My Blog

Author: Admin

  • चंद्रपुरात पुढच्या सहा महिन्यांत कॅन्सर हॉस्पिटल येणार लोकांच्या सेवेत

    चंद्रपुरात पुढच्या सहा महिन्यांत कॅन्सर हॉस्पिटल येणार लोकांच्या सेवेत

    News34 chandrapur

    चंद्रपूर : गेल्या अडीच वर्षांपासून रखडलेल्या चंद्रपूर कॅन्सर केअर हॉस्पीटलच्या कामाला राज्याचे वने, सांस्कृतिक कार्य, मत्स्यव्यवसाय मंत्री तथा जिल्ह्याचे पालकमंत्री सुधीर मुनगंटीवार यांच्या पाठपुराव्यामुळे गती मिळाली आहे. त्यामुळे जिल्ह्यातील कॅन्सर पीडितांना मोठा दिलासा मिळाला आहे. ऑक्टोबर 2022 पर्यंत या हॉस्पीटलचे केवळ 30 टक्के काम झाले होते. मात्र गेल्या एक वर्षात पालकमंत्री सुधीर मुनगंटीवार यांनी हॉस्पिटलच्या उभारणीकरिता घेतलेल्या नियमित बैठका आणि, शासनाकडे केलेल्या पाठपुराव्यामुळे आता हॉस्पीटलचे 87 टक्के काम पूर्ण झाले आहे. येत्या सहा महिन्यांमध्ये कॅन्सर हॉस्पिटल लोकांच्या सेवेसाठी उपलब्ध होणार आहे.

     

    जिल्ह्याचे पालकमंत्री सुधीर मुनगंटीवार यांच्या अध्यक्षतेत आढावा बैठक घेण्यात आली. यावेळी मुंबईवरून दूरदृष्यप्रणालीद्वारे वैद्यकीय शिक्षण विभागाचे प्रधान सचिव दिनेश वाघमारे, तर जिल्हाधिकारी कार्यालयात जिल्हाधिकारी विनय गौडा, जी.सी. मुख्य कार्यकारी अधिकारी विवेक जॉन्सन, टाटा कॅन्सर हॉस्पीटलचे डॉ. कैलाश शर्मा व त्यांची टीम, शासकीय वैद्यकीय महाविद्यालयाचे अधिष्ठाता डॉ. मिलिंद फुलपाटील, सहाय्यक अधिष्ठाता डॉ. मिलिंद कांबळे यांची उपस्थिती होती.

     

    चंद्रपूर येथे कॅन्सर हॉस्पीटलच्या निर्मितीसाठी चंद्रपूर कॅन्सर केअर फाऊंडेशनची स्थापन करण्यात आली आहे, असे सांगून पालकमंत्री श्री. मुनगंटीवार म्हणाले, ‘27 जून 2019 ला या हॉस्पीटलच्या बांधकामाचे वर्कऑर्डर देण्यात आले. मात्र अडीच वर्षे या रुग्णालयाचे काम पूर्णपणे थंडबस्त्यात पडले. गेल्या वर्षीपासून या कामाला गती देण्यात आली असून एका वर्षात 30 टक्क्यांवरील बांधकाम आज 87 टक्क्यांपर्यंत पोहचले आहे. कॅन्सर हॉस्पीटल येत्या सहा महिन्यात सुसज्ज इमारत आणि अत्याधुनिक उपकरणांसह सज्ज होऊन कॅन्सर पीडितांना उपचाराकरीता उपलब्ध करावा अशा सूचना श्री. मुनगंटीवार यांनी दिल्या. यावेळी कॅन्सर फाऊंडेशनच्या संचालकांनी कॅन्सर हॉस्पिटल येत्या सहा महिन्यात सुरू करण्याचे आश्वासन दिले.

     

    ‘हॉस्पिटलच्या गुणवत्तेत तडजोड नको’

    कॅन्सर हॉस्पीटलचे बांधकाम, उपकरणांची उपलब्धता, आवश्यक मनुष्यबळ, त्यांचे वेतन आदींसाठी गॅप फंडींगचा विषय तात्काळ मार्गी लावा. तसेच हॉस्पीटलच्या गुणवत्तेमध्ये कुठलीही तडजोड करू नये. याबाबत जिल्हाधिकारी यांनी दर पंधरा दिवसांत कामाचा आढावा घ्यावा. जिल्ह्यातील कॅन्सर पीडित रुग्णांना दिलासा देण्यासाठी या कामात आता प्राधान्याने पुढे जाण्याचे निर्देश पालकमंत्री श्री. मुनगंटीवार यांनी दिले.

     

    आरोग्य तपासणीच्या माध्यमातून होणार कॅन्सरचे निदान

    मोठ्या प्रमाणात कॅन्सर रुग्णांची वाढ ही अतिशय गंभीर बाब आहे. जिल्ह्यातील प्रदुषण हा सुध्दा एक घटक त्यासाठी कारणीभूत राहू शकतो. तसेच ब्रेस्ट कॅन्सर, मुखाचा कॅन्सर, गर्भाशय आणि गर्भाशयाच्या मुखाचा कॅन्सर आदी प्रकार आज मोठ्या प्रमाणात आढळून येत आहेत. त्यामुळे जिल्ह्यातील रुग्णांची तपासणी करून कॅन्सरचे निदान करण्यासाठी टाटा ट्रस्टच्या वतीने फिरत्या बसच्या माध्यमातून रुग्ण शोध मोहीम राबविण्यात येणार आहे.

     

    सुसज्ज व अत्याधुनिक उपकरणांसह निर्मिती

    चंद्रपूर येथे 2 लक्ष 35 हजार चौरस फूट जागेवर 140 खाटांचे चंद्रपूर कॅन्सर केअर हॉस्पीटलचे बांधकाम होत असून हॉस्पिटलची मुख्य इमारत ग्राऊंड फ्लोअर अधिक चार मजले, रेडीएशन ब्लॉक ग्राऊंड फ्लोअर अधिक एक मजला, युटीलिटी ब्लॉक ग्राऊंड फ्लोअर अधिक एक मजला अशी राहणार आहे. याशिवाय रेडीएशन, किमोथेरपीकरीता अत्याधुनिक उपकरणांची उपलब्धता करण्यात येणार आहे. त्यासाठी तज्ज्ञ डॉक्टर्स, प्रशिक्षित मनुष्यबळ आदी बाबींची पूर्तता करण्यात येणार आहे.

