My Blog

Category: चंद्रपूर शहर

चंद्रपूर शहर (Chandrapur City) आणि आसपासच्या परिसरातील प्रत्येक लहान-मोठी बातमी वाचा news34.in वर. महानगरपालिका, स्थानिक राजकारण, गुन्हेगारी, शैक्षणिक आणि सांस्कृतिक घडामोडींचे त्वरित आणि अचूक कव्हरेज येथे उपलब्ध आहे. तुमच्या चंद्रपूर शहर परिसरातील प्रत्येक महत्त्वाच्या विषयावर सविस्तर माहिती आणि सत्य घटनांचे अपडेट्स मिळवा. स्थानिक नागरिकांसाठी हे सर्वात विश्वसनीय स्रोत आहे.

  • बाळू भाऊच्या स्वप्न पूर्तीसाठी प्रतिभाताई सोबत राहा : माजी खासदार नरेशबाबू पुगलिया यांचे आवाहन

    News34 chandrapur

    चंद्रपूर : “दिवंगत खासदार बाळूभाऊ धानोरकर यांच्या जाण्याने एक सहकारी मी गमावला आहे. त्यांचे स्वप्न पूर्ण करण्यासाठी कार्यकर्त्यांनी आमदार प्रतिभाताई धानोरकर यांच्यासोबत राहण्याचे आवाहन खासदार नरेशबाबू पुगलीया यांनी केले.
    चंद्रपूर शहरातील भाऊचा दांडिया उत्सवाचे उद्धघाटन माजी खासदार नरेशबाबू पुगलिया यांच्याहस्ते  करण्यात आले. यावेळी माजी खासदार नरेशबाबू पुगलिया सपत्नीक आले होते.
    दिवंगत खासदार बाळूभाऊ धानोरकर यांच्या उपस्थितीत मागील वर्षी भाऊचा दांडिया उत्सवाचे आयोजन करण्यात आले होते. परंतु त्यांच्या जाण्याने या उत्सवाचं आयोजन करण्याची जबाबदारी त्यांच्या पत्नी आमदार प्रतिभाताई धानोरकर यांच्यावर आली.
    यावेळी त्यांनी पुगलिया कुटुंबियांकडून दांडियातील स्पर्धकांकरिता दीड लाखांची बक्षिसे जाहीर केली. ग्रुप दांडियामध्ये नगरपरिषद चंद्रपूर निर्वाचित प्रथम अध्यक्ष स्व. राजमलजी पुगलिया यांच्या स्मुर्तीप्रित्यर्थ राजमलजी पुगलिया फाउंडेशन, चंद्रपूर तर्फे एक लाख चे प्रथम पुरस्कार व कपल डॉन्स मध्ये ज्या ग्रुपचा प्रथम क्रमांक येईल त्या कपल गृपला स्वतंत्र सेनानी स्व. उत्तमचंद राजमलजी पुगलिया यांच्या स्मृतिप्रीत्यर्थ ५० हजार रुपयाचे पारितोषिक देण्यात येणार आहे.  
    याप्रसंगी आमदार प्रतिभाताई धानोरकर म्हणाल्या कि, दिवंगत बाळूभाऊ धानोरकर यांच्या जाण्याने न भरून निघणारी पोकळी निर्माण झाली आहे. परंतु त्यांची क्रीडा, सांस्कृतिक व इतर क्षेत्रात आवड होती. तो वसा पुढे नेण्याकरिता मी पुढे देण्यासाठी कटिबद्ध असल्याचे असल्याचे प्रतिपादन त्यांनी यावेळी केले.

    यावेळी चंद्रपूर शहर जिल्हाध्यक्ष रामू तिवारी, भद्रावती नगराध्यक्ष अनिल धानोरकर, काँग्रेस जेष्ठ नेते विनोद दत्तात्रय, यवतमाळ मध्यवर्ती बँकेचे माजी अध्यक्ष टिकाराम कोंगरे, काँग्रेस नेते गजानन गावंडे, सेवादल जिल्हाध्यक्ष सूर्यकांत खनके, इंटक नेते के. के. सिंग, ओबीसी जिल्हाध्यक्ष प्रशांत दानव, माजी महापौर संगीताताई अमृतकर, शहर महिला काँग्रेस अध्यक्ष चंदाताई वैरागडे, अनुसूचित जाती महिला नेत्या अश्विनीताई खोब्रागडे, अल्पसंख्याक काँग्रेस जिल्हाध्यक्ष सोहेल शेख रजा, इंटक काँग्रेस जिल्हाध्यक्ष प्रशांत भारती, वरोरा शहर अध्यक्ष विलास टिपले, भद्रावती शहर अध्यक्ष सुरज गावंडे, वरोरा तालुका अध्यक्ष प्रशांत काळे, माजी नगरसेवक अशोक नागापुरे, माजी नगरसेवक देवेंद्र बेले, यवतमाळ महिला जिल्हाध्यक्ष वंदनाताई आवारी, वसंत जिनींग संचालिका साधनाताई गोहोकार, शारदाताई ठाकरे, संध्याताई गोहोकर, माजी नगरसेवक प्रसन्न सिरवार, माजी नगरसेवक गोपाल अमृतकर, भालचंद्र दानव, रतन शिलावार, नरेंद्र बोबडे, डॉ. सागर वझे, उमाकांत धांडे, सुरजकुमार बोबडे, मोनू चिमुरकर, सचिन घाटे, प्रमोद मगरे, बसंत सिंग, बाळू चिंचोलकर, सुनंदा धोबे, मीनाक्षी गुजरकर, शालिनी भगत, सौरभ ठोंबरे, मोनू रामटेके यांची उपस्थिती होती.

