My Blog

Tag: MH34

  • चंद्रपुरात वेकोलीच्या चुकीमुळे 12 वर्षीय मुलाचा मृत्यू

    News34 chandrapur

    चंद्रपूर – वेकोली दुर्गापूर क्षेत्रात असलेल्या सिव्हरेज प्लांट मध्ये 12 वर्षीय मुलाचा बुडून मृत्यू झाला.

    या घटनेत दुर्गापुरात राहणाऱ्या 12 वर्षीय प्रेम बाळू वाघमारे चा मृत्यू झाला.

    दुर्गापूर वेकोली क्षेत्रात मागील अनेक वर्षांपासून बंद असलेल्या सिव्हरेज प्लांट जवळ 3 मुले खेळायला गेली होती, 2 मुले घरी परतली मात्र प्रेम घरी न आल्याने कुटुंब व मित्रांनी त्याची शोधाशोध सुरू केली.

     

    सिव्हरेज प्लांट जवळ मित्र व कुटुंब पोहचले असता त्याठिकाणी प्रेम चा मृतदेह आढळला, सिव्हरेज प्लांट मध्ये असलेल्या पाण्यात बुडून प्रेम चा मृत्यू झाला.

     

    या घटनेमुळे संतप्त झालेल्या नागरिकांनी प्रेम चा मृतदेह वेकोली उपविभागीय अधिकाऱ्यांच्या कार्यालयात आणत ठिय्या आंदोलन सुरू केले.

     

    तणावाची परिस्थिती निर्माण होताचं वेकोलीचे अधिकारी, पोलीस प्रशासन व दंगापथक त्याठिकाणी दाखल झाले.

    इंटक चे केके सिंग यांनी त्याठिकाणी पोहचत घटनेची माहिती घेत पीडित कुटुंबाला 25 लाखांची मदत मिळावी अशी मागणी करीत त्याबाबत सूचना केल्या, वेकोली द्वारे तात्काळ त्याबाबत पत्र व्यवहार करण्याचे आश्वासन मिळाले व अंत्यसंस्कार साठी 25 हजारांची मदत वेकोली तर्फे देण्यात आली.

     

    विशेष म्हणजे मागील अनेक वर्षांपासून तो सिव्हरेज प्लांट बंद अवस्थेत आहे, या प्लान्ट मध्ये आतापर्यंत अश्या 3 घटना घडल्या असून याबाबत वेकोलीने त्या प्लांट ची विल्हेवाट लावली नसल्याने आज 12 वर्षीय मुलाचा मृत्यू झाला.

    या घटनेमुळे दुर्गापूर परिसरात शोककळा पसरली आहे.

  • बल्लारपुरात हत्येचा थरार

    News34 chandrapur

    बल्लारपूर – बल्लारपूरमध्ये, केवळ 1500 रुपयांची एका तरुणाची निर्घृण हत्या करण्यात आली तर एक युवक गंभीर जखमी झाला.

     

    6 नोव्हेम्बरला रात्री साडेदहा च्या सुमारास विद्यानगर वार्ड पंचशील चौकात दोन महिलांमध्ये आपापसात उधार घेतलेल्या पैशाच्या व्यवहाराबाबत वाद सुरू होता, त्यानंतर बचावासाठी गेलेल्या 2 युवकांनी वाद सोडविण्याचा प्रयत्न केला. मात्र त्या महिलांनी युवकांवर हल्ला केला, लाठी काठ्यांनी दोन्ही युवकांवर वार करण्यात आला, या हल्ल्यात 32 वर्षीय ललित उर्फ नागेश रमेश तोडसाम चा जागीच मृत्यू झाला तर 24 वर्षीय अमोल देवगडे हा गंभीर जखमी झाला.

