट्र शासन व प्रशासन उदासीन आहे.शेतकरी विरोधी असलेल्या शासन व प्रशासनाचा भारत राष्ट्र समितीने जाहीर निषेध केला आहे. तातडीने शेतकऱ्यांना आर्थिक पॅकेज जाहीर करा व त्यांच्या बँक खात्यामध्ये पैसे जमा करा अशी मागणी यावेळी भारत राष्ट्र समितीने केली आहे. अन्यथा भारत राष्ट्र समिती पीडित शेतकऱ्यांसोबत मिळून तीव्र आंदोलन करेल असा इशाराही देण्यात आलेला आहे. याप्रसंगी भारत राष्ट्र समिती राजुरा महिला समन्वयक ज्योतीताई नळे, नळे सर, राकेश चिल्कुलवार, सनी रेड्डी, महेंद्र ठाकूर, धनंजय बोर्ड सह अनेक कार्यकर्ते उपस्थित होते.

  • डॉ. बाबासाहेब आंबेडकर यांच्या विचारांवर चालण्याचा संकल्प करा – पालकमंत्री सुधीर मुनगंटीवार

    News34 chandrapur

    चंद्रपूर : ‘नागपूर आणि चंद्रपूर हा परिसर जगात ‘टायगर कॅपीटल’ म्हणून ओळखला जात असला तरी या दोन्ही जिल्ह्यांत बाबासाहेबांनी 1956 सालीच वाघाची डरकाळी दिली आणि संपूर्ण देशाने ही डरकाळी ऐकली आहे. या महामानवाने दिलेल्या संविधानात स्वातंत्र्य, अधिकार, जबाबदारी आणि कर्तव्याचाही समावेश आहे. त्यामुळे प्रत्येक नागरिकाने संविधान वाचून डॉ. बाबासाहेब आंबेडकर यांनी दिलेल्या विचारांवर चालण्याचा संकल्प करावा व त्यातून जगण्याची प्रेरणा घ्यावी,’ असे आवाहन राज्याचे वने, सांस्कृतिक कार्य, मत्स्यव्यवसाय मंत्री तथा जिल्ह्याचे पालकमंत्री ना. श्री. सुधीर मुनगंटीवार यांनी केले.

     

    डॉ. बाबासाहेब आंबेडकर मेमोरीअल ट्रस्टच्यावतीने दीक्षाभूमी चंद्रपूर येथे आयोजित कार्यक्रमात त्यांनी महामानवाला अभिवादन केले. त्यावेळी ते बोलत होते. कार्यक्रमाच्या अध्यक्षस्थानी ट्रस्टचे अध्यक्ष अरुण घोटेकर होते. तर प्रमुख पाहुणे म्हणून सर्वश्री आमदार सुधाकर अडबाले, किशोर जोरगेवार, सुभाष धोटे, प्रतिभा धानोरकर, संस्थेचे उपाध्यक्ष अशोक घोटेकर, सचिव वामनराव मोडक, गोंडवाना विद्यापीठाचे कुलगुरु डॉ. प्रशांत बोकारे आदी उपस्थित होते.

     

    देशात आज 750 पेक्षा जास्त जिल्हे आहेत, मात्र नागपूर आणि चंद्रपूर या दोन जिल्ह्यांचे विशेष महत्त्व आहे, असे सांगून पालकमंत्री श्री. मुनगंटीवार म्हणाले, ‘14 ऑक्टोबर रोजी नागपूर येथे तर दोन दिवसांनी म्हणजे 16 ऑक्टोबर 1956 रोजी चंद्रपूर येथे डॉ. बाबासाहेब आंबेडकर यांनी आपल्या अनुयायांना बौद्ध धर्माची दीक्षा दिली. हे दोन्ही जिल्हे आज वाघांसाठी प्रसिद्ध आहेत. पण 1956 मध्येच बाबासाहेबांची डरकाळी संपूर्ण देशाने ऐकली आहे. डॉ. बाबासाहेब आंबेडकर यांनी दिलेल्या संविधानानुसारच देशाची आणि राज्याची वाटचाल सुरू आहे. संविधानात प्रत्येक गोष्टीचा उल्लेख त्यांनी केला आहे. व्यक्ती स्वातंत्र्य, अधिकार यासोबतच प्रत्येकाला त्याच्या जबाबदारीची आणि कर्तव्याचीसुध्दा जाणीव करून देण्यात आली आहे. त्यामुळे बाबासाहेबांचे केवळ स्मरण करून थांबू नये तर, त्यांच्या विचारांवर अंमल करावे लागेल. आणि त्यासाठी प्रत्येकाला संविधानाचे वाचनही करावे लागेल.