     ‘भाऊचा दांडिया’ उत्सवानिमित्त आकर्षक बक्षिसे जिंकण्याची संधी स्पर्धकांना मिळणार आहे. त्यात दोन चॅम्पियन्स ला ई दुचाकी, व रोख बक्षिसे देण्यात येणार आहे.  चांदा क्लब ग्राउंडवर २४ ऑगस्ट २०२२ रोजीपर्यंत सायंकाळी सहा ते रात्रौ १० वाजता दांडियाची घूम राहणार आहे. यात दररोज वेगवेगळ्या क्षेत्रातील नामवंत सहभागी होणार आहेत. या महोत्सवात उपस्थित राहण्याचे आवाहन दिवंगत खासदार बाळूभाऊ धानोरकर यांच्या स्मृती प्रित्यर्थ द मराठा चॅरिटेबल स्ट्रट तथा बाळूभाऊ धानोरकर मित्र परिवार चॅरिटेबल सोसायटी च्या वतीने करण्यात आले आहे.

  • महोत्सव आला….भक्तीगीतांच्या सिडीचे फडणवीस यांच्या हस्ते विमोचन

    News34 chandrapur

    चंद्रपूर – श्री माता महाकाली महोत्सवा निमित्त तयार करण्यात आलेल्या आला आला हो .. महोत्सव आला या भक्तीगीत सिडीचे राज्याचे उपमुख्यमंत्री देवेंद्र फडणवीस यांच्या हस्ते नागपूर येथे विमोचन करण्यात आले. यावेळी श्री महाकाली माता महोत्सव समितीचे अध्यक्ष आमदार किशोर जोरगेवार, समितीचे सचिव अजय जयस्वाल, माजी नगर सेवक बलराम डोडाणी, अशोक मत्ते, मोहित मोदी आदींची उपस्थिती होती.

     

    श्री महाकाली माता महोत्सव समितीच्या वतीने 19 ऑक्टोंबर पासून चंद्रपूरात होऊ घातलेल्या श्री माता महाकाली महोत्सवाची जय्यत तयारी सुरु आहे. यासाठी महाकाली मंदिर पटांगणात भव्य मंडप उभारण्यात आले आहे. सदर महोत्सवाच्या टिझरचे नुकतेच राज्याचे मुख्यमंत्री एकनाथ शिंदे यांच्या हस्ते उद्घाटन करण्यात आले आहे. सदर महोत्सवात सुप्रसिध्द कलाकार भक्तीमय गीतांची मेजवानी सादर करणार आहे.

     

    सदर महोत्सवात 9 हजार 999 कन्यांचे पुजन व भोजन कार्यक्रमाचे आयोजन करण्यात आले आहे. तर नवरात्री दरम्यान जन्मास आलेल्या कन्यांना श्री महाकाली माता महोत्सव समितीच्या वतीने चांदीचा सिक्का देण्यात येणार आहे. चंद्रपूरची आराध्य दैवत माता महाकालीची महती राज्यभरात पोहोचावी यातुन येथील पर्यटनाला चालना मिळावी हा या महोत्सवा मागचा मुळ उद्देश असल्याचे समितीचे अध्यक्ष आमदार किशोर जोरगेवार यांनी म्हटले आहे.

     

    सदर महोत्सवासाठी श्री महाकाली माता महोत्सव समितीच्या वतीने माता महाकालीच्या भक्तीमय गीतांची सीडी तयार करण्यात आली आहे. यात बोलो नमोस्तुते महाकाली, आला आला हो महोत्सव आला, दृष्ट पापीओं दूर हटो, मुझे भा गया महाकाली का देश, चंद्रपूरची महाकाली गोंधळाला आली, चला करुया जागर अशी भक्ती गीते सदर सिडीमध्ये असणार आहे. दरम्यान राज्याचे उपमुख्यमंत्री देवेंद्र फडणवीस यांच्या हस्ते नागपूर येथे या भक्तीगीतांच्या गाण्याच्या सिडीचे विमोचन करण्यात आले आहे. सदर गाणी महाकाली भक्तांच्या मुखात बसेल या गाण्यांच्या माध्यमातून माता महाकालीचा जागर राज्यभर होईल असा विश्वास यावेळी श्री महाकाली माता महोत्सव समीतीच्या वतीने व्यक्त करण्यत आला आहे.