  • चंद्रपुरात कामगार कायद्याची पायमल्ली, शिवसेना करणार आंदोलन

    चंद्रपुरात कामगार कायद्याची पायमल्ली, शिवसेना करणार आंदोलन

    News34 chandrapur

    चंद्रपूर – चंद्रपूर जिल्हा हा औद्योगिक जिल्हा म्हणून ओळखला जातो, जिल्ह्यात विविध उद्योगांचे जाळे पसरले आहे, मात्र अनेक उद्योगात स्थानिक कामगार नसल्याने जिल्ह्यात बेरोजगारांची संख्या वाढत चालली आहे.

     

    वेकोली चंद्रपूर क्षेत्रातील भटाळी येथे ओव्हरबर्डन काढण्याच्या कामाचं कंत्राट दक्षिण भारतातील कावेरी कंपनीला मिळाले आहे, मात्र या कंपनीने बाहेरून कामगार आणल्याने स्थानिक कामगारांना काम देण्यास कावेरी प्रबंधन टाळाटाळ करीत आहे, शिवसेना ठाकरे गटाचे जिल्हाप्रमुख संदीप गिर्हे यांनी कंपनी प्रशासनाला स्थानिक कामगारांना कामावर घ्या असे सुचविले मात्र त्यांच्या या मागणीवर कंपनीने दुर्लक्ष केले.

     

    कावेरी कंपनीच्या विरोधात 11 डिसेंबर 2023 ला कावेरी कंपनी विरुद्ध शिवसेना आंदोलन करणार आहे.

    परप्रांतीय कामगारांना कावेरी कंपनीने कामावर घेतले, मात्र त्यांचं कसल्याही प्रकारचे पोलीस व्हेरिफिकेशन, कामगारांची नोंदणी, उत्खनन साठी वापरण्यात येणाऱ्या वाहनांची नोंदणी करण्यात आली नसून ते बेकायदेशीर पणे वेकोलीच्या क्षेत्रात चालत आहे.

     

    या सर्व बेकायदेशीर कृत्याचा विरोध व स्थानिक कामगारांवर अन्याय करणाऱ्या कावेरी कंपनी विरुद्ध शिवसेनेने आंदोलनाचे हत्यार उपसले असून 11 डिसेंबर ला कंपनी प्रबंधन विरुद्ध तीव्र आंदोलन करण्यात येणार आहे, आंदोलनाबाबत संबंधित विभागाला निवेदने देण्यात आली आहे.

     

    सदर आंदोलन शिवसेना जिल्हाप्रमुख संदीप गिर्हे, युवासेना जिल्हाप्रमुख विक्रांत सहारे यांच्या नेतृत्वाखाली होणार असून या आंदोलनात शिवसेना, युवासेना आजी-माजी पदाधिकाऱ्यांनी उपस्थित रहावे असे आवाहन करण्यात आले आहे.

  • हा रस्ता माझ्या बापाचा, चंद्रपुरात आनंद मेळा धारकाची मुजोरी

    हा रस्ता माझ्या बापाचा, चंद्रपुरात आनंद मेळा धारकाची मुजोरी

    News34 chandrapur

    चंद्रपूर – लहान मुले व नागरिकांच्या मनोरंजनासाठी चंद्रपूर शहरातील चांदा क्लब मैदानावर नुकतंच आनंद मेळा सुरू झाला आहे, मात्र या मेळा धारकाने सार्वजनिक मार्गावर अतिक्रमण केल्याने नागरिकांनी चांगलाच संताप व्यक्त केला आहे.

     

    नोव्हेंबर महिन्यापासून चंद्रपूर शहरातील चांदा क्लब मैदानावर आनंद मेळा सुरू झाला, मात्र या मेळा धारकांनी आपली मुजोरी सुरू करीत चंद्रपूर-नागपूर मार्गावर अतिक्रमण केले आहे, विशेष बाब म्हणजे वाहतूक व चंद्रपूर पोलिसांचे बॅरिकेट्स चा वापर अतिक्रमणसाठी केला.

     

    चांदा क्लब मैदानाच्या आत सुरू असलेल्या या मेळ्यात येणारे नागरिक आत वाहन पार्क करतात मात्र मैदानाच्या बाहेर नागरिकांनी आपली वाहने पार्क करू नये यासाठी वाहतूक पोलिसांचे बॅरिकेट्स चा वापर करून चंद्रपूर-नागपूर मार्गावरील तब्बल 100 मीटर वर दोरीच्या साहाय्याने मेळा धारकाने अतिक्रमण केले आहे.

     

    वाहन पार्क न करू दिल्याने अनेक नागरिकांसोबत मेळा धारकाचे अनेकदा भांडण सुद्धा झाले आहे, मात्र आमचं कुणी काही बिघडवू शकत नाही अशी मुजोर भूमिका मेळा धारकाने घेतली आहे.

    चंद्रपूर-नागपूर मार्गावर आधीच अतिक्रमणामुळे अनेक अपघात घडले असताना वाहतूक पोलिसांच्या नाकावर टिच्चून मेळा धारक आपली मुजोरी करत असल्याने हा रस्ता माझ्या बापाचा आहे असे दर्शवित आहे.

     

    शहरात पुन्हा अपघाताला आमंत्रण देणाऱ्या मुजोर आनंद मेळा धारकावर पोलीस व वाहतूक पोलीस प्रशासन कारवाई करणार काय? की मेळा धारकाच्या मुजोरीला प्रशासन आशीर्वाद देणार? वाहतूक पोलिसांनी मेळा धारकाला चंद्रपूर-नागपूर मार्गावर अतिक्रमण करण्याची रीतसर परवानगी दिली आहे काय? प्रशासन त्या अतिक्रमण धारकाला पाठीशी घालत आहे काय? असे अनेक प्रहन यावेळी उपस्थित झाले आहे.

  • चांदाफोर्ट ते गोंदिया रेल्वेमार्गावर आतापर्यंत 8 वाघांचा मृत्यू

    चांदाफोर्ट ते गोंदिया रेल्वेमार्गावर आतापर्यंत 8 वाघांचा मृत्यू

    News34 chandrapur

    चंद्रपूर :  चांदा फोर्ट ते गोंदिया रेल्वे मार्ग हा वन्यजीवांसाठी धोकादायक ठरत आहे. 2 दिवसांपूर्वी रेल्वेच्या धडकेत एका तीन महिन्यांच्या वाघाच्या बछड्याचा मृत्यू झाल्याने हा मुद्दा पून्हा एकदा चर्चेला आला आहे.2008 ते 2023 पर्यंत एकूण 6 वाघांचा रेल्वेच्या धडकेने मृत्यू झाला.त्यामुळे याबाबत उपाययोजना करण्यासाठी वनविभागाने रेल्वे विभागाकडे वन्यप्राण्यांच्या मृत्यूचा अहवाल पाठविला असून वन्यजीव रक्षणाससाठी उपाययोजना सुचविल्या आहेत.याबाबत रेल्वे प्रशासनाने अनुकूलता दाखविल्याने येत्या काळात रेल्वेच्या धडकेने होणारे वन्यजीव मृत्यू थांबण्याची शक्यता वर्तविण्यात येत आहे.

