News34 chandrapur
गडचांदूर – कोरपणा मार्गावरील खिर्डी गावाजवळ बस आणि दुचाकीचा भीषण अपघात झाला असून त्यात दुचाकीस्वार युवकाचा जागीच मृत्यू झाला.
निखिल कोंडेकर असे मृत युवकांचे नाव असून तो विसापूर ता. बल्लारपूर येथील रहिवासी आहे.
किनवट आगाराची बस क्र MH 30 BL 1650 गडचांदुर मार्गे चंद्रपूरला जात असताना समोरून येणारा दुचाकी स्वार युवकाने बस ला समोरासमोर धडक दिली, या अपघातात निखिल जागीच ठार झाला. घटनास्थळी गडचांदूर पोलीस स्टेशनचे पथक दाखल झाले असून पुढील तपास गडचांदूर पोलीस करीत आहे.
News34 chandrapur
चंद्रपूर :- हम बहुउद्देशिय संस्था चंद्रपूर द्वारे डॉ. हेडगेवार जन्मशताब्दि सेवा समिती द्वारा संचालित सेवा प्रकल्प व निराधार प्राण्याची सेवा करणारी प्यार फाऊॅंडेशन या दोन संस्थांच्या आर्थिक मदतीकरीता दि 04 नोव्हेबर रोजी अमेय दक्षिणदास लिखित व ऍड चैताली बोरकुटे-कटलावार दिग्दर्शीत दोन अंकी मराठी नाटक ‘‘द कॉन्शस्’’ चा यशस्वी प्रयोग मोठ्या थाटात उत्साहात पार पडला.
स्थानिक प्रियदर्शीनी सांस्कृतिक सभागृह येथे आयोजित या कार्यक्रमाचे उद्घाटन चंद्रपूरचे ज्येष्ठ विधिज्ञ तथा लोकमान्य टिळक स्मारक मंडळाचे अध्यक्ष ऍड रविंद्र भागवत व चंद्रपूरचे आ. किशोर जोरगेवार यांचे हस्ते दिप प्रज्वलन करुन करण्यात आले. यावेळी चांदा शिक्षण प्रसारक मंडळाचे सचिव प्रा. डॉ. अशोक जिवतोडे, सत्यशोधक समाजाचे अध्यक्ष ऍड हिराचंद बोरकुटे, नाट्यशिबीरांच्या माध्यमातून उदयोन्मुख नाट्य कलावंत घडविणारे सुशील सहारे हे प्रमुख पाहुणे म्हणून उपस्थित होते.
‘‘द कॉन्शस्’’हे नाट्य नव्या कल्पनेला अनुरुप असे नाविण्यपूर्ण असल्याने रसिकांचा या नाट्यप्रयोगास उत्स्फुर्त प्रतिसाद लाभला. या नाटकातील कलावंतांनी आपआपल्या भूमिकेला न्याय दिला. मि. शाम यांची भूमिका विशाल ढोक, मिरा चे पात्र ऍड चैताली बोरकुटे-कटलावार तर मनस्वी चे पात्र नामू ऊर्फ नामदेव बदखल यांनी साकारली. त्यांच्या भूमिकांनी प्रेक्षकांच्या हृदयाचा ठाव घेतला. तेजराज चिकटवार यांचे नेपथ्य व हेमंत गुहे यांच्या प्रकाशयोजनेने रसिकांची मने जिंकून घेतली. डिलीव्हरी बॉय म्हणून रोशनसिंह बघेल, पंकज मलिक यांचे संगीत व प्रियंका ढोक यांची रंग व वेशभूषेनेही रसिकांची मने जिंकली.
या कार्यक्रमात नाट्यक्षेत्रात योगदान देणारे सुप्रसिध्द नेपथ्यकार दिगांबर इंगळे, प्रकाशयोजनाकार हेमंत गुहे व रंग व वेशभूषाकार नितीन तोडे यांना आ. किशोर जोरगेवार व उपस्थित मान्यवरांच्या शुभहस्ते मानपत्र प्रदान करण्यात आले. कार्यक्रमाला योगदान व सहकार्याबद्दल संस्थेच्या वतीने पवन सादमवार, हिरेन शाह, सचिन इंगळे, परवेज धनानी, मुकुंद दुबे, मिथून मेश्राम, प्रेमकुमार उपरे, ऍड आसिफ शेख, संतोश गोविंदवार, ऍड विजय मोगरे, देवराव भोंगळे, डॉ मंगेश गुलवाडे, ऍड सुरेश तालेवार, राम पल्लेवार, निलिमा शिंदे , डॉ सचिन भेदे, संजय कंचर्लावार यांचा यथोचित सन्मान करण्यात आला.