  • शुक्रवारी चंद्रपुरात जनआक्रोश मोर्चा

    News34 chandrapur

    चंद्रपूर : राज्‍य सरकारने बाह्ययंत्रणेमार्फत सुरू केलेली कंत्राटी पदभरती रद्द करावी, ‘दत्तक शाळा योजना’ रद्द करावी, राज्‍य कर्मचाऱ्यांना जुनी पेंशन योजना लागू करावी, MPSC व इतर विभागाकडून घेण्यात येणाऱ्या स्‍पर्धा परिक्षेचे शुल्‍क कमी करून १०० रुपये ठेवावे यासह इतर मागण्यांना घेऊन शिक्षण – नोकरी बचाव समिती, जिल्‍हा चंद्रपूरच्या वतीने शुक्रवार, दिनांक २० ऑक्‍टोंबर २०२३ रोजी दुपारी १२ वाजता दीक्षाभूमी (डॉ. आंबेडकर कॉलेज) येथून चंद्रपूर जिल्‍हाधिकारी कार्यालयावर जनआक्रोश माेर्चा काढण्यात येणार आहे.

     

    उद्योग, ऊर्जा, कामगार आणि खनिकर्म विभागाने शासन निर्णय ६ सप्‍टेंबर २०२३ रोजी निर्गमित केला. त्यानुसार शिक्षण व विविध विभागात मनुष्यबळ बाह्ययंत्रणेमार्फत पुरविण्यात येणार आहे. शासकीय नोकरी हा महाराष्ट्रातील सुशिक्षित तरुणाचा हक्क आहे. बाह्ययंत्रणेमार्फत पदभरती करून सुशिक्षित बेरोजगारांचे शोषण करण्याचे परवाने वाटप केल्या जात आहे.

     

    महाराष्ट्र राज्य सरकार या शासन निर्णयाच्या माध्यमातून नवी वेठबिगारी निर्माण करू पाहत आहे काय? हा शासन आदेश तात्काळ रद्द करून सर्व विभागातील रिक्त जागेवर कायमस्‍वरूपी पदभरती करावी, ‘दत्तक शाळा योजना’ राबविण्याबाबतचा शासन निर्णय रद्द करावा, NPS रद्द करून शिक्षक-राज्‍य कर्मचाऱ्यांना जुनी पेंशन योजना लागू करावी, MPSC व इतर विभागाकडून घेण्यात येणाऱ्या स्‍पर्धा परिक्षेचे शुल्‍क कमी करून १०० रुपये ठेवावे, IBPS/ TCS किंवा इतर खासगी संस्‍थामार्फत विविध पदाच्या स्‍पर्धा परिक्षा न घेता सर्व परिक्षा MPSC आयाेगाद्वारे घेण्यात याव्‍या, विविध शासकीय पदभरतीसाठी होणाऱ्या स्‍पर्धा परिक्षेतील पेपर फुटीवर नियंत्रण आणण्यासाठी कडक कायदा करण्यात यावा, विद्यार्थी हितासाठी २० पटाखालील शाळा बंद होऊ नयेत, यासाठी समूह शाळा संकल्‍पना रद्द करणे, राज्‍य शासनातील शासकीय कार्यालयातील रिक्‍त पदे व अनुदानित संस्‍थेमधील शिक्षक – प्राध्यापकांची रिक्‍त पदे तात्काळ भरावी आदी मागण्यांचा जनआक्रोश मोर्चात समावेश आहे.

     

    वरील सर्व मागण्यांचा गांभीर्याने विचार करून राज्‍यातील विद्यार्थी, सुशिक्षीत बेराेजगार, शिक्षक, राज्‍य कर्मचारी यांना न्‍याय द्यावा अन्‍यथा शिक्षण – नोकरी बचाव समिती, जिल्‍हा चंद्रपूरच्या वतीने सुरू असलेले आंदोलन अधिक तीव्र करून राज्‍यव्‍यापी आंदोलन छेडण्यात येईल, असा इशारा राज्‍याचे मुख्यमंत्री, उपमुख्यमंत्री, शालेय शिक्षण मंत्री यांना पत्राद्वारे देण्यात आला आहे. आमदार सुधाकर अडबाले यांच्या अध्यक्षतेखाली नुकतीच मातोश्री सभागृह तुकूम येथे नियोजन सभा पार पडली. यावेळी सर्व शैक्षणिक, सामाजिक, राजकीय संघटनांचे पदाधिकारी मोठ्या संख्येने उपस्‍थित होते.

     

    या जनआक्रोश मोर्चात विद्यार्थी, युवक, पालक, कर्मचारी, सर्वसामान्‍य नागरिक यांनी रस्‍त्‍यावर उतरून सरकारने सुरू केलेले खासगीकरण व कंत्राटीकरण धोरण रद्द करण्यासंदर्भात विराेध दर्शवावा, असे आवाहन शिक्षण – नोकरी बचाव समिती, जिल्‍हा चंद्रपूरच्‍या वतीने करण्यात आले आहे.

  • चंद्रपुरातील ते देशी दारूचे दुकान तात्काळ हटवा – चंद्रपूर शिवसेना आक्रमक

    News34 chandrapur

    चंद्रपुर :- जिल्ह्यातील चंद्रपुर शहर महानगरपालिका हद्दीतील अष्टभुजा वार्डातील बायपास रोड जवळील पुरातन अष्टभुजा देवीच्या मंदिरालगत शासनाच्या नियमाची पायमल्ली करुन नियमबाह्य पद्धतीने परवाना देण्यात आलेले मालक-हरीश भोजा शेट्टी यांचे सरकारी देशी दारूचे दुकान तात्काळ हटविण्यासंदर्भात चंद्रपुर शिवसेना तालुका प्रमुख तथा ग्राहक संरक्षण समिती जिल्हाध्यक्ष संतोष पारखी यांनी जिल्हाधिकारी यांना निवेदनाद्वारे इशारा दिला.