     

    महापुरुषांना भारतापुरता मर्यादित समजू नये

    ‘भगवान गौतम बुध्द, छत्रपती शिवाजी महाराज, महात्मा गांधी, डॉ. बाबासाहेब आंबेडकर हे केवळ भारतापुरतेच मर्यादीत नाही तर संपूर्ण जगाला वैचारीक प्रेरणा देण्याचे कार्य त्यांनी केले आहे. ‘शिका, संघटीत व्हा आणि संघर्ष करा’ हा जीवन जगण्याचा मंत्र डॉ. बाबासाहेब आंबेडकर यांनी आपल्याला दिला आहे. गौतम बुद्धांचा शांततेचा आणि समतेचा संदेश संपूर्ण जगात पोहचला आहे. केंद्र शासन आज बुद्धगया, नालंदा, विक्रमशिला, सारनाथ, कपिलवस्तू, राजगीर, वैशाली, श्रावस्ती या ठिकाणांना जोडणारे बुद्ध सर्किट तयार करीत आहे,’ असेही पालकमंत्री सुधीर मुनगंटीवार यांनी सांगितले.

     

    एस.एन.डी.टी. विद्यापीठ आणि चंद्रपूर फ्लाईंग क्लब ठरणार विद्यार्थ्यांसाठी गेमचेंजर

    कौशल्य विकासावर आधारीत प्रशिक्षण आणि रोजगारासाठी चंद्रपूरमध्ये एस.एन.डी.टी विद्यापीठाचे उपकेंद्र स्थापन करण्यात येत आहे. तसेच आगामी काही महिन्यातच चंद्रपूर येथे फ्लाईंग क्लब सुरू करण्याचे नियोजन आहे. त्यामुळे चंद्रपूर आणि गडचिरोली या जिल्ह्यातील अनुसूचित जाती, अनुसूचित जमाती, इतर मागास प्रवर्ग आदी विद्यार्थी–विद्यार्थीनींसाठी या बाबी गेमचेंजर ठरणार आहेत, असा विश्वासही त्यांनी व्यक्त केला.

  • चंद्रपुरातील अपघाताचा थरारक व्हिडीओ व्हायरल

    News34 chandrapur

    चंद्रपूर – चंद्रपूर शहरातील वाहतुकीने सतत कोंडलेल्या जटपुरा गेटवरील अपघाताचा थरारक व्हिडीओ समाज माध्यमावर व्हायरल झाला आहे, या व्हिडीओ मध्ये भरधाव वेगात असलेल्या ऑटोने 65 वर्षीय वृद्धाला जबर धडक दिली आहे.

    या व्हायरल व्हिडिओत 65 वर्षीय इसम रस्त्यावरून पलीकडे जात असताना त्यांना भरधाव वेगात येत असलेल्या ऑटो ने जोरदार धडक दिली, या धडकेत 65 वर्षीय प्रकाश खोडे राहणार जलनगर हे गंभीर जखमी झाले आहे.