नाटकाचे निर्मिती सुत्रधार ऍड अभय पाचपोर, श्रीकृष्ण लाडके, अभिजित कटलावार व राहुल बनकर यांचाही सन्मान उपस्थित मान्यवरांचे शुभहस्ते करण्यात आला. क्रिएटिव्ह फिंगर(कले साठी कला) चे उद्घाटन आ. किशोर जोरगेवार यांचे हस्ते करण्यात आले.
सदर नाटकाचा प्रयोग यशस्वी करण्यासाठी सौ प्रमिला बोरकुटे, नितिन इंगोले, प्रफुल आस्वले, रविशंकर गावंडे, बबन राखुंडे, शशांक गाढवे, पंकज नवघरे, बाबा खिरेकर, सुरज उमाटे, अंकुश राजुरकर, केविंद्र बारसागडे, वैशाख रामटेके, प्रज्वल निखार, रवींद्र वंडरे यांचे विशेष सहकार्य लाभले. कार्यक्रमाचे सूत्र संचालन ऍड अभय पाचपोर तर आभार अभिजित कटलावार यांनी मानले.
News34 chandrapur
मुंबई : मराठा आरक्षणाच्या आंदोलनाचा धुरळा, त्यातून झालेली टीका हे सगळं पचवून राज्यातल्या सत्ताधारी भाजपने ग्रामपंचायत निवडणुकांमध्ये इतर पक्षांना आस्मान दाखवलंय. राज्याच्या ग्रामीण भागातील ओबीसी आणि मराठा समाजाने देवेंद्र फडणवीसांच्या नेतृत्वाला साथ देत ७०० हून अधिक ग्रामपंचायतींचं दान भाजपच्या पदरात टाकलंय. आतापर्यंत हाती आलेल्या ग्रामपंचायत निकालांपैकी 427 ग्रामपंचायती म्हणजे 33 टक्के यश एकट्या भाजपला मिळालंय.
राज्यातील 2359 ग्रामपंचायतींच्या निवडणुका नुकत्याच पार पडल्या. मनोज जरांगे – पाटील यांच्या मराठा आरक्षणासाठी सुरू झालेल्या उपोषणानंतर राज्यात मोठं आंदोलन उभं राहिलं. आंदोलनाला हिंसक वळण लागल्यानंतर मनोज जरांगे – पाटील यांनी भाजप आणि विशेषतः देवेंद्र फडणवीस यांच्यावर जोरदार टीका केली होती. मात्र, या टीकेचे धनी होऊन देखील ग्रामपंचायत निवडणुकीत मोठ्या संख्येनं मराठा समाज देवेंद्र फडणवीसांच्या पाठीशी असल्याचं निवडणूक निकालांमधून स्पष्ट होतंय. त्याचबरोबर राज्यातल्या ओबीसी समाजाने देखील देवेंद्र फडणवीसांना पूर्वीपासून दिलेली साथ अजूनही सोडलेली नाही.
उलट ओबीसी आणि मराठ्यांनीच भाजपचा हा मोठा विजय साकार केल्याचं विश्लेषण राजकीय विश्लेषकांनी केलंय. यामुळे राज्याचं खरं नेतृत्व देवेंद्र फडणवीस हेच असल्याच्या विचाराला आता पुन्हा बळकटी मिळताना दिसतेय.
ग्रामपंचायत निवडणूक निकालांच्या दुपारी 3.30 वाजता आलेल्या निकालांनुसार विजयी घोषित झालेल्यांमध्ये भाजप ७१७ राष्ट्रवादी कॉंग्रेस (अजित पवार गट) ४०७, शिवसेना (शिंदे गट) २६२, राष्ट्रवादी कॉंग्रेस (शरद पवार गट) १८५, कॉंग्रेस २०७, शिवसेना (ठाकरे गट) ११४, आणि इतर 60 आहेत.
