My Blog

Category: चंद्रपूर शहर

चंद्रपूर शहर (Chandrapur City) आणि आसपासच्या परिसरातील प्रत्येक लहान-मोठी बातमी वाचा news34.in वर. महानगरपालिका, स्थानिक राजकारण, गुन्हेगारी, शैक्षणिक आणि सांस्कृतिक घडामोडींचे त्वरित आणि अचूक कव्हरेज येथे उपलब्ध आहे. तुमच्या चंद्रपूर शहर परिसरातील प्रत्येक महत्त्वाच्या विषयावर सविस्तर माहिती आणि सत्य घटनांचे अपडेट्स मिळवा. स्थानिक नागरिकांसाठी हे सर्वात विश्वसनीय स्रोत आहे.

  • चंद्रपुरातील रोजगार मेळाव्यातून 95 महिला उमेदवारांची निवड

    News34

     

    चंद्रपूर : जिल्हा कौशल्य विकास, रोजगार व उद्योजकता मार्गदर्शन केंद्र, मॉडल करिअर सेंटर व सरदार पटेल महाविद्यालय, चंद्रपूर यांच्या संयुक्त विद्यमाने सरदार पटेल महाविद्यालयात महिलांसाठी पंडित दिनदयाळ उपाध्याय रोजगार मेळाव्याचे आयोजन करण्यात आले होते.

    या रोजगार मेळाव्यात जय महाराष्ट्र प्लेसमेंट सर्व्हिसेस चंद्रपूर, व्हि-1 क्लिक सोलुशन, स्वातंत्र्य फायनान्स बल्लारपूर, एस.बी.आय. लाइफ इन्शुरन्स, एल.आय.सी. वरोरा, एलिव्हेट फायनान्स लिमि., व्हि.व्हि.आर. फायनान्स आदी कंपन्या सहभागी होत्या. या रोजगार मेळाव्यात 379 महिला उमेदवारांची उपस्थिती होती, त्यापैकी 95 महिला उमेदवारांची प्राथमिक निवड करण्यात आली.

    याप्रसंगी पोलिस अधीक्षक रवींद्रसिंह परदेशी, सुधा पोटदुखे, सरदार पटेल महाविद्यालयाचे प्राचार्य डॉ. प्रमोद काटकर, जिल्हा कौशल्य विकास, रोजगार व उद्योजकता मार्गदर्शन केंद्राचे सहायक आयुक्त भैय्याजी येरमे, अॅड. प्रिया पाटील आदींची उपस्थिती होती.

    पोलिस अधीक्षक रवींद्रसिंह परदेशी म्हणाले, कौशल्याचा वापर रोजगार व स्वयंरोजगार मिळवण्यासाठी करावा, उमेदवारांनी नवउद्योजक बनावे तसेच या ठिकाणी आलेल्या उद्योजकांनी जास्तीत-जास्त उमेदवारांना रोजगाराची संधी द्यावी. यासोबतच महिला उमेदवारांनी या रोजगार मेळाव्याचा लाभ घ्यावा, असे आवाहन केले.

    अॅड. प्रिया पाटील म्हणाल्या, स्त्रियांनी चुल व मूल या संकल्पनेत गुंतून न राहता उच्च शिक्षण घेऊन स्वावलंबी बनावे, रोजगार मेळाव्यातून संधीचा लाभ घ्यावा व महिला उद्योजक म्हणून नावारुपास यावे.

    रोजगार व उद्योजकता मार्गदर्शन केंद्राचे सहाय्यक आयुक्त भैय्याजी येरमे म्हणाले, या रोजगार मेळाव्यात विविध कंपन्या सहभागी झाल्या आहेत. या माध्यमातून उमेदवारांना रोजगाराची संधी चालून आली आहे.

    या संधीचा लाभ घ्यावा तसेच उमेदवारांनी आपल्या कौशल्याचा वापर रोजगार मिळवण्यासाठी करावा व नोकरीसाठी बाहेर जाण्याची मानसिकता ठेवावी असेही ते म्हणाले. कार्यक्रमाचे संचालन प्राध्यापिका कविता रायपूरकर तर आभार मुकेश मुजंनकर यांनी मानले.

  • विद्यार्थ्यांनी पोलीस बांधवांसोबत साजरा केला रक्षाबंधन

    News34

     

    चंद्रपूर: भारतीय संस्कृतीत सण, उत्सव यांना अनन्यसाधारण महत्व आहे. सर्वधर्म समभाव, ऐक्य, निरपेक्ष, निस्वार्थ, आपलेपणा जपणारे सण, उत्सव साजरे करून एकनिष्ठ असल्याची जाणीव या माध्यमातून होते.