    20 वर्षीय शीतल ऋतिक गवई व आकांक्षा नामक महिलेकडून 1500 रुपये उधार घेतले होते, मात्र शीतल ते पैसे परत करीत नव्हती, सोमवारी रात्री आकांक्षा चा भाऊ चैतन्य पंचशील चौकातून जात असताना त्याला शीतल गवई भेटली त्यावेळी त्याने माझ्या बहिणीचे पैसे तू का देत नाही अशी विचारणा केली असता शीतल चा पती रितिक ने चैतन्य ला शिवीगाळी केली, त्याचवेळी ललित व अमोल त्याठिकाणी आले असता त्यांनी रितीक ला समजावले असता दोघात धक्काबुक्की झाली.

     

    परिसरातील नागरिकांनी सुरू असलेला वाद सोडविला, त्यानंतर रितीक घरी गेला त्याने घडलेला प्रसंग आई आशा गवई यांना सांगितला असता त्यांनी आपल्या सोबत सौराब खान यांना घेत माझ्या मुलाला का मारहाण केली म्हणून अमोल व ललित वर काठीने मारहाण करण्यास सुरुवात केली. त्यावेळी आशा गवई यांच्या सोबत असलेले रितीक गवई, शीतल गवई, सौराब खान, बंडू नगराळे यांनी सुद्धा अमोल व ललित वर काठी व दगडाने वार केला, यामध्ये ललित चा जागीच मृत्यू झाला तर अमोल हा गंभीर जखमी झाला, सध्या अमोल वर जिल्हा सामान्य रुग्णालयात उपचार सुरू आहे.

     

    बल्लारपूर पोलिसांनी तोडसाम हत्या प्रकरणात 5 आरोपीना अटक केली आहे, ज्यामध्ये 2 महिलांचा समावेश आहे, पुढील तपास पोलीस निरीक्षक उमेश पाटील यांच्या मार्गदर्शनाखाली बल्लारपूर पोलीस करीत आहे.

  • चंद्रपूर जिल्ह्यातील महिला आमदाराने ग्रामपंचायत निवडणुकीत इतिहास रचला

    News34 chandrapur

    चंद्रपूर : समाजातील शेवटच्या वर्गाला न्याय देण्यासाठी लढा देणाऱ्या महिला आमदार म्हणून प्रतिभाताई धानोरकर यांची ओळख निर्माण झाली आहे. मतदार संघातील ग्रामपंचायत निवडणुकीत कामाची पावती मिळाली आहे. वरोरा तालुक्यातील सालोरी येथे तब्बल २५ वर्षानंतर काँग्रेसचा स्वबळावर झेंडा रोवला आहे.

     

    यात सरपंचपदी प्रतिभाताई भानुदास शेरकुरे तर सदस्यपदी राहुल मारोती शेरकुरे, सिमा तुळशीदास मगरे, संगीता नागोराव नन्नावरे, रामचंद्र रघुनाथ उईके निवडून आले आहे.

     

    वरोरा जनसंपर्क कार्यालयात आमदार प्रतिभाताई धानोरकर यांनी विजयी उमेदवारांचा सत्कार केला. यावेळी तालुकाध्यक्ष मिलिंद भोयर, विद्यार्थी कॉंग्रेस (NSUI) तालुकाध्यक्ष रूपेश तेलंग, माजी सभापती कृ. उ. बा. स. वरोरा राजेंद्र चिकटे, हरीश जाधव संचालक कृ. उ. बा. स.,युवक कॉंग्रेस उपाध्यक्ष राहुल नन्नावरे,सेवा सहकारी संस्था अध्यक्ष अरुण शेरकुरे,भूषण पाटील, अमोल शेलकर, प्रभुदास पाटील, मधुकर पुसन्नाके, राजेंद्र मडवी, मारोती मिलमिले, किशोर मडावी, मिथुन आत्राम, निलेश गायकवाड, हनुमान घरात,अनिल शेरकुरे,विकास जांभुळे,मारोती चौखे,नामदेव मगरे,मनोहर रंदई,संजय काढमेघे,कैलास तुमसरे,चंपत ढोक,कवडू वाघ,सचिन शेंडे,स्वप्नील दडमल यांनी प्रयत्न केले.