     

    आंतरराष्ट्रीय हिंदू परिषद राष्ट्रीय बजरंग दल, चंद्रपुरच्या वतीने जिल्हा महामंत्री दिपक रेड्डी यांनी दि.06/09/2023 ला निवेदन देवून सदर विषयाची दखल न घेतल्यामुळे संदर्भीय पत्राच्या अनुसंगाने चंद्रपुर शहर मनपा येथील अष्टभुजा वार्डातील बायपास रोड जवळील पुरातण अष्टभुजा देवीचे मंदिर असून येथे देशभरातून येणाऱ्या भक्त भाविक मोठ्या संख्यने पूजा अर्चना करण्यासाठी येत असुन मंदिरालगत नुकतेच नव्याने देशी दारूचे दुकान (मालक-हरीश भोजा शेड्डी ला. नं. 133/2023-24) देण्यात आले आहे.

     

    यामध्ये शासनाच्या नियमाची पायमल्ली करुन नियमबाह्य पद्धतीने दारूचा परवाना देण्यात आलेल्या सरकारी देशी दारूच्या दुकानात सर्रासपणे विदेशी दारू व बियरची विक्री केली जात असल्यामुळे दारू पिवून दारूच्या नशेत देवीच्या मंदिरात भक्त भाविक पूजा अर्चना करण्यासाठी ये-जा करीत असतांना अश्लील भाषेत शिविगाळ करुन अपशब्दात बोलत असतात.
    त्यामुळे मंदिर येणाऱ्या महिला, पुरुष, मुले, मूली व लहान बालकांना सदर प्रकरणापासून फार मोठ्याप्रमाणात त्रास सहन करावा लागत असून भाविकांच्या भावना दुखावल्या जात आहे.

     

    त्याकरिता पुरातण अष्टभुजा देवीच्या मंदिरालगत शासनाच्या नियमाची पायमल्ली करुन नियमबाह्य पद्धतीने सरकारी देशी दारूचे दुकान तात्काळ हटविण्याचे आदेश देवून देशभरातून येणाऱ्या भक्त भाविकांना पूजा अर्चना करणे सोइस्कर होईल याची दक्षता घेण्यात यावी.

     

    अन्यथा आम्हाला शिवसेनेच्या पद्धतीने सदर प्रकरण हाताळावे लागेल व याची सर्वस्वी जबाबदारी प्रशासनाची राहील असे चंद्रपुर शिवसेना तालुका प्रमुख तथा ग्राहक संरक्षण समिती जिल्हाध्यक्ष संतोष पारखी यांनी जिल्हाधिकारी यांना निवेदनाद्वारे इशारा दिला. यावेळी चंद्रपुर तालुका संघटक संजयकुमार शिंदे,आंतरराष्ट्रीय हिंदू परिषद राष्ट्रीय बजरंग दल जिल्हा महामंत्री दिपक रेड्डी, राजू रायपुरे, सुरेंदर अंचल, गोविन्द प्रसाद व पप्पू कोठारिया उपस्थित होते.

  • डॉ. बाबासाहेब आंबेडकर यांच्या विचारांवर चालण्याचा संकल्प करा – पालकमंत्री सुधीर मुनगंटीवार

    News34 chandrapur

    चंद्रपूर : ‘नागपूर आणि चंद्रपूर हा परिसर जगात ‘टायगर कॅपीटल’ म्हणून ओळखला जात असला तरी या दोन्ही जिल्ह्यांत बाबासाहेबांनी 1956 सालीच वाघाची डरकाळी दिली आणि संपूर्ण देशाने ही डरकाळी ऐकली आहे. या महामानवाने दिलेल्या संविधानात स्वातंत्र्य, अधिकार, जबाबदारी आणि कर्तव्याचाही समावेश आहे. त्यामुळे प्रत्येक नागरिकाने संविधान वाचून डॉ. बाबासाहेब आंबेडकर यांनी दिलेल्या विचारांवर चालण्याचा संकल्प करावा व त्यातून जगण्याची प्रेरणा घ्यावी,’ असे आवाहन राज्याचे वने, सांस्कृतिक कार्य, मत्स्यव्यवसाय मंत्री तथा जिल्ह्याचे पालकमंत्री ना. श्री. सुधीर मुनगंटीवार यांनी केले.

     

    डॉ. बाबासाहेब आंबेडकर मेमोरीअल ट्रस्टच्यावतीने दीक्षाभूमी चंद्रपूर येथे आयोजित कार्यक्रमात त्यांनी महामानवाला अभिवादन केले. त्यावेळी ते बोलत होते. कार्यक्रमाच्या अध्यक्षस्थानी ट्रस्टचे अध्यक्ष अरुण घोटेकर होते. तर प्रमुख पाहुणे म्हणून सर्वश्री आमदार सुधाकर अडबाले, किशोर जोरगेवार, सुभाष धोटे, प्रतिभा धानोरकर, संस्थेचे उपाध्यक्ष अशोक घोटेकर, सचिव वामनराव मोडक, गोंडवाना विद्यापीठाचे कुलगुरु डॉ. प्रशांत बोकारे आदी उपस्थित होते.

