Category: चंद्रपूर शहर

News34 chandrapur

चंद्रपूर : जिल्ह्यातील आमदार प्रतिभा धानोरकर यांनी रेल्वे मंत्री अश्विनी वैष्णव यांना पत्र लिहून बल्लारशाह ते मुंबई डायरेक्ट ट्रेन सुरु होईस्तोवर ट्रेन क्र. 51196 लिंक कोचेस पूर्ववत करण्याची मागणी केली आहे.

या पत्रात आमदार प्रतिभाताई धानोरकर यांनी म्हटले आहे की, कोरोना महामारीच्या काळात ही ट्रेन थांबली होती. देशभरात कोरोनाची परिस्थिती नियंत्रणात असून जनजीवन पुन्हा सुरू झाले आहे. पण ती गाडी असूनपर्यंत बंद आहे. ही गाडी चंद्रपूर जिल्ह्यातील प्रवाशांसाठी अतिशय सोयीची आहे. त्यामुळे बल्लारशाह-चंद्रपूर ते मुंबई ही थेट रेल्वे आठवड्यातून तीन वेळा सुरू होईपर्यंत लोकांच्या सोयीसाठी ही लिंक एक्स्प्रेस अगोदर सुरू करणे आवश्यक आहे.

आमदार प्रतिभाताई धानोरकर म्हणाल्या की, ही गाडी दोन वर्ग 3 कोच, 3 स्लीपर कोच आणि एक जनरल कोच असलेली होती. ही गाडी वर्धा ते सेवाग्राम एक्सप्रेस ट्रेन क्र. 12140 ने मुंबईसाठी निघायची. आणि परतताना मुंबई-बल्लारपूर लिंकचे डबे गाडी क्रमांक सेवाग्राम 12139 ने यायचे. रेल्वे बोर्डाने लिंक कोचेस बंद जरी केल्या असल्या तरी मुंबईसाठी डायरेक्ट ट्रेन सुरु होईस्तवर हि सोय पूर्ववत देण्याची गरज आहे.

आमदार प्रतिभाताई धानोरकर यांनी रेल्वे मंत्री वैष्णव यांना विनंती केली आहे की, ही ट्रेन पूर्ववत सुरू करावी या मागणीवर रेल्वे मंत्रालयाकडून लवकरच निर्णय अपेक्षित आहे. हि मागणी पूर्ण झाल्यास हजारो प्रवाशांचा प्रवास सुखकर होणार आहे.

News34 chandrapur

चंद्रपूर :- हम बहुउद्देशिय संस्था चंद्रपूर द्वारे डॉ. हेडगेवार जन्मशताब्दि सेवा समिती द्वारा संचालित सेवा प्रकल्प व निराधार प्राण्याची सेवा करणारी प्यार फाऊॅंडेशन या दोन संस्थांच्या आर्थिक मदतीकरीता दि 04 नोव्हेबर रोजी अमेय दक्षिणदास लिखित व ऍड चैताली बोरकुटे-कटलावार दिग्दर्शीत दोन अंकी मराठी नाटक ‘‘द कॉन्शस्’’ चा यशस्वी प्रयोग मोठ्या थाटात उत्साहात पार पडला.

स्थानिक प्रियदर्शीनी सांस्कृतिक सभागृह येथे आयोजित या कार्यक्रमाचे उद्घाटन चंद्रपूरचे ज्येष्ठ विधिज्ञ तथा लोकमान्य टिळक स्मारक मंडळाचे अध्यक्ष ऍड रविंद्र भागवत व चंद्रपूरचे आ. किशोर जोरगेवार यांचे हस्ते दिप प्रज्वलन करुन करण्यात आले. यावेळी चांदा शिक्षण प्रसारक मंडळाचे सचिव प्रा. डॉ. अशोक जिवतोडे, सत्यशोधक समाजाचे अध्यक्ष ऍड हिराचंद बोरकुटे, नाट्यशिबीरांच्या माध्यमातून उदयोन्मुख नाट्य कलावंत घडविणारे सुशील सहारे हे प्रमुख पाहुणे म्हणून उपस्थित होते.