  • बस व दुचाकीच्या अपघातात युवक ठार

    News34 chandrapur

    गडचांदूर – कोरपणा मार्गावरील खिर्डी गावाजवळ बस आणि दुचाकीचा भीषण अपघात झाला असून त्यात दुचाकीस्वार युवकाचा जागीच मृत्यू झाला.

    निखिल कोंडेकर असे मृत युवकांचे नाव असून तो विसापूर ता. बल्लारपूर येथील रहिवासी आहे.

     

    किनवट आगाराची बस क्र MH 30 BL 1650 गडचांदुर मार्गे चंद्रपूरला जात असताना समोरून येणारा दुचाकी स्वार युवकाने बस ला समोरासमोर धडक दिली, या अपघातात निखिल जागीच ठार झाला. घटनास्थळी गडचांदूर पोलीस स्टेशनचे पथक दाखल झाले असून पुढील तपास गडचांदूर पोलीस करीत आहे.

  • द कॉन्शन्स’’ ने जिंकली नाट्य रसिकांची मने

    News34 chandrapur

    चंद्रपूर :- हम बहुउद्देशिय संस्था चंद्रपूर द्वारे डॉ. हेडगेवार जन्मशताब्दि सेवा समिती द्वारा संचालित सेवा प्रकल्प व निराधार प्राण्याची सेवा करणारी प्यार फाऊॅंडेशन या दोन संस्थांच्या आर्थिक मदतीकरीता दि 04 नोव्हेबर रोजी अमेय दक्षिणदास लिखित व ऍड चैताली बोरकुटे-कटलावार दिग्दर्शीत दोन अंकी मराठी नाटक ‘‘द कॉन्शस्’’ चा यशस्वी प्रयोग मोठ्या थाटात उत्साहात पार पडला.

    स्थानिक प्रियदर्शीनी सांस्कृतिक सभागृह येथे आयोजित या कार्यक्रमाचे उद्घाटन चंद्रपूरचे ज्येष्ठ विधिज्ञ तथा लोकमान्य टिळक स्मारक मंडळाचे अध्यक्ष ऍड रविंद्र भागवत व चंद्रपूरचे आ. किशोर जोरगेवार यांचे हस्ते दिप प्रज्वलन करुन करण्यात आले. यावेळी चांदा शिक्षण प्रसारक मंडळाचे सचिव प्रा. डॉ. अशोक जिवतोडे, सत्यशोधक समाजाचे अध्यक्ष ऍड हिराचंद बोरकुटे, नाट्यशिबीरांच्या माध्यमातून उदयोन्मुख नाट्य कलावंत घडविणारे सुशील सहारे हे प्रमुख पाहुणे म्हणून उपस्थित होते.

     

    ‘‘द कॉन्शस्’’हे नाट्य नव्या कल्पनेला अनुरुप असे नाविण्यपूर्ण असल्याने रसिकांचा या नाट्यप्रयोगास उत्स्फुर्त प्रतिसाद लाभला. या नाटकातील कलावंतांनी आपआपल्या भूमिकेला न्याय दिला. मि. शाम यांची भूमिका विशाल ढोक, मिरा चे पात्र ऍड चैताली बोरकुटे-कटलावार तर मनस्वी चे पात्र नामू ऊर्फ नामदेव बदखल यांनी साकारली. त्यांच्या भूमिकांनी प्रेक्षकांच्या हृदयाचा ठाव घेतला. तेजराज चिकटवार यांचे नेपथ्य व हेमंत गुहे यांच्या प्रकाशयोजनेने रसिकांची मने जिंकून घेतली. डिलीव्हरी बॉय म्हणून रोशनसिंह बघेल, पंकज मलिक यांचे संगीत व प्रियंका ढोक यांची रंग व वेशभूषेनेही रसिकांची मने जिंकली.