     

    चंद्रपूर जिल्हा हा घनदाट जंगलाने वेढलेला आहे. महाराष्ट्र राज्यातील सर्वाधिक जंगल असलेला हा जिल्हा आहे. चंद्रपूरच्या बाबपेठला चांदा फोर्ट रेल्वे स्टेशन आहे. येथून नागभीड ते गोंदिया रेल्वे मार्ग आहे. हा मार्ग चंद्रपूर, मूल, सिंदेवाही, नागभीड तालुक्याला जोडतो. या रेल्वे मार्गाच्या दुतर्फा घनदाट जंगल आहे. येथून वन्यजीवांचा मुक्तसंचार आहे. वाघ, बिबट, हरण, रानगवा, रानडुक्कर आदी वन्यजीवांचा यात समावेश आहे. रेल्वे मार्ग ओलांडत असताना अनेकदा रेल्वेच्या धडकेत वन्यजीवांचा मृत्यू होतो, हा एक गंभीर विषय आहे.

    पाच वर्षांत 6 वाघ 2 बिबट्यांचा मृत्यू
    ============

    2018 पासून 2023 पर्यंत चंद्रपूर येथील रेल्वे मार्गावरील अपघातात तब्बल 6 वाघ आणि 2 बिबट्यांचा मृत्यू झाला. यात चंद्रपूर वनवृतातील 3 तर वन विकास महामंडळाच्या क्षेत्रातील 3 वाघांचा समावेश आहे.नोव्हेंबर 2018 मध्ये लोहाराच्या जंगलात रस्ता ओलांडत असताना तब्बल तीन वाघांच्या बछड्यांचा दुर्दैवी मृत्यू झाला तर वाघीण देखील जखमी झाली. यानंतर 10 ऑगस्ट 2022 ला राजुरा तालुक्यातील चनाखा येथे रेल्वेच्या धडकेत वाघिणीचा मृत्यू झाला, 21 ऑक्टोबर 2022 ला राजुरा तालुक्यातील चूनाळा मार्गावर अपघातात वाघाचा मृत्यू झाला, 27 नोव्हेंबर 2023 ला नागभीड बाळापूर रेल्वे मार्गावर एक तीन महिन्याच्या वाघाचा मृत्यू झाला. तर 8 ऑक्टोबर 2019 मध्ये सावली चिखली मार्गावर एका बिबट्याचा मृत्यू झाला तर 7 मार्च 2023 ला जीवंत विद्युत तारांच्या संपर्कात आल्याने बिबट्याचा मृत्यू झाला होता.

     

    वनविभागाने सुचविल्या उपाययोजना
    =============
    वन्यजीवांच्या सुरक्षित संचारासाठी वनविभागाने काही पर्यायी सूचना दिल्या आहेत. ज्या ठिकाणी खुरटे जंगल आहे त्या रेल्वे रुळाच्या बाजूने सुरक्षा जाळी, लावण्यात यावे, प्राण्यांना येण्याजाण्यासाठी भूमिगत मार्ग काढण्यात यावे, रेल्वे रुळाच्या बाजूला निर्माण झालेले खड्डे बुजविण्यात यावे जेणेकरून तिथे पाणी पिण्यासाठी वन्यजीव फिरकणार नाही, वळणरस्त्यावर रेल्वेची गती कमी करणे आदी उपाय योजना सुचविल्या आहेत.

     

    रेल्वे विभागाने केले दुर्लक्ष
    =============
    2018 मध्ये वनविकास महामंडळाच्या क्षेत्रातील वाघाच्या तीन बछड्यांचा मृत्यू झाला होता. यानंतर वनविभाग आणि रेल्वे विभागाची संयुक्त बैठक झाली. यात वनविभागाच्या अधिकाऱ्यांनी या सर्व उपाययोजना सांगितल्या मात्र तेव्हा रेल्वे विभागाने याकडे दुर्लक्ष केले.

     

    आता रेल्वे विभाग सकारात्मक
    ===============
    मंगळवारी सकाळी एका वाघाच्या बछड्याचा रेल्वे अपघातात मृत्यू झाल्याचे समोर आले. यानंतर चंद्रपूर वनविभागाचे मुख्य वनसंरक्षक डॉ. जितेंद्र रामगावकर यांनी रेल्वेच्या वरिष्ठ अधिकाऱ्यांशी संपर्क केला असून रेल्वे मार्गावर झालेल्या अपघातात किती वाघ आणि बिबट्यांचा मृत्यू झाला याचा अहवाल देण्यात आला. याबाबत आता रेल्वे विभाग सकारात्मक असून वरीष्ठ पातळीवर लवकरच याबाबत तोडगा निघण्याची शक्यता आहे.
  • विद्यार्थ्यांचं शैक्षणिक-आर्थिक नुकसान थांबवा अन्यथा – निलेश बेलखेडे युवासेना

    विद्यार्थ्यांचं शैक्षणिक-आर्थिक नुकसान थांबवा अन्यथा – निलेश बेलखेडे युवासेना

    News34 chandrapur

    चंद्रपूर – मागील काही वर्षांपासून कधी प्राध्यापकांच्या प्रलंबित पगाराला घेऊन चर्चेमध्ये राहणारे राजीव गांधीं अभियांत्रिकी महाविद्यालय हे यावेळी डॉ बाबासाहेब आंबेडकर टेक्निकल युनिवर्सिटी (DBATU)लोनारे रायगड यांच्या वतीने होणाऱ्या विद्यार्थ्यांच्या शैक्षणिक भोंगळ कारभारामुळे चर्चेत आले आहे.