    रक्षाबंधन हा बहीण भावाच्या प्रेमाचे प्रतीक असणारा सण आहे. या दिवशी बहीण भावला राखी बांधून आपले रक्षण करण्यासाठी साकडे घालते,भाऊ हातातील राखीचा धागा म्हणजे बहिणीचे रक्षण करण्याची जबाबदारीची जाणीव करून देणारा असल्याचे विचार आत्मसात करतो.

    हा उत्सव सगळीकडे आनंदात साजरा होत असला तरी आपल्या सर्वांचे रक्षण करणारे महाराष्ट्र पोलीस दलातील चंद्रपूर पोलिस व वाहतूक शाखेतील पोलीस दादांना विद्यार्थ्यांनी अनोख्या पद्धतीने पोलीस ठाण्यातील परिसरात जाऊन त्यांना औक्षण करून त्यांना रक्षणाचे बंधन बांधले. तसेच या रक्षाबंधन पर्वाच्या औचीत्याने सर्वसमभाव, आणि संस्कृतीचे जतन करण्यासाठी अखिल भारतीय विद्यार्थी परिषद चंद्रपूर महानगर तर्फे हे अनोखा उपक्रम चंद्रपूर महानगर तसेच जिल्हयातील विविध शाखेत चालविल्या गेला.

    या वेळी अभाविप चंद्रपूर महानगर तर्फे रामनगर पोलीस, तसेच शहर वाहतूक नियंत्रण शाखा येथे हा उपक्रम गुरूवार 31 ऑगस्ट रोजी चालविल्या गेला.
    यावेळी विभाग संयोजक वैदेही मुडपल्लिवार , स्वरा गंपवार, विद्या मेश्राम, जान्हवी भोयर, प्रतीक्षा श्रोती, तनवी, जिल्हा संयोजक पियूष बनकर, प्रदेश कार्यकारिणी सदस्य शैलेश दिंडेवार, महानगर मंत्री आदित्य गच्केश्र्वर , रोहित खेडेकर, तन्मय बनकर, हर्ष भांदकर व अन्य कार्यकर्ते उपस्थित होते.

  • परिचारिका मृत्यू प्रकरणानंतर जिल्हाधिकारी पोहचले जिल्हा रुग्णालयात

    News34

    चंद्रपूर – शासकीय वैद्यकीय महाविद्यालय व रुग्णालय येथे परिचारिकेच्या झालेल्या मृत्युप्रकरणाची जिल्ह्याचे पालकमंत्री सुधीर मुनगंटीवार यांनी गंभीर दखल घेऊन प्रशासनाला चौकशीचे आदेश दिले आहे. तसेच सामान्य रुग्णालयातील उणिवा, त्रृटी आदी बाबींमध्ये जिल्हाधिका-यांनी विशेष लक्ष देण्याच्या सुचना केल्या होत्या. त्या अनुषंगाने जिल्हाधिकारी विनय गौडा जी.सी. यांनी बुधवारी (दि.30) जिल्हा सामान्य रुग्णालयातील आरोग्य व्यवस्थेची पाहणी केली.

    यावेळी जिल्हाधिकारी श्री. गौडा म्हणाले, रुग्णालयात मिळणा-या आरोग्य सेवेबद्दल नागरिकांच्या तक्रारीसाठी लावण्यात आलेली तक्रारपेटी सुस्थितीत असणे आवश्यक आहे व त्याची नागरिकांना माहिती असावी. जिल्हा रुग्णालयातील औषध पुरवठा, साहित्य, उपकरणे, रिक्त जागा आदी बाबीं प्रत्येक महिन्याला शासनाला कळवाव्यात. तसेच त्याची एक प्रत जिल्हा प्रशासनाला उपलब्ध करून द्यावी. अतिदक्षता कक्ष चांगल्या स्थितीत असावा. देखभाल व दुरुस्ती करीता देण्यात आलेल्या निधीमध्ये अतिदक्षता कक्ष, संरक्षण भिंत, प्रवेशद्वार, पाण्याची टाकी याव्यतिरिक्त इतर बाबींचा समावेश करायचा असल्यास त्वरीत कळवावे.