     

    या कार्यक्रमात नाट्यक्षेत्रात योगदान देणारे सुप्रसिध्द नेपथ्यकार दिगांबर इंगळे, प्रकाशयोजनाकार हेमंत गुहे व रंग व वेशभूषाकार नितीन तोडे यांना आ. किशोर जोरगेवार व उपस्थित मान्यवरांच्या शुभहस्ते मानपत्र प्रदान करण्यात आले. कार्यक्रमाला योगदान व सहकार्याबद्दल संस्थेच्या वतीने पवन सादमवार, हिरेन शाह, सचिन इंगळे, परवेज धनानी, मुकुंद दुबे, मिथून मेश्राम, प्रेमकुमार उपरे, ऍड आसिफ शेख, संतोश गोविंदवार, ऍड विजय मोगरे, देवराव भोंगळे, डॉ मंगेश गुलवाडे, ऍड सुरेश तालेवार, राम पल्लेवार, निलिमा शिंदे , डॉ सचिन भेदे, संजय कंचर्लावार यांचा यथोचित सन्मान करण्यात आला.

    नाटकाचे निर्मिती सुत्रधार ऍड अभय पाचपोर, श्रीकृष्ण लाडके, अभिजित कटलावार व राहुल बनकर यांचाही सन्मान उपस्थित मान्यवरांचे शुभहस्ते करण्यात आला. क्रिएटिव्ह फिंगर(कले साठी कला) चे उद्घाटन आ. किशोर जोरगेवार यांचे हस्ते करण्यात आले.

     

    सदर नाटकाचा प्रयोग यशस्वी करण्यासाठी सौ प्रमिला बोरकुटे, नितिन इंगोले, प्रफुल आस्वले, रविशंकर गावंडे, बबन राखुंडे, शशांक गाढवे, पंकज नवघरे, बाबा खिरेकर, सुरज उमाटे, अंकुश राजुरकर, केविंद्र बारसागडे, वैशाख रामटेके, प्रज्वल निखार, रवींद्र वंडरे यांचे विशेष सहकार्य लाभले. कार्यक्रमाचे सूत्र संचालन ऍड अभय पाचपोर तर आभार अभिजित कटलावार यांनी मानले.

  • ग्रामपंचायत निवडणुकांमध्ये ओबीसी आणि मराठ्यांचा कौल देवेंद्र फडणवीसांना!

    News34 chandrapur

    मुंबई : मराठा आरक्षणाच्या आंदोलनाचा धुरळा, त्यातून झालेली टीका हे सगळं पचवून राज्यातल्या सत्ताधारी भाजपने ग्रामपंचायत निवडणुकांमध्ये इतर पक्षांना आस्मान दाखवलंय. राज्याच्या ग्रामीण भागातील ओबीसी आणि मराठा समाजाने देवेंद्र फडणवीसांच्या नेतृत्वाला साथ देत ७०० हून अधिक ग्रामपंचायतींचं दान भाजपच्या पदरात टाकलंय. आतापर्यंत हाती आलेल्या ग्रामपंचायत निकालांपैकी 427 ग्रामपंचायती म्हणजे 33 टक्के यश एकट्या भाजपला मिळालंय.

     

    राज्यातील 2359 ग्रामपंचायतींच्या निवडणुका नुकत्याच पार पडल्या. मनोज जरांगे – पाटील यांच्या मराठा आरक्षणासाठी सुरू झालेल्या उपोषणानंतर राज्यात मोठं आंदोलन उभं राहिलं. आंदोलनाला हिंसक वळण लागल्यानंतर मनोज जरांगे – पाटील यांनी भाजप आणि विशेषतः देवेंद्र फडणवीस यांच्यावर जोरदार टीका केली होती. मात्र, या टीकेचे धनी होऊन देखील ग्रामपंचायत निवडणुकीत मोठ्या संख्येनं मराठा समाज देवेंद्र फडणवीसांच्या पाठीशी असल्याचं निवडणूक निकालांमधून स्पष्ट होतंय. त्याचबरोबर राज्यातल्या ओबीसी समाजाने देखील देवेंद्र फडणवीसांना पूर्वीपासून दिलेली साथ अजूनही सोडलेली नाही.