     

    देशात आज 750 पेक्षा जास्त जिल्हे आहेत, मात्र नागपूर आणि चंद्रपूर या दोन जिल्ह्यांचे विशेष महत्त्व आहे, असे सांगून पालकमंत्री श्री. मुनगंटीवार म्हणाले, ‘14 ऑक्टोबर रोजी नागपूर येथे तर दोन दिवसांनी म्हणजे 16 ऑक्टोबर 1956 रोजी चंद्रपूर येथे डॉ. बाबासाहेब आंबेडकर यांनी आपल्या अनुयायांना बौद्ध धर्माची दीक्षा दिली. हे दोन्ही जिल्हे आज वाघांसाठी प्रसिद्ध आहेत. पण 1956 मध्येच बाबासाहेबांची डरकाळी संपूर्ण देशाने ऐकली आहे. डॉ. बाबासाहेब आंबेडकर यांनी दिलेल्या संविधानानुसारच देशाची आणि राज्याची वाटचाल सुरू आहे. संविधानात प्रत्येक गोष्टीचा उल्लेख त्यांनी केला आहे. व्यक्ती स्वातंत्र्य, अधिकार यासोबतच प्रत्येकाला त्याच्या जबाबदारीची आणि कर्तव्याचीसुध्दा जाणीव करून देण्यात आली आहे. त्यामुळे बाबासाहेबांचे केवळ स्मरण करून थांबू नये तर, त्यांच्या विचारांवर अंमल करावे लागेल. आणि त्यासाठी प्रत्येकाला संविधानाचे वाचनही करावे लागेल.

     

    महापुरुषांना भारतापुरता मर्यादित समजू नये

    ‘भगवान गौतम बुध्द, छत्रपती शिवाजी महाराज, महात्मा गांधी, डॉ. बाबासाहेब आंबेडकर हे केवळ भारतापुरतेच मर्यादीत नाही तर संपूर्ण जगाला वैचारीक प्रेरणा देण्याचे कार्य त्यांनी केले आहे. ‘शिका, संघटीत व्हा आणि संघर्ष करा’ हा जीवन जगण्याचा मंत्र डॉ. बाबासाहेब आंबेडकर यांनी आपल्याला दिला आहे. गौतम बुद्धांचा शांततेचा आणि समतेचा संदेश संपूर्ण जगात पोहचला आहे. केंद्र शासन आज बुद्धगया, नालंदा, विक्रमशिला, सारनाथ, कपिलवस्तू, राजगीर, वैशाली, श्रावस्ती या ठिकाणांना जोडणारे बुद्ध सर्किट तयार करीत आहे,’ असेही पालकमंत्री सुधीर मुनगंटीवार यांनी सांगितले.

     

    एस.एन.डी.टी. विद्यापीठ आणि चंद्रपूर फ्लाईंग क्लब ठरणार विद्यार्थ्यांसाठी गेमचेंजर

    कौशल्य विकासावर आधारीत प्रशिक्षण आणि रोजगारासाठी चंद्रपूरमध्ये एस.एन.डी.टी विद्यापीठाचे उपकेंद्र स्थापन करण्यात येत आहे. तसेच आगामी काही महिन्यातच चंद्रपूर येथे फ्लाईंग क्लब सुरू करण्याचे नियोजन आहे. त्यामुळे चंद्रपूर आणि गडचिरोली या जिल्ह्यातील अनुसूचित जाती, अनुसूचित जमाती, इतर मागास प्रवर्ग आदी विद्यार्थी–विद्यार्थीनींसाठी या बाबी गेमचेंजर ठरणार आहेत, असा विश्वासही त्यांनी व्यक्त केला.

  • चंद्रपुरातील अपघाताचा थरारक व्हिडीओ व्हायरल

    News34 chandrapur

    चंद्रपूर – चंद्रपूर शहरातील वाहतुकीने सतत कोंडलेल्या जटपुरा गेटवरील अपघाताचा थरारक व्हिडीओ समाज माध्यमावर व्हायरल झाला आहे, या व्हिडीओ मध्ये भरधाव वेगात असलेल्या ऑटोने 65 वर्षीय वृद्धाला जबर धडक दिली आहे.

    या व्हायरल व्हिडिओत 65 वर्षीय इसम रस्त्यावरून पलीकडे जात असताना त्यांना भरधाव वेगात येत असलेल्या ऑटो ने जोरदार धडक दिली, या धडकेत 65 वर्षीय प्रकाश खोडे राहणार जलनगर हे गंभीर जखमी झाले आहे.

     

    चंद्रपूर शहरात दिवसेंदिवस वाहतुकीची समस्या गंभीर होत आहे, मात्र यावर वाहतूक विभागाचे मोठ्या प्रमाणात दुर्लक्ष असून शहरातील भरधाव वेगात चालणाऱ्या वाहनांवर कारवाई फक्त नावापुरती होत असल्याचा आरोप वारंवार वाहतूक विभागावर लागत आहे.