     

    चंद्रपूर शहरात दिवसेंदिवस वाहतुकीची समस्या गंभीर होत आहे, मात्र यावर वाहतूक विभागाचे मोठ्या प्रमाणात दुर्लक्ष असून शहरातील भरधाव वेगात चालणाऱ्या वाहनांवर कारवाई फक्त नावापुरती होत असल्याचा आरोप वारंवार वाहतूक विभागावर लागत आहे.

     

    विशेष बाब म्हणजे शहरातील विविध भागात लागलेले सीसीटीव्ही कॅमेऱ्याचं कंट्रोल रूम हे चंद्रपूर वाहतूक विभागात आहे.

  • 3 जिल्ह्यातील दुचाकी चोर चंद्रपूर स्थानिक गुन्हे शाखेच्या ताब्यात

    News34 chandrapur

    चंद्रपूर – जिल्ह्यात होत असलेल्या दुचाकी चोरीवर अंकुश लावण्यासाठी स्थानिक गुन्हे शाखेने कंबर कसली आहे, 16 ऑक्टोबर रोजी स्थानिक गुन्हे शाखेच्या पथकाने गोपनीय माहितीच्या आधारे एका दुचाकी अट्टल चोराला ताब्यात घेतले, त्याची अधिक चौकशी केली असता दुचाकी चोरीचे मोठे घबाड उघडकीस आले.

     

    16 ऑक्टोबर ला स्थानिक गुन्हे शाखा दुसऱ्या गुन्ह्याचा तपास करीत असताना त्यांना गोपनीय माहिती मिळाली की एक इसम कमी किमतीमध्ये दुचाकी वाहन विकण्यासाठी बस स्टॅण्ड वर ग्राहक शोधत आहे. मात्र त्या वाहनांचे कागदपत्रे त्याच्याजवळ नव्हते, पोलिसांना संशय आला असता त्याला चौकशीसाठी ताब्यात घेतले.

     

    पारधीगुळा धोपटाला येथे राहणारा 28 वर्षीय प्रदीप संजय शेरकुरे असे त्या इसमाचे नाव, सदरचे दुचाकी वाहन प्रदीप ने वरोरा पोलीस स्टेशनच्या हद्दीतून चोरले असल्याची माहिती पोलिसांना मिळाली, प्रदीप कडून दुचाकी वाहन क्रमांक MH34BC5968 जप्त करण्यात आली.

    प्रदीप ने इतर काही गुन्हे केले का याबाबत सखोल चौकशी केली असता वरोरा, गडचांदूर, नागपूर व यवतमाळ जिल्ह्यातील दुचाकी व LED टीव्ही चोरी केले असल्याची माहिती स्थानिक गुन्हे शाखेच्या पथकाला मिळाली.

     

    प्रदीप ने 7 मोटार सायकल व एक टीव्ही चोरी केली होती, आरोपिकडून तब्बल 2 लाख 80 हजार रुपयांचा मुद्देमाल जप्त करण्यात आला, आरोपीला पुढील कारवाईसाठी वरोरा पोलीस स्टेशनच्या ताब्यात देण्यात आले.

     

    सदरची यशस्वी कारवाई पोलीस अधीक्षक रविंद्र परदेशी, अप्पर पोलीस अधीक्षक रिना जनबंधु यांच्या मार्गदर्शनाखाली स्थानिक गुन्हे शाखेचे पोलीस निरीक्षक महेश कोंडावार यांच्या नेतृत्वात पोलीस उपनिरीक्षक अतुल कावळे, पोलीस कर्मचारी अतुल डांगे, जमिर पठाण, नितेश महात्मे, प्रसाद धुळगळे, दिनेश अराडे व रुषभ बारसिंगे यांनी केली.