     

    या विद्यापीठाच्या वतीने अभियांत्रिकी चे शिक्षण घेणार्या विद्यार्थ्यांना मागील काही वर्षांपासून नाहक त्रासाला समोर जावं लागतं आहे त्यामुळे विविध प्रश्नांना घेऊन राजीव गांधीं महाविद्यालयाचे विद्यार्थी युवासेना कडे धाव घेत त्यांना होणाऱ्या शैक्षणिक व आर्थिक नुकसानापासून न्याय मिळवून द्यावे या मागणीला घेऊन विद्यार्थी प्रतिनिधीचे एक शिष्टमंडळ यामध्ये महाविद्यालय विद्यार्थी अध्यक्ष तेजस अल्लावार, वतन मादर, अक्षय उपगनलावार, रोहन आंबटकर, हेमंत गोरे, अनिकेत मानकर ,अथर्व कर्चे, विशाल कुलसंगे, वैभव किनाके व इतर विद्यार्थी मित्र इत्यादी हे शिवसेना -उद्धव बाळासाहेब ठाकरे च्या युवासेना सचिव पुर्व विदर्भ इंजि निलेश बेलखेडे यांना भेटले व सदर विषयावर एक निवेदन त्यांनी दिले. यापुर्वी सुद्धा निलेश बेलखेडे यांनी या विद्यार्थ्याचे प्रश्न सोडवुन दिलेले असल्याने विद्यार्थ्यांनी बेलखेडे यांच्या कडे या प्रश्नांना सोडविण्यासाठी मदत करावी अशी विनंती केली.

     

    यामध्ये १) काही विद्यार्थ्यांचा मागील वर्षीच्या पास म्हणून आलेला निकाल विद्यापिठाच्या सिस्टम अपडेटमुळे चक्क सहा महिने तर काहिंचा एक वर्षानंतर नापास म्हणून आलेला आहे व त्यांना आता त्या विषयांची परिक्षा द्यावी लागणार आहे म्हणजे अश्या विद्यार्थ्यांना remedial परिक्षेची संधी पासून सुद्धा विद्यापिठाच्या चुकीमुळे वंचित राहावे लागले आहे . २)काहि अभ्यासक्रमाच्या विद्यार्थ्यांच्या गुणपत्रिका ७-८महिने कालावधी झाल्या नंतरहि अजून आलेल्या नाही. ३)अंतिम वर्षातील विद्यार्थी पास होऊन अभियांत्रिकीचे शिक्षण पूर्ण केल्यानंतर हि त्यांच्या गुणपत्रिका, डिग्री वेळेवर न मिळाल्याने त्यांना समोरच्या शिक्षणासाठी किंवा नोकरी साठी वंचित राहावे लागत आहे. ४) नियमीत सत्राची परिक्षेचा निकाल लागून अनुत्तीर्ण झालेल्या विषयांच्या फेरतपासनीचा निकाल न लागता त्यांना remidial चा फाॅर्म भरून परिक्षा द्यावी लागत आहे यामध्ये शैक्षणिक नुकसान सोबतचं आर्थिक भृंदड सुद्धा त्यांच्यावर पडआहे. ५) विद्यार्थ्यांचा मागील सेमिस्टर चा सप्लिमेंट चा निकाल आतापर्यंत लागलेला नाही त्यामुळे समोर च्या शैक्षणिक सत्रामध्ये ते पोहोचले कि नाही हा सुद्धा प्रश्नचिन्ह विद्यार्थ्यांसमोर असून अभ्यास कसा करायचा या संभ्रमात विद्यार्थी पडले आहे. ६) विद्यापिठाच्या पोर्टलच्या चुकांमुळे काही विद्यार्थी विद्यापिठाच्या criterion नुसार विद्यार्थी हा समोरच्या सत्रासाठी pramote असून सुद्धा तो पोर्टल वर Not Pramoted दर्शवितो आहे. ७) आॅनलाईन पद्धतीने पेपर्स मुल्यांकन होत असून चुकिचे पेपर चेक होणे इत्यादी.

     

    अश्या अनेक समस्यांना विद्यार्थ्यांना समोरे जावे लागत असून यासंदर्भात काही दिवसांपूर्वी निलेश बेलखेडे यांच्या वतीने राजीव गांधी अभियांत्रिकी महाविद्यालयात जाऊन प्राचार्य प्रशांत पोटदुखे, रजिस्ट्रार व महाविद्यालयीन डिन यांच्यासोबत सविस्तर चर्चा केली असता महाविद्यालय आपल्या वतीने या समस्येवर प्रयत्न करीत असून विद्यापिठ महाविद्यालयाच्या कुठल्याही मेल ला योग्य उत्तरे देत नसून याबाबत विद्यापीठ फारसं गंभीर नाही असे एकंदरित दिसून आले. त्यावेळी निलेश बेलखेडे यांनी या सर्वाच निराकरणाची जबाबदारी हि महाविद्यालयाची असून फक्त मोबाईल वर, मेल द्वारे हे प्रश्न सुटणार नसून महाविद्यालयाच्या वतीने विद्यापिठात रायगड येथे एक शिष्टमंडळ पाठवून तिथे विद्यापीठ कुलगुरू यांच्याशी चर्चा करून याबाबत तोडगा काढून विद्यार्थ्याचे शैक्षणिक व आर्थिक शोषण थांबवावे असे सांगितले त्यावेळी महाविद्यालयाच्या वतीने हे मान्य करण्यात आले परंतु अजूनही त्यावर काही कारवाई झालेली नाही.

     

    हे विद्यापीठ विद्यार्थ्यांना दर्जेदार शिक्षण देण्यासाठी बनलेलं आहे कि विद्यार्थी पालकांची आर्थिक लुट करण्यासाठी बनलेलं आहे यावरून रोष व्यक्त करित युवासेना सचिव निलेश बेलखेडे यांनी येत्या काही दिवसांत याबाबत महाविद्यालयाच्या प्रशासनाने विद्यार्थ्यांच्या समस्येचे गांभीर्य समजून शिष्टमंडळ पाठवून त्यांना या चुका निदर्शनास आणून देऊन विद्यार्थ्यांना न्याय मिळवून दिला नाही तर युवासेना च्या वतीने विद्यार्थ्यांना घेऊन तिव्र आंदोलन केल्या जाईल असा इशारा शिवसेना उद्धव बाळासाहेब ठाकरे – युवासेना सचिव इंजि.निलेश बेलखेडे यांच्या वतीने देण्यात आला आहे.