मराठा आरक्षण आंदोलन काळात टीका होऊनही उपमुख्यमंत्री देवेंद्र फडणवीस यांनी मनोज जरांगे – पाटील यांचं उपोषण मागे घेण्यासाठी विशेष प्रयत्न केले. जरांगे – पाटील यांना उपोषण मागे घेण्याची विनंती करणाऱ्यांमध्ये 4 मंत्र्यांसह 2 माजी न्यायमूर्तींना पाठवण्याची भूमिका देवेंद्र फडणवीस यांनी घेतली. या माजी न्यायमूर्तींंनीची जरांगेंना आरक्षण मिळवण्यासाठी लागणारा वेळ व त्यामागची कायदेशीर गुंतागुंत समजवून सांगितली.
हे जाणून घेतल्यावर जरांगे यांनी उपोषण मागे घेण्याचा निर्णय जाहीर केला. त्यामुळे मराठा समाजाला आरक्षण देण्यासाठी देवेंद्र फडणवीस प्रामाणिक प्रयत्न करत असल्याचा संदेश जनतेत गेला. हे सगळं होत असताना ओबीसींच्या आरक्षणाला धक्का लागणार नसल्याचा पुनरुच्चारही देवेंद्र फडणवीस यांनी केला होता. या सगळ्याचा परिपाक म्हणूनच अतिशय भरघोस यश भाजपच्या पारड्यात पडल्याचं राजकीय जाणकारांना वाटतंय. निवडणूक निकालांमधून हे सिद्ध होत असून निकाल येण्यासाठी शिल्लक राहिलेल्या इतर ग्रामपंचायतींच्या निकालांमध्येही भाजपने आघाडी घेतली आहे.
News34 chandrapur
चंद्रपूर – 3 नोव्हेम्बरला शहरातील अष्टभुजा प्रभागातील नटराज इंग्रजी शाळेत सॅनिटरी पॅडची विल्हेवाट न लावल्याने मुख्याध्यापिकेने तब्बल 23 विद्यार्थिनींना स्वच्छतागृहात डांबले होते.
या संतापजनक शिक्षेची तक्रार विद्यार्थिनी व पालकांनी युवासेना जिल्हाप्रमुख विक्रांत सहारे यांच्याकडे केली, त्यानंतर युवासेनेने शाळेत धडक देत शाळा प्रशासनाला जाब विचारला.
6 नोव्हेम्बरला युवासेना जिल्हाप्रमुख सहारे यांच्या नेतृत्वात शिष्टमंडळाने शिक्षणाधिकारी व अप्पर जिल्हाधिकारी यांची भेट घेत शाळा व्यवस्थापनावर कारवाई करीत मान्यता रद्द करण्याची मागणी केली.
यावर शिक्षणाधिकारी यांनी याबाबत सविस्तर चौकशी करीत लवकरात लवकर कारवाई करू असे आश्वासन दिले, अप्पर जिल्हाधिकारी यांनी सुद्धा असे प्रकार खपवून घेणार नसल्याचे बोलत या प्रकरणी तात्काळ दखल घेत कारवाईचे संकेत दिले.
विद्यार्थिनींना मानसिक त्रास देणाऱ्या शाळा व्यवस्थापणाविरोधात युवासेना कारवाई होईपर्यंत शांत बसणार नाही अशी प्रतिक्रिया जिल्हाप्रमुख विक्रांत सहारे यांनी दिली.
यावेळी युवतीसेना जिल्हाप्रमुख रोहिणी पाटील, सुमित अग्रवाल, शहबाज शेख, बाळू भगत, सूरज रॉय, संघदीप रामटेके, पराग कुत्तरमारे, हर्षल येलमुले, अनुष्का खनके, रोशनी गोल्डर, गोविंदा असोपा, नरेश वासनिक यांची उपस्थिती होती.
News34 chandrapur
मुंबई – राज्यात नुकत्याच झालेल्या ग्रामपंचायत निवडणुकीत देवेंद्र फडणवीसांच्या नेतृत्वाखालील भाजपने जोरदार मुसंडी मारत निकालांमध्ये आघाडी मिळवली आहे. आगामी लोकसभा, विधानसभा निवडणुकांच्या पार्श्वभूमीवर राज्यातील 2359 ग्रामपंचायतींच्या निवडणूक निकालांना महत्त्व प्राप्त झालंय. विशेष म्हणजे भाजपने जिंकलेल्या ग्रामपंचायतींच्या विजयी उमेदवारांमध्ये मराठा समाजाचं प्राबल्य दिसून आलंय.