    रुग्णालयात कोणत्या डॉक्टर्सची ड्यूटी आहे, ते कधी येतात, त्यांच्या येण्या-जाण्याच्या वेळा कोणत्या आहेत, याबाबत रुग्णालय प्रशासनाने अतिशय गांभिर्याने लक्ष द्यावे. यात कोणताही हलगर्जीपणा खपवून घेतला जाणार नाही. रुग्णाशी निगडीत असलेल्या व अत्यावश्यक बाबी जसे औषध पुरवठा, उपकरणे यांची मागणी त्वरीत करा. रुग्णालयातील सर्व विभाग प्रमुखांची बैठक घेऊन त्या-त्या विभागात कशाची आवश्यकता आहे, प्रथम प्राधान्य कोणते, त्याचे बजेट किती याबाबत अहवाल मागवून घ्या. रुग्णालयातील स्टाफ किती वाजता येतो, वेळेवर उपस्थित नसलेल्यांची नोंद घेणे, स्वाक्षरीची पडताळणी करण्यासाठी हस्ताक्षर तज्ञांकडे पाठविणे, बायोमेट्रीक मशीन असल्यास उपस्थितांची नोंद घेणे, अशा सुचनाही त्यांनी केल्या.

    जिल्हाधिकारी पुढे म्हणाले, रुग्णालयात औषधी पुरवठा व मागणी, उपकरणे, सर्जिकल साहित्य याचा गत तीन वर्षाचा रेकॉर्ड, त्यासाठी आलेला निधी याबाबत अहवाल सादर करावा. येथे उपलब्ध असलेले सीसीटीव्ही सर्व चालू स्थितीत असणे आवश्यक आहे. आणखी सीसीटीव्ही लागत असल्यास तसा प्रस्ताव सादर करा. डॉक्टरांची येण्या-जाण्याची वेळ नोंद होण्यासाठी रुग्णालयाच्या प्रवेशद्वारावर सीसीटीव्ही त्वरित लावा. त्याचा ॲक्सेस उपविभागीय अधिकारी यांना आय.पी.द्वारे द्यावा. इतर विभागापेक्षा नवजात बालक कक्ष, बालरोग विभाग, तेथील आयसीयू हे चांगल्या प्रकारे सुरू असले तरी बालकांची अदलाबदल, बाळ चोरीचे प्रकार घडणार नाही, यासाठी दक्ष रहा. रुग्णालयात रुग्णासोबत कमीतकमी नातेवाईक आत येण्यासाठी सुरक्षा रक्षकांकडून नियोजन करा, असेही निर्देश त्यांनी दिले.

    यावेळी जिल्हाधिका-यांनी टेलिमेडीसीन विभाग, अपघात विभाग, अतिदक्षता विभाग, लहान मुलांसाठी असलेला अतिदक्षता विभाग, ड्रेसिंग रूम, डिलिव्हरी रुम, डायलिसिस युनीट, थॅलेसमिया रुम व बाहृयरुग्ण विभाग आदींची पाहणी केली. याप्रसंगी सहाय्यक जिल्हाधिकारी मुरुगानंथम एम, शासकीय वैद्यकीय महाविद्यालयाचे अधिष्ठाता डॉ. मिलींद फुलपाटील, बालरोग्य तज्ञ डॉ. मिलींद कांबळे, जिल्हा शल्य चिकित्सक डॉ. महादेव चिंचोळे, डॉ. प्रशांत उईके, डॉ. मंगेश गुलवाडे, आयएमए चंद्रपूरच्या सचिव डॉ. कल्पना गुलवाडे, निवासी वैद्यकीय अधिकारी डॉ. हेमचंद कन्नाके, वैद्यकीय अधिक्षक डॉ. निवृत्ती जिवणे आदी उपस्थित होते.

  • चंद्रपूरच्या आमदाराने घेतली मुख्यमंत्री शिंदे यांची भेट

    News34

    चंद्रपूर – विविध मागण्यांना घेऊन होमगार्ड महासंघाच्या वतीने मुंबई येथील आझाद मैदानात आंदोलन सुरु करण्यात आले आहे. दरम्यान आमदार किशोर जोरगेवार यांनी मुंबई मंत्रालय येथे राज्याचे मुख्यमंत्री एकनाथ शिंदे आणि उपमुख्यमंत्री तथा गृहमंत्री देवेंद्र फडणवीस यांची भेट घेत होमगार्ड यांच्या रास्त मागण्या मान्य करण्याची मागणी केली आहे.

    राज्यातील होमगार्ड हे पोलीस दलासोबत खांद्याला खांदा लावून नागरिकांच्या सुरक्षतेसाठी तत्पर असतात. परंतु सद्यास्थितीत त्यांच्यासमोर अनेक आव्हाने असून राज्यातील होमगार्ड यांच्या प्रमुख २० मागण्यांसाठी त्यांनी मुंबई येथील आजाद मैदानात आंदोलन सुरु केले आहे.