  • देशात गाजलेल्या निठारी हत्याकांडाची पुन्हा चर्चा

    News34 chandrapur

    उत्तरप्रदेश – निठारी घटनेच्या तपासाबाबत निराशा व्यक्त करत अलाहाबाद उच्च न्यायालयाने सोमवारी (16 ऑक्टोबर) आरोपी मोनिंदर सिंग पंढेर आणि सुरेंद्र कोळी यांची निर्दोष मुक्तता केली. तपासात त्रुटी असल्याचे आणि पुरावे गोळा करण्याच्या मूलभूत नियमांचे ‘निर्लज्जपणे उल्लंघन’ झाल्याचे न्यायालयाच्या निदर्शनास आले. Nithari kand news

     

    खटला चालवण्यात आलेले अपयश हे जबाबदार एजन्सींकडून जनतेच्या विश्वासाचा घात करण्यापेक्षा कमी नाही, असे न्यायालयाने म्हटले आहे. पंढेरची दोन खटल्यांत निर्दोष मुक्तता करण्यात आली होती, ज्यात त्याला फाशीची शिक्षा झाली होती, तर कोळीला 12 खटल्यांत निर्दोष सोडण्यात आले होते ज्यात त्याला फाशीची शिक्षा झाली होती.

    सय्यद आफताब हुसैन रिझवी आणि अश्वनी कुमार मिश्रा यांच्या खंडपीठाने सांगितले की, “या प्रकरणातील पुराव्याचे मूल्यांकन करताना, भारतीय राज्यघटनेच्या कलम २१ अन्वये आरोपीला दिलेल्या निष्पक्ष खटल्याची हमी लक्षात घेता, आम्हाला आढळून आले की परिस्थितीजन्य पुराव्याच्या आधारे खटल्याच्या निश्चित मानकांवर SK आणि पंधेर यांचा दोष वाजवी संशयापलीकडे सिद्ध होऊ शकला नाही.

     

    डिसेंबर 2006 मध्ये निठारी, नोएडातील एका नाल्यात आठ मुलांचे सांगाडे सापडले तेव्हा उघडकीस आलेले हे खळबळजनक प्रकरण, सुरुवातीला उत्तर प्रदेश पोलिसांनी तपास केला पण नंतर तो केंद्रीय अन्वेषण ब्युरो (CBI) कडे सोपवण्यात आला. निठारी प्रकरणाचा तपास ज्या पद्धतीने झाला, विशेषत: बळी ‘अ’ च्या बेपत्ता होण्याच्या तपासाबाबत न्यायालयाने निराशा व्यक्त केली. खंडपीठाने म्हटले की, “अभ्यायोगाचा खटला आरोपी एसके (सुरेंद्र कोळी) याने २९ डिसेंबर २००६ रोजी यूपी पोलिसांसमोर दिलेल्या कबुलीजबाबावर आधारित आहे.”

     

    सांगाडे आणि हाडे जप्त करण्यात आल्याने आरोपींच्या चौकशीची नोंद करण्यासाठी आवश्यक प्रक्रिया अवलंबायला हवी होती, असे खंडपीठाने म्हटले आहे. खंडपीठाने म्हटले की, अटक, पुनर्प्राप्ती आणि कबुलीजबाब या महत्त्वाच्या बाबी ज्या अनौपचारिक आणि आकस्मिक पद्धतीने हाताळल्या गेल्या ते बहुतांशी निराशाजनक आहे. न्यायालयाने असे निरीक्षण नोंदवले की फिर्यादीने सुरुवातीला पंढेर आणि कोळी यांनी एकत्रितपणे केलेली वसुली दाखविण्यापासून ते नंतरच्या टप्प्यावर केवळ कोळी यांच्यावरच दोष ठेवण्यासाठी आपली भूमिका बदलत राहिली.