त्यामुळे ग्रामीण भागातील मराठा समाजाने देवेंद्र फडणवीसांना साथ दिल्याचं स्पष्ट होतंय. मराठा आरक्षणाच्या आंदोलनात फडणवीसांना काहींनी विरोध करूनही हे चित्र पुढे आल्याने भाजपच्या गोटात आनंदाचं वातावरण पसरलंय.
ग्रामपंचायत निवडणूक निकालांच्या सकाळी १२ वाजेपर्यंत आलेल्या निकालांनुसार विजयी घोषित झालेल्यांमध्ये भाजप २०२, राष्ट्रवादी कॉंग्रेस (अजित पवार गट) १२१, शिवसेना (शिंदे गट) ११५, कॉंग्रेस ६३, शिवसेना (ठाकरे गट) ५६, राष्ट्रवादी कॉंग्रेस (शरद पवार गट)६५, आणि इतर ६९
इतर ग्रामपंचायतींच्या निकालांमध्येही भाजपने आघाडी कायम राखली आहे. उपमुख्यमंत्री देवेंद्र फडणवीस यांनी केलेल्या प्रचाराला ग्रामीण भागात साथ मिळाल्याचं दिसतंय.
News34 chandrapur
ब्रह्मपुरी – ब्रह्मपुरी वनविभागाच्या दक्षिण ब्रह्मपुरी वन परिक्षेत्रातील आवळगाव उपविभागातील कक्ष क्रमांक ११६८ हळदा बिटमध्ये 5 नोव्हेम्बरला सायंकाळी ४ वाजता दोन ते अडीच वर्षे वयाच्या वाघिणीला वनविभागाने पकडले.
गेल्या आठवड्यात तीन वेगवेगळ्या घटनांमध्ये वाघाच्या हल्ल्यात तिघांना जीव गमवावा लागला होता. 29 ऑक्टोबर रोजी पळसगाव वन परिक्षेत्रातील बेलारा येथे एका मेंढपाळाचा वाघाने बळी घेतला, त्यानंतर दुसऱ्याच दिवशी खडसांगी वन परिक्षेत्रात वाघाच्या हल्ल्यात एका शेतकऱ्याचा मृत्यू झाला आणि त्यानंतर 1 नोव्हेंबर रोजी एका शेतकऱ्याचा मृत्यू झाला.
ब्रह्मपुरी वनपरिक्षेत्रातील आवळगाव उपविभागात वाघाचा हल्ला हळदा गावातील सयत्राबाई नामदेव कामडी (७०) या महिलेचा बुधवारी हळदा बिट येथील कम्पार्टमेंट क्रमांक ११६८ मध्ये शेतात भात कापणी करत असताना वाघाने ठार केले. तेव्हापासून ब्रह्मपुरी वनविभागाचे वन कर्मचारी या वाघिणीला पकडण्यासाठी तिच्या हालचालींवर लक्ष ठेवून होते.
5 नोव्हेम्बरला दुपारी चार वाजता या वाघिणीच्या स्थळाची माहिती मिळताच डॉ.आर. एस. खोब्रागडे, पशुवैद्यकीय अधिकारी (वन्यजीव) ताडोबा एन. टायगर पी. चंद्रपूर, आणि आरआरटी प्रमुख ए.सी. मराठे, पोलीस नाईक, (शूटर) ता.ए. वाय. प्र. चंद्रपूर,. राकेश आहुजा जीवशास्त्रज्ञ, वनविभाग, ब्रम्हपुरी, या पथकाने वाघिणीला डार्ट मारत पकडले. पुढील उपचारासाठी वाघिणीला टीटीसीकडे हस्तांतरित करण्यात आले.
ही कारवाई श्री. शेंडे सर, वन परिक्षेत्र अधिकारी (प्रा.) दक्षिण ब्रह्मपुरी यांच्या मार्गदर्शनाखाली
आरआरटी सदस्य दिपेश. डी.टेंभुर्णे योगेश. डी.लकडे, गुरुनानक, व्ही.ढोरे, वसीम.एन.शेख, विकास.एस.ताजणे, प्रफुल्ल.एन.वाटगुरे, ए. डी. कोरपे आर.आर. टी. चालक, ए. एम. दांडेकर, आर.आर.टी.चालक यांनी केली.