‘‘द कॉन्शस्’’हे नाट्य नव्या कल्पनेला अनुरुप असे नाविण्यपूर्ण असल्याने रसिकांचा या नाट्यप्रयोगास उत्स्फुर्त प्रतिसाद लाभला. या नाटकातील कलावंतांनी आपआपल्या भूमिकेला न्याय दिला. मि. शाम यांची भूमिका विशाल ढोक, मिरा चे पात्र ऍड चैताली बोरकुटे-कटलावार तर मनस्वी चे पात्र नामू ऊर्फ नामदेव बदखल यांनी साकारली. त्यांच्या भूमिकांनी प्रेक्षकांच्या हृदयाचा ठाव घेतला. तेजराज चिकटवार यांचे नेपथ्य व हेमंत गुहे यांच्या प्रकाशयोजनेने रसिकांची मने जिंकून घेतली. डिलीव्हरी बॉय म्हणून रोशनसिंह बघेल, पंकज मलिक यांचे संगीत व प्रियंका ढोक यांची रंग व वेशभूषेनेही रसिकांची मने जिंकली.

या कार्यक्रमात नाट्यक्षेत्रात योगदान देणारे सुप्रसिध्द नेपथ्यकार दिगांबर इंगळे, प्रकाशयोजनाकार हेमंत गुहे व रंग व वेशभूषाकार नितीन तोडे यांना आ. किशोर जोरगेवार व उपस्थित मान्यवरांच्या शुभहस्ते मानपत्र प्रदान करण्यात आले. कार्यक्रमाला योगदान व सहकार्याबद्दल संस्थेच्या वतीने पवन सादमवार, हिरेन शाह, सचिन इंगळे, परवेज धनानी, मुकुंद दुबे, मिथून मेश्राम, प्रेमकुमार उपरे, ऍड आसिफ शेख, संतोश गोविंदवार, ऍड विजय मोगरे, देवराव भोंगळे, डॉ मंगेश गुलवाडे, ऍड सुरेश तालेवार, राम पल्लेवार, निलिमा शिंदे , डॉ सचिन भेदे, संजय कंचर्लावार यांचा यथोचित सन्मान करण्यात आला.

नाटकाचे निर्मिती सुत्रधार ऍड अभय पाचपोर, श्रीकृष्ण लाडके, अभिजित कटलावार व राहुल बनकर यांचाही सन्मान उपस्थित मान्यवरांचे शुभहस्ते करण्यात आला. क्रिएटिव्ह फिंगर(कले साठी कला) चे उद्घाटन आ. किशोर जोरगेवार यांचे हस्ते करण्यात आले.

सदर नाटकाचा प्रयोग यशस्वी करण्यासाठी सौ प्रमिला बोरकुटे, नितिन इंगोले, प्रफुल आस्वले, रविशंकर गावंडे, बबन राखुंडे, शशांक गाढवे, पंकज नवघरे, बाबा खिरेकर, सुरज उमाटे, अंकुश राजुरकर, केविंद्र बारसागडे, वैशाख रामटेके, प्रज्वल निखार, रवींद्र वंडरे यांचे विशेष सहकार्य लाभले. कार्यक्रमाचे सूत्र संचालन ऍड अभय पाचपोर तर आभार अभिजित कटलावार यांनी मानले.

News34 chandrapur

चंद्रपूर : शहरातील महानगरपालिका मध्ये घंटागाडी स्वच्छता कर्मचारी म्हणुन कार्यरत कंत्राटी कामगारांना सुरू झालेले वाढीव वेतन कंत्राटदार बदलताच वेतन कमी करन्यात आल्याने कामगारांनी याचा तीव्र रोष व्यक्त करत धम्मचक्र अनुप्रवर्तन दिनाच्या तोंडावर काम बंद आंदोलन सुरू केले होते.

ज्यामध्ये शासनाच्या नियमानुसार किमान वेतन तसेच कामगारांच्या सुरक्षा संदर्भात विविध विषयांना घेऊन आंदोलन केले गेले. सदर आंदोलन वेळीं मनपाचे आयुक्त यांनी कामगार सहायक आयुक्त यांच्या सूचनेवरून कामगारांच्या मागण्या लेखी स्वरूपात मान्य केल्या होत्या त्यानंतर कामगारांनी आपले आंदोलन मागे घेत मनपा प्रशासना समोर धम्मपरिनिर्वाण दिनानिमित्त दिक्षा भूमीवर उद्भवणाऱ्या स्वच्छतेचा प्रश्न मार्गी लागला.