     

    उलट ओबीसी आणि मराठ्यांनीच भाजपचा हा मोठा विजय साकार केल्याचं विश्लेषण राजकीय विश्लेषकांनी केलंय. यामुळे राज्याचं खरं नेतृत्व देवेंद्र फडणवीस हेच असल्याच्या विचाराला आता पुन्हा बळकटी मिळताना दिसतेय.
    ग्रामपंचायत निवडणूक निकालांच्या दुपारी 3.30 वाजता आलेल्या निकालांनुसार विजयी घोषित झालेल्यांमध्ये भाजप ७१७ राष्ट्रवादी कॉंग्रेस (अजित पवार गट) ४०७, शिवसेना (शिंदे गट) २६२, राष्ट्रवादी कॉंग्रेस (शरद पवार गट) १८५, कॉंग्रेस २०७, शिवसेना (ठाकरे गट) ११४, आणि इतर 60 आहेत.

    आंदोलनातील टीकेचा परिणाम नाही

    मराठा आरक्षण आंदोलन काळात टीका होऊनही उपमुख्यमंत्री देवेंद्र फडणवीस यांनी मनोज जरांगे – पाटील यांचं उपोषण मागे घेण्यासाठी विशेष प्रयत्न केले. जरांगे – पाटील यांना उपोषण मागे घेण्याची विनंती करणाऱ्यांमध्ये 4 मंत्र्यांसह 2 माजी न्यायमूर्तींना पाठवण्याची भूमिका देवेंद्र फडणवीस यांनी घेतली. या माजी न्यायमूर्तींंनीची जरांगेंना आरक्षण मिळवण्यासाठी लागणारा वेळ व त्यामागची कायदेशीर गुंतागुंत समजवून सांगितली.

     

    हे जाणून घेतल्यावर जरांगे यांनी उपोषण मागे घेण्याचा निर्णय जाहीर केला. त्यामुळे मराठा समाजाला आरक्षण देण्यासाठी देवेंद्र फडणवीस प्रामाणिक प्रयत्न करत असल्याचा संदेश जनतेत गेला. हे सगळं होत असताना ओबीसींच्या आरक्षणाला धक्का लागणार नसल्याचा पुनरुच्चारही देवेंद्र फडणवीस यांनी केला होता. या सगळ्याचा परिपाक म्हणूनच अतिशय भरघोस यश भाजपच्या पारड्यात पडल्याचं राजकीय जाणकारांना वाटतंय. निवडणूक निकालांमधून हे सिद्ध होत असून निकाल येण्यासाठी शिल्लक राहिलेल्या इतर ग्रामपंचायतींच्या निकालांमध्येही भाजपने आघाडी घेतली आहे.

  • त्या शाळेवर होणार कारवाई, प्रशासनाचे संकेत

    News34 chandrapur

    चंद्रपूर – 3 नोव्हेम्बरला शहरातील अष्टभुजा प्रभागातील नटराज इंग्रजी शाळेत सॅनिटरी पॅडची विल्हेवाट न लावल्याने मुख्याध्यापिकेने तब्बल 23 विद्यार्थिनींना स्वच्छतागृहात डांबले होते.

    या संतापजनक शिक्षेची तक्रार विद्यार्थिनी व पालकांनी युवासेना जिल्हाप्रमुख विक्रांत सहारे यांच्याकडे केली, त्यानंतर युवासेनेने शाळेत धडक देत शाळा प्रशासनाला जाब विचारला.

     

    6 नोव्हेम्बरला युवासेना जिल्हाप्रमुख सहारे यांच्या नेतृत्वात शिष्टमंडळाने शिक्षणाधिकारी व अप्पर जिल्हाधिकारी यांची भेट घेत शाळा व्यवस्थापनावर कारवाई करीत मान्यता रद्द करण्याची मागणी केली.