News34 chandrapur
चंद्रपूर- जिल्ह्यातील प्रवासी, नोकरदार व रेल सुविधा संघर्ष समितीच्या पदाधिकाऱ्यांच्या मागणीची दखल घेवून राष्ट्रीय मागासवर्गीय आयोगाचे अध्यक्ष तथा पूर्व केंद्रीय गृहराज्यमंत्री हंसराज अहीर यांनी अखेर ट्रेन क्र. 01316 बल्हारशाह-वर्धा या विशेष डेमू ट्रेनच्या वेळापत्रकामध्ये बदल करवून घेत जिल्ह्यातील प्रवाशांना दिलासा दिला आहे.
सदर ट्रेन ही यापूर्वी बल्हारशाह स्थानकातून सायंकाळी 05.00 वा सोडण्यात येत होती. त्यामुळे जिल्ह्यातील रेल्वे प्रवासी विशेषतः शासकीय कर्मचाऱ्यांसाठी ही ट्रेन असुविधाकारक ठरत असल्याने झेडआरयुसीसी चे सदस्य दामोदर मंत्री व रेल्वे सुविधा संघर्ष समितीच्या पदाधिकाऱ्यांनी हंसराज अहीर यांची भेट घेवून त्यांचेकडे ही अडचण व्यक्त केली होती.
या अडचणीची दखल घेवून अहीर यांनी या डेमू ट्रेनची वेळ बदलण्याकरीता केंद्रीय रेल्वेमंत्री, रेल्वे बोर्ड चेअरमन यांचेशी पत्रव्यवहार व प्रत्यक्ष चर्चा करुन या ट्रेनची वेळ बदलवून बल्हारशाह-वर्धा प्रवास करणाऱ्या प्रवाशांना सुविधा उपलब्ध केली आहे. आता ही डेमू ट्रेन बल्हारशाह वरुन सायंकाळी 06.30 वा. सुटून चंद्रपूर येथे 06.53 वा. पोहचेल व ही ट्रेन वर्धेला रात्रो 09.30 वा. पोहचणार आहे. या बदलामुळे नोकरपेशा लोकांना चांगली सुविधा झाली असून त्यांना कार्यालयाची वेळ सांभाळून यामुळे सोयीचा प्रवास करण्याची संधी मिळाली आहे.
डेमू ट्रेनच्या वेळापत्रकात बदल करवून घेत जिल्ह्यातील प्रवाशांना सुविधा उपलब्ध केल्याबद्दल रेलसुविधा संघर्ष समितीचे पदाधिकारी सर्वश्री रमणीकभाई चव्हाण, दामोदर मंत्री, नरेंद्र सोनी, शाम सारडा, डॉ भूपेश भलमे, पूनम तिवारी, प्रदिप माहेश्वरी, अनिश दिक्षित, अशोक रोहरा, राजेश सादरानी, नरेश लेखवानी, संजय मंघानी, प्रमोद त्रिवेदी, सुदाम यादव, महावीर मंत्री, रमेश बोथरा, शकरसिंह राजपूरोहीत, प्रभाकर मंत्री, प्रल्हाद शर्मा, विनोद बजाज, मिलिंद दाभेरे, गौतम यादव यांनी हंसराज अहीर यांची भेट घेवून अभिनंदन केले. जिल्ह्यातील अन्य महत्वपूर्ण रेल्वे विषयक समस्या व आवश्यक असलेल्या ट्रेन सुरु करण्यास पुढाकार घ्यावा अशी मागणी केली. सदर पदाधिकाऱ्यांशी चर्चा करतांना हंसराज अहीर यांनी मुंबई करीता थेट गाडी सुरु करण्यास तसेच अन्य रेल्चे विषयक प्रश्नांबाबत आपण प्रयत्न करु असे आश्वासन दिले. यासंदर्भात रेल्वे मंत्री व चेअरमन यांचेसोबत लवकरच बैठक घेत असल्याची माहिती त्यांनी रेल्वे समितीच्या पदधिकाऱ्यांना दिली.
News34 chandrapur
चंद्रपूर – चंद्रपूर येथील नटराज इंग्लिश स्कूलमध्ये एक भयावह घटना उघडकीस आली, जिथे मुख्याध्यापिका श्रीमती सरकार यांनी 23 शाळकरी विद्यार्थिनींना सॅनिटरी पॅड्सची विल्हेवाट न लावल्याने शिक्षा म्हणून पूर्ण तासभर बाथरूममध्ये बंद केले. क्रूरता आणि निष्काळजीपणाच्या या कृत्यामुळे मुलींना तीव्र त्रास सहन करावा लागला, काहींना त्यांची सुटका झाल्यावर अस्वस्थ वाटू लागले काहींना उलट्या देखील झाल्या.