     

    डी-५ (पंधेर) आणि डी-६ (डॉक्टरचे घर) या घराच्या भिंतीच्या पलीकडे असलेल्या नाल्यातून मानवी सांगाड्याची सर्व जप्ती करण्यात आली होती आणि पंढेरच्या घरातून कोणतीही पुनर्प्राप्ती झाली नाही, असे न्यायालयाने निरीक्षण नोंदवले. खंडपीठाने सांगितले की, “घर क्रमांक डी-5 मधून कोणतीही कवटी, सांगाडा/हाडे सापडली नाहीत. या घरातून फक्त दोन चाकू आणि एक कुऱ्हाड जप्त करण्यात आली आहे, ज्याचा बलात्कार, खून इत्यादी गुन्ह्यांमध्ये निःसंशयपणे वापर केला गेला नाही.” “पण त्यांचा गळा दाबून खून केल्यानंतर पीडितांचे तुकडे करण्यासाठी वापरण्यात आला होता.”

     

    खंडपीठाने म्हटले की, तपासादरम्यान अशा गंभीर त्रुटींची संभाव्य कारणे संगनमतासह विविध अटकळ असू शकतात. तथापि, आम्ही या पैलूंवर कोणतेही निश्चित मत व्यक्त करू इच्छित नाही आणि हे मुद्दे योग्य स्तरावर तपासासाठी सोडू इच्छित नाही. गाझियाबाद सत्र न्यायालयाने सुनावलेली फाशीची शिक्षा रद्द करून अलाहाबाद उच्च न्यायालयाने सांगितले की, या प्रकरणातील आरोपी-अपीलकर्ता चतुराईने निष्पक्ष खटल्यातून सुटला. न्यायालयाने सांगितले की, कनिष्ठ न्यायालयाने 24 जुलै 2017 रोजी दिलेल्या आदेशानुसार, आरोपी एसके आणि पंढेर यांची शिक्षा आणि शिक्षा उलटली आहे.

     

    आरोपींना फौजदारी प्रक्रिया संहितेच्या कलम 437A चे पालन करून सोडले जाईल, जर ते इतर कोणत्याही प्रकरणात नको असतील. खंडपीठाने म्हटले आहे की, विशेषत: जेव्हा अत्यंत अमानुष पद्धतीने त्यांची हत्या केली जाते तेव्हा मुलांचे आणि महिलांचे जीव गमावणे ही गंभीर बाब आहे, परंतु हे स्वतःच आरोपींना निष्पक्ष चाचणीची संधी नाकारणे आणि पुराव्याअभावी न्याय्य ठरणार नाही. मध्ये त्याच्या शिक्षेचे समर्थन करणे योग्य नाही

  • चंद्रपुरात 5 दिवसीय माता महाकाली महोत्सवाचे ऐतिहासिक आयोजन

    News34 chandrapur

    चंद्रपूर – चंद्रपूर विधानसभेचे लोकप्रिय आमदार व माता महाकाली महोत्सवाचे संयोजक किशोर जोरगेवार यांनी 19 ऑक्टोबर पासून शहरात 5 दिवसीय महाकाली महोत्सवाचे आयोजन करण्यात आले अशी माहिती पत्रकार परिषदेद्वारे दिली आहे.

     

    विधानसभेतील नागरिकांना मूलभूत समस्या न भेळसाव्या यासाठी ठोस पावले उचलणारे आमदार जोरगेवार आपल्या वेगळ्या कार्यप्रणालीमुळे नेहमीच चर्चेत असतात, मात्र 2022 पासून त्यांनी चंद्रपुरातील आराध्य दैवत माता महाकाली महोत्सवाचे आयोजन केल्याने विविध राज्यातील भाविकांच्या मनात आमदार जोरगेवार यांनी आपली लोकप्रिय छवी निर्माण केली आहे.

     

    यंदा महाकाली महोत्सव हा 5 दिवसांचा असून यावर्षी अनेक मुख्य आकर्षण या महोत्सवाच्या माध्यमातून नागरिक अनुभवणार आहे, जगप्रसिद्ध जागरण गायक लखबिर सिंग लख्खा, अनुराधा पौडवाल, निरंजन बोबडे, वैशाली सामंत, युवा कीर्तनकार सोपान दादा कनेरकर व मंदिर अब बनने लगा है गाण्याची पार्श्वगायिका इशरत जहाँ यांच्या रोड शो चे आयोजन करण्यात आले असल्याची माहिती आमदार किशोर जोरगेवार यांनी पत्रकार परिषदेत दिली आहे.