     

    यावर शिक्षणाधिकारी यांनी याबाबत सविस्तर चौकशी करीत लवकरात लवकर कारवाई करू असे आश्वासन दिले, अप्पर जिल्हाधिकारी यांनी सुद्धा असे प्रकार खपवून घेणार नसल्याचे बोलत या प्रकरणी तात्काळ दखल घेत कारवाईचे संकेत दिले.

     

    विद्यार्थिनींना मानसिक त्रास देणाऱ्या शाळा व्यवस्थापणाविरोधात युवासेना कारवाई होईपर्यंत शांत बसणार नाही अशी प्रतिक्रिया जिल्हाप्रमुख विक्रांत सहारे यांनी दिली.

     

    यावेळी युवतीसेना जिल्हाप्रमुख रोहिणी पाटील, सुमित अग्रवाल, शहबाज शेख, बाळू भगत, सूरज रॉय, संघदीप रामटेके, पराग कुत्तरमारे, हर्षल येलमुले, अनुष्का खनके, रोशनी गोल्डर, गोविंदा असोपा, नरेश वासनिक यांची उपस्थिती होती.

  • ग्रामपंचायत निवडणूक निकालांमध्ये भाजपला आघाडी

    News34 chandrapur

    मुंबई – राज्यात नुकत्याच झालेल्या ग्रामपंचायत निवडणुकीत देवेंद्र फडणवीसांच्या नेतृत्वाखालील भाजपने जोरदार मुसंडी मारत निकालांमध्ये आघाडी मिळवली आहे. आगामी लोकसभा, विधानसभा निवडणुकांच्या पार्श्वभूमीवर राज्यातील 2359 ग्रामपंचायतींच्या निवडणूक निकालांना महत्त्व प्राप्त झालंय. विशेष म्हणजे भाजपने जिंकलेल्या ग्रामपंचायतींच्या विजयी उमेदवारांमध्ये मराठा समाजाचं प्राबल्य दिसून आलंय.

     

    त्यामुळे ग्रामीण भागातील मराठा समाजाने देवेंद्र फडणवीसांना साथ दिल्याचं स्पष्ट होतंय. मराठा आरक्षणाच्या आंदोलनात फडणवीसांना काहींनी विरोध करूनही हे चित्र पुढे आल्याने भाजपच्या गोटात आनंदाचं वातावरण पसरलंय.

     

    ग्रामपंचायत निवडणूक निकालांच्या सकाळी १२ वाजेपर्यंत आलेल्या निकालांनुसार विजयी घोषित झालेल्यांमध्ये भाजप २०२, राष्ट्रवादी कॉंग्रेस (अजित पवार गट) १२१, शिवसेना (शिंदे गट) ११५, कॉंग्रेस ६३, शिवसेना (ठाकरे गट) ५६, राष्ट्रवादी कॉंग्रेस (शरद पवार गट)६५, आणि इतर ६९

    इतर ग्रामपंचायतींच्या निकालांमध्येही भाजपने आघाडी कायम राखली आहे. उपमुख्यमंत्री देवेंद्र फडणवीस यांनी केलेल्या प्रचाराला ग्रामीण भागात साथ मिळाल्याचं दिसतंय.

  • बल्लारशाह-वर्धा डेमु ट्रेन च्या वेळापत्रकात बदल

    News34 chandrapur

    चंद्रपूर- जिल्ह्यातील प्रवासी, नोकरदार व रेल सुविधा संघर्ष समितीच्या पदाधिकाऱ्यांच्या मागणीची दखल घेवून राष्ट्रीय मागासवर्गीय आयोगाचे अध्यक्ष तथा पूर्व केंद्रीय गृहराज्यमंत्री हंसराज अहीर यांनी अखेर ट्रेन क्र. 01316 बल्हारशाह-वर्धा या विशेष डेमू ट्रेनच्या वेळापत्रकामध्ये बदल करवून घेत जिल्ह्यातील प्रवाशांना दिलासा दिला आहे.