     

    विशेष बाब म्हणजे शहरातील विविध भागात लागलेले सीसीटीव्ही कॅमेऱ्याचं कंट्रोल रूम हे चंद्रपूर वाहतूक विभागात आहे.

  • 3 जिल्ह्यातील दुचाकी चोर चंद्रपूर स्थानिक गुन्हे शाखेच्या ताब्यात

    News34 chandrapur

    चंद्रपूर – जिल्ह्यात होत असलेल्या दुचाकी चोरीवर अंकुश लावण्यासाठी स्थानिक गुन्हे शाखेने कंबर कसली आहे, 16 ऑक्टोबर रोजी स्थानिक गुन्हे शाखेच्या पथकाने गोपनीय माहितीच्या आधारे एका दुचाकी अट्टल चोराला ताब्यात घेतले, त्याची अधिक चौकशी केली असता दुचाकी चोरीचे मोठे घबाड उघडकीस आले.

     

    16 ऑक्टोबर ला स्थानिक गुन्हे शाखा दुसऱ्या गुन्ह्याचा तपास करीत असताना त्यांना गोपनीय माहिती मिळाली की एक इसम कमी किमतीमध्ये दुचाकी वाहन विकण्यासाठी बस स्टॅण्ड वर ग्राहक शोधत आहे. मात्र त्या वाहनांचे कागदपत्रे त्याच्याजवळ नव्हते, पोलिसांना संशय आला असता त्याला चौकशीसाठी ताब्यात घेतले.

     

    पारधीगुळा धोपटाला येथे राहणारा 28 वर्षीय प्रदीप संजय शेरकुरे असे त्या इसमाचे नाव, सदरचे दुचाकी वाहन प्रदीप ने वरोरा पोलीस स्टेशनच्या हद्दीतून चोरले असल्याची माहिती पोलिसांना मिळाली, प्रदीप कडून दुचाकी वाहन क्रमांक MH34BC5968 जप्त करण्यात आली.

    प्रदीप ने इतर काही गुन्हे केले का याबाबत सखोल चौकशी केली असता वरोरा, गडचांदूर, नागपूर व यवतमाळ जिल्ह्यातील दुचाकी व LED टीव्ही चोरी केले असल्याची माहिती स्थानिक गुन्हे शाखेच्या पथकाला मिळाली.

     

    प्रदीप ने 7 मोटार सायकल व एक टीव्ही चोरी केली होती, आरोपिकडून तब्बल 2 लाख 80 हजार रुपयांचा मुद्देमाल जप्त करण्यात आला, आरोपीला पुढील कारवाईसाठी वरोरा पोलीस स्टेशनच्या ताब्यात देण्यात आले.

     

    सदरची यशस्वी कारवाई पोलीस अधीक्षक रविंद्र परदेशी, अप्पर पोलीस अधीक्षक रिना जनबंधु यांच्या मार्गदर्शनाखाली स्थानिक गुन्हे शाखेचे पोलीस निरीक्षक महेश कोंडावार यांच्या नेतृत्वात पोलीस उपनिरीक्षक अतुल कावळे, पोलीस कर्मचारी अतुल डांगे, जमिर पठाण, नितेश महात्मे, प्रसाद धुळगळे, दिनेश अराडे व रुषभ बारसिंगे यांनी केली.

  • चंद्रपुरात 5 दिवसीय माता महाकाली महोत्सवाचे ऐतिहासिक आयोजन

    News34 chandrapur

    चंद्रपूर – चंद्रपूर विधानसभेचे लोकप्रिय आमदार व माता महाकाली महोत्सवाचे संयोजक किशोर जोरगेवार यांनी 19 ऑक्टोबर पासून शहरात 5 दिवसीय महाकाली महोत्सवाचे आयोजन करण्यात आले अशी माहिती पत्रकार परिषदेद्वारे दिली आहे.

     

    विधानसभेतील नागरिकांना मूलभूत समस्या न भेळसाव्या यासाठी ठोस पावले उचलणारे आमदार जोरगेवार आपल्या वेगळ्या कार्यप्रणालीमुळे नेहमीच चर्चेत असतात, मात्र 2022 पासून त्यांनी चंद्रपुरातील आराध्य दैवत माता महाकाली महोत्सवाचे आयोजन केल्याने विविध राज्यातील भाविकांच्या मनात आमदार जोरगेवार यांनी आपली लोकप्रिय छवी निर्माण केली आहे.

     

    यंदा महाकाली महोत्सव हा 5 दिवसांचा असून यावर्षी अनेक मुख्य आकर्षण या महोत्सवाच्या माध्यमातून नागरिक अनुभवणार आहे, जगप्रसिद्ध जागरण गायक लखबिर सिंग लख्खा, अनुराधा पौडवाल, निरंजन बोबडे, वैशाली सामंत, युवा कीर्तनकार सोपान दादा कनेरकर व मंदिर अब बनने लगा है गाण्याची पार्श्वगायिका इशरत जहाँ यांच्या रोड शो चे आयोजन करण्यात आले असल्याची माहिती आमदार किशोर जोरगेवार यांनी पत्रकार परिषदेत दिली आहे.