    महाराष्ट्र होमगार्ड अॅक्ट 1947 मध्ये सुधारणा अथवा बदल करण्यात यावा, भारत सरकारच्या आदेशानुसार होमगार्ड यांना 365 दिवस नियमित रोजगार उपलब्ध करुन देण्यात यावा, महाराष्ट्र होमगार्ड अॅक्ट 1947 मधील दर 3 वर्षानी होणार्या पुनरनोंदणी पुनर्नियुक्ती प्रणाली पद्धत कायमस्वरूपी बंद करण्यात यावी, महाराष्ट्र होमगार्ड अॅक्ट 1947 मधे बॉम्बे पोलीस अॅक्ट प्रमाणे किंवा प्रादेशिक सेना टि.ए 118 इन्फैंट्री बटालियन या धर्तीवर सुधार करण्यात यावा, मानसेवी कर्मचारी पद आणि वेतनिय कर्मचारी पद असे भेदभाव चे प्रकार नष्ट करून महाराष्ट्र होमगार्ड विभागात होमगार्ड सैनिकांना प्रतिनिधित्वाची समान संधी देण्यात यावी.

    तसेच पोलीस विभाग प्रमाणेच होमगार्ड विभागा करिता स्वतंत्र बजट ची व्यवस्था तसेच प्रतिवर्ष महामाई दरानुसार महागाई भत्ता देण्यात यावा, साप्ताहिक परेड भत्ता, उजळणी प्रशिक्षण भत्ता व तसेच आगामी काळात मध्ये येणारे सर्व प्रशिक्षण भत्ता व त्याचप्रमाणे शासनाचे पैरामिलिट्री फोर्स ला लावून दिलेले 6 महिन्याचे अतिदक्ष प्रशिक्षण शिबीर कर्तव्य भत्ता चे दर मानधनाचा सम प्रमाणानुसार देयक असावेत, इतर राज्यांप्रमाणे महाराष्ट्र राज्य मध्ये देखील 3 वर्षे सेवा देवू केलेले होमगार्ड सैनिकांना पोलीस विभाग, वन विभाग किंवा इत्यादी शासकीय प्रशासकीय विभागात 50% आरक्षण सह भरती निवड प्रक्रियेत वयात आणि उंचीत विशेष सवलत देत सरळ भरतीने नेमणूक देण्यात यावी यासह इतर मागण्यांना घेऊन होमगार्ड महासंघाच्या वतीने मुंबई येथील आजाद मैदानात आंदोलन सुरु करण्यात आले आहे.

    दरम्यान आमदार किशोर जोरगेवार यांनी मुंबई मंत्रालय येथे मुख्यमंत्री एकनाथ शिंदे आणि उपमुख्यमंत्री तथा गृहमंत्री देवेंद्र फडणवीस यांची भेट घेत होमगार्ड महासंघाच्या मागण्यांकडे त्यांचे लक्ष वेधले असून या बाबत चर्चा केली आहे. सदर विषय हा राज्यातील ४५ हजार १७१ होमगार्ड यांचा असून ही संख्या मोठी आहे. त्यामुळे त्यांच्या मागण्यांकडे विशेष लक्ष देण्याची गरज आहे.

    या होमगार्ड यांनी होमगार्ड महासंघाच्या नेतृत्वात आझाद मैदानात सुरु केलेल्या आंदोलनाची आपण दखल घेत त्यांच्या रास्त असलेल्या मागण्या मान्य कराव्यात अशी मागणीही यावेळी आमदार किशोर जोरगेवार यांनी यावेळी मुख्यमंत्री आणि उपमुख्यमंत्री यांना केली आहे.

  • राखी बांधायची कधी? जाणून घ्या योग्य वेळ

    News34 raksha bandhan

    चंद्रपूर – आज दिनदर्शिकेत नारळी पौर्णिमा, रक्षा बंधन नमूद आहे मात्र राखी कधी बांधायची हा पेच मुहूर्तामुळे अडकल्याने राखी बांधायची की नाही? हा प्रश्न बहिणीसमोर पडला आहे.

    यंदा 30 व 31 ऑगस्टला रक्षाबंधन साजरे केले जाणार आहे, पौर्णिमा तिथी ही दोन दिवस असल्याने 30 ऑगस्ट पासून सकाळी 11 तर दुसऱ्या दिवशी म्हणजेच 31 ऑगस्टला सकाळी 7.37 पर्यंत असल्याने राखी बांधण्याचे 2 मुहूर्त असणार आहे.

    राखी कधी बांधायची?