अष्टभुजा प्रभागात असलेल्या नटराज इंग्रजी शाळेत 3 नोव्हेम्बरला हा प्रकार घडला, वर्ग 7 ते 10 वी च्या तब्बल 23 विद्यार्थिनींना शाळेच्या बाथरूम मध्ये डांबण्यात आले होते.
जेव्हा मुलींनी धैर्याने या कृत्याची तक्रार शिक्षकांसोबत सामायिक केली, तेव्हा त्यांना समर्थन आणि सहानुभूतीऐवजी हास्य आणि उपहासात्मक वागणूक मिळाली. मात्र, न्याय मिळवण्याच्या निर्धाराने मुलींनी त्यांच्या पालकांना घडलेल्या या प्रकाराची हकीकत सांगितली, त्यांनी तातडीने ही घटना युवासेना जिल्हाप्रमुख विक्रांत सहारे यांना कळवली.
तक्रार मिळताच जिल्हाप्रमुख सहारे व युवती सेना जिल्हाधिकारी रोहिणी पाटील यांनी तातडीने हस्तक्षेप करत शाळेला भेट देऊन या लज्जास्पद कृत्याचा जाब विचारला. प्राचार्य सरकारकडून सुरुवातीला नकार मिळाला आम्ही जे केलं ती त्यांना शिक्षा म्हणून केलं, युवा सेनेच्या अथक प्रयत्नांमुळे अखेरीस प्राचार्य सरकार यांना चूक मान्य करून पश्चात्ताप करण्यास भाग पाडले.
या संतापजनक घटनेची प्रतिक्रिया म्हणून विक्रांत सहारे आणि रोहिणी पाटील यांनी जिल्हाधिकारी, शिक्षणाधिकारी आणि जिल्हा पोलिस अधीक्षकांकडे तक्रार करणार आल्याची माहिती दिली. या बेजबाबदार वर्तनामुळे शाळेची मान्यता रद्द करण्याची मागणी करण्याचा मानसही त्यांनी व्यक्त केला आहे. सोबत या संतापजनक कृत्य केल्याने शाळा व्यवस्थापनावर गुन्हा दाखल करू अशी मागणी आम्ही प्रशासनाला करणार असल्याची माहिती सुद्धा यावेळी युवासेना पदाधिकारी यांनी दिली.
यावेळी युवासेना शहर प्रमुख शहबाज शेख, युवा सेना उपशहर प्रमुख संगदीप रामटेके, युवती सेना उपजिल्हाधिकारी धनश्री हेडाऊ, अनुष्का खनके, रोशनी गोल्डर,सूरज रॉय व गोविंदा असोपा उपस्थित होते.
नटराज इंग्रजी शाळेच्या प्राचार्य सरकार यांच्याशी संपर्क साधला असता त्यांनी सांगितले की बाथरुम मध्ये विद्यार्थिनी सॅनिटरी पॅड ची विल्हेवाट लावत नसल्याने त्यांना स्वच्छतेचे महत्व कळावे यासाठी आम्ही त्यांना शिक्षा दिली, जर विद्यार्थी दुखावले असतील तर मी त्यांची माफी नक्की मागणार.
News34 chandrapur
चंद्रपूर : शहरातील महानगरपालिका मध्ये घंटागाडी स्वच्छता कर्मचारी म्हणुन कार्यरत कंत्राटी कामगारांना सुरू झालेले वाढीव वेतन कंत्राटदार बदलताच वेतन कमी करन्यात आल्याने कामगारांनी याचा तीव्र रोष व्यक्त करत धम्मचक्र अनुप्रवर्तन दिनाच्या तोंडावर काम बंद आंदोलन सुरू केले होते.
ज्यामध्ये शासनाच्या नियमानुसार किमान वेतन तसेच कामगारांच्या सुरक्षा संदर्भात विविध विषयांना घेऊन आंदोलन केले गेले. सदर आंदोलन वेळीं मनपाचे आयुक्त यांनी कामगार सहायक आयुक्त यांच्या सूचनेवरून कामगारांच्या मागण्या लेखी स्वरूपात मान्य केल्या होत्या त्यानंतर कामगारांनी आपले आंदोलन मागे घेत मनपा प्रशासना समोर धम्मपरिनिर्वाण दिनानिमित्त दिक्षा भूमीवर उद्भवणाऱ्या स्वच्छतेचा प्रश्न मार्गी लागला.