परंतू आयुक्तांनी किमान वेतन संदर्भात दिलेला शब्द पाळला नाही. त्यामुळे कामगारांत रोष व्यक्त होत असून कामगारांनी दिलेली दिनांक 04/11/2023 ची डेड लाईन संपलेली असल्याने आता दिनांक 06/11/2023 पासून परत काम बंद आंदोलन केले जाणार असल्याचे कामगार युनियन अध्यक्ष रतन गायकवाड यांनी सांगितले आहे.

News34 chandrapur

चंद्रपूर – चंद्रपूर हा औद्योगीक जिल्हा आहे. येथे अनेक उद्योग आहे. त्यामुळे या उद्योगांना पुरक असे नवे उद्योग या जिल्ह्यात उभे राहु शकतात ही बाब लक्षात घेत येथील उद्योग वाढीसाठी चंद्रपूर येथील मोरवा विमानतळाची धावपट्टी व्यावसायिक विमाने उतरण्याच्या दृष्टीने विकसीत करण्यात यावी अशी मागणी आमदार किशोर जोरगेवार यांनी केली आहे.

आमदार किशोर जोरगेवार यांनी मुंबई मंत्रालय येथे राज्याचे विधानसभा अध्यक्ष राहुल नार्वेकर यांची भेट घेतली असून या भेटी दरम्यान सदर मागणी केली आहे. या मागणीचे निवेदनही आमदार किशोर जोरगेवार यांच्या वतीने विधानसभा अध्यक्ष राहुल नार्वेकर यांना देण्यात आले आहे. यावेळी चंद्रपूर विधानसभा क्षेत्रातील इतरही प्रश्नांबाबत आमदार किशोर जोरगेवार यांची राहूल नार्वेकर यांच्याशी सकारात्मक चर्चा झाली आहे.

चंद्रपूर हा औद्यागिक जिल्हा असून मोठे वीज निर्मिती प्रकल्प, कोळसा खाणी, लोहखनिज, सिमेंट उद्योग,  कागदउद्योग, आयुध निर्माण प्रकल्प,  वनसंपत्ती,  पर्यटन असे अनेक उद्योग चंद्रपूर येथे आहे. यामुळे या क्षेत्रात अजून नवीन उद्योग आणि कारखाने उभारण्याची क्षमता आहे. या सर्व उद्योगांचे संचालन आणि नियमन मुंबई,  नागपूर,  दिल्ली,  बंगलोर,  अहमदाबाद, रायपुर या सारख्या शहरांमधून होत असते.

चंद्रपूर व गडचिरोली सारख्या सुदूर व मागास क्षेत्राला जोडण्याकरिता शासनाच्या वतीने १९६७ ला मोरवा या ठिकाणी २२ हेक्टर जागेत विमानतळ उभारण्याचा निर्णय घेण्यात आला होता. त्या अनुषंगाने विमान धावपट्टी विकसित करण्यात आली. सदर विमानतळाची धावपट्टीची लांबी 900 मीटर व रुंदी 28 मीटर इतकी आहे. त्यामुळे सदर विमानतळ केवळ छोटेखानी विमान उतरण्यासाठी योग्य आहे. तसेच सद्यस्थितीत सदर विमानतळाचा वापर केवळ व्हीआयपीच्या हालचालींसाठी केला जातो.

मात्र आता सदर विमान धावपट्टी व्यावसायिक विमान चलन च्या दृष्टीने विकसित केल्यास या विमानतळाचा वापर अधिक योग्य रीतीने केल्या जाऊ शकतो. तसेच नक्षलप्रभावित चंद्रपूर-गडचिरोली जिल्हायाकरिता सद्यस्थितीत केवळ हे एकच विमानतळ आहे. मोरवा येथील धावपट्टी चा विकास आराखडा नुसार व्यवसायिक विमान चालवण्यासाठी योग्य आहे. त्यामुळे राज्याच्या शेवटच्या टोकावर असलेल्या  व नक्षलप्रभावित चंद्रपूर-गडचिरोली जिल्ह्याला व्यवसायिकदृष्ट्या विमानसेवेने जोडण्यासाठी व  येथे नवीन रोजगार निर्मितीसाठी मोरवा, चंद्रपूर विमानतळाची धावपट्टीचा विकास करण्यात यावा अशी मागणी यावेळी आमदार किशोर जोरगेवार यांनी केली आहे.