     

    असा असेल हा ऐतिहासिक कार्यक्रम

    19 ऑक्टोबर ला जैन मंदिर संस्था व सराफा असोसिएशनच्या वतीने श्री माता महाकालीच्या चांदीच्या मूर्तीची शोभायात्रा द्वारे महोत्सवाचा शुभारंभ करण्यात येणार आहे. सायंकाळी गायक लखबिर सिंग लख्खा यांच्या भक्तिमय संगीताचा कार्यक्रम.

    20 ऑक्टोबर ला सारेगामा फेम निरंजन बोबडे सह 151 कलावंतांचा भक्ती स्वराभिषेक कार्यक्रम, 21 ऑक्टोबर ला गोंडवानाचा महायोद्धा वीर बाबुराव शेडमाके यांच्या जीवनावर आधारित नाटक, वैशाली सामंत यांच्या सुमधुर आवाजात गीत संगीताचा कार्यक्रम.

    22 ऑक्टोबर ला महाराष्ट्रातील सुप्रसिद्ध कीर्तनकार सोपान दादा कनेरकर यांचे कीर्तन, गायिका अनुराधा पौडवाल यांचा भक्तिमय संगीत कार्यक्रम, सोमवार 23 ऑक्टोबर ला श्री माता महाकाली नगरप्रदक्षिणा पालखी काढण्यात येणार आहे, गायिका इशरत जहाँ यांचा रोड शो, उत्तरप्रदेश राज्यातील केदारनाथ धाम येथील झांज डमरू पथक, शिवतांडव अघोरी नृत्य, बाहुबली हनुमान वानरसेना यांचे बोलके दृष्य अश्या अनेक विविध आकर्षण सहित शोभायात्रा शहरातून प्रदक्षिणा घालत परत माता महाकाली मंदिरात पोहचणार आहे.

    विशेष कार्यक्रम

    19 ते 23 ऑक्टोबर दरम्यान 9 हजार 999 बालिकांचे कन्यापूजन व कन्याभोजन, 20 ते 23 ऑक्टोबर ऐतिहासिक हेरिटेज वॉक, बाई पण भारी देवा, मला पण आज बोलायचंय, महिला व मुलींकरिता मुक्त व्यासपीठ, चंद्रपूर जिल्ह्यातील वनवैभव दाखविणारे चित्र प्रदर्शन, पोलीस विभागातर्फे महिलांकरिता मार्गदर्शक सूचना केंद्र, आत्मनिर्भर दुर्गा यांचा सत्कार, चित्रकला व चित्र प्रदर्शनाचे आयोजन.

    5 दिवसीय कार्यक्रमासाठी राज्याचे मुख्यमंत्री एकनाथ शिंदे उपस्थित राहण्याची शक्यता आहे.

    अश्या विविध कार्यक्रमाची मेजवानी महाकाली महोत्सवाच्या 5 दिवसाच्या काळात भाविकांना अनुभवायला मिळणार आहे, श्री माता महाकाली महोत्सव ट्रस्टच्या वतीने आयोजित या महोत्सवाचा लाभ नागरिकांनी उपस्थित राहून घ्यावा असे आवाहन संयोजक व आमदार किशोर जोरगेवार यांनी केले आहे.

  • चंद्रपुरात थोर स्त्रियांचा जागर करणारा दांडिया उत्सव

    News34 chandrapur

    चंद्रपूर – चंद्रपूरच्या नानाजी नगर महिला मंडळातर्फे आयोजीत वुमेन्स पाॅवर दांडियाचे वरोरा भद्रावती विधानसभा क्षेत्राच्या आमदार प्रतिभा धानोरकर यांच्या हस्ते रविवारी 15 ऑक्टोंबर रोजी रात्री 8 वाजता थाटात उद्घाटन करण्यात आले. यावेळी प्रमुख पाहुणे म्हणून वडगाव प्रभागाचे माजी नगरसेवक पप्पू देशमुख,माजी नगरसेविका अनुराधा हजारे, जनविकास सेनेचे घनश्याम येरगुडे व मनीषा बोबडे प्रामुख्याने उपस्थित होते.

     

    विशेष म्हणजे या दांडिया मध्ये नऊ दिवस राजमाता जिजाऊ, महाराणी हिराई, पुण्यश्लोक अहिल्याबाई होळकर, झाशीची राणी लक्ष्मीबाई ,क्रांतीज्योती सावित्रीबाई फुले ,आद्य शिक्षिका फातिमा शेख, प्रथम वैद्यकीय चिकित्सक रख्माबाई राऊत, माता रमाई भिमराव आंबेडकर व मदर टेरेसा या 9 थोर स्त्रियांच्या कार्याची माहिती देऊन त्यांचा जागर करण्यात येणार आहे. तसेच चंद्रपूर शहर व जिल्ह्यातील उल्लेखनीय कार्य करणाऱ्या 9 महिलांचा सत्कार करण्यात येणार आहे. उद्घाटनाच्या पहिल्या दिवशी राजकीय क्षेत्रात उल्लेखनीय कार्य केल्याबद्दल तसेच विधानसभेत जनसामान्यांचे अनेक प्रश्न उपस्थित केल्याबद्दल आमदार धानोरकर यांचा साडी-चोळी देऊन नानाजी नगर महिला मंडळाच्या सदस्यांनी सत्कार केला.