     

    30 ऑगस्ट आणि 31 ऑगस्ट या दोन्ही दिवशी रक्षाबंधनाचा सण साजरा केला जाणार आहे. यासोबतच रक्षाबंधनाला पौर्णिमेचा योगायोग देखील आहे, जो खूप खास मानला जातो. 30 ऑगस्ट रोजी सकाळी 10.59 वाजल्यापासून पौर्णिमा सुरू होते आणि 31 ऑगस्ट सकाळी 7:05 वाजता पौर्णिमा संपते, त्यामुळे या दरम्यानचा वेळ हा राखी बांधण्यासाठी योग्य आहे.

    परंतु 30 ऑगस्टला रात्री 9.02 वाजेपर्यंत भद्राकाळ असल्याने त्यानंतर रक्षाबंधन साजरं केलं जावू शकतं. 31 ऑगस्ट रोजी सकाळी 7.05 मिनिटांपर्यंत भावाला राखी बांधता येईल. पण बरेच जण मानतात की, बहिणीचं भावावरील प्रेम व्यक्त करण्यासाठी हा दिवस असतो, त्यामुळे अशा दिवशी मुहूर्ताचा सोस कशाला बाळगायचा. त्यामुळे जे लोक मुहूर्ताची परवा बाळगत नाही, ते 30 ऑगस्टला कोणत्याही वेळी भावाला राखी बांधू शकतात.

  • 12 कोटींच्या घोळाने ताडोब्यातील ऑनलाइन बुकिंग सेवा बंद

    News34

    चंद्रपूर – वाघांसाठी जगप्रसिद्ध असलेल्या ताडोबा जंगल सफारीला घोटाळ्याचा फटका बसल्याने सध्या ऑनलाइन बुकिंग बंद करण्यात आली आहे.

     

    ताडोबा प्रशासनाने ऑनलाइन तिकीट बुकिंग चे कंत्राट वाईल्ड कनेक्टिव्हिटी सोल्युशन या एजन्सी ला दिले होते, वर्ष 2021 ते 23 चे ऑडिट झाल्याने त्यामध्ये तब्बल 22 कोटी 80 लाख 67 हजार 749 रुपयांची तफावत आढळली, याबाबत एजन्सीला पैसे भरण्यास सांगितले असता त्यांनी 10 कोटी रुपये ताडोबा प्रशासनाकडे भरले मात्र उर्वरित 12 कोटी रुपये त्यांनी भरले नाही, ताडोबा व्यवस्थापनाने त्यांना वारंवार उर्वरित रकमेचा भरणा करण्यासाठी सांगितले मात्र त्यांनी पैसे भरले नाही, नेहमी शासनाला त्यांनी उडवाउडवीची उत्तरे दिली, त्यामुळे ताडोबा व्यवस्थापनाने बुकिंग एजन्सीचे संचालक अभिषेक विनोदकुमार ठाकूर व रोहित विनोद कुमार ठाकूर या दोघांवर वन अधिकारी सचिन शिंदे यांच्या तक्रारीवरून फसवणुकीचा गुन्हा रामनगर पोलीस स्टेशनमध्ये दाखल करण्यात आला.

    कोर व बफर झोनची ऑनलाइन बुकिंग सेवा बंद

    वाईल्ड कनेक्टिव्हिटी सोल्युशन या तिकीट बुकिंग एजन्सीने my tadoba नामक वेबसाईट ची निर्मिती ताडोबा जंगल सफारीचा आनंद घेणाऱ्या पर्यटकांसाठी बनविली होती.

    मात्र 12 कोटीच्या रकमेचा अपहार केल्याची चाहूल ताडोबा व्यवस्थापनाला लागल्याने त्यांनी my tadoba हे संकेतस्थळ बंद करण्याचा आदेश काढला व राज्यातील संपूर्ण व्याघ्रप्रकल्पाची एक वेबसाईट असणार त्यामधून ऑनलाइन बुकिंग होणार असे जाहीर केले होते मात्र ठाकूर बंधू ताडोबा व्यवस्थापनाच्या या आदेशाविरोधात उच्च न्यायालयात गेले, न्यायालयाने ठाकूर बंधूंचे ऐकत ताडोबा व्यवस्थापनाच्या आदेशाला स्थगिती देत सदर निर्णय चंद्रपूर न्यायालय अंतर्गत घेण्यात यावा असे नमूद करीत जोपर्यंत निर्णय लागणार नाही तोपर्यंत ऑनलाइन बुकिंग बंद राहण्याचे निर्देश दिले.