  • करवाढीमुळे नागरिक संतापले, सरपंच व ग्रामसेवकाला कार्यालयात डांबले

    करवाढीमुळे नागरिक संतापले, सरपंच व ग्रामसेवकाला कार्यालयात डांबले

    News34 chandrapur

    चंद्रपूर :  मालमत्ता कर आणि पाणीपट्टीत वाढ करण्यात आल्यामुळे संतापलेल्या नागरिकांनी सरपंच, सचिवासह ग्रामपंचायत सदस्यांना साडेतीन तास ग्रामपंचायत कार्यालयात डांबून ठेवल्याची घटना चंद्रपूर जिल्ह्यातील नागभीड तालुक्यातील देवपायली येथे आज बुधवारी घडली.

     

    नागभीड तालुक्यातील देवपायली ग्रामपंचायतीत आज बुधवारी ग्रामसभा आयोजीत केली होती. ग्रामसभेत विविध विषयावर चर्चा झाली त्यापैकी मालमत्ता व पाणीपट्टी कर वाढविण्याबाबत चर्चा करून त्यामध्ये वाढ करण्याच्या निर्णय घेण्यात आला. त्यामुळे नागरिकामध्ये संताप उफाळून आला. करवाढ होत असल्याचे लक्षात येताच संतप्त नागरिकांनी सरपंच, ग्रामसेवकासह ग्रामपंचायतीच्या सर्व पदाधिकाऱ्यांना कार्यालयात डांबले. तब्बल साडेतीन तास ही मंडळी कुलूपबंद होती. घटनेची माहिती मिळताच पोलिस देवपायली येथे पोहचले. पोलीसांनी नागरीकांना समजावले. त्यानंतरच नागरिकांनी कुलूप उघडले सरपंच सचिव सदस्यांची सुटका केली.

     

    चंद्रपूर जिल्ह्यातील नागभीड पंचायत समितीअंतर्गत येणाऱ्या देवपायली ग्रामपंचायतमध्ये यापूर्वी 7 नोव्हेंबरला ग्रामसभा बोलाविण्यात आली होती, परंतु सभा तहकूब करण्यात आली. तहकूब झालेली ही ग्रामसभा बुधवारी घेण्यात आली. सभेला सरपंच अरविंद कोहपरे, ग्रामसेवक प्रशांत दोडके, सदस्य अर्चना ठाकरे, इंदिरा नवघडे, मोरेश्वर नवघडे, वैशाली भोयर यांची उपस्थिती होती. सरपंचांनी सभेला सुरुवात केली. काही वेळातच ग्रामसभा संपली.

     

    ग्रामसभेत मालमत्ता कर व पाणीपट्टीवाढीचा ठराव मंजूर करण्यात आला. ही माहिती गावात पसरताच नागरिक चांगलेच संतापले. त्यामूळे नागरीकांनी सरपंच सचिवासह गग्राम पंचायत सदस्यांना कार्यालयाला कुलूप लावून डांबण्यात आले. पोलिसांच्या मध्यस्थीनं सर्वांची सुटका करण्यात आली. आता 4 डिसेंबला पुन्हा देवपायलीत पुन्हा ग्रामसभा घेण्यात येणार आहे.

     

    सरपंचांच्या परवानगीने पाणीपट्टी व मालमत्ता करवाढीचा निर्णय घेण्यात आला. हा निर्णय नियमानुसार आहे, अशी माहिती ग्रामसेवक प्रशांत दोडके यांनी दिली. नागरीकांना विश्वासात न घेता मनमानी पद्धतीने करवाढ करण्यात आल्याचा आरोप नागरिकांनी केला आहे.
    पोलिसांनी नागरिकांची समजूत काढली. त्यामुळं त्यांनी सर्वांची सुटका केली. या प्रकरणात कुणीच तक्रार न केल्याने पोलीसांनी कारवाई केली नाही. सध्या गावात शांतता आहे. पुढील ग्रामसभा 4 डिसेंबरला होणार आहे. ग्रामपंचायतीने मागणी केल्यास ग्राम सभेला पोलिस बंदोबस्त पुरविण्याची तयारी दर्शविली आहे.

  • शासकीय आधारभूत धान खरेदी नोंदणीची मुदत ३१ डिसेंबर २०२३ पर्यंत वाढवून द्यावी – सभापती राकेश रत्नावार

    शासकीय आधारभूत धान खरेदी नोंदणीची मुदत ३१ डिसेंबर २०२३ पर्यंत वाढवून द्यावी – सभापती राकेश रत्नावार

    News34 chandrapur गुरू गुरनुले

    मुल – एकतर शासनाने मुल येथे देण्यात येणारे आधारभूत धान खरेदी केंद्र सुरवातीला नवरगाव येथे देण्यात आले होते. त्यामुळे मुल तालुक्यातील शेतकऱ्यांची चांगलीच धावपळ सुरू झाली. यासाठी सी.डी सी.सी.बँकेचे अध्यक्ष यांनी शेवटी राज्याचे विरोधी पक्ष नेते आमदार विजय वडेट्टीवार यांचेकडून मुल येथे आधारभूत खरेदी केंद्र उशिरा मंजूर केले. त्यामुळे उशिरा सुरू झालेली नोंदणी उद्या दिनांक ३० नोव्हेंबर २०२३ रोजी संपत असल्याने आजच्या स्थितीत हजारो शेतकरी नोंदणी करण्यापासून वंचित राहण्याची शक्यता आहे.

     

    एकीकडे आकस्मिक अवकाळी पाऊस आल्याने मुल तालुक्यातील असंख्य शेतकऱ्यांचे धान कापून असल्याने पाण्यामुळे भिजून खराब झाले आहे. करीता ओले झालेल्या धानाला अतिशय कमी भाव मिळेल किंवा व्यापारी ते धान खरेदी करणार नाही. त्यामुळे शेकऱ्यावर संकट कोसळले आहे. आकस्मिक पाऊसामुळे ओले धानाचे पीक वाचविण्याचा प्रयत्न करीत असल्याने शेतकऱ्यांना नोंदणी करण्यासाठी कृषी उत्पन्न बाजार समितीमध्ये येऊन नोंदणी करण्यासाठी वेळ नाही. इकडे आड तिकडे विहीर अशी अवस्था मुल तालुक्यातील शेतकरी बांधवांची झाली आहे.

     

    एकतर उशिरा नोंदणी सुरू केल्यामुळे मुदतीच्या आत तालुक्यातील हजारो शेतकऱ्यांची नोंदणी होऊ शकली नाही. अजूनही असंख्य शेतकरी वंचित आहेत. करीता दुष्काळात सापडलेल्या शेतकऱ्यांची नोंदणी करण्यासाठी ३१ डिसेंबर २०२३ पर्यंत सलग एक महिना मुदत वाढ त्वरित देण्यात यावी अशी मागणी शेतकऱ्यांच्या हितासाठी कृषी उत्पन्न बाजार समितीचे सभापती राकेश रत्नावार यांनी चंद्रपूर जिल्हा मार्केटिंग अधिकारी यांचेकडे लेखी पत्राद्वारे केली आहे.