     

    उद्घाटन प्रसंगी बोलताना आमदार प्रतिभा धानोरकर यांनी महिलांनी सक्षम होऊन स्वबळावर उभे राहण्याची गरज असल्याची भावना व्यक्त केली.तसेच नवरात्र उत्सवातून थोर महिलांच्या कार्याचे स्मरण करण्याची संकल्पना समाजातील नवीन पिढीला दिशा देण्यासाठी अतिशय उपयुक्त ठरणार असल्याचे त्यांनी नमूद केले.
    या दांडिया उत्सवामध्ये नऊ दिवस चंद्रपूर जिल्ह्यातील विविध क्षेत्रात काम करणाऱ्या नऊ महिलांचा सत्कार करण्यात येणार असल्याने सर्वसामान्य मुली व महिलांना प्रोत्साहन व प्रेरणा मिळेल अशी भावना यावेळी माजी नगरसेवक देशमुख यांनी व्यक्त केली.

     

    कार्यक्रमाचे सूत्रसंचालन संस्कृती गावंडे या मुलीने केले. यावेळी तिने जिजाऊची वेशभूषा परिधान केल्याने सर्वांचे लक्ष वेधले.कार्यक्रमाचे प्रास्ताविक व राजमाता जिजाऊ च्या कार्याचे वाचन माधुरी शास्त्रकार तर आभार प्रदर्शन नंदू पाहुणे यांनी केले.

    कार्यक्रमाच्या यशस्वीते करिता नानाजी नगर महिला मंडळाच्या शुभांगी गावंडे,संगीता पाहुणे,मनिषा गावंडे, संगीता वानखडे,अलका लांडे ,जयश्री लांडे,प्रविण बरडे, वैशाली हिवरकर,साधना शेंडे, सपना राणा,कविता भांदककर यांनी अथक प्रयत्न केले.

  • चंद्रपुरात गर्भवती महिलेला मारहाण

    News34 chandrapur

    चंद्रपूर – जिल्ह्यातील मूल शहरात 14 ऑक्टोबर ला रात्रीच्या सुमारास शेजाऱ्यांनी गर्भवती महिलेला मारहाण केल्याची संतापजनक घटना घडली आहे, या प्रकरणात तिघांवर गुन्हा दाखल करण्यात आला आहे.

    राज्यात एकीकडे सरकार महिलांच्या सन्मानार्थ विविध योजना काढत आहे मात्र दुसरीकडे महिलांवर अत्याचार वाढत आहे, असाच एक संतापजनक प्रकार मूल शहरात उघडकीस आला.

     

    शहरातील वॉर्ड क्रमांक 17 मध्ये राहणारे 27 वर्षीय आकाश बोर्डावार राहतात, मोल मजुरी करीत ते आपल्या कुटुंबाचा उदरनिर्वाह करतात, 6 महिन्यांपूर्वी आकाश चे लग्न दामिनी सोबत झाले, सध्या दामिनी ही 3 महिन्याची गर्भवती आहे.

     

    आकाश यांच्या घराशेजारी राहणारे राहुल प्रेमलवार राहत असून त्यांच्यासोबत नेहमी होणारे वाद बघता आकाश बोर्डावार यांचे बोलणे बंद आहे. 14 ऑक्टोबर ला रात्री 11.30 वाजताच्या सुमारास राहुल प्रेमलवार, छोटू तोटावार, ईश्वर लोनबले व बादल बावनवाडे हे बोर्डावार यांच्या घरापुढे येऊन जोरजोरात ओरडत शिवीगाळी करू लागले.

     

    त्यांचा आवाज ऐकून आकाश व त्यांची आई शोभा बोर्डावार यांनी शिवीगाळी का करता म्हणून हटकले, हटकले म्हणून चौघांचा पारा चढला व त्यांनी आकाश सोबत मारहाण केली, आकाश ला मारहाण होत असताना त्यांच्या गर्भवती पत्नीने पतीला वाचविण्यासाठी मध्ये गेली मात्र चौघांनी दामिनी ला सुद्धा मारहाण करीत तिला अश्लील शिवीगाळी केली.

     

    या मारहाणीत दामिनी जखमी झाली, पती आकाश ने तिला तात्काळ रुग्णालयात दाखल केले, प्रकृती गंभीर असल्याने डॉक्टरांनी तिला पुढील उपचारासाठी चंद्रपूर जिल्हा सामान्य रुग्णालयात रेफर केले.

     

    आकाश ने याबाबत मूल पोलीस स्टेशनमध्ये तक्रार नोंदविली, पोलिसांनी राहुल प्रेमलवार, छोटू तोटावार, ईश्वर लोनबले व बादल बावनवाडे यांच्यावर कलम 324, 294,  506 व 34 अंतर्गत गुन्हा दाखल केला.

Powered by
►
Necessary cookies enable essential site features like secure log-ins and consent preference adjustments. They do not store personal data.
None
►
Functional cookies support features like content sharing on social media, collecting feedback, and enabling third-party tools.
None
►
Analytical cookies track visitor interactions, providing insights on metrics like visitor count, bounce rate, and traffic sources.
None
►
Advertisement cookies deliver personalized ads based on your previous visits and analyze the effectiveness of ad campaigns.
None
Powered by