    ऑनलाइन बुकिंग बंद असल्याने पर्यटकांचा हिरमोड झाला, ऑगस्ट महिन्यापासून कोर झोन च्या जंगल सफारीसाठी पर्यटक बुकिंग प्रक्रिया पार पाडतात, सध्या बफर सफारी सुरू आहे मात्र ती सुद्धा ऑफलाईन पद्धतीने, ज्या पर्यटकांनी आधीच ऑक्टोबर महिन्यासाठी जंगल सफारी बुक केली असेल त्यांना कसलीही अडचण येणार नाही, जर अडचण आली तर त्यांनी ताडोबा व्यवस्थापणासोबत सम्पर्क साधावा असे आवाहन डॉ.जितेंद्र रामगावकर व्यवस्थापकीय संचालक ताडोबा अंधारी व्याघ्रप्रकल्प यांनी केले आहे.

    येत्या 2 ते 3 दिवसात न्यायालयाचा निर्णय येणार आहे, शक्यतो ताडोबा प्रशासनाच्या बाजूने निर्णय लागणार त्यानंतर सर्व प्रक्रिया सुरळीत होणार आहे, जर निर्णयाला उशीर झाला तर आम्ही ऑनलाइन बुकिंग सेवा सुरू करण्यासाठी पर्यायी मार्ग शोधू अशी माहिती रामगावकर यांनी दिव्य मराठी सोबत बोलताना दिली

  • परस्पर समन्वय व सहकार्यातून बांबू क्षेत्राला पुढे न्यावे – व्ही. गिरीराज

    News34

     

    चंद्रपूर:- बांबू आधारित उदयोग-व्यवसायात मोठ्या प्रमाणात रोजगार निर्मितीची क्षमता असून शेतकरी, कारागीर, तंत्रज्ञासोबतच उद्योजक-व्यावसायिकांनी काळाची गरज असलेल्या बांबू क्षेत्राला परस्पर समन्वय व सहकार्यातून पुढे न्यावे असे मत महाराष्ट्र बांबू प्रवर्तन प्रतिष्ठान, मुंबईचे मुख्य कार्यकारी अधिकारी व्ही. गिरीराज यांनी व्यक्त केले.

    ते चीचपल्ली येथील बांबूटेक ग्रिन सर्व्हिसेसच्या कार्यशाळा भेटी दरम्यान उपस्थित बांबू मित्र, बांबू कारागीर आणि बांबू शेतकरी यांच्याशी संवाद साधतांना बोलत होते. याप्रसंगी बांबू संशोधन व प्रशिक्षण केंद्राचे संचालक अविनाश कुमार, वंडर ग्रासचे संचालक वैभव काळे, बांबू उद्योजक अजित टक्के, बांबूटेक ग्रिन सर्व्हिसेसच्या संचालिका अन्नपूर्णा धुर्वे-बावनकर यांची प्रामुख्याने उपस्थिती होती. यावेळी व्ही. गिरीराज यांनी बांबू क्षेत्राशी निगडीत विविध विषयांवर चर्चा करून उपस्थितांना मोलाचे मार्गदर्शन केले.

    सादर कार्यक्रमाचे प्रास्ताविक अन्नपूर्णा धुर्वे यांनी केले तर प्रास्ताविक अनिल दहागांवकर आणि आभार प्रदर्शन निलेश पाझारे यांनी केले. कार्यक्रमाला जिल्हाभरातील बांबूमित्र, बांबू शेतकरी, बांबू कारागीर, यांची उपस्थिती होती. कार्यक्रमाच्या यशस्वितेसाठी भास्कर शेरकी, सुरज सोनारकर, प्रज्वल बावणे, कल्पना शिंदे, दर्शन चाफले, पुष्पा सावसाकडे, भास्कर कांबळे, रवींद्र उपरे, शिवसागर चंदनखेडे, सुभाष मोहुर्ले, हेमराज धुर्वे, श्वेता बावणे, राजू नंदनवार, मधुकर डांगे, लक्ष्मण घुगुल, उमेश रामटेके, प्रवीण कावेरी, राहुल स्वामी, अभय रॉय, भूषण नंदनवार, प्रणित मारोटकर यांनी परिश्रम घेतले.

  • चंद्रपुर शहरात पुन्हा आढळला मृतदेह

    News34

    Chandrapur police

    चंद्रपूर – चंद्रपूर शहरात मागील काही दिवसांपासून अनोळखी व्यक्तीचे मृतदेह आढळत आहे, पोलिसांसमोर त्या व्यक्तीची ओळख पटविण्याचे आव्हान उभे झाले आहे.