  • ताडोबा व्याघ्र प्रकल्पाचा नाविन्यपूर्ण उपक्रम

    ताडोबा व्याघ्र प्रकल्पाचा नाविन्यपूर्ण उपक्रम

    News34 chandrapur

    चंद्रपूर: ताडोबा-अंधारी व्याघ्र प्रकल्प हा भारतातील एक महत्वाचा व्याघ्र प्रकल्प आहे. या व्याघ्र प्रकल्पाची जैवविविधता संपन्न व समृद्ध आहे. यामध्ये 80 प्रजातीचे सस्तन प्राणी, 280 पेक्षा पक्ष्यांच्या प्रजाती, 54 प्रजातीचे सरपटणारे प्राणी, 125 प्रजातींची फुलपाखरे, 670 पेक्षा अधिक वनस्पतींच्या प्रजातीने या वनाची समृद्धता वाढवली आहे. तर 79 टक्के वन हे बांबू वनाचे असून वाघाकरीता हा उत्तम असा अधिवास आहे. सन 2021-22 मध्ये झालेल्या व्याघ्र गणनेनुसार या व्याघ्र प्रकल्पामध्ये 87 वाघाची नोंद झाली आहे.

     

    सन 1955 रोजी या वनाला राष्ट्रीय उद्यानाचा दर्जा प्राप्त झाला. सन 1986 मध्ये अंधारी अभयारण्य घोषित करण्यात आले आणि सन 1995 ला वाघांचा अधिवास अधिक सुरक्षित व अबाधित राखण्यासाठी या वनाला व्याघ्र प्रकल्पाचा दर्जा देऊन गौरविण्यात आले आहे. या वनाच्या गाभा क्षेत्राचे काटेकोरपणे संरक्षण व संवर्धन व्हावे या हेतूने, सन 2010-11 मध्ये बफर क्षेत्र घोषित करण्यात आले. या बफर क्षेत्रात 90 पेक्षा अधिक गावे असून या ठिकाणच्या वन क्षेत्रातसुद्धा वाघाचा मोठ्या प्रमाणात वावर आहे. म्हणून ही गावे व्याघ्र प्रकल्पाच्या विकासात्मक उपक्रमामध्ये जोडण्यात आली. साधारणत: 1 लाख लोकसंख्या असलेल्या या क्षेत्रात डॉ. श्यामाप्रसाद मुखर्जी जन-वन योजनेअंतर्गत विविध, सर्व स्तरावर विकासात्मक कामे करण्यात येऊ लागली आणि यातील स्थानिक विद्यार्थ्यांना निसर्ग शिक्षणासंदर्भात जनजागृती व्हावी या करीता “चला माझ्या ताडोबाला” हा महत्वपूर्ण व नाविन्यपूर्ण उपक्रम राबवायला सुरवात झाली.

     

    याशिवाय, चंद्रपूर जिल्ह्यातील इतर वन क्षेत्रातसुद्धा वाघाचे अस्तित्व मोठ्या प्रमाणात आहे. महाराष्ट्रात 2022-23 च्या व्याघ्र गणनेनुसार 414 वाघांची नोंद झाली. यापैकी 200 पेक्षा अधिक वाघ केवळ चंद्रपूर जिल्ह्यात आहे. म्हणून चंद्रपूरची ओळख वाघाचा जिल्हा अशी आहे.

     

    अशा या जैवविविधतेने संपन्न असलेल्या व्याघ्रभूमीचे संरक्षण व संवर्धन लोकसहभागातून व्हावे, स्थानिकांना वनाचे महत्व कळावे आणि विद्यार्थ्यांनी पुढील आयुष्यात एक जबाबदार नागरीक म्हणून वनसंवर्धन व संरक्षणासाठी योगदान द्यावे, या हेतूने, निसर्ग संवर्धनातून वनसंवर्धन हा उपक्रम नियमित राबविण्यात येत आहे. याकरीता सन 2015-16 पासून ताडोबा-अंधारी व्याघ्र प्रकल्पामार्फत बफर क्षेत्रातील शालेय विद्यार्थ्यांसाठी “चला माझ्या ताडोबाला” हा महत्वपूर्ण जन-जागृतीचा कार्यक्रम सुरु करण्यात आला आहे. या उपक्रमाचा उद्देश शालेय विद्यार्थ्यांच्या मनात निसर्गाविषयी आवड निर्माण करणे आणि वने व वन्यजीव संवर्धनात त्यांचा सहभाग वाढविणे हा होय.

     

    सन 2022-23 मध्ये चंद्रपूर जिल्ह्यातील 135 शाळेतील 5 हजार विद्यार्थी या उपक्रमामध्ये उत्साहपूर्वक सहभागी झाले होते. तसेच जिल्ह्यातील 27 आश्रम शाळेतील विद्यार्थ्यांचा सुद्धा सहभाग होता हे विशेष. यावर्षी सन 2023-24 मध्ये सुद्धा राज्याचे वने, सांस्कृतिक कार्य व मत्स्यव्यवसाय मंत्री तथा जिल्ह्याचे पालकमंत्री सुधीर मुनगंटीवार यांच्या सुचनेनुसार, दि. 29 नोव्हेंबर 2023 पासून या उपक्रमाची सुरवात मुल वनपरिक्षेत्रातील भगवानपूर, फुलझरी, करवण, काटवन व डोणी येथील शाळेपासून होत आहे. यातील भगवानपूर हे गाव सन 2007 मध्ये ताडोबा-अंधारी व्याघ्र प्रकल्पामधून स्वयंइच्छेने पुनर्वसित झालेले गाव आहे. हे गाव कोळसा व बोटेझरी या दोन गावांना एकत्रित करून या गावाचे नाव भगवानपूर ठेवण्यात आले आहे. म्हणून या वर्षी प्रथम प्राधान्य या गावाला देण्यात आले आहे.