     

    सदर ट्रेन ही यापूर्वी बल्हारशाह स्थानकातून सायंकाळी 05.00 वा सोडण्यात येत होती. त्यामुळे जिल्ह्यातील रेल्वे प्रवासी विशेषतः शासकीय कर्मचाऱ्यांसाठी  ही ट्रेन असुविधाकारक ठरत असल्याने झेडआरयुसीसी चे सदस्य दामोदर मंत्री व रेल्वे सुविधा संघर्ष समितीच्या पदाधिकाऱ्यांनी हंसराज अहीर यांची भेट घेवून त्यांचेकडे ही अडचण व्यक्त केली होती.

     

    या अडचणीची दखल घेवून अहीर यांनी या डेमू ट्रेनची वेळ बदलण्याकरीता केंद्रीय रेल्वेमंत्री, रेल्वे बोर्ड चेअरमन यांचेशी पत्रव्यवहार व प्रत्यक्ष चर्चा करुन या ट्रेनची वेळ बदलवून बल्हारशाह-वर्धा प्रवास करणाऱ्या  प्रवाशांना सुविधा उपलब्ध केली आहे. आता ही डेमू ट्रेन बल्हारशाह वरुन सायंकाळी 06.30 वा. सुटून चंद्रपूर येथे 06.53 वा. पोहचेल व ही ट्रेन वर्धेला रात्रो 09.30 वा. पोहचणार आहे. या बदलामुळे नोकरपेशा लोकांना चांगली सुविधा झाली असून त्यांना कार्यालयाची वेळ सांभाळून यामुळे सोयीचा प्रवास करण्याची संधी मिळाली आहे.

     

    डेमू ट्रेनच्या वेळापत्रकात बदल करवून घेत जिल्ह्यातील प्रवाशांना सुविधा उपलब्ध केल्याबद्दल रेलसुविधा संघर्ष समितीचे पदाधिकारी सर्वश्री रमणीकभाई चव्हाण, दामोदर मंत्री, नरेंद्र सोनी, शाम सारडा, डॉ भूपेश भलमे, पूनम तिवारी, प्रदिप माहेश्वरी, अनिश दिक्षित, अशोक रोहरा, राजेश सादरानी, नरेश लेखवानी, संजय मंघानी, प्रमोद त्रिवेदी, सुदाम यादव, महावीर मंत्री, रमेश बोथरा, शकरसिंह राजपूरोहीत, प्रभाकर मंत्री, प्रल्हाद शर्मा, विनोद बजाज, मिलिंद दाभेरे, गौतम यादव यांनी हंसराज अहीर यांची भेट घेवून अभिनंदन केले. जिल्ह्यातील अन्य महत्वपूर्ण रेल्वे विषयक समस्या व आवश्यक असलेल्या ट्रेन सुरु करण्यास पुढाकार घ्यावा अशी मागणी केली. सदर पदाधिकाऱ्यांशी  चर्चा करतांना हंसराज अहीर यांनी मुंबई करीता थेट गाडी सुरु करण्यास तसेच अन्य रेल्चे विषयक प्रश्नांबाबत आपण प्रयत्न करु असे आश्वासन दिले. यासंदर्भात रेल्वे मंत्री व चेअरमन यांचेसोबत लवकरच बैठक घेत असल्याची माहिती त्यांनी रेल्वे समितीच्या पदधिकाऱ्यांना दिली.

  • चंद्रपूर शहरातील शाळेत प्राचार्यांने विद्यार्थिनींना दिली संतापजनक शिक्षा

    News34 chandrapur

    चंद्रपूर – चंद्रपूर येथील नटराज इंग्लिश स्कूलमध्ये एक भयावह घटना उघडकीस आली, जिथे मुख्याध्यापिका श्रीमती सरकार यांनी 23 शाळकरी विद्यार्थिनींना सॅनिटरी पॅड्सची विल्हेवाट न लावल्याने शिक्षा म्हणून पूर्ण तासभर बाथरूममध्ये बंद केले. क्रूरता आणि निष्काळजीपणाच्या या कृत्यामुळे मुलींना तीव्र त्रास सहन करावा लागला, काहींना त्यांची सुटका झाल्यावर अस्वस्थ वाटू लागले काहींना उलट्या देखील झाल्या.