    काही दिवसांपूर्वी चंद्रपूर मनपा इमारतीच्या पार्किंग मध्ये अनोळखी इसम मिळाला होता, काही वेळात त्याचा मृत्यू झाला, त्यानंतर 28 ऑगस्टला शहरातील महाकाली कॉलरी येथील झरपट नाल्याच्या पात्रात पोलिसांना एका व्यक्तीचा मृतदेह मिळाला आहे.

    सदर अनोळखी व्यक्तीस कुणी ओळखत असल्यास शहर पोलीस स्टेशनचे पोउपनी दीपक चालूरकर मोबाइल क्रमांक ७९७२७५८११३ संपर्क साधण्याची विनंती पोलिसांनी केली आहे.

  • सोनार समाजातील विखुरलेल्या बांधवांना एका छत्राखाली आणून समाजाचा उत्कर्ष साधावा – रवि चावरे

    News34

    चंद्रपूर – सोनार समाजाचा उत्कर्ष साधायचा असेल तर सर्वप्रथम समाज बांधवांना वेगवेगळया पोटजातीमध्ये विखुरलेल्या समाजबांधवांना एकत्र आणण्याचा प्रयत्न केला पाहिजे. समाजातील बुध्दीजीवी, नोकरी पेशातील बांधवांनी समाज ऋणाची परतफेड करण्याकरिता संपूर्ण समाजाला एका छत्राखाली आणून त्यांच्या सामाजिक शैक्षणिक, सांस्कृतिक व आर्थिक विकासाला कशी चालना मिळेल याकरिता विचारमंथन करण्याची आवश्यकता असल्याचे प्रतिपादन समाजाचे युवा नेतृत्व तथा राष्ट्रीय मागासवर्गीय आयोग अध्यक्ष हंसराज अहीर यांचे स्वीय सहायक रवि चावरे यांनी केले.

    चंद्रपूर सोनार समाज बहुउद्देशीय संस्थेच्या वतिने आयोजित संत श्री नरहरी महाराज यांच्या 828 व्या जयंती महोत्सवानिमित्त उद्घाटक म्हणून ते बोलत होते. स्थानिक संत तुकडोजी भवन, नागपूर रोड येथे आयोजित या कार्यक्रमास मंचावर कार्यक्रमाचे अध्यक्ष प्रफुल चावरे, कार्यक्रमाचे अतिथी भुषण गजपूरे, अॅड प्रशिक ताठे, सुबोध कासुलकर, विनोद पांढरे, श्री रत्नपारखी आदी मान्यवर उपस्थित होते.

    समाज बांधवांना मार्गदर्शन करतांना रवि चावरे यांनी सांगीतले की,समाजात पोटजातींना घेवून दुजाभाव न करता त्यांना सामाजिक प्रवाहात येण्याकरिता संस्थेच्या माध्यमातून प्रभावीपणे कार्य करण्याची आवश्यकता आहे, समाजामध्ये अनेक कुटूंबात प्रज्ञावंत मुले असतांनाही आर्थिकदृष्टया ते शैक्षणिक प्रगती करण्यास असमर्थ असल्याने अशा मुलांचा शोध घेवून सामाजिक स्तरावर त्या कुटूंबांना सहाय्य करण्याची भुमिका स्विकारल्या गेली किंवा अशा गुणवंत विद्याथ्र्यांना शिष्यवृत्ती सारखी मदत मिळाली तर आपला समाज कुठेही मागे राहणार नाही.

    ज्या संत नरहरी महाराजांचे पाईक म्हणून आपण त्यांचेवर श्रध्दा ठेवतो. परंतु, महाराजांचे सामाजिक उत्थानासाठीचे विचार त्यांचे संदेश किंवा त्यांच्या कर्तृत्वाबाबत आपण अनभिज्ञ आहोत. त्यामुळे समाजातील युवकांनी, समाज बांधवांनी या विचाराचा प्रचार व प्रसार करण्याचे कर्तव्य पार पाडावे असेही आपल्या संबोधनातून रवि चावरे यांनी सांगीतले.

    तत्पूर्वी मान्यवर अतिथींच्या शुभहस्ते दीपप्रज्वलन करून महाराजांच्या प्रतिमेस माल्यार्पण करण्यात आले. यावेळी कार्यक्रमाचे अध्यक्ष व अन्य मान्यवरांनी समाज बांधवांना मौलीक मार्गदर्शन केले. याप्रसंगी रक्तदान शिबीर, धार्मिक कार्यक्रमाचे आयोजन करण्यात आले. समाजातील सेवानिवृत्त बांधवांना याप्रसंगी शाल व श्रीफळ देवून सन्मानित करण्यात आले. कार्यक्रमास माता भगिणींसह समाजबांधव बहुसंख्येने उपस्थित होते