परंतू आयुक्तांनी किमान वेतन संदर्भात दिलेला शब्द पाळला नाही. त्यामुळे कामगारांत रोष व्यक्त होत असून कामगारांनी दिलेली दिनांक 04/11/2023 ची डेड लाईन संपलेली असल्याने आता दिनांक 06/11/2023 पासून परत काम बंद आंदोलन केले जाणार असल्याचे कामगार युनियन अध्यक्ष रतन गायकवाड यांनी सांगितले आहे.
News34 chandrapur
चंद्रपूर – चंद्रपूर हा औद्योगीक जिल्हा आहे. येथे अनेक उद्योग आहे. त्यामुळे या उद्योगांना पुरक असे नवे उद्योग या जिल्ह्यात उभे राहु शकतात ही बाब लक्षात घेत येथील उद्योग वाढीसाठी चंद्रपूर येथील मोरवा विमानतळाची धावपट्टी व्यावसायिक विमाने उतरण्याच्या दृष्टीने विकसीत करण्यात यावी अशी मागणी आमदार किशोर जोरगेवार यांनी केली आहे.
आमदार किशोर जोरगेवार यांनी मुंबई मंत्रालय येथे राज्याचे विधानसभा अध्यक्ष राहुल नार्वेकर यांची भेट घेतली असून या भेटी दरम्यान सदर मागणी केली आहे. या मागणीचे निवेदनही आमदार किशोर जोरगेवार यांच्या वतीने विधानसभा अध्यक्ष राहुल नार्वेकर यांना देण्यात आले आहे. यावेळी चंद्रपूर विधानसभा क्षेत्रातील इतरही प्रश्नांबाबत आमदार किशोर जोरगेवार यांची राहूल नार्वेकर यांच्याशी सकारात्मक चर्चा झाली आहे.
चंद्रपूर हा औद्यागिक जिल्हा असून मोठे वीज निर्मिती प्रकल्प, कोळसा खाणी, लोहखनिज, सिमेंट उद्योग, कागदउद्योग, आयुध निर्माण प्रकल्प, वनसंपत्ती, पर्यटन असे अनेक उद्योग चंद्रपूर येथे आहे. यामुळे या क्षेत्रात अजून नवीन उद्योग आणि कारखाने उभारण्याची क्षमता आहे. या सर्व उद्योगांचे संचालन आणि नियमन मुंबई, नागपूर, दिल्ली, बंगलोर, अहमदाबाद, रायपुर या सारख्या शहरांमधून होत असते.
चंद्रपूर व गडचिरोली सारख्या सुदूर व मागास क्षेत्राला जोडण्याकरिता शासनाच्या वतीने १९६७ ला मोरवा या ठिकाणी २२ हेक्टर जागेत विमानतळ उभारण्याचा निर्णय घेण्यात आला होता. त्या अनुषंगाने विमान धावपट्टी विकसित करण्यात आली. सदर विमानतळाची धावपट्टीची लांबी 900 मीटर व रुंदी 28 मीटर इतकी आहे. त्यामुळे सदर विमानतळ केवळ छोटेखानी विमान उतरण्यासाठी योग्य आहे. तसेच सद्यस्थितीत सदर विमानतळाचा वापर केवळ व्हीआयपीच्या हालचालींसाठी केला जातो.
मात्र आता सदर विमान धावपट्टी व्यावसायिक विमान चलन च्या दृष्टीने विकसित केल्यास या विमानतळाचा वापर अधिक योग्य रीतीने केल्या जाऊ शकतो. तसेच नक्षलप्रभावित चंद्रपूर-गडचिरोली जिल्हायाकरिता सद्यस्थितीत केवळ हे एकच विमानतळ आहे. मोरवा येथील धावपट्टी चा विकास आराखडा नुसार व्यवसायिक विमान चालवण्यासाठी योग्य आहे. त्यामुळे राज्याच्या शेवटच्या टोकावर असलेल्या व नक्षलप्रभावित चंद्रपूर-गडचिरोली जिल्ह्याला व्यवसायिकदृष्ट्या विमानसेवेने जोडण्यासाठी व येथे नवीन रोजगार निर्मितीसाठी मोरवा, चंद्रपूर विमानतळाची धावपट्टीचा विकास करण्यात यावा अशी मागणी यावेळी आमदार किशोर जोरगेवार यांनी केली आहे.