     

    चालू वर्षात प्रथम ताडोबा-अंधारी व्याघ्र प्रकल्पाच्या बफर क्षेत्रातील व या व्याघ्र प्रकल्पातून पुनर्वसित झालेल्या अशा सर्व गावातील एकूण 121 शाळेतील 5 हजारपेक्षा अधिक विद्यार्थ्यांना ताडोबा वनभ्रमंती सोबतच निसर्ग शिक्षणाचे महत्व पटवून देण्यात येईल आणि वने व व्याघ्र संवर्धनाची चळवळ अधिक प्रबळ या माध्यमातून करण्यात येईल, असे ताडोबा- अंधारी व्याघ्र प्रकल्प कार्यालयाने कळविले आहे.

  • मुख्यमंत्र्यांच्या उपस्थितीत महाराष्ट्र शाश्वत विकास ध्येय परिषदेचे 30 नोव्हेम्बरला आयोजन

    मुख्यमंत्र्यांच्या उपस्थितीत महाराष्ट्र शाश्वत विकास ध्येय परिषदेचे 30 नोव्हेम्बरला आयोजन

    News34 chandrapur

    मुंबई – अप्रतिम मीडिया फाउंडेशन’च्या वतीने ‘पहिली महाराष्ट्र शाश्वत विकास ध्येय परिषद’ येत्या गुरुवारी ३० नोव्हेंबर रोजी यशवंतराव चव्हाण सेंटर मुंबई येथे संपन्न होत आहे.

    आगामी १० वर्षांच्या काळात संपूर्ण महाराष्ट्रात ग्रामीण व शहरी पत्रकारांच्या माध्यमातून राबवायच्या ‘अप्रतिम महावक्ता – पब्लिक टॅलेंट रियालिटी शो सिरीज – २०३२ शाश्वत विकास देण्याच्या दिशेने’ या भव्य कार्यक्रम मालिकेची माहिती दिली जाणार आहे.

     

    या परिषदेमध्ये प्रमुख पाहुणे म्हणून मुख्यमंत्री श्री एकनाथ शिंदे उपस्थित राहणार असून त्यांच्या शुभहस्ते महाराष्ट्रातील विविध सामाजिक संस्था व सेवाभावी व्यक्तींचा अप्रतिम गौरव देऊन सत्कार करण्यात येणार आहे. याप्रसंगी केंद्रीय राज्य अर्थमंत्री डॉक्टर भागवत कराड, राजेश क्षीरसागर कार्यकारी अध्यक्ष, राज्य नियोजन मंडळ; खासदार हेमंत पाटील,आमदार श्री संजय शिरसाट प्रवक्ते शिवसेना, आमदार प्रदीप जयस्वाल, आमदार यामिनी जाधव आदी उपस्थित राहणार आहेत.

     

    सकाळी उद्घाटन प्रसंगी उपमुख्यमंत्री श्री देवेंद्र फडणवीस, उपमुख्यमंत्री श्री. अजितदादा पवार, केंद्रीय अर्थ राज्यमंत्री डॉ.भागवतजी कराड, नियोजन मंडळाचे कार्यकारी अध्यक्ष श्री. राजेश क्षीरसागर, श्री अतुल सावे इतर मागास बहुजन कल्याण व गृहनिर्माण मंत्री श्री संदिपान भुमरे रोहयो मंत्री, श्री विजय वडेट्टीवार विरोधी पक्षनेते विधानसभा श्री अंबादास दानवे विरोधी पक्षनेते विधानपरिषद, मुख्य सचिव श्री मनोज सौनिक, अनिल देशमुख, माजी गृहमंत्री, राष्ट्रवादी नेते; सर्वश्री आमदार रोहित पवार,आशिष जयस्वाल,सत्यजित तांबे, प्रशांत बंब; मुंबई विद्यापीठाचे कुलगुरू प्रा. रवींद्र कुलकर्णी, श्री. विनय सहस्रबुद्धे माजी खासदार आधी पाहुणे उपस्थित राहणार आहेत.

     

    या परिषदेमध्ये खालील प्रमाणे तीन चर्चासत्रे होणार आहेत. पहिले सत्र – शासकीय योजना लोकसहभाग आणि एस डी जी सिद्धी(सहभाग : श्री प्रवीण परदेशी मुख्य कार्यकारी अधिकारी मित्र, श्री सौरभ विजय प्रधान सचिव नियोजन विभाग, राज्य शासन, श्री राधेश्याम मोपलवार उपाध्यक्ष व कार्यकारी संचालक एम एस आर डी सी, जे इ चौधरी अप्पर संचालक सांख्यिकी व नियोजन विभाग; डॉ. विजय आहेर, संचालक सांख्यिकी विभाग.

     

    दुसरे सत्र – एस डी जी साठी स्थानिक स्वराज्य संस्था नागरिक संघटनांची भूमिका उदाहरण छत्रपती संभाजीनगर (सहभाग : डॉक्टर भागवत कराड, केंद्रीय अर्थ राज्यमंत्री श्री संदिपान भुमरे, पालकमंत्री, छत्रपती संभाजी नगर, श्री अतुल सावे, इतर मागास बहुजन कल्याण मंत्री, अंबादास दानवे, विरोधी पक्षनेते विधान परिषद, खासदार इम्तियाज जलील, आमदार संजय शिरसाट, प्रवक्ते शिवसेना, श्री मुकुंद भोगले, अध्यक्ष संभाजीनगर फर्स्ट, आमदार प्रदीप जयस्वाल श्री विवेक देशपांडे उद्योजक, श्री बी एस खोसे संस्थापक, अध्यक्ष मराठवाडा एन्व्हायरमेंटल क्लस्टर, आस्तिक कुमार पांडे जिल्हाधिकारी छत्रपती संभाजीनगर, श्री रणजीत कक्कड माजी अध्यक्ष संभाजीनगर फर्स्ट), विकास नवाळे, मुख्याधिकारी, एरंडोल नगर परिषद जिल्हा जळगाव; आणि तिसरे सत्र – शाश्वत विकास ध्येयांसाठी विकास पत्रकारितेचे महत्त्व : स्थानिक वार्ताहर व विशेष तज्ञ पत्रकारांचे योगदान(श्री विनायक पात्रुडकर, मुख्यमंत्र्यांचे सल्लागार, श्री अनिरुद्ध अष्टपुत्रे मुख्यमंत्र्यांचे जनसंपर्क अधिकारी, श्री प्रमोद डोईफोडे, अध्यक्ष मंत्रालय व विधिमंडळ वार्ताहर संघ; वसंत भोसले, अध्यक्ष महाराष्ट्र राज्य पत्रकार संघ; श्री अभय देशपांडे, राजकीय विश्लेषक, श्री एस एम देशमुख किरण नाईक राजा आदाटे, पत्रकार हल्ला विरोधी कृती समिती; संदीप काळे संस्थापक अध्यक्ष व्हाईस ऑफ मेडिया; कुमार कदम, ज्येष्ठ पत्रकार; यमाजी मालकर संपादक, थिंक पॉझिटिव्ह; यदु जोशी, अध्यक्ष, महाराष्ट्र राज्य पत्रकार अधीस्वीकृती समिती; डॉ.माधव सावरगावे, साम टीव्ही मराठवाडा प्रतिनिधी; बालाजी सूर्यवंशी विभागीय अध्यक्ष, मराठी पत्रकार परिषद) यांचा विशेष सहभाग असणार आहे.