  • चंद्रपुरात गणेशोत्सावर होणार लीग स्पर्धा

    News34

    Ganesh utsav festival

    चंद्रपूर – येत्या गणेशोत्सवाच्या पावन पर्वावर चंद्रपूर शहर महानगरपालिकेतर्फे पर्यावरण पुरक सार्वजनिक गणेश मंडळ व सौंदर्यीकरण लीग स्पर्धा आयोजित करण्यात येत आहे. यात सार्वजनिक गणेश मंडळांनी मनपातर्फे देण्यात आलेल्या विषयांवर सजावट/देखावा करणे तसेच सार्वजनिक जागा सौंदर्यीकरण करणे अपेक्षित असुन यात प्रथम आलेल्या मंडळाला १ लक्ष रुपयांचे पारितोषिक दिले जाणार आहे.

     

    मनपा स्वच्छता विभागातर्फे गणेशोत्सव सौंदर्यीकरण पंधरवाडा दिनांक ०२ ऑक्टोबर ते १७ ऑक्टोबर २०२३ पर्यंत राबविला जाणार असुन यात सार्वजनिक जागांचे सौंदर्यीकरण करावयाचे आहे.यात पर्यावरण पूरक मूर्ती, पर्यावरण पूरक सजावट,ध्वनिप्रदूषण रहीत वातावरण, गणेशोत्सव मंडळाने आवश्यक सर्व शासकीय परवानगी घेणे,सांस्कृतिक कार्यक्रम व स्पर्धा घेणे,निर्माल्यपासुन खत निर्मिती करणे,परिसराची स्वच्छता व शिस्त ठेवणे, मंडप परिसरात सामाजीक संदेश देणारे देखावा तयार करणे इत्यादींवर गुण दिले जाणार आहेत.

     

    इलेक्ट्रॉनिक वस्तूंची नवी दुकान, खरेदी करा amazon वर

    रेन वाटर हार्वेस्टिंग,पर्यावरण संरक्षण व संवर्धन, पर्यावरण पुरक गाडी ( ई व्हेईकल ),स्वच्छ चंद्रपूर सुंदर चंदपूर या विषयांवर प्रचार प्रसिद्धी करणारे सजावट/देखावा गणेश मंडळांना करावयाचा आहे. यासोबतच शहराच्या वैभवाची साक्ष असणारे किल्ले यांची स्वच्छता करणाऱ्या मंडळांची विशेष दखल घेतली जाणार आहे. चंद्रपूर महानगरपालिकेतर्फे सर्व गणेश मंडळांनी यात सहभाग घेण्याचे आवाहन करण्यात येत आहे.

    अटी व शर्ती :-
    मंडळ हे धर्मदाय आयुक्त यांचेकडे नोंदणी केलेले असावे किंवा महानगरपालिका चंद्रपूर यांची परवानगीधारक असणे बंधनकारक आहे.
    मंडळ चंद्रपूर शहरातील असावे
    सजावट/देखावा साठी कोणतेही साहित्य मनापाद्वारे पुरविण्यात येणार नाही.

    सौंदर्यीकरणासाठी जागा ही चौक किंवा सार्वजनिक स्थळ/जागा असावे.
    मनपा तर्फे झाडे व पेंटिंग कलर मर्यादित) पुरविण्यात येईल.
    स्पर्धा गटाचे सह्भागीतेवर बक्षीस रक्कम व रोख रक्कम कमी / जास्त करण्याचा अधिकार मनपा कडे राहील.

     

    बक्षिसे :
    प्रथम पारितोषिक – १ लक्ष व ट्रॉफी व सन्मानपत्र.
    द्वितीय पारितोषिक – ७१ हजार व ट्रॉफी व सन्मानपत्र.
    तृतीय पारितोषिक – ५१ हजार व ट्रॉफी व सन्मानपत्र.
    टाकाऊ पासुन टिकाऊ वस्तु बनविणे  – २१ हजार व ट्रॉफी व सन्मानपत्र.
    प्रोत्साहनपर १० पारितोषिक – २१ हजार व ट्रॉफी व सन्मानपत्र.

Powered by
►
Necessary cookies enable essential site features like secure log-ins and consent preference adjustments. They do not store personal data.
None
►
Functional cookies support features like content sharing on social media, collecting feedback, and enabling third-party tools.
None
►
Analytical cookies track visitor interactions, providing insights on metrics like visitor count, bounce rate, and traffic sources.
None
►
Advertisement cookies deliver personalized ads based on your previous visits and analyze the effectiveness of ad campaigns.
None
Powered by