News34 chandrapur

चंद्रपूर/नागपूर – 28 ऑक्टोबरला महाराष्ट्र प्रांतिक तैलिक महासभे ची जवाहर विद्यार्थी गृह, सिविल लाईन नागपूर येथे विभागीय बैठक पार पडली या बैठकीला प्रामुख्याने प्रदेशचे अध्यक्ष तथा वर्धा जिल्ह्याचे खासदार मा. रामदासजी तडस साहेब, कोषाध्यक्ष गजानन नाना शेलार, महासचिव डॉ. भूषण कर्डीले, सहसचिव बळवंतराव मोरघडे, अतुल वांदिले,सहसचिव जयेश बागडे, प्रदेश उपाध्यक्ष प्रकाश देवतळे, नागपूर विभागीय अध्यक्ष जगदीश वैद्य, माजी आमदार चरण वाघमारे, राज्य प्रसिद्धी प्रमुख गजानन उमाटे, विभागीय पदाधिकारी नंदकिशोर दंडारे, वैभव गोल्लर, विनायकराव तुपकर, महिला आघाडी विदर्भ संघटिका माधुरी तलमले, वंदना वनकर, प्रज्ञा बडवाईक, रमेश पिसे, किष्णाजी बेले, छबू वैरागडे, राजेंद्र झाडे, नयना झाडे, पुष्कर डांगरे व सर्व नागपूर विभागातील, जिल्ह्यातील जिल्हाध्यक्ष तथा जिल्यातील पदाधिकारी यांची मोठ्या संख्येने उपस्थिती होती.

संताजी जगनाडे महाराज यांच्या प्रतिमेला माल्यार्पण करून सर्व मान्यवरांचे स्वागत करण्यात आले या बैठकी प्रसंगी नुकतेच भारताचे प्रतिनिधित्व करून तीन सुवर्ण पदक प्राप्त करणारे ओजस देवतळे यांच्या परिवाराला सन्मानित करण्यात आले, नागपूर पोलीस उपायुक्त गुन्हे शाखा डॉ. संजय पाटील साहेब यांचा सत्कार करण्यात आला, नागपूर विभागीय उपसंचालक शिक्षण विभाग उल्हास नरळ साहेब यांचाही सत्कार करण्यात आला व बैठकीची सुरुवात करण्यात आली या बैठकीत ओबीसी आरक्षणाला धक्का लागू नये. यावर विचारमंथन करण्यात आले, सोबतच भविष्यात येणाऱ्या लोकसभा व विधानसभा निवडणुकीत तेली समाजाचे किमान ४ खासदार व 15 आमदारांना सर्वपक्षीय प्रतिनिधित्व मिळावे याकरिता सर्व तेली बांधवांनी एकत्रित येण्याचे आवाहन करण्यात आले तेली माहाराष्ट्र तेल घाना महामंडळ स्थापन करण्याची मागणी करण्यात आली.

समाज हा विदर्भात फार मोठ्या संख्येने आहे येणाऱ्या काळात ओबीसीं आरक्षणासह प्रतिनिधित्वाला जर धक्का लागला तर तेली समाज एक ओबीसीच्या घटक म्हणून राज्यभर रस्त्यावर उतरून शांततापूर्ण आंदोलन करतील इत्यादी महत्त्वाच्या बाबीवर मंथन करण्यात आले याप्रसंगी नागपूर विभागातील 200 पेक्षा जास्त पदाधिकाऱ्यांच्या नवीन नियुक्त करण्यात आल्या या बैठकीला नागपूर विभागातील ५०० पेक्षा जास्त पदाधिकारी मिटींगला उपस्थित होते.