    अष्टभुजा प्रभागात असलेल्या नटराज इंग्रजी शाळेत 3 नोव्हेम्बरला हा प्रकार घडला, वर्ग 7 ते 10 वी च्या तब्बल 23 विद्यार्थिनींना शाळेच्या बाथरूम मध्ये डांबण्यात आले होते.

     

    जेव्हा मुलींनी धैर्याने या कृत्याची तक्रार शिक्षकांसोबत सामायिक केली, तेव्हा त्यांना समर्थन आणि सहानुभूतीऐवजी हास्य आणि उपहासात्मक वागणूक मिळाली. मात्र, न्याय मिळवण्याच्या निर्धाराने मुलींनी त्यांच्या पालकांना घडलेल्या या प्रकाराची हकीकत सांगितली, त्यांनी तातडीने ही घटना युवासेना जिल्हाप्रमुख विक्रांत सहारे यांना कळवली.

     

    तक्रार मिळताच जिल्हाप्रमुख सहारे व युवती सेना जिल्हाधिकारी रोहिणी पाटील यांनी तातडीने हस्तक्षेप करत शाळेला भेट देऊन या लज्जास्पद कृत्याचा जाब विचारला. प्राचार्य सरकारकडून सुरुवातीला नकार मिळाला आम्ही जे केलं ती त्यांना शिक्षा म्हणून केलं, युवा सेनेच्या अथक प्रयत्नांमुळे अखेरीस प्राचार्य सरकार यांना चूक मान्य करून पश्चात्ताप करण्यास भाग पाडले.

     

    या संतापजनक घटनेची प्रतिक्रिया म्हणून विक्रांत सहारे आणि रोहिणी पाटील यांनी जिल्हाधिकारी, शिक्षणाधिकारी आणि जिल्हा पोलिस अधीक्षकांकडे तक्रार करणार आल्याची माहिती दिली. या बेजबाबदार वर्तनामुळे शाळेची मान्यता रद्द करण्याची मागणी करण्याचा मानसही त्यांनी व्यक्त केला आहे. सोबत या संतापजनक कृत्य केल्याने शाळा व्यवस्थापनावर गुन्हा दाखल करू अशी मागणी आम्ही प्रशासनाला करणार असल्याची माहिती सुद्धा यावेळी युवासेना पदाधिकारी यांनी दिली.

     

    यावेळी युवासेना शहर प्रमुख शहबाज शेख, युवा सेना उपशहर प्रमुख संगदीप रामटेके, युवती सेना उपजिल्हाधिकारी धनश्री हेडाऊ, अनुष्का खनके, रोशनी गोल्डर,सूरज रॉय व गोविंदा असोपा उपस्थित होते.

     

    नटराज इंग्रजी शाळेच्या प्राचार्य सरकार यांच्याशी संपर्क साधला असता त्यांनी सांगितले की बाथरुम मध्ये विद्यार्थिनी सॅनिटरी पॅड ची विल्हेवाट लावत नसल्याने त्यांना स्वच्छतेचे महत्व कळावे यासाठी आम्ही त्यांना शिक्षा दिली, जर विद्यार्थी दुखावले असतील तर मी त्यांची माफी नक्की मागणार.

Powered by
►
Necessary cookies enable essential site features like secure log-ins and consent preference adjustments. They do not store personal data.
None
►
Functional cookies support features like content sharing on social media, collecting feedback, and enabling third-party tools.
None
►
Analytical cookies track visitor interactions, providing insights on metrics like visitor count, bounce rate, and traffic sources.
None
►
Advertisement cookies deliver personalized ads based on your previous visits and analyze the effectiveness of ad campaigns.
None
Powered by