     

    असा असेल हा ऐतिहासिक कार्यक्रम

    19 ऑक्टोबर ला जैन मंदिर संस्था व सराफा असोसिएशनच्या वतीने श्री माता महाकालीच्या चांदीच्या मूर्तीची शोभायात्रा द्वारे महोत्सवाचा शुभारंभ करण्यात येणार आहे. सायंकाळी गायक लखबिर सिंग लख्खा यांच्या भक्तिमय संगीताचा कार्यक्रम.

    20 ऑक्टोबर ला सारेगामा फेम निरंजन बोबडे सह 151 कलावंतांचा भक्ती स्वराभिषेक कार्यक्रम, 21 ऑक्टोबर ला गोंडवानाचा महायोद्धा वीर बाबुराव शेडमाके यांच्या जीवनावर आधारित नाटक, वैशाली सामंत यांच्या सुमधुर आवाजात गीत संगीताचा कार्यक्रम.

    22 ऑक्टोबर ला महाराष्ट्रातील सुप्रसिद्ध कीर्तनकार सोपान दादा कनेरकर यांचे कीर्तन, गायिका अनुराधा पौडवाल यांचा भक्तिमय संगीत कार्यक्रम, सोमवार 23 ऑक्टोबर ला श्री माता महाकाली नगरप्रदक्षिणा पालखी काढण्यात येणार आहे, गायिका इशरत जहाँ यांचा रोड शो, उत्तरप्रदेश राज्यातील केदारनाथ धाम येथील झांज डमरू पथक, शिवतांडव अघोरी नृत्य, बाहुबली हनुमान वानरसेना यांचे बोलके दृष्य अश्या अनेक विविध आकर्षण सहित शोभायात्रा शहरातून प्रदक्षिणा घालत परत माता महाकाली मंदिरात पोहचणार आहे.

    विशेष कार्यक्रम

    19 ते 23 ऑक्टोबर दरम्यान 9 हजार 999 बालिकांचे कन्यापूजन व कन्याभोजन, 20 ते 23 ऑक्टोबर ऐतिहासिक हेरिटेज वॉक, बाई पण भारी देवा, मला पण आज बोलायचंय, महिला व मुलींकरिता मुक्त व्यासपीठ, चंद्रपूर जिल्ह्यातील वनवैभव दाखविणारे चित्र प्रदर्शन, पोलीस विभागातर्फे महिलांकरिता मार्गदर्शक सूचना केंद्र, आत्मनिर्भर दुर्गा यांचा सत्कार, चित्रकला व चित्र प्रदर्शनाचे आयोजन.

    5 दिवसीय कार्यक्रमासाठी राज्याचे मुख्यमंत्री एकनाथ शिंदे उपस्थित राहण्याची शक्यता आहे.

    अश्या विविध कार्यक्रमाची मेजवानी महाकाली महोत्सवाच्या 5 दिवसाच्या काळात भाविकांना अनुभवायला मिळणार आहे, श्री माता महाकाली महोत्सव ट्रस्टच्या वतीने आयोजित या महोत्सवाचा लाभ नागरिकांनी उपस्थित राहून घ्यावा असे आवाहन संयोजक व आमदार किशोर जोरगेवार यांनी केले आहे.

Powered by
►
Necessary cookies enable essential site features like secure log-ins and consent preference adjustments. They do not store personal data.
None
►
Functional cookies support features like content sharing on social media, collecting feedback, and enabling third-party tools.
None
►
Analytical cookies track visitor interactions, providing insights on metrics like visitor count, bounce rate, and traffic sources.
None
►
Advertisement cookies deliver personalized ads based on your previous visits and analyze the effectiveness of ad campaigns.
None
Powered by