चंद्रपुरात तेली समाज बांधवांची संख्या मोठया प्रमाणावर असून समाजात संघटनेविषयी जनजागृती व पदाधिकारी विस्तार व्हावा यासाठी चंद्रपूर शहर महिला आघाडी अध्यक्षपदाची धुरा माजी नगरसेविका कल्पना बगुलकर यांच्याकडे देण्यात आली.

कार्यक्रमाचे प्रास्ताविक नागपूर विभागाचे विभागीय अध्यक्ष जगदीश वैद्य यांनी केले तर संचालक नागपूर जिल्हा अध्यक्ष पुष्कर डांगरे व माधुरी तलमले यांनी केले तर आभार प्रदर्शन वंदना वनकर यांनी केले.

कार्यक्रमाच्या यशस्वीतेकरिता नागपूर कार्याध्यक्ष राजेश बारुतकर, रुपेश कुबडे, राजेश काळबांडे, विजय पाटील, अरुण तडस, राम जुमळे, गणेश वासुरकर, संकुल शहारे, आकाश लेंडे, दत्तु जीभकाटे, शालिनी तेलरांदे, मंगला महाजन, मंगला मस्के, निशा हटवार, जयश्री गभने, किरण बारई इत्यादी नागपूर विभागातील सर्व जिल्हा अध्यक्ष जिल्ह्यातील पदाधिकाऱ्यांनी परिश्रम घेतले.

News34 chandrapur

चंद्रपूर : चंद्रपूर शहर महानगरपालिका हद्दवाढीच्या प्रस्तावावर भूमिपुत्र युवा संघटनेने आक्षेप घेतला आहे. या प्रस्तावात चंद्रपूर शहराभोवतीच्या 13 किलोमीटर अंतरातील सर्व गावांचा समावेश करण्यात आलेला नाही. त्यामुळे आम्ही या प्रस्तावावर आक्षेप घेतो, असे संघटनेचे संयोजक दिनेश दादापाटील चोखारे यांनी जिल्हाधिकाऱ्यांना दिलेल्या पत्रात म्हटले आहे.

चंद्रपूर महानगरपालिकेची स्थापना 2011 मध्ये झाली. त्यावेळी पूर्वीच्या नगरपालिका हद्दीतील लोकसंख्या आणि वस्ती समाविष्ट करण्यात आली होती. आता स्थापनेच्या 12 वर्षांनी महापालिकेची हद्द वाढीचा प्रस्ताव राज्य सरकारकडे मंजुरीसाठी पाठवण्यात आला आहे. या प्रस्तावात मोरवा, ताडाली, साखरवाही, येरुर, पडोली, आदी गावांचा समावेश करण्यात येणार आहे. मात्र, मनपा क्षेत्रातील आजूबाजूच्या 13 किलोमीटर अंतर्गत असलेल्या सर्व गावांचा आणि मोठ्या गावांचा समावेश करण्यात आलेला नाही. त्यामुळे या प्रस्तावावर आक्षेप घेण्यात येत आहे.

पूर्वीपासून समाविष्ट असलेल्या प्रभागाचा सर्व परीने विकास करावा. आताच मनपा क्षेत्रात पाण्याची समस्या जटील आहे. रस्ते बरोबर नाही. मग हद्द वाढवून काय होईल. सध्या पूर्वीपासून समाविष्ट भागातच विकास होऊ द्या. नागरिकांना सर्व सेवा सुविधांचा लाभ मिळू द्या, असे चोखारे यांनी म्हटले आहे.

चंद्रपूर शहराचा विकास हा सर्वांगीण असावा, यासाठी मनपा क्षेत्रातील आजूबाजूच्या 13 किलोमीटर अंतर्गत असलेल्या सर्व गावांचा समावेश करण्यात यावा. यामुळे शहराचा विकास होईल आणि शहरातील रहिवाशांना अनेक सुविधा उपलब्ध होतील. जवळच्या इतर गावांचा समावेश न करता मोरवा, ताडाली, साखरवाही, येरुर, पडोली, आदी गावांचा समावेश करून ही हद्द वाढ करणे म्हणजे जाणीवपूर्वक दुजाभाव करण्यासारखे आहे. त्यामुळे मनपापासून जवळपास असलेली सर्व गावे यात समाविष्ट करण्यात यावे, अन्यथा समावेश करू नये, अशी विनंती चोखारे यांनी केली आहे.