  • ग्रेटा एनर्जी लिमिटेड कंपनीकडून नवउद्योजकाची फसवणुक

    ग्रेटा एनर्जी लिमिटेड कंपनीकडून नवउद्योजकाची फसवणुक

    News34 chandrapur

    चंद्रपुर :- मुल येथील ग्रेटा एनर्जी लि. कंपनीने फ्लाय अँश हॅंन्डलींग कामाचा पाच वर्षाचा करार सुशिक्षित बेरोजगार गणेश पुलगमवार यांना देवून देखील करारानुसार काम न दिल्यामुळे कंपनीकडून 27 लाख रूपये तसेच याव्यतिरिक्त शारिरीक व मानसिक त्रासापोटी 50 लक्ष रुपए अतिरिक्त नुकसान भरपाई तात्काळ मिळवून देण्यात येण्याची मागणी शिवसेना चंद्रपुर तालुका प्रमुख संतोष पारखी यांची जिल्हाधिकारी विनय गौडा यांना निवेदनाद्वारे करण्यात आली.

     

    मूल तालुक्यातील आकापुर एमआयडीसी मध्ये सुरु असलेल्या ग्रेटा एनर्जी लि. कंपनी प्रकल्पात अनेक नवउद्योजक सुशिक्षित बेरोजगारांना जिल्हा प्रशासनाच्या प्रोत्साहनामुळे काही कामे मिळाली होती. त्यातच फ्लाय अँश हॅंन्डलींगचे काम अथक प्ररिश्रमानंतर राजुरा येथील गणेश पुलगमवार यांना मिळाले होते.

    सन 2018 मध्ये कामाच्या सुरुवातीला कंपनीने अँश हॅन्डलींगसाठी दरमहा 1.20 लक्ष रुपए देत होती. करारानुसार 1 वर्ष हे काम सुरळीत चालले.

     

    5 वर्षाचा करार होता. दरम्यान कंपनी प्रशासनाने नवउद्योजक गणेश पुलगमवार यांना वेगवेगळया सबबी लावून त्रास देणे सुरु करुन कंपनीने नंतर अँश हॅन्डलींगचे काम मोफत करण्याचे आदेश दिले. ते ही मान्य करुन 6 महिने हे काम निःशुल्क केले. परंतु कंपनीचे त्रास देणे काही बंद झाले नाही. कंपनीने 3 महिन्यात वीज विभागाची परवानगी, जलपूरवठा यंत्रणा इत्यादी लावून ब्रिक्स प्लांट टाका, स्प्रींकलींग करा असा ससेमीरा लावला.

     

    करारकर्ते गणेश पुलगमवार यांनी खूप प्रयत्न केले. परंतु इतर सर्व बाबींची जुळवाजुळव झाली, मात्र वीज विभागाची परवानगी दिलेल्या वेळेत मिळू शकली नाही. त्यामुळे ग्रेटा एनर्जी लि. कंपनीने सदर काम बंद केले. 5 वर्षाच्या कराराचे काम 6 महिन्यात गुंडाळण्यात आले. जेव्हा की, करारकर्ते गणेश पुलगमवार यांनी तो पर्यंत प्रचंड परिश्रम करुन कंपनीची अँश हॅंन्डलींग प्रणाली, परिवहन, उपयोग इत्यादी सर्व टृॅक वर आणून दिले होते.

     

    दरम्यान कंपनीच्या कामासाठी करारकर्ते गणेश पुलगमवार यांनी जेसीबी, हायवा टृक, ब्रिक्स प्लांट यंत्र सामुग्री, पाणी पुरवठा आणि वीज विभागाचे मिटर इत्यादी सह दैनिक प्रवास असा लाखोंचा खर्च केला. एवढे सर्व केल्यावर अचानक कंपनीने काम हिसकावून घेतले.

     

    दरम्यान करारानुसार 2019 ते 2023 पर्यंत कंपनीने करारकर्ते गणेश पुलगमवार यांच्या कामावर कंपनीने सुमारे 2 कोटी रुपए मुनाफा कमावला त्यातून करारकर्ते पुलगमवार यांना नुकसानभरपाई स्वरुपात 27 लक्ष रुपए परतफेड करावी. तसेच याव्यतिरिक्त शारिरीक व मानसिक त्रासापोटी 50 लक्ष रुपए अतिरिक्त देण्यात यावे. काम अचानक काढून टाकल्याने करारकर्ते गणेश पुलगमवार यांची मानसिक स्थिती सुध्दा बिघडत चालली असल्यामुळे ग्रेटा एनर्जी लि. कंपनीवर करारभंग केल्याप्रकरणी तसेच वेगवेगळया कारणांनी त्रास दिल्याप्रकरणी सदरहूं नुकसानभरपाई तात्काळ मिळवून देण्यात यावी आणि भविष्यात कंपनीत काम करणा-या नवतरुणांसोबत सौहार्द्रपूर्ण व्यवहार करण्याची ताकिद द्यावी, अन्यथा नाइलाजास्तव सदर प्रकरण आम्हाला शिवसेनेच्या पध्दतीने आंदोलन करुन हाताळावे लागेल आणि त्याची सर्वस्वी जबाबदारी प्रशासनाची राहिल. अशी मागणी शिवसेना चंद्रपुर तालुका प्रमुख संतोष पारखी यांनी जिल्हाधिकारी विनय गौडा यांना निवेदनाद्वारे करण्यात आली.

Powered by
►
Necessary cookies enable essential site features like secure log-ins and consent preference adjustments. They do not store personal data.
None
►
Functional cookies support features like content sharing on social media, collecting feedback, and enabling third-party tools.
None
►
Analytical cookies track visitor interactions, providing insights on metrics like visitor count, bounce rate, and traffic sources.
None
►
Advertisement cookies deliver personalized ads based on your previous visits and analyze the effectiveness of ad campaigns.
